Larim Tok Bilong God i Stiaim Wokabaut Bilong Yu
“Tok bilong yu i olsem lam bilong helpim mi long wokabaut stret, na i olsem lait bilong soim rot long mi.”—SONG 119:105.
1, 2. Bilong wanem ol man i no painim rot bilong i stap bel isi na amamas?
YU INAP tingim wanpela taim we yu askim wanpela man long soim rot long yu? Ating yu kam kamap klostu long ples yu laik go long en tasol yu no kliagut wanem rot stret yu bai bihainim bilong kamap long dispela ples. O ating yu bihainim rot i go na yu paul olgeta na nau yu mas tanim na i go bek na bihainim gen narapela rot. Maski yu no kliagut long wanem rot stret long bihainim o yu paul olgeta long rot, em i savepasin long bihainim rot em wanpela man i save gut long dispela ples i tokim yu long en. Kain man olsem inap helpim yu long i go kamap long ples yu laik i go long en.
2 Inap planti tausen yia, ol man i bin bihainim rot ol yet i makim na ol i no larim Man Bilong Wokim ol, em God Jehova, i soim rot long ol. Tasol taim ol man i gat sin i bihainim rot ol yet i makim, ol i no bihainim gutpela rot, nogat. Ol i no inap painim rot bilong i stap bel isi na amamas. Bilong wanem i olsem? Winim 2,500 yia i go pinis, profet Jeremaia i tok: “Mipela man i no inap bosim wokabaut bilong mipela yet.” (Jeremaia 10:23) Sapos wanpela man i laik bosim wokabaut bilong em yet na i no larim wanpela i save gut long rot i soim rot long em, orait hevi bai painim em. Tru tumas, i mas i gat wanpela bilong soim rot long yumi ol man!
3. Bilong wanem God Jehova wanpela tasol inap long soim rot long ol man? Em i tok promis long mekim wanem?
3 God Jehova wanpela tasol inap long soim rot long ol man. Bilong wanem? Long wanem, em tasol i save long pasin i stap long skin bilong ol man winim ol narapela man. Na em i save long wanem samting i bin kamap na ol man i no bihainim stretpela rot em ol i mas bihainim. Na em i save tu long wanem samting ol i mas mekim na bai ol i ken kirap bihainim gen dispela stretpela rot. Na tu, Jehova em i Man Bilong Wokim yumi, olsem na em i save long wanem samting inap helpim tru yumi. (Aisaia 48:17) Olsem na yumi ken bilip long tok promis bilong em i stap long Song 32:8 i tok: “Mi laik skulim yu gut, na soim yu long rot yu mas wokabaut long en. Bai mi skulim yu na lainim yu.” Yumi ken bilip tru olsem: Jehova wanpela tasol inap long soim yumi nambawan gutpela rot long bihainim. Tasol olsem wanem em i save stiaim yumi?
4, 5. Olsem wanem ol tok bilong God i ken soim rot long yumi?
4 Man bilong raitim song, em i beten long Jehova olsem: “Tok bilong yu i olsem lam bilong helpim mi long wokabaut stret, na i olsem lait bilong soim rot long mi.” (Song 119:105) Ol tok bilong God i stap long Baibel, na ol inap helpim yumi long winim ol hevi i painim yumi long i stap bilong yumi. Tru tumas, taim yumi ritim Baibel na larim em i stiaim yumi, bai yumi pilim tru samting em Aisaia 30:21 i toktok long en, em i tok: “Em bai i stap baksait long yupela na em bai i tokim yupela long rot yupela i mas bihainim.”
5 Tasol tingim, Song 119:105 i kolim 2-pela wok bilong Baibel. Namba wan, em i olsem lam bilong helpim yumi long wokabaut stret. Taim ol hevi bilong wan wan de i painim yumi, ol stiatok i stap long Baibel i mas stiaim yumi na bai yumi bihainim gutpela tingting na abrusim ol samting bilong dispela graun inap pulim yumi. Namba tu, ol tok bilong God i olsem lait bilong soim rot long yumi, em i helpim yumi long makim ol samting i stret wantaim laik bilong yumi long i stap oltaim long Paradais em God i tok promis long kamapim. Dispela lait bai helpim yumi long skelim rot yumi laik bihainim—gutpela samting bai kamap long en o samting nogut bai kamap. (Rom 14:21; 1 Timoti 6:9; KTH 22:12) Orait nau yumi ken skelim olsem wanem ol tok bilong God i stap long Baibel inap i stap olsem lam bilong helpim yumi long wokabaut stret na olsem lait bilong soim rot long yumi.
“Lam Bilong Helpim Mi Long Wokabaut Stret”
6. Long wanem ol taim ol tok bilong God i stap olsem lam bilong helpim yumi?
6 Long olgeta de yumi makim ol samting yumi laik mekim. Sampela bilong ol em ol liklik samting, tasol sampela taim sampela samting inap kamap na traim pasin bilong yumi long bihainim stretpela pasin o long yumi no insait long pasin bilong dispela graun. Bilong winim ol dispela traim, yumi mas “traim planti taim long skelim wanem ol pasin i gutpela na wanem ol pasin i nogut.” (Hibru 5:14) Taim yumi kisim stretpela save long Baibel na yumi kliagut long ol stiatok bilong en, yumi wok long skulim maus bilong bel bilong yumi na bai yumi mekim ol samting Jehova i laikim.—Sindaun 3:21.
7. Stori long wanem samting inap kamap na wanpela Kristen i tingting long bung wantaim ol wanwok bilong em i no Kristen.
7 Olsem wanem? Yu wanpela man i givim bel long mekim ol samting bilong mekim Jehova i belgut? (Sindaun 27:11) Sapos yu mekim olsem, dispela i gutpela tru. Tasol olsem wanem sapos sampela wanwok i givim yu wanpela tiket bilong yu ken go wantaim ol long lukim wanpela gem? Ol i save amamas long wok wantaim yu na ol i laik bai yu mekim ol samting wantaim ol bihain long taim wok i pinis. Ating yu ting olsem ol i gutpela man na ol i save bihainim gutpela pasin. Bai yu mekim wanem? Bai i gat sampela hevi i kamap sapos yu tok orait long i go wantaim ol? Olsem wanem Baibel inap helpim yu long skelim gut samting yu mas mekim?
8. Wanem ol stiatok bilong Baibel i helpim yumi long kisim stretpela tingting long ol man yumi laik poroman wantaim?
8 Tingim sampela stiatok bilong Baibel. Namba wan tok yumi inap tingim i stap long 1 Korin 15:33, em i tok: “Sapos yumi poroman wantaim ol man nogut, bai ol i bagarapim gutpela pasin bilong yumi.” Bilong bihainim dispela tok, yu ting yu mas givim baksait olgeta long ol man i no bilip? Baibel i bekim dispela askim olsem, nogat. Aposel Pol yet i save tingim “olgeta kain man,” na ol man i no bilip tu. (1 Korin 9:22) Wok bilong tingim ol narapela na tokim ol long ol bilip Kristen bilong yumi, em wanpela wok Kristen bilong yumi. (Rom 10:13-15) Tasol olsem wanem yumi inap bihainim dispela tok long “mekim gutpela pasin long ol arapela” sapos yumi stap longwe long ol manmeri em ol i mas kisim helpim?—Galesia 6:10.
9. Wanem tok bilong Baibel i helpim yumi long kisim stretpela tingting long pasin bilong poromanim ol wanwok?
9 Tasol pasin bilong mekim gutpela pasin long wanwok i no wankain long pasin bilong pas gut tru wantaim em. Long dispela samting tu i gat wanpela stiatok bilong Baibel i stret long dispela. Aposel Pol i mekim dispela tok lukaut long ol Kristen: “Ol haiden ol i narakain, olsem na yupela i no ken pas wantaim ol na wok bung wantaim ol.” (2 Korin 6:14) Wanem mining bilong dispela tok “no ken pas wantaim ol na wok bung wantaim ol”? Sampela Baibel i tanim dispela tok olsem “no ken raun wantaim,” “no ken wok bung wantaim ol na tingim ol i wankain olsem yu yet,” na “no ken prenim ol man i no stret long prenim.” Yu inap pas o bung wantaim wanwok i go inap long wanem mak? Tok Bilong God, em Baibel, em inap stiaim yu long dispela samting.
10. (a) Olsem wanem Jisas i makim ol man em i laik poroman wantaim ol? (b) Wanem ol askim inap helpim wanpela Kristen long makim gut ol man em i laik poroman wantaim ol?
10 Tingim pasin bilong Jisas, em i bin laikim ol man kirap long taim God i wokim ol. (Sindaun 8:30, 31) Taim em i stap long graun, em i laikim tumas ol disaipel bilong em na pas gut wantaim ol. (Jon 13:1) Em i bin “laikim” tu wanpela man i gat tingting kranki long ol samting bilong lotu em i mas mekim. (Mak 10:17-22) Tasol Jisas i putim mak long husat em bai poroman gut wantaim. Em i no poroman wantaim ol manmeri em ol i no laik mekim laik bilong Papa bilong em. Long wanpela taim Jisas i tok: “Sapos yupela i mekim olsem mi bin tokim yupela, orait yupela i stap pren bilong mi.” (Jon 15:14) Tru, ating yu wok gut wantaim wanpela wanwok bilong yu. Tasol askim yu yet: ‘Dispela man o meri i redi long bihainim tok bilong Jisas? Em i laik kisim save long Jehova, em man Jisas i tokim yumi long lotuim? Em i save bihainim ol stretpela lo Kristen wankain olsem mi yet i save bihainim?’ (Matyu 4:10) Taim yu toktok wantaim ol wanwok bilong yu na yu strong long bihainim ol stiatok bilong Baibel, bai yu inap luksave long bekim bilong ol dispela askim.
11. Stori long sampela samting inap kamap na tok bilong God i mas soim rot long yumi.
11 Long ol narapela samting tu i save kamap long laip bilong yumi, tok bilong God inap i stap olsem lam bilong helpim yumi long wokabaut stret. Olsem: Rot i op long wanpela Kristen i no gat wok mani long kisim wanpela wok. Tasol bilong mekim dispela wok, em i mas lusim bikpela hap taim na strong long mekim, na sapos em i orait long mekim dispela wok, em bai i no inap i go long sampela miting Kristen na em i no inap insait long sampela wok bilong lotu i tru. (Song 37:25) Ating narapela Kristen i gat bikpela laik long lukim ol piksa wokabaut samting i no stret i kalapim ol stiatok bilong Baibel. (Efesus 4:17-19) Ating narapela em i save bel hevi kwik long samting wanpela wanbilip i mekim. (Kolosi 3:13) Long dispela olgeta samting, yumi mas larim Baibel i stap olsem lam bilong helpim yumi long wokabaut stret. Tru tumas, long rot bilong bihainim ol tok bilong Baibel yumi inap winim ol hevi i painim yumi. Tok Bilong God i “gutpela samting tru bilong skulim yumi long tok tru na bilong stretim ol manmeri tingting bilong ol i no stret na bilong stretim wokabaut bilong yumi na bilong skulim yumi long ol pasin i stret long ai bilong God.”—2 Timoti 3:16.
“Lait Bilong Soim Rot Long Mi”
12. Olsem wanem tok bilong God i olsem lait bilong soim rot long yumi?
12 Song 119:105 i tok tu olsem ol tok bilong God i olsem lait bilong soim rot long yumi. Yumi save long ol samting bai kamap bihain, long wanem, Baibel i kamapim klia as na ol hevi i stap long graun na wanem samting bai kamap. Tru tumas, yumi luksave olsem yumi stap long “las de” bilong dispela taim nogut bilong nau. (2 Timoti 3:1-5) Yumi save long ol samting bai kamap bihain na dispela i mas mekim sampela samting long i stap bilong yumi long nau. Aposel Pita i tok: “Sapos dispela olgeta samting bai i pinis long dispela kain pasin, orait yupela i ting yupela i mas bihainim wanem kain pasin? Yupela i mas givim laip bilong yupela long God na wokabaut long pasin holi na bihainim olgeta pasin bilong God. Long dispela pasin yupela i mas wetim De bilong God i kamap.”—2 Pita 3:11, 12.
13. Yumi save olsem taim i sot pinis olsem na dispela i mas mekim wanem long tingting bilong yumi na long i stap bilong yumi?
13 Tingting bilong yumi na pasin yumi bihainim long i stap bilong yumi i mas soim olsem yumi bilip tru olsem “dispela graun bai i pinis, na olgeta pasin bilong dispela graun . . . ol tu bai i pinis wantaim.” (1 Jon 2:17) Taim yumi bihainim ol stiatok bilong Baibel, dispela bai helpim yumi long tingting gut long wanem ol mak yumi putim bilong winim long bihain. Jisas i tok: “Yupela i mas wok pastaim long painim kingdom bilong God wantaim stretpela pasin bilong em. Na bihain bai em i givim dispela olgeta arapela samting tu long yupela.” (Matyu 6:33, Nupela Testamen na Ol Sam) Yumi amamas tru long lukim planti yangpela i soim olsem ol i bilip long tok bilong Jisas na ol i mekim wok autim tok fultaim! Sampela narapela—famili olgeta—i bin go sindaun long ol hap i sot long ol man bilong autim tok bilong Kingdom.
14. Wanpela famili Kristen i mekim wanem bilong mekim bikpela wok moa bilong autim tok?
14 Tingim wanpela famili Kristen em papa, mama, na tupela pikinini, ol i lusim Amerika na i go sindaun long Ripablik Dominika na bung wantaim wanpela kongrigesen i stap long wanpela taun we i gat 50,000 manmeri. Dispela kongrigesen i gat 130 pablisa. Tasol long Epril 12, 2006, inap 1,300 manmeri i kam long Memorial bilong tingim indai bilong Krais! Ol man i stap long dispela teritori ol i olsem kaikai i “redi pinis” bilong kisim, olsem na bihain long 5-pela mun, papa, mama, pikinini man, na pikinini meri ol i mekim 30 Baibel stadi. (Jon 4:35) Papa i tok: “Dispela kongrigesen i gat 30 brata na sista bilong ol narapela kantri em ol i kam i stap long dispela ples bilong helpim ol bratasista bilong dispela hap. Inap olsem 20 bilong ol i bilong Amerika, na ol narapela ol i bilong ol ailan Bahama, Itali, Kanada, Nu Silan na Spen. Ol i amamas long autim tok na dispela i strongim ol bratasista bilong dispela ples.”
15. Yu bin kisim wanem ol blesing taim yu putim ol samting bilong Kingdom i stap namba wan long laip bilong yu?
15 Tru, planti i no inap i go sindaun long narapela ples em ol i sot long ol man bilong autim tok. Tasol ol lain em ol inap long i go—o ol inap long stretim ol samting long sindaun bilong ol na bai ol i ken go long narapela ples—ol bai kisim planti blesing taim ol i insait long dispela pasin bilong autim tok. Na maski yu mekim wok long wanem hap, taim yu mekim wok bilong Jehova long strong bilong yu olgeta, bai yu kisim amamas long dispela. Sapos yu putim ol samting bilong Kingdom i stap namba wan samting long laip bilong yu, Jehova bai ‘givim planti gutpela samting long yu na yu no ken sot.’—Malakai 3:10.
Kisim Helpim Long Ol Tok Bilong God
16. Sapos yumi larim ol tok bilong God i stiaim yumi, olsem wanem dispela bai helpim yumi?
16 Olsem yumi stori pinis, ol tok bilong Jehova i save helpim yumi long tupela rot. Ol i stap olsem lam bilong helpim yumi long wokabaut stret, ol i helpim yumi long bihainim stretpela rot na stiaim yumi taim yumi makim ol samting yumi mas mekim. Na tu, ol tok bilong Jehova i olsem lait bilong soim rot long yumi, na i helpim yumi long save long wanem samting bai kamap bihain. Ol dispela samting i helpim yumi long bihainim tok bilong Pita: “Oltaim tingting bilong yupela i mas i stap redi na yupela i mas bosim gut wokabaut bilong yupela. Yupela i mas bilip strong na wetim God i mekim dispela gutpela samting em i laik mekim long yupela, long taim Jisas Krais i kamap ples klia.”—1 Pita 1:13.
17. Olsem wanem pasin bilong stadi long Baibel bai helpim yumi long bihainim tok bilong God?
17 Tru tumas, Jehova i bin kamapim ol tok bilong soim rot long yumi. Tasol olsem wanem? Bai yu bihainim ol dispela tok? Bilong kliagut long rot Jehova i makim, yu mas putim mak long ritim wanpela hap bilong Baibel long olgeta wan wan de. Tingim tingim long bel ol tok yu ritim, traim long luksave long tingting bilong Jehova long ol samting, na tingim ol narapela narapela rot we yu ken bihainim ol dispela tok long i stap bilong yu. (1 Timoti 4:15, NW) Orait nau mekim wok long “stretpela tingting” taim yu makim ol samting yu bai mekim.—Rom 12:1, NW.
18. Taim yumi larim Baibel i stiaim yumi, yumi kisim wanem ol blesing?
18 Sapos yumi larim ol stiatok i stap long Baibel i stiaim yumi, ol bai givim save long yumi na stiaim yumi long bihainim stretpela rot taim yumi makim ol samting yumi bai mekim. Yumi ken bilip tru olsem ol tok bilong Jehova long Baibel bai “givim gutpela tingting long ol man i no gat planti save.” (Song 19:7) Taim yumi larim Baibel i stiaim yumi, bel bilong yumi i no gat tok na yumi stap belgut, long wanem, yumi save yumi mekim ol samting God i laikim. (1 Timoti 1:18, 19) Sapos yumi larim tok bilong God i stiaim yumi long olgeta de, Jehova bai givim bikpela blesing tru long yumi, em laip i stap gut oltaim.—Jon 17:3.
Yu Inap Tingim?
• Bilong wanem em i bikpela samting long larim God Jehova i soim rot long yumi?
• Long wanem rot tok bilong God i stap olsem lam bilong helpim yumi long wokabaut stret?
• Olsem wanem tok bilong God i olsem lait bilong soim rot long yumi?
• Olsem wanem pasin bilong stadi long Baibel inap helpim yumi long bihainim tok bilong God?
[Piksa long pes 15]
Yumi ken pas wantaim ol man i no bilip inap long wanem mak?
[Piksa long pes 16]
Ol man Jisas i poroman wantaim ol em ol man i mekim laik bilong Jehova
[Ol Piksa long pes 17]
Olsem wanem? Sindaun bilong yumi i soim olsem yumi save putim ol samting bilong Kingdom i stap namba wan?