Em i Laikim Tumas Lo Bilong Jehova

ALBERT D. SCHROEDER, em wanpela bilong lain Gavening Bodi Bilong Ol Witnes Bilong Jehova, em i dai long Trinde, Mas 8, 2006. Em i gat 94 krismas na i bin mekim fultaim sevis winim 73 yia.

Mama i karim Brata Schroeder long Saginaw, Michigan, long Amerika, long 1911.a Taim em i liklik, bubu meri bilong em i skulim em long ol tok bilong Baibel na i kirapim em long laikim tru pasin bilong ritim Tok Bilong Jehova. Em i lainim tok Latin na Jeman na skul long kamap elektrikol ensinia, long Yunivesiti Bilong Michigan. Tasol taim pasin bilong em long laikim ol tok bilong Baibel i go bikpela, em i lusim skul na i kirap autim tok bilong Kingdom fultaim. Long 1932, em i kamap wanpela bilong famili Betel long Brooklyn, New York.

Long 1937, taim Brata Schroeder i gat 26 krismas, ol i makim em long lukautim wok bilong ol Witnes Bilong Jehova long Briten. Pasin bilong em long givim bel tru long wok autim tok i kirapim planti long insait long fultaim sevis. Wanpela yangpela brata em i bin wok wantaim em long haus Betel long London, em Brata John E. Barr. Bihain tupela i wok wantaim insait long lain Gavening Bodi inap planti yia.

Long taim bilong pait, ol man i luksave long wok Brata Schroeder i mekim bilong helpim wok bilong ol Witnes Bilong Jehova. Long Ogas 1942, ol i rausim em long Briten. Taim em i ron long sip long solwara Atlantik, ol birua i laik bagarapim ol. Bihain, em i kamap long Brooklyn long Septemba.

Long dispela taim, ol wokman bilong Jehova i luksave olsem bai i gat bikpela wok ol i mas mekim bihain long Wol Woa 2. Brata Schroeder i kirap nogut na amamas long nupela asainmen bilong em​—em i helpim wok bilong kamapim wanpela kos bilong Wastaua Baibel Skul Bilong Gileat. Inap sampela yia, em i mekim wok olsem tisa bilong skulim ol misineri. Ol sumatin em i bin lainim long Skul Gileat na Skul Bilong Wok Kingdom ol i tingim yet skul em i givim ol. Em i amamas long skulim ol sumatin long laikim tru ol lo bilong God na em i kamapim klia olsem em i bikpela samting long save long Jehova.

Long 1956, em i maritim Charlotte Bowin, na long 1958 pikinini man bilong ol, Judah Ben, i kamap. Brata Schroeder i wanpela gutpela papa Kristen na man marit. Long 1974, em i kamap wanpela bilong lain Gavening Bodi, na ol narapela bilong dispela lain ol i amamas tru long savetingting bilong em. Em i gat gutpela pasin na pasin daun, na bikpela samting tru, em i laik litimapim biknem bilong God. Yumi bilip tru olsem Brata Schroeder i kisim pinis gutpela pe bilong em long heven olsem wanpela Kristen God i bin makim na i “laikim tumas lo bilong God.”​​—Song 1:2.

[Futnot]