Ol Weding Em Ol i Stret Long Ai Bilong God na Ol Man

“Wanpela man i marit long taun Kana . . . Ol i bin singautim tu Jisas wantaim ol disaipel bilong en, na ol tu i kam i stap long dispela marit.”​​—JON 2:​1, 2.

1. Stori bilong Jisas long Kana i kamapim wanem samting?

JISAS, mama bilong em, na sampela disaipel bilong em ol i bin save long bikpela amamas wanpela weding i ken kamapim long lain bilong God. Krais i mekim na wanpela kaikai bilong marit i kamap gutpela tru. Em i wokim namba wan mirakel bilong em, na dispela i mekim na bung i kamap gutpela moa. (Jon 2:​1-11) Ating yu go pinis long weding bilong sampela Kristen em ol i laik amamas wantaim bilong mekim wok bilong Jehova olsem marit. O yu amamas long yu yet bai i gat weding o yu bai helpim wanpela pren long weding bilong em i kamap gutpela. Wanem samting inap mekim na wanpela weding i ken kamap gutpela?

2. Baibel i kamapim wanem save long ol weding?

² Ol Kristen i kisim save olsem ol tok bilong Baibel i gutpela long helpim man na meri i laik marit. (2 Timoti 3:​16, 17) Tru, Baibel i no kamapim stret olgeta samting ol man i mas mekim long wanpela weding Kristen. Dispela i olsem, long wanem, long ol narapela narapela ples na narapela narapela haptaim i gat kain kain kastam, na tu, ol lo bilong gavman long dispela samting i narapela narapela kain. Olsem: Long taim bilong ol Israel bilong bipo i no gat wanpela bung bilong marit. Long de bilong marit, man i laik marit i bringim nupela meri i kam long haus bilong em yet o long haus bilong papa bilong em. (Stat 24:67; Aisaia 61:10; Matyu 1:24) Em i mekim dispela samting long ai bilong olgeta man na dispela i makim olsem tupela i marit, na i no gat bung bilong marit olsem planti marit long nau i save mekim.

3. Jisas i mekim wanem samting long wanpela bung long Kana?

³ Long ai bilong ol Israel dispela i olsem ol i marit. Bihain ol inap mekim wanpela kaikai bilong marit, olsem Jon 2:1 i stori long en. Planti Baibel i tanim dispela ves olsem: “I gat wanpela marit long Kana.” Tasol long tok ples ol i raitim Baibel long en long bipo dispela tok i makim olsem “kaikai bilong marit.”a (Matyu 22:​2-10; 25:10; Luk 14:8) Stori i kamapim klia olsem Jisas i bin stap long kaikai bilong wanpela marit Juda, na em i bin mekim wanpela samting bambai bung i kamap gutpela. Tasol bikpela samting em olsem: Ol samting ol man i mekim long marit long dispela taim i narapela kain long ol samting ol man i save mekim long nau.

4. Sampela Kristen i save marit olsem wanem? Bilong wanem ol i mekim olsem?

⁴ Long nau long planti kantri, ol Kristen i laik marit ol i mas inapim sampela lo bilong gavman. Taim ol i inapim ol dispela lo, ol inap marit long kain kain rot em gavman i orait long en. Ol inap mekim olsem long wanpela liklik bung long ai bilong wanpela jas o bikman bilong gavman o wanpela elda bilong kongrigesen em gavman i givim namba long ol long wokim marit. Sampela i save marit olsem, na ol i askim sampela famili o pren Kristen long stap olsem witnes na sainim setifiket o bilong ol i ken amamas wantaim ol long dispela bikpela de bilong ol. (Jeremaia 33:11; Jon 3:29) Na sampela Kristen i no laik mekim bikpela kaikai bilong marit, long wanem, dispela i givim bikpela wok long ol long stretim ol samting na i gat bikpela pe bilong en. Ol i stretim rot long mekim liklik kaikai tasol wantaim sampela gutpela pren. Maski yumi gat wanem tingting long dispela samting, yumi mas save olsem sampela narapela strongpela Kristen i gat narapela tingting long en.​​—Rom 14:​3, 4.

5. Bilong wanem planti Kristen taim ol i marit ol i laikim wanpela tok bilong marit? Dispela tok bai kamapim wanem samting?

⁵ Planti Kristen taim ol i marit ol i laikim wanpela tok bilong marit em Baibel i as bilong en.b Ol i luksave olsem Jehova em i as bilong marit na long Baibel em i kamapim ol gutpela tok bilong helpim marit i ken kamap gutpela na amamas. (Stat 2:​22-24; Mak 10:​6-9; Efesus 5:​22-33) Na planti i laik ol pren Kristen na famili i ken amamas wantaim ol long dispela bikpela de. Tasol yumi mas ting olsem wanem long ol lo bilong gavman, na ol samting ol marit i mas mekim, na ol kastam bilong ples? Dispela stadi bai stori long ol samting i wok long kamap long ol narapela narapela ples. Ating sampela samting i narapela kain long ol samting yu save long en o ol manmeri long hap bilong yu i save mekim. Tasol yu ken lukim sampela stiatok o sampela samting i bikpela samting long ol wokman bilong God.

Stretpela Marit i Mas Bihainim Ol Lo Bilong Gavman

6, 7. Bilong wanem yumi mas save long ol lo bilong gavman long marit? Olsem wanem yumi inap kamapim dispela?

⁶ Tru, Jehova i as bilong marit, tasol ol gavman bilong graun i bosim sampela wok bilong ol manmeri i laik marit. I stret ol i mekim olsem. Jisas i tok: “Samting bilong Sisar, em yupela i mas givim long Sisar. Na samting bilong God, em yupela i mas givim long God.” (Mak 12:17) Na aposel Pol i tok: “Olgeta man i mas i stap aninit long ol gavman. Yumi save, i no gat wanpela gavman i kamap nating. Nogat. Olgeta wok bilong gavman i kamap long han bilong God tasol. Na olgeta gavman i stap, God yet i putim ol na ol i stap.”​​—Rom 13:1; Taitus 3:1.

⁷ Long planti kantri gavman i makim husat inap long marit. Olsem na sapos tupela Kristen i fri long marit olsem Baibel i makim, ol i save bihainim gut ol lo long hap bilong ol, olsem: Kisim wanpela pepa bilong marit, yusim wanpela man em gavman i givim namba long em long wokim marit, na rejistaim marit taim ol i marit pinis. Taim Sisar Ogastus i putim lo olsem ol i mas “kisim nem,” Maria na Josep i bihainim dispela lo, na ol i go long Betlehem bilong “gavman i ken kisim nem bilong ol.”​​—Luk 2:​1-5.

8. Ol marit i mas stap wantaim i go inap long wanem taim? Wanem pasin bilong ol Witnes Bilong Jehova i kamapim dispela?

⁸ Sapos tupela Kristen i marit long rot i stret long gavman na ol man, tupela i stap marit long ai bilong God na ol i no ken brukim. Olsem na ol Witnes Bilong Jehova i no save mekim bung bilong marit planti taim, na ol i no save mekim gen tok promis bilong marit, olsem taim ol i marit inap 25 o 50 yia. (Matyu 5:37) (Sampela lotu i no save orait long marit ol man i mekim long gavman, ol i tok man na meri i no marit stret sapos i no gat wanpela pris o pasto i wokim marit bilong ol o tokaut olsem tupela i man na meri i marit.) Long planti kantri gavman i save givim namba long wanpela elda bilong ol Witnes Bilong Jehova na em i ken wokim marit. Sapos ol inap mekim olsem, ating elda i laik maritim ol long taim em i mekim wanpela tok bilong marit long Haus Kingdom. Em i ples bilong lotu tru long God na gutpela ples bilong mekim wanpela tok long marit, em God Jehova i as bilong en.

9. (a) Sapos tupela Kristen i marit long gavman, ol inap mekim wanem? (b) Olsem wanem ol elda bai insait long ol samting bilong weding?

⁹ Long sampela kantri, lo i makim olsem man na meri i mas marit long wanpela ofis bilong gavman, o long ai bilong wanpela wokman bilong gavman i gat namba long wokim marit. Planti Kristen em ol i marit long dispela rot, bihain ol i gat wanpela tok bilong marit long Haus Kingdom long dispela de yet o long de bihain. (Ol i no laik planti de i lus namel long marit long gavman na long tok bilong Baibel, long wanem, ol i marit pinis long ai bilong God na ol man, na long ai bilong kongrigesen Kristen tu.) Sapos tupela Kristen i marit long gavman ol i laikim wanpela tok long wanpela Haus Kingdom, paslain long dispela ol i mas kisim tok orait long ol elda i insait long Kongrigesen Sevis Komiti. Ol elda bai kisim save olsem man na meri i laik marit ol i gat gutnem, na ol bai kisim save tu olsem taim bilong tok bilong marit i no ken kamap long taim bilong ol miting o long taim bilong sampela narapela program i kamap long Haus Kingdom. (1 Korin 14:​33, 40) Ol bai toktok tu long olgeta samting tupela i laik mekim bilong redim Haus Kingdom bilong wokim weding na makim olsem ol bai mekim wanpela toksave long weding o nogat.

