Yu Tingim Yet?

Olsem wanem? Yu bin amamas long ritim ol tok bilong ol nupela Wastaua? Sapos olsem, orait yu ken traim bekim ol dispela askim i stap daunbilo:

• Wanem samting inap helpim trupela Kristen taim wanpela long famili i lusim Jehova?

Strongim yu yet na ol narapela long famili i stap gut long God. Givim bel long ol wok bilong lotu i tru. Helpim ol narapela. Bilip na wet olsem man i lusim Jehova em inap kam bek. No ken ting yu gat asua. Daun long rot bilong Jehova long stretim man na kamapim tingting bilong yu long ol pren.​—9/1, pes 18-21.

• Wanem tupela rot em Baibel i helpim yumi long luksave long “taim bilong las de”?

Baibel i tok profet long ol samting i mas kamap long taim pasin bilong “dispela graun i laik pinis.” (Matyu 24:​3, 7, 8; Luk 21:11) Na tu, Baibel i stori long pasin na tingting bilong ol man i stap long “taim bilong las de.” (2 Timoti 3:​1-5) Long dispela taim, ol i mas autim tok bilong Kingdom.​—9/15, pes 4-6.

• Sapos Kristen i draivim ka na em i insait long wanpela eksiden we ol narapela i dai, kongrigesen i gat wok long mekim wanem?

Taim ol elda i skelim dispela samting, ol inap luksave olsem Kristen i no gat asua long blut, long wanem, samting i bin kamapim indai em samting draiva i no bin save long en na i no gat rot long pasim. Tasol sapos draiva i gat asua long blut na em i hevi tru long rong bilong em, orait ol bai givim em sampela tok bilong Baibel bilong stretim em na putim tambu long em long ol asainmen bilong wok em inap mekim long kongrigesen.​—9/15, pes 30.

• Bilong wanem ol save samting bilong saiens i no inap bringim laip oltaim long yumi ol man?

Ol saveman bilong saiens i traim kain kain rot bilong skruim laip bilong ol man i go longpela, ol i mekim olsem long rot bilong strongim ol sel bilong skin long kamap nupela inap longpela taim o ol i traim long kisim wanpela liklik sel long skin bilong man na wokim lewa, o kidni, o klok samting long en na putim insait long bodi bilong sikman bilong senisim lewa o klok samting i bagarap pinis. Tasol Baibel i kamapim klia olsem wanpela rot tasol bilong man inap kisim laip oltaim, em long rot bilong ofa bilong Jisas.​—10/1, pes 3-5.

• Pasin lotu bilong ol Juda long waswas, yu ting baptais Kristen i kamap long dispela rot?

Nogat. Ol Juda i mekim ol samting bilong kamap klin long ol samting bilong lotu. Tasol baptais Jon i bin givim long ol man i no dispela kain. Lo Bilong Moses i tok sapos man i kamap doti em i mas waswas bilong kamap klin gen, na em i mas mekim olsem planti taim, tasol baptais bilong Kristen em samting man i mas mekim wanpela taim tasol.​—10/15, pes 12-13.

• Ministerial Trening Skul em wanem kain skul?

Em wanpela skul i save stap 8-pela wik na em bilong ol elda bilong kongrigesen na ol kongrigesen sevan husat i singel na inap mekim bikpela wok moa long ol hap i sot long ol man bilong autim tok. Ol inap mekim dispela wok long kongrigesen ol i kam long en, o long narapela kongrigesen long hap bilong ol, o mekim wok long narapela kantri.​—11/15, pes 10-11.

• Husat em birua bilong Krais, olsem antikrais, em 1 Jon 2:18 (NW); 4:3 (NW), i stori long en?

Dispela tok “antikrais” i makim olgeta man em ol i birua long Krais o ol i giaman na tok ol i Krais o mausman bilong em. Tok bilong Jisas na Jon i kamapim ples klia olsem antikrais i no wanpela man tasol, i gat planti antikrais husat i giamanim ol man long ol samting bilong lotu na sakim Kingdom Bilong God.​—12/1, pes 4-6.