Olsem Wanem Yu Inap Makim Ol Samting God i Laikim?

WANPELA man long Amerika i kisim sek bilong em i go long beng. Sek em inap olsem 25,000 dola. Em i laik putim dispela mani long pasbuk. Tasol man i wok long beng i tokim em long yusim dispela mani long baim ol sea long stok maket, long wanem, long dispela rot bai em kisim bikpela winmani. Orait man i bihainim dispela tok na sotpela taim bihain bikpela hap mani bilong em i lus.

Stori hia i kamapim olsem i hatwok long makim gut ol samting yumi bai mekim. Olsem wanem long ol arapela samting yumi gat wok long makim? Ol disisen yumi wokim inap kamapim gutpela samting o kamapim hevi, ol i ken helpim yumi long stap laip o ol inap mekim na yumi dai. Olsem wanem yumi ken save olsem tru tru ol samting yumi makim bilong mekim em i stret wantaim savetingting?

“Rot Yupela i Mas Bihainim”

Long olgeta de yumi makim ol samting yumi bai mekim, olsem kaikai yumi bai kisim, klos yumi bai pasim, hap yumi bai go long en, na ol narapela samting. Sampela disisen yumi wokim i olsem ol i liklik liklik samting, tasol ol inap mekim bikpela samting tru long yumi. Olsem: Disisen bilong kisim smok long namba wan taim inap mekim na yu kalabus long smok inap long laip olgeta bilong yu. Yumi no ken ting ol liklik disisen i olsem samting nating.

Bai yumi painim we gutpela tok bilong stiaim yumi taim yumi gat wok long makim ol samting yumi bai mekim? Gutpela tru sapos wanpela gutpela man inap helpim yumi taim yumi gat ol bikpela samting long makim! Yumi inap painim kain man olsem. Wanpela buk bilong bipo tru i kamapim ol tok i stret long nau, buk i tok: “Taim yupela i wokabaut na yupela i paul long wanem rot yupela i mas bihainim, rot bilong han sut o rot bilong han kais, orait em bai i stap baksait long yupela na em bai i tokim yupela long rot yupela i mas bihainim.” (Aisaia 30:21) Husat i mekim dispela tok? Olsem wanem yu inap save olsem tok bilong em i gutpela?

Tok hia i kam long Baibel, na planti milion manmeri i bin stadi long dispela buk na kisim save olsem em tok bilong God Jehova, Man Bilong Wokim yumi. (2 Timoti 3:​16, 17) Jehova i bin wokim yumi, olsem na em i nambawan man bilong soim rot long yumi. Na tu, em inap save long ol samting bai kamap bihain, em yet i tok: “Taim wanpela samting i no kamap yet, mi save tokaut long dispela samting bai i kamap na bai i go pinis olsem wanem. Bipo yet mi bin tok long ol samting bai i kamap, na bihain ol dispela samting i kamap tru olsem mi bin tok. Sapos mi laik mekim wanpela samting, orait mi save mekim tasol.” (Aisaia 46:10) Dispela em i as na man bilong raitim song i bilip long Tok Bilong Jehova, em i tok: “Tok bilong yu i olsem lam bilong helpim mi long wokabaut stret, na i olsem lait bilong soim rot long mi.” (Song 119:105) Tasol olsem wanem Jehova i stiaim yumi i go long gutpela rot nau long taim bilong planti hevi? Olsem wanem yumi inap makim ol samting bilong mekim olsem God i laikim?

Bihainim Ol Stiatok Bilong Baibel

God Jehova i givim ol gutpela stiatok long ol Kristen na bai ol inap makim gut ol samting ol bai mekim. Wok bilong kisim save long ol stiatok bilong Baibel na long bihainim i wankain olsem wok bilong lainim wanpela tok ples na mekim wok long en. Taim yu lainim pinis wanpela tok ples, yu inap save long taim wanpela i no kolim stret tok, long wanem, tok i no krai gut long yau bilong yu. Tru ating yu no inap kamapim stret as na tok i kranki, tasol yu save olsem tok i no stret. Taim yu kisim save long ol stiatok bilong Baibel na long pasin bilong bihainim, bai yu save taim wanpela disisen i no stret wantaim ol dispela stiatok.