10. Sapos ol i mas marit long gavman, dispela bai mekim wanem long tok bilong marit?

¹⁰ Elda husat bai mekim tok bilong marit bai wok strong long mekim tok long pasin ol man i ken pilim tru long bel, na strongim ol long ol samting bilong spirit, na i soim rispek. Sapos tupela i bin marit pastaim long gavman, em bai kamapim olsem tupela i marit pinis olsem lo bilong gavman i makim. Sapos ol i no mekim tok promis bilong marit long taim ol i marit long gavman, ating tupela i laik mekim olsem long taim bilong tok.c Sapos tupela i mekim pinis tok promis taim ol i marit long gavman na ol i laik mekim gen tok promis long ai bilong Jehova na kongrigesen, ol bai mekim long pasin i kamapim olsem ol i bin mekim pinis dispela tok promis, na “God i pasim [ol] pinis.”​​—Matyu 19:6; 22:21.

11. Long sampela hap, man na meri i marit olsem wanem? Dispela bai mekim wanem long tok bilong marit?

¹¹ Long sampela ples, lo i no makim olsem man na meri i mas marit long wanpela bung we ol i sainim pepa na mekim tok promis, o long ai bilong wanpela man em gavman i givim namba bilong wokim marit. Ol i marit taim ol i bringim wanpela pepa bilong rejistaim marit em ol i sainim pinis long wanpela wokman bilong gavman. Bihain stret long dispela, ol i rejistaim setifiket bilong marit. Long dispela rot ol man i tingim tupela olsem man na meri marit, na dispela de em i de bilong marit bilong ol. Olsem yumi tok pinis, bihain long rejistaim marit tupela nupela marit i ken askim wanpela strongpela brata long mekim wanpela tok bilong Baibel long Haus Kingdom. Brata bai tokaut long ol manmeri i stap long harim tok olsem tupela i marit pinis long rot bilong rejistaim marit. Sapos ol i laik mekim tok promis bilong marit ol bai mekim olsem yumi stori pinis long paragraf 10 na sta daunbilo long en. Ol manmeri i kam long Haus Kingdom ol bai amamas wantaim tupela nupela marit na ol bai kisim ol gutpela tok long Baibel.​​—Solomon 3:​11.

Marit Long Kastam na Gavman

12. Marit long kastam i wanem kain marit? Taim tupela Kristen i marit pinis long kastam, gutpela ol i mekim wanem samting?

¹² Long sampela kantri, man na meri i marit long kastam (o, ples). Yumi no tok long kain marit we man na meri i stap nating wantaim, o tupela i stap wantaim olsem marit, tasol ol i no marit stret long lo bilong gavman.d Yumi toktok long marit i stret long kastam o ples na ol man i tingim olsem tupela i marit stret. Planti taim long kain marit olsem ol i save baim meri, na long dispela rot tupela i marit stret long lo bilong gavman na Baibel. Gavman i orait long kain marit olsem na ol man i no inap brukim. Bihain long dispela, ol inap rejistaim dispela marit bilong kastam, na taim ol i mekim olsem ol bai kisim wanpela setifiket. Sapos ol i rejistaim marit long gavman, dispela inap lukautim tupela o lukautim meri taim man i dai, o lukautim ol pikinini i kamap bihain. Kongrigesen i laik kirapim olgeta manmeri i marit long kastam long rejistaim marit kwiktaim. Aninit long Lo Bilong Moses, ol i bin rejistaim ol marit na ol nupela pikinini.​​—Matyu 1:​1-​16.

13. Bihain long marit long kastam, sapos i gat wanpela tok bilong marit ol i ken tingim wanem samting?

¹³ Taim man na meri i wokim marit long kastam, long dispela taim ol i kamap man na meri marit. Olsem yumi tok pinis, tupela Kristen i marit olsem ol i ken stretim rot bilong mekim wanpela tok bilong marit, na tok promis bilong marit, long Haus Kingdom. Sapos ol i mekim olsem, brata i mekim tok bai tokaut olsem tupela i marit pinis olsem lo bilong gavman i makim. Ol bai mekim wanpela tok tasol. Yumi ken tok, ol i marit pinis long kastam (ples) i stret long gavman, na mekim wanpela tok tasol bilong Baibel. I gutpela long ol i wokim marit na tok bilong marit insait long liklik haptaim, olsem long wanpela de, long wanem, long ai bilong ol manmeri dispela bai givim biknem long marit Kristen.

14. Kristen inap mekim wanem sapos marit long kastam na marit long gavman tupela wantaim i stret?

¹⁴ Long sampela kantri we gavman i orait long marit long kastam, i gat rot tu long marit long gavman. Planti taim ol i wokim marit long gavman long ai bilong wanpela wokman bilong gavman i gat namba long wokim marit, na planti taim ol i mekim tok promis bilong marit na sainim wanpela pepa bilong rejistaim marit. Sampela Kristen i laikim marit long gavman, na i no marit long kastam. I no gat wanpela lo i tok ol i mas mekim tupela wantaim; tupela marit wantaim i stret long ai bilong gavman. Ol samting yumi toktok pinis long paragraf 9 na 10 long ol samting bilong tok bilong marit na tok promis bilong marit i stret tu long dispela kain marit. Bikpela samting i olsem, marit bilong tupela i mas stret long ai bilong God na ol man.​​—Luk 20:25; 1 Pita 2:​13, 14.

Holimpas Stretpela Pasin Insait Long Marit

15, 16. Olsem wanem ona em i bikpela samting long marit?

¹⁵ Taim wanpela hevi i kamap long marit bilong king bilong Persia, wanpela hetman, nem bilong em Memukan, em i givim wanpela tok em inap long kamapim gutpela samting​—olsem “olgeta meri bai i harim gut tok [“givim ona,” NW] bilong man bilong ol.” (Esta 1:20) I no gat wanpela king i mas givim dispela tok long ol Kristen i marit; ol meri i gat laik long givim ona long man bilong ol. Na ol man marit i laik mekim gutpela pasin na litimapim nem bilong meri bilong ol. (Sindaun 31:​11, 30; 1 Pita 3:7) Ol marit i no ken mekim tasol gutpela pasin long poroman bilong ol bihain long ol i marit inap planti yia, nogat. Ol i mas mekim olsem kirap long taim ol i marit nupela, olsem kirap long de bilong marit.

¹⁶ Man na meri​—olsem man na meri marit​—i no tupela tasol i mas soim ona long de bilong marit. Sapos wanpela elda Kristen bai mekim tok bilong marit, dispela tok tu i mas givim ona olsem soim rispek. Em i mas mekim tok i go long tupela i laik marit. Bilong givim rispek long ol, brata i no inap kamapim ol tok pilai na ol toktok nating planti man i save mekim. Em i no ken kamapim ol tok i stori long ol samting em i bin lukim long tupela na dispela bai mekim na tupela na ol man i harim tok ol bai sem. Em bai mekim gutpela tok i strongim ol, na kamapim klia olsem Jehova i As bilong marit na Em i gat ol gutpela tok bilong helpim marit. Tru tumas, gutpela tok bilong elda bai mekim na marit bai givim ona long God Jehova.

17. Bilong wanem ol marit Kristen i mas bihainim lo bilong gavman?

¹⁷ Ating yu luksave olsem dispela stadi i kamapim planti tok long ol lo bilong marit long gavman. Ating sampela samting i no stret long hap bilong yu. Tasol yumi olgeta i mas save olsem em i bikpela samting long ol Witnes Bilong Jehova i wokim ol marit i soim rispek long ol lo bilong ples, em ol lo bilong gavman. (Luk 20:25) Aposel Pol i tokim yumi: “Wanem samting yupela i mas givim long gavman, orait yupela givim long ol. Yupela i mas givim ol kain kain takis long man bilong kisim takis. . . . Na sapos man i stap bikman, orait yupela i mas givim biknem long em.” (Rom 13:7) Yes, kirap long de bilong marit, i stret long ol Kristen i givim ona long samting God i bin putim bilong ol man i bihainim long nau.

18. Yumi mas tingim wanem samting moa long marit? Yumi inap painim we ol tok long dispela samting?

¹⁸ Bihain long planti weding ol i save mekim wanpela bung bilong marit​—olsem kaikai bilong marit. Tingim, Jisas i bin stap long wanpela kaikai olsem. Sapos i gat wanpela bung olsem, olsem wanem ol tok bilong Baibel i ken helpim yumi long mekim ol samting i givim ona long God na i mekim gut nem bilong tupela nupela marit na kongrigesen Kristen? Stadi i kamap bihain long dispela bai toktok long dispela samting.e

[Ol Futnot]

Yu Inap Tingim?

• Long samting bilong marit, bilong wanem yumi mas tingim ol lo bilong gavman na ol samting bilong spirit?

• Sapos tupela Kristen i marit long gavman, liklik taim bihain ol inap mekim wanem samting?

• Bilong wanem ol i save mekim ol tok bilong marit long Haus Kingdom?

[Piksa long pes 18]

Long wanpela marit long Israel long bipo, man i bringim nupela meri i kam long haus bilong em o long haus bilong papa

[Piksa long pes 21]

Sapos ol i laik, tupela Kristen i ken stretim rot na taim ol i marit pinis long kastam, wanpela tok bilong marit i ken kamap long Haus Kingdom