Helpim i Kam Long God i Save Mekim Gut Bel Bilong Yumi

INAP olsem 2,000 yia i go pinis, aposel Pol i bin tok, Jehova em God “yumi save kisim strong long [em]” na em “i save mekim yumi sanap strong.” (Rom 15:5) Baibel i tok Jehova i no save senis, olsem na yumi ken bilip tru olsem God i save wok yet long strongim na mekim gut bel bilong ol manmeri i mekim wok bilong em. (Jems 1:17) Baibel i soim olsem, long kain kain rot Jehova i save mekim gut bel bilong ol manmeri bel bilong ol i bagarap. Wanem sampela rot? God i save givim strong long ol man i beten askim em long helpim ol. Na em i save kirapim ol Kristen tru long mekim gut bel bilong ol wanbilip. Na Jehova i save kamapim ol gutpela stori olsem long Baibel, em ol i save strongim tru bel bilong ol manmeri i krai sori long wanpela pikinini bilong ol i dai. Orait, nau yumi ken stori long dispela 3-pela rot bilong mekim gut bel bilong ol.

Jehova “i Harim”

King Devit i tok long Man Bilong Wokim yumi, Jehova, olsem: “Yupela ol lain bilong mi, oltaim yupela i mas bilip long God. Yupela i mas autim olgeta hevi na olgeta tingting bilong yupela long em. Long wanem, yumi ken i go long em na i stap gut.” (Song 62:8) I gat wanem as na Devit i bilip strong long Jehova olsem? Devit i stori long em yet olsem, ‘rabisman i prea long Bikpela na em i harim prea bilong em, na i helpim em long olgeta hevi bilong em.’ (Song 34:6) Long olgeta hevi na taim nogut i bin painim em, oltaim Devit i beten askim God long helpim em, na oltaim Jehova i harim na i mekim olsem. Olsem na Devit i save pinis, God bai helpim em long sanap strong na karim hevi.

Ol papamama i krai sori, ol i mas save olsem Jehova bai helpim na strongim ol long dispela taim bilong bikpela hevi, olsem em i bin mekim long Devit. Ol inap i go klostu long dispela Man bilong “harim beten,” na ol i ken bilip olsem em bai helpim ol. (Song 65:2) William, em yumi bin kamapim tok bilong em long stori paslain long dispela, em i tok: “Planti taim mi pilim olsem mi no inap i stap laip moa, long wanem, pikinini bilong mi i no stap, na mi askim Jehova long helpim mi long dispela hevi. Long olgeta taim em i bin givim strong long mi na strongim bel bilong mi bambai mi ken i stap yet na karim dispela hevi.” Sapos yu tu yu bilip strong na beten long Jehova, bikpela God bilong heven bai helpim na strongim yu. Long wanem, God Jehova i tok promis long ol man i mekim wok bilong em: “Mi God, Bikpela bilong yupela. Mi save sambai long yupela na mi tokim yupela olsem, yupela i no ken pret. Bai mi helpim yupela.”​—Aisaia 41:13.

Helpim i Kam Long Ol Pren Tru

Planti papamama em wanpela pikinini bilong ol i dai, ol i mas i gat hap taim bilong i stap ol yet na krai sori long pikinini na daunim bel hevi bilong ol. Tasol sapos ol i wok long abrusim ol pren bilong ol inap longpela taim, dispela i no savepasin. Sindaun 18:1 i tok, “man i save stap wanpis,” dispela inap nogutim em. Olsem na ol manmeri i krai sori ol i mas was gut, nogut pasin bilong i stap wanpis tasol i bagarapim ol.

Ol pren i save pret long God ol inap givim bikpela helpim long ol manmeri i bel hevi. Sindaun 17:17 (NW), i tok: “Pren tru i save laikim yumi long olgeta taim, na em i olsem brata i save sambai long helpim yumi long taim bilong hevi.” Lucy, yumi stori long em long stori i bin kamap paslain long dispela, em i bin kisim gutpela helpim long ol poroman tru, em ol i bin mekim gut bel bilong em taim pikinini man bilong em i dai. Em i stori long ol pren insait long kongrigesen na em i tok: “Ol i bin kam lukim mipela na dispela i helpim gut mipela, maski sampela taim ol i no mekim planti tok. Wanpela pren i bin lukim mi long taim mi stap wanpis. Em i save, bai mi stap long haus na krai i stap, na planti taim em i bin kam na krai wantaim mi. Narapela pren i ring long mi long olgeta de bilong strongim bel bilong mi. Na sampela moa i singautim mipela i go kaikai long haus bilong ol, na ol i save mekim yet.”

Tru, bikpela bel hevi ol papamama i kisim taim wanpela pikinini i dai, em i no save pinis kwik. Tasol pasin bilong beten long God na bung wantaim ol pren Kristen tru i stap long kongrigesen, dispela bai mekim gut tru bel bilong ol. Planti papamama Kristen em wanpela pikinini bilong ol i dai, ol i bin pilim tru olsem Jehova i stap wantaim ol. Tru tumas, Jehova “i save mekim orait ol manmeri, hevi i bagarapim tingting bilong ol na ol i pilim nogut. Na em i pasim ol sua bilong ol.”​—Song 147:3.

Ol Stori Bilong Baibel

Beten na bung wantaim ol wanlain Kristen i save mekim gut bel bilong ol papamama i krai sori. Tasol i no dispela samting tasol​—i gat narapela samting tu, em Tok Bilong God long Baibel. Ol stori bilong Baibel i kamapim olsem Jisas i gat bikpela laik na strong long rausim bel hevi bilong ol papamama em pikinini bilong ol i dai​—em inap kirapim bek ol man i dai pinis. Ol dispela stori i save strongim tru bel bilong ol papamama i krai sori. Yumi ken kamapim tupela stori olsem.

Luk sapta 7 i stori long samting i bin kamap taim Jisas i bungim wanpela lain long taun Nain ol i wokabaut i go bilong planim wanpela man. Ol manmeri i redi long planim pikinini man bilong wanpela meri, man bilong en i dai pinis na em i gat dispela wanpela pikinini tasol. Luk 7 Ves 13 i tok: “Bikpela i lukim dispela meri, na em i sori tru long em, na em i tokim meri olsem, ‘Yu no ken krai.’ ”

Taim wanpela mama i stap long bung bilong planim pikinini bilong em, ating i no gat man bai tokim em long em i no ken krai. Bilong wanem Jisas i tok olsem? Long wanem, em i save liklik taim bai bel hevi bilong mama i pinis. Baibel i stori moa olsem: “[Jisas] i go klostu, na i putim han long bet ol i karim bodi long en. Na ol man i karim dispela bet ol i sanap. Na Jisas i tok, ‘Yangpela man, mi tokim yu, yu kirap.’ Na dispela man i dai pinis, em i kirap na i sindaun, na em i stat long toktok. Na Jisas i givim em bek long mama bilong en.” (Luk 7:​14, 15) Long dispela taim, ating mama i krai gen, tasol nau em i amamas tru na em i krai.

Long narapela taim, wanpela man nem bilong en Jairus, em i kam long Jisas na i askim em long helpim pikinini meri bilong em i gat 12-pela krismas, em i gat bikpela sik tru. I no longtaim na ol i salim tok i kam olsem pikinini i dai pinis. Jairus i harim na bel bilong em i bagarap stret, tasol Jisas i tokim em: “Yu no ken pret. Yu mas bilip tasol.” Ol i kamap pinis long haus bilong dispela famili na Jisas i go insait. Em i kisim han bilong pikinini meri i dai pinis na i tokim em: “Liklik meri, mi tokim yu, yu kirap.” Orait wanem samting i kamap? “Kwiktaim dispela liklik meri i kirap na i wokabaut.” Yu ting papamama i pilim olsem wanem? “Ol i kirap nogut tru.” Taim Jairus na meri bilong em i holimpas pikinini bilong ol, bel bilong ol i amamas moa yet. I olsem ol i driman tasol.​—Mak 5:​22-​24, 35-​43.

Ol dispela stori bilong Baibel long ol pikinini i dai pinis i kirap bek, ol i soim ol papamama bilong nau i krai sori olsem ol inap wetim gutpela samting tru i kamap bihain. Jisas i tok: “Taim i laik kamap na olgeta manmeri i stap long matmat ol bai i harim maus bilong Pikinini, na ol bai i lusim matmat na i kam ausait.” (Jon 5:​28, 29) Jehova i tingting pinis long Pikinini bilong em bai givim laip long ol man i dai pinis. Planti milion milion pikinini i dai pinis ol bai ‘harim maus bilong Jisas’ taim em i tokim ol: “Mi tokim yu, yu kirap.” Ol dispela yangpela ol bai wokabaut na toktok gen. Na papamama bilong ol bai “kirap nogut tru” na amamas moa yet, olsem Jairus wantaim meri bilong em i bin mekim.

Sapos wanpela pikinini man o pikinini meri bilong yu i dai pinis, yu mas save, long rot bilong kirap bek Jehova inap senisim bel hevi bilong yu i kamap olsem bikpela amamas. Bilong kisim dispela gutpela samting tru long bihain, yu mas bihainim tok bilong man bilong raitim song, em i tok: “Oltaim yumi mas i go klostu long Bikpela na askim em long helpim na strongim yumi. . . . Yupela i mas tingim gen ol strongpela wok bilong Bikpela na ol mirakel em i bin wokim.” (Song 105:​4, 5) Yes, yu mas mekim wok bilong God tru, Jehova, na lotuim em long pasin em i laikim.

Wanem samting bai kamap sapos yu wok long “go klostu long Bikpela”? Long rot bilong beten long God bai yu kisim strong, na ol poroman Kristen tru bai mekim gut bel bilong yu, na taim yu stadi long tok bilong God long Baibel dispela bai strongim yu. Na tu, liklik taim nau na bai yu lukim ‘ol strongpela wok na ol mirakel’ Jehova bai mekim bilong helpim yu wantaim pikinini bilong yu i bin i dai, na dispela helpim bai go inap oltaim oltaim.

[Blok long pes 5]

“Bringim Dispela Meri i Kam, Em Tupela Pikinini Bilong Em i Bin i Dai”

Kehinde na Bintu em tupela marit bilong Naijiria ol i Witnes Bilong Jehova, na tupela pikinini bilong ol i bin dai long ka eksiden. I kam inap long nau, bel bilong tupela i bagarap stret long dispela samting nogut i kamap. Tasol ol i bilip strong long Jehova na dispela i strongim ol, na ol i wok yet long autim gutpela tok bilong Baibel long ol neiba bilong ol.

Sampela ol i lukim bel isi na strong bilong Kehinde na Bintu. Orait wanpela taim wanpela meri, em Misis Ukoli, em i tokim wanpela pren bilong Bintu: “Bringim dispela meri i kam, em tupela pikinini bilong em i bin i dai wantaim na em i wok yet long autim tok bilong Baibel. Mi laik save, wanem samting i givim strong long em bilong karim dispela hevi?” Taim Bintu i kamap long haus bilong meri, Misis Ukoli i tokim em: “Mi laik save, bilong wanem yu wok yet long autim tok bilong dispela God em i bin kilim i dai tupela pikinini bilong yu? Mi gat wanpela pikinini meri tasol na God i bin kisim em, olsem na i kam inap long nau, mi no save tingim God liklik.” Bintu i mekim wok long Baibel na i tokim em long as na ol man i save dai, na olsem wanem yumi ken bilip strong olsem ol famili bilong yumi i dai pinis bai ol i kirap bek.​—Aposel 24:15; Rom 5:12.

Bihain Misis Ukoli i tok: “Pastaim mi ting God i mekim na ol man i save dai. Tasol nau mi save long tok i tru.” Em i kirap stadi long Baibel wantaim ol Witnes Bilong Jehova bambai em i ken kisim sampela save moa long ol tok promis bilong God.

[Blok long pes 6]

‘Mi Laik Helpim Ol, Tasol Bai Mi Mekim Olsem Wanem?’

Papamama na ol bratasusa bilong pikinini i bin i dai, ol i bel hevi nogut tru, tasol ating ol pren bilong ol i tingting planti. Ol i laik helpim famili, tasol ol i pret nogut ol i mekim wanpela tok o pasin i kranki na famili i bel hevi moa yet. Orait yumi ken kamapim sampela tok bilong helpim ol man ol i tingting olsem ‘Mi laik helpim ol, tasol bai mi mekim olsem wanem?’

❖ Maski yu no save wanem tok o wanem samting yu mas mekim, yu no ken abrusim ol. Sapos yu go lukim ol, dispela yet bai strongim ol. Na sapos yu no save wanem tok bai yu mekim, yu ken holimpas ol na tok, “Sori tru.” Em nau, ol bai save yu tingim ol. Olsem wanem? Yu pret, nogut yu krai na dispela bai bagarapim bel bilong ol moa yet? Baibel i tok: “Yupela i mas krai wantaim ol man i krai.” (Rom 12:15) Aiwara bilong yu bai soim ol, yu krai sori wantaim ol, na dispela bai mekim gut bel bilong ol.

❖ Tingim ol samting yu ken mekim. Yu inap redim liklik kaikai bilong ol? Yu inap wasim ol plet samting i hip i stap na ol i no wasim yet? Yu inap go long stua na baim ol samting ol i laikim? Yu no ken tok, “Sapos yu laik bai mi helpim yu long wanpela samting, orait toksave long mi.” Maski yu tok tru, planti papamama ol bai ting yu no gat taim bilong helpim ol. Mobeta yu askim ol, “Nau mi ken mekim wanem bilong helpim yu?” Orait nau kirap long mekim ol samting ol i askim yu long mekim. Tasol was gut​—no ken go long hap bilong haus em famili i no laikim ol narapela i lukim, na no ken askim askim ol long ol samting yu no gat wok long save long en.

❖ Yu no ken tok, “Mi save long hevi bilong yu.” Ol famili em wanpela bilong ol i dai, bel hevi bilong ol i narapela narapela kain. Na maski wanpela pikinini bilong yu yet i bin i dai, yu no save tru tru long bel hevi bilong ol.

❖ Bikpela hap taim i mas lus pastaim na bai sindaun bilong famili i ken kamap orait gen. Wok strong yet long helpim ol. Pastaim, inap sampela de o wik, planti manmeri bai bung bung long famili bilong mekim gut bel bilong ol, tasol bihain ol i mas i gat sampela helpim moa. Long ol wik na mun bihain, wok long tingim gut wanem ol samting yu ken helpim ol long en.a

[Futnot]

[Ol Piksa long pes 7]

Ol stori bilong Baibel i soim olsem Jisas i gat strong na laik long kirapim bek ol pikinini i dai pinis