Olsem: Ating yangpela man i tingting long em bai katim gras bilong em long wanem stail. Baibel i no tambuim wanpela kain stail bilong katim gras. Tasol tingim wanpela stiatok bilong Baibel. Aposel Pol i tok: “Mi laik bai ol meri i mas putim ol gutpela klos samting, inap tasol long ol. Ol i no ken hambak na bilasim gras na skin bilong ol long ol kain kain bis na bilas gol na ol klos i dia tumas. Nogat. Ol meri i laik bihainim tok bilong God, ol i mas mekim ol kain kain gutpela wok. Dispela em i bilas tru bilong ol.” (1 Timoti 2:​9, 10) Pol i stori long ol meri, tasol dispela stiatok i stret long man na meri wantaim. Wanem stiatok? Em stiatok olsem lukluk bilong yumi i mas kamapim olsem yumi no hambak na yumi bihainim gutpela tingting. Olsem na yangpela man i ken askim em yet, ‘Stail bilong gras bilong mi i stret long pasin Kristen long no ken hambak?’

Wanpela yangpela i ken lainim wanem gutpela stiatok long tok bilong disaipel Jems? Em i tok: “Yupela i lusim God, olsem meri i lusim man bilong en na i go pamuk nabaut. Harim. Sapos man i laikim pasin bilong graun, em i mekim pasin birua long God. Ating yupela i no save long dispela, a? Olsem na sapos man i laik pren wantaim ol pasin bilong graun, em bai i kamap birua bilong God.” (Jems 4:4) Ol Kristen i no laik tru long kamap pren bilong dispela graun i birua long God. Olsem wanem? Sapos yangpela i katim gras long wankain stail olsem ol wankrismas i laikim, dispela bai i kamapim olsem em i laikim God o em i laikim pasin bilong dispela graun? Yangpela man i tingting long em bai katim gras long wanem stail, em i ken mekim wok long ol stiatok na wokim gutpela disisen. Em nau ol stiatok bilong God i ken helpim yumi long makim ol samting yumi bai mekim. Taim yumi lain long makim ol samting i stret wantaim ol stiatok bilong God, ol disisen bilong yumi bai kamap gutpela moa na ol samting yumi makim i no ken nogutim yumi.

Yumi inap painim planti stiatok long Baibel. Tru ating bai yumi no painim skripsa i stret olgeta long ol samting yumi tingting long en, tasol yumi inap ritim stori long olsem wanem sampela i bin bihainim tok bilong God na long sampela i bin givim baksait long ol tok lukaut bilong em. (Stat 4:​6, 7, 13-16; Lo 30:​15-20; 1 Korin 10:11) Taim yumi ritim ol dispela stori na skelim gut ol samting i bin kamap, dispela bai helpim yumi long kliagut long ol stiatok bilong God em ol inap helpim yumi long makim ol samting God i laikim.

Tingim tok Jisas Krais i bin mekim long aposel Pita. Ol man bilong kisim takis ol i askim Pita: “Ating tisa bilong yupela i save givim takis bilong tempel?” Na Pita i tok, “Yes.” Bihain liklik Jisas i askim Pita: “Ol king bilong dispela graun i save kisim pe bilong ol kain kain takis long husat? Ol i save kisim long ol lain bilong ol yet, o long ol arapela man?” Taim Pita i tok: “Long ol arapela man,” Jisas i tokim em: “Olsem na ol lain bilong ol yet i no mas givim takis. Tasol nogut yumi mekim ol i kros long yumi. Yu go long raunwara na tromoi huk. Na namba wan pis yu pulim, em yu kisim na opim maus bilong en, na bai yu lukim wanpela mani i stap insait. Yu kisim dispela mani na givim long ol, bilong inapim takis bilong mitupela wantaim.” (Matyu 17:​24-27) Yumi inap painim wanem ol stiatok long dispela stori?

Long rot bilong ol askim Jisas i stiaim tingting bilong Pita olsem: Jisas em i Pikinini Bilong God, olsem na em i no gat wok long baim takis. Pastaim Pita i no kliagut long dispela, tasol long gutpela pasin Jisas i bin helpim em long tingim dispela samting. Taim yumi lukim popaia narapela i mekim, yumi inap makim olsem yumi bai bihainim pasin bilong Jisas na sori long man na yumi no kamapim popaia bilong em long hatpela pasin.

Dispela tok i helpim Pita long kisim save long as na ol i baim takis​—ol i no laik bagarapim bel bilong narapela. Na i gat narapela stiatok yumi kisim long dispela stori. I bikpela samting moa long yumi mas tingim maus bilong bel bilong narapela na no ken strong long mekim tasol ol samting yumi gat rait long mekim.

Wanem samting i kirapim yumi long tingim maus bilong bel bilong man long taim yumi makim ol samting yumi bai mekim? Em pasin bilong laikim tru ol narapela. Jisas Krais i tok, pasin bilong laikim tru na givim bel bilong yumi long God i olsem namba wan lo, namba tu bikpela lo em long laikim ol narapela. (Matyu 22:39) Tasol pasin bilong dispela graun na sin i stap long skin bilong yumi i kirapim yumi long tingim yumi yet tasol. Olsem na man i laik mekim pasin laikim long ol narapela olsem em i mekim long em yet, em i mas mekim tingting bilong em i kamap nupela.​—Rom 12:2.

Planti ol i bin mekim tingting bilong ol i kamap nupela, olsem na maski em bikpela samting o liklik samting ol i makim bilong mekim, ol i save tingim ol narapela. Pol i tok: “Tru, ol brata, God i bin singautim yupela bilong yupela i ken i stap fri. Tasol nogut yupela i ting olsem, ‘Mipela i stap fri, olsem na mipela i ken mekim ol pasin bilong olpela bel.’ Nogat. Yupela i no ken ting olsem. Yupela wan wan i mas i stap olsem wokboi bilong ol arapela manmeri bilong God, na yupela i mas givim bel bilong yupela long ol.” (Galesia 5:13) Olsem wanem yumi ken mekim dispela samting? Tingim wanpela yangpela meri i bin go sindaun long wanpela liklik stesin bilong helpim ol man long kisim save long Baibel. I no longtaim na em i luksave olsem bikpela tok i kamap long klos em i pasim, em ol klos ol man long biktaun bai i no tingting planti long en. Maski klos na bilas bilong meri i gutpela, em i wokim disisen olsem em i no ken pasim kala kala klos i gat stail na bai ‘ol man i no inap tok nogut long tok bilong God.’​—Taitus 2:5.

Olsem wanem long yu? Bai yu mekim wanem sapos yu mas wokim disisen long bilas bilong yu o long narapela samting em bilong yu yet long makim? Yu mas save olsem Jehova i amamas taim ol samting yu makim i soim olsem yu tingim maus bilong bel bilong ol narapela.

Tingting Long Bihain

Yumi tingim ol stiatok bilong Baibel na maus bilong bel bilong ol narapela taim yumi makim ol samting, orait, i gat wanem narapela samting long tingim? Tru, ol Kristen i wokabaut long rot i no op tumas na i hatwok long bihainim, tasol i gat planti samting God i orait long ol yet i makim. (Matyu 7:​13, 14) Yumi mas tingim ol samting ol disisen yumi wokim bai mekim long yumi long bihain, long ol samting bilong spirit, bel na tingting, na long helt bilong yumi.

Olsem wanem sapos yu tingting long kisim wanpela wok. Ating wok em i gutpela na no gat rong long en. Wok bai i no pasim yu long go long ol miting Kristen na long ol kibung. Na pe i gutpela tru. Bos i tingim tru save bilong yu long wok na em i laik givim bikpela wok long yu. Na yu yet yu laikim dispela kain wok. Olsem wanem? Sampela samting i mekim na yu no laik kisim dispela wok? Ating yu luksave olsem yu inap laikim tumas dispela wok. Bos i tok bai em i no subim yu long wok ovataim. Tasol bilong pinisim wanpela wok, bai yu sakim gutpela tingting na subim yu yet long wok planti tumas? Bai yu wok ovataim planti taim? Dispela inap tekewe haptaim bilong yu long stap wantaim famili na long mekim ol samting bilong lotu?

Tingim bikpela disisen Jim i bin wokim long wok bilong em. Em i bin wok strong tru long kamap bikman bilong wanpela kampani. Bihain em i kirap bosim ol wok kampani bilong em i mekim long Esia, em i stap bikbos long ofis bilong kampani i stap long Amerika, na tu, em i wanpela memba bilong lain dairekta i bosim wok kampani i mekim long Yurop. Tasol taim hevi long mani i kamap long Japan, em i luksave olsem wok bilong kisim mani na bikpela namba em i samting nating. Mani em i bin wok strong long kisim i pinis wantu. Em i pilim olsem laip bilong em i no gat as bilong en. Em i askim em yet: ‘Long tenpela yia bihain, bai mi stap na mekim wanem?’ Em i luksave olsem meri pikinini bilong em ol i putim tingting bilong ol i go long samting i gat as tru bilong en. Inap planti yia ol i bung wantaim ol Witnes Bilong Jