Laip Stori

Wetim Wanpela Kingdom “i No Bilong Dispela Graun”

Stori bilong Nikolai Gutsulyak

Inap 41 de na nait, mi bin stap namel long pait ol kalabusman i bin kirapim. Wantu, pairap bilong bikpela gan i kirapim mi long slip. Ol soldia na ol strongpela ka i gat bikpela gan ol i kolim tenk i kam insait long banis kalabus na pait wantaim ol kalabusman. Long dispela taim laip bilong mi inap lus.

OLSEM wanem mi stap namel long kain hevi olsem? Mi laik stori long dispela. Dispela samting i bin kamap long 1954. Long dispela taim, mi gat 30 krismas. Olsem planti Witnes Bilong Jehova i stap aninit long gavman bilong Soviet Yunion, mi tu i kalabus, long wanem, mi no laik insait long wok politik na mi tokim ol narapela man long Kingdom Bilong God. Mipela ol Witnes i stap long dispela banis kalabus em 46 man na 34 meri. Mipela i stap long wanpela banis kalabus i stap klostu long ples Kengir, long sentral Kasakstan. Mipela i stap wantaim planti tausen narapela kalabusman.

Lida bilong Soviet Yunion, Joseph Stalin, i bin dai long yia paslain long dispela. Planti kalabusman i ting nupela gavman long Moscow bai putim yau long komplein bilong ol olsem i stap bilong ol long kalabus i nogut tru. Ol kalabusman i no amamas long i stap bilong ol na dispela i mekim na ol i kirap bikhet. Taim dispela samting i kamap, mipela ol Witnes i mas tokim ol bikhet kalabusman olsem mipela bai i no inap insait long dispela kros bilong ol, na mipela i mas tokim ol soldia tu long dispela samting. Mipela i mas bilip tru long God na bai mipela inap tokaut long tingting bilong mipela.

Pasin Bikhet i Kirap!

Long Me 16, pasin bikhet i kirap long banis kalabus. Tupela de bihain, winim 3,200 kalabusman i no laik mekim wok, ol i tok i stap bilong ol long kalabus i mas kamap gutpela, na ol man i kalabus long samting bilong wok politik ol i mas i gat rait long mekim sampela samting. Ol samting i wok long kamap hariap. Pastaim ol bikhet kalabusman i subim ol gad long lusim banis kalabus. Ol i katim banis i raunim kalabus na wokim ol hul long en. Ol i brukim ol banis i stap namel long haus kalabus bilong ol man na bilong ol meri, na ol i mekim ol i kamap olsem ol haus kalabus bilong ol famili. Insait long sampela de bihain long dispela, sampela kalabus i marit, na ol pris husat i kalabus tu ol i mekim tok bilong marit. Long tripela haus kalabus we pasin bikhet i kamap, klostu olgeta bilong 14,000 kalabusman i insait long dispela pasin.

Ol bikhet kalabusman i kamapim komiti bilong toktok wantaim lain ami. Tasol i no longtaim na ol memba bilong komiti i pait namel long ol yet, na nau ol kalabusman i bikhet nogut tru i kirap bosim banis kalabus. Tingting bilong pait na bagarapim man i go bikpela. Ol lida bilong ol bikhet kalabusman i kamapim lain sekiuriti, lain ami, na lain bilong givim ol toksave bambai ol kalabusman i stap isi. Ol lida i yusim ol bikpela spika i stap long ol pos bilong banis kalabus bilong autim ol strongpela tok, ol i laik bai tingting bilong ol kalabusman long bikhet i stap strong. Ol bikhet kalabusman i pasim rot bilong ol narapela long ranawe, ol i givim strafe long ol man i sakim tok bilong ol, na ol i tok ol i redi long kilim i dai ol man ol i no laikim. Mipela i harim tok win olsem ol i bin kilim i dai pinis sampela kalabusman.

Ol bikhet kalabusman i ting lain ami bai kam na pait, olsem na ol i redim gut ol samting na bai ol inap lukautim ol yet. Ol lida bilong ol bikhet kalabusman i tok olgeta kalabus i mas holim gan samting na bai i gat planti man bilong lukautim banis kalabus. Bilong mekim olsem, ol kalabus i rausim ol ba ain long ol windo na wokim ol naip samting long ain. Ol i kisim tu sampela gan na bom.

Ol i Strong Long Mipela i Mas Joinim Ol

Long dispela taim, tupela bikhet kalabusman i kam long mi. Wanpela i holim naip em i bin sapim nau tasol. Em i tok strong: “Kisim dispela! Yu mas i gat dispela samting bilong lukautim yu yet.” Mi beten long tingting na askim Jehova long helpim mi long stap isi. Mi tokim ol: “Mi wanpela Kristen, wanpela Witnes Bilong Jehova. Ol narapela Witnes na mi i kalabus long hia, long wanem, mipela i no pait long ol man, nogat, mipela i pait long ol strongpela spirit. Ol samting mipela i holim bilong pait em bilip bilong mipela long Kingdom Bilong God em mipela i wetim i stap.”​—Efesus 6:12.

Mi kirap nogut taim man ya i meknaisim het bilong makim olsem em i kliagut long tok bilong mi. Tasol narapela man i paitim mi strong. Bihain ol i lusim mi. Ol bikhet kalabusman i go long wan wan haus kalabus, na ol i traim long subim ol Witnes long joinim pait bilong ol. Tasol olgeta brata na sista Kristen bilong yumi i no laik mekim olsem.

Long miting bilong komiti bilong ol bikhet kalabusman ol i toktok long pasin bilong ol Witnes long ol i no laik insait long pait. Ol i tok: “Ol man bilong olgeta lotu​—ol Pentikostal, Sevende, Baptis, na ol narapela​—i joinim pait. Ol Witnes Bilong Jehova tasol, nogat. Bai yumi mekim wanem long ol?” Wanpela i tok long tromoi wanpela Witnes long aven bilong banis kalabus bilong pretim mipela. Tasol wanpela ofisa bilong ami long bipo, em wanpela kalabusman ol narapela i save rispektim, em i sanap na i tok: “Em i no savepasin. Yumi mas putim olgeta Witnes long wanpela haus long arere bilong banis, klostu long geit. Olsem na sapos lain ami i kam wantaim ol tenk, ol bai kilim i dai ol Witnes pastaim. Na bai yumi no gat asua long ol i dai.” Ol narapela i wanbel wantaim tok bilong em.

Ol i Laik Bagarapim Mipela

I no longtaim na ol kalabusman i wokabaut raun long banis kalabus na i singaut olsem, “Ol Witnes Bilong Jehova, yupela kam ausait!” Ol i kisim mipela olgeta 80 Witnes i go long wanpela haus kalabus i stap long arere bilong banis. Ol i rausim ol dabol bet i kam ausait na bai i gat spes na ol i tokim mipela long go insait. Dispela haus i kamap kalabus bilong mipela insait long banis kalabus.

Ol sista Kristen long grup bilong mipela i samapim sampela betsit wantaim, na mipela i yusim ol dispela betsit bilong brukim haus kalabus i go long tupela hap​—hap bilong ol man na hap bilong ol meri. (Bihain, wanpela Witnes long Rasia i wokim piksa bilong dispela haus kalabus, piksa i stap daunbilo.) Taim mipela i stap long dispela haus i no gat planti spes, planti taim mipela i beten wantaim na askim Jehova long givim savetingting na “bikpela strong” long mipela.​—2 Korin 4:7.

Taim mipela i stap long dispela haus kalabus, mipela i stap namel long ol bikhet kalabusman na ami bilong gavman Soviet. Mipela i no save dispela tupela lain bai mekim wanem. Wanpela gutpela lapun brata Kristen i tok: “No ken tingting long samting inap kamap. Jehova i no inap lusim yumi.”

Ol gutpela sista Kristen​—yangpela na lapun wantaim​—ol i sanap strong na karim hevi. Wanpela sista i gat 80 krismas samting na i mas kisim helpim. Ol narapela i sik na ol i mas kisim marasin samting. Taim mipela i stap long dispela haus kalabus, mipela i mas larim ol dua i op i stap bambai ol bikhet kalabusman i ken putim ai long mipela long olgeta taim. Long nait, ol kalabusman i holim gan samting i save kam long haus mipela i stap long en. Sampela taim mipela i harim ol i tok, “Lain bilong Kingdom Bilong God i slip pinis.” Long san, taim ol i larim mipela i go long rum kaikai bilong banis kalabus, oltaim mipela i stap wantaim na beten askim Jehova long lukautim mipela long ol man bilong pait.

Insait long haus kalabus, narapela i traim long helpim narapela long ol samting bilong spirit. Olsem: Planti taim wanpela brata i toktok isi na kamapim wanpela stori bilong Baibel. Bihain em i stori long olsem wanem dispela stori i stret long i stap bilong mipela. Wanpela lapun brata i save stori long lain ami bilong Gideon. Em i tokim mipela olsem: “Long nem bilong Jehova, 300 man i holim biugel na pait long lain ami i gat 135,000 soldia. Olgeta 300 man i no kisim bagarap na ol i kam bek.” (Hetman 7:​16, 22; 8:10) Dispela na ol narapela stori bilong Baibel i strongim mipela long ol samting bilong spirit. Mi bin stap olsem wanpela Witnes inap sotpela taim tasol, tasol taim mi lukim strongpela bilip bilong ol brata na sista, dispela i strongim mi tru. Mi pilim olsem tru tru Jehova i stap wantaim mipela.

Pait i Kirap

Ol wik i kam na i go, na hevi insait long banis kalabus i wok long i go bikpela. Ol bikhet kalabusman na ol bikman bilong gavman i wok long toktok strong moa namel long ol yet. Ol lida bilong ol bikhet kalabusman i strong long gavman long Moscow i mas salim wanpela mausman i kam bilong bungim ol. Ol bikman bilong gavman i tok ol bikhet kalabusman i no ken bikhet moa, ol i mas givim ol gan samting bilong ol i go bek, na kirap mekim wok gen. Tupela sait wantaim i no laik bihainim tok bilong narapela narapela. Nau lain ami i raunim pinis banis kalabus, ol i redi long kam insait na pait taim ol i kisim tok long mekim olsem. Ol bikhet kalabusman tu i redi long pait, ol i bin wokim ol strongpela banis na bungim planti gan samting. Olgeta i ting bikpela pait namel long lain ami na ol kalabusman inap kirap wantu tasol.

Long Jun 26, pairap bilong ol strongpela gan i kirapim mipela long slip. Ol tenk i brukim banis na i kam insait long banis kalabus. Bihain long ol, ol soldia i kam na sut wantaim ol masin-gan. Ol kalabus​—ol man na meri​—i ran i go long ol tenk na i singaut “Ure!” na tromoi ol ston, ol bom ol yet i bin wokim, na ol narapela samting ol inap holim. Bikpela pait i kamap na mipela ol Witnes i stap namel long en. Mipela i beten askim Jehova long helpim mipela. Em bai mekim wanem?

Wantu, ol soldia i ron i kam insait long haus kalabus bilong mipela. Ol i singaut: “Yupela lain holi, yupela kam ausait! Hariap, go ausait long banis!” Nambawan ofisa i tokim ol soldia long ol i no ken sutim mipela, ol i mas stap na was long mipela. Taim ol lain i pait i go i kam, mipela i sindaun long ples kunai i stap ausait long banis kalabus. Inap fopela aua mipela i harim ol bom na gan i pairap, na ol man i singaut na krai insait long banis kalabus. Orait nau, olgeta pairap i pinis. Bihain, taim san i kam antap, mipela i lukim ol soldia i karim bodi bilong ol daiman i kam ausait long banis kalabus. Mipela i kisim save olsem planti handet i kisim bagarap na planti i dai.

Bihain long dispela de yet, wanpela ofisa em mi save long em, em i kam long mipela. Em i askim mi: “Orait Nikolai, husat i helpim yupela long abrusim bagarap? Mipela o Jehova?” Mipela i tok tenkyu tru long em i bin lukautim mipela na mipela i no kisim bagarap, na mipela i tok moa: “Mipela i bilip olsem God bilong mipela i gat olgeta strong, em Jehova, em i kirapim yu long lukautim mipela, olsem em i bin kirapim ol narapela man long lukautim ol wokboi bilong em long taim bilong ol man i bin raitim Baibel.”​—Esra 1:​1, 2.

Dispela ofisa i tokim mipela tu long olsem wanem ol soldia i save mipela i husat na mipela i stap we. Em i tok, long wanpela taim ol ami na ol bikhet kalabusman i bung na i toktok i go i kam, na lain ami i sutim tok long ol bikhet kalabusman olsem ol i bin kilim i dai ol kalabusman husat i no sapotim ol. Bilong strongim sait bilong ol, ol bikhet kalabusman i tok ol Witnes Bilong Jehova i no insait long dispela bikhetpasin, tasol ol i no bin kilim ol i dai. Nogat. Bilong givim strafe long ol Witnes, ol i bin kalabusim ol long wanpela haus kalabus. Dispela ofisa i tingim dispela tok.

Mipela i Strong Long Stap Gut Long Kingdom

Wanpela man Rasia i gat nem long raitim ol buk, em Aleksandr Solzhenitsyn. Long buk em i raitim (The Gulag Archipelago), em i stori long dispela pasin bikhet i bin kamap insait long banis kalabus. Em i tok dispela pasin bikhet i kamap, long wanem, “mipela i laik i stap fri, . . . tasol husat inap mekim na mipela i stap fri?” Mipela ol Witnes Bilong Jehova i stap long dispela wankain banis kalabus, mipela tu i laik i stap fri. Tasol mipela i no laik i stap fri long kalabus tasol, nogat. Mipela i laik i stap fri long planti samting na Kingdom Bilong God tasol inap kamapim dispela samting. Taim mipela i kalabus, mipela i save mipela i mas kisim strong i kam long God bambai mipela i ken stap gut long Kingdom bilong em. Na Jehova i lukautim mipela long olgeta samting mipela i mas kisim. Em i helpim mipela long win maski mipela i no yusim ol naip na hanbom samting.​—2 Korin 10:3.

Jisas Krais i tokim Pailat: “Kingdom bilong mi em i no bilong dispela graun. Sapos kingdom bilong mi em i bilong dispela graun, orait inap ol wokman bilong mi i pait.” (Jon 18:36) Mipela ol disaipel bilong Krais, olsem na mipela i no insait long ol pait bilong wok politik. Mipela i amamas olsem long taim bilong dispela pait na bihain long en, ol narapela i luksave long pasin bilong mipela long stap gut long Kingdom Bilong God. Solzhenitsyn i stori long buk bilong em long pasin bilong mipela long dispela taim. Em i tok: “Ol Witnes Bilong Jehova i no surik long bihainim ol lo bilong ol, na ol i no laik wokim ol banis bilong lukautim ol yet o makim sampela long was long ol.”

Winim 50 yia i lus pinis bihain long dispela pait i bin kamap. Tasol planti taim mi tingting i go bek long dispela taim na mi tok tenkyu, long wanem, mi bin lainim ol gutpela pasin, olsem pasin bilong wet long Jehova na bilip tru long strongpela han bilong em. Yes, olsem planti gutpela Witnes long Soviet Yunion bilong bipo, mi lukim pinis olsem Jehova i save lukautim, kisim bek, na mekim i kamap fri ol man i wetim wanpela Kingdom “i no bilong dispela graun.”

[Ol Piksa long pes 8, 9]

Banis kalabus long Kasakstan we mipela i kalabus

[Piksa long pes 10]

Piksa bilong haus kalabus bilong ol Witnes, hap bilong ol meri

[Piksa long pes 11]

Mi wantaim ol brata Kristen taim mipela i lusim kalabus