Bilong Wanem Yumi Mas Save Long Antikrais?
Long bipo yet, aposel Jon i tok: “Yupela i harim tok long birua bilong Krais [“antikrais,” NW] bai i kamap.” (1 Jon 2:18) Dispela tok i kirapim tru tingting bilong yumi, a? Inap planti handet yia ol man i bin tingting planti long mining bilong en. Antikrais em husat? Em bai kam long wanem taim? Em bai mekim wanem taim em i kam?
INSAIT long ol yia i go pinis, ol i bin sutim tok long planti man olsem ol i antikrais. Long bipo, ol i kolim sampela man Juda, pop Katolik, na ol king bilong Rom olsem “antikrais.” Olsem: Taim King Frederick Namba 2 (1194-1250) i no laik insait long Pait Bilong Lotu bilong helpim misin, Pop Gregory Namba 9 i kolim em antikrais na rausim em long misin. Pop Innocent Namba 4, em man i kisim ples bilong Pop Gregory, i rausim King Frederick gen. Orait bihain, Frederick i kolim Innocent olsem antikrais.
Long Baibel aposel Jon tasol i kolim dispela tok “antikrais.” Long tupela pas i gat nem bilong Jon, dispela tok i kamap 5-pela taim. Ol ves i kolim dispela tok i stap long blok long pes 4. Long ol dispela ves, yumi kisim save olsem antikrais em wanpela man bilong giaman, na em i laik bagarapim gutpela pasin pren bilong ol man wantaim Krais na God. Olsem na aposel Jon i kirapim ol wanlain Kristen bilong em olsem: “Ol pren, planti giaman profet i save raun nabaut long graun. Olsem na yupela i no ken bilip long olgeta man i kam long yupela na i tok, ‘Spirit bilong God i givim tok long mi.’ Nogat. Yupela i mas traim olgeta spirit, bai yupela i ken save, ol i kam long God, o nogat.”—1 Jon 4:1.
Jisas tu i tok lukaut olsem bai i gat ol man bilong giaman, olsem ol profet giaman. Em i tok: “Ol i olsem ol weldok i pasim skin bilong sipsip, bai ol i ken i go klostu long ol sipsip na holimpas ol. Yupela lukim pasin bilong ol na bai yupela i save, ol i giaman profet.” (Matyu 7:15, 16) Olsem wanem? Jisas i bin givim tok lukaut tu long ol disaipel bilong em long antikrais? Orait nau yumi ken toktok long olsem wanem yumi ken save long husat em dispela antikrais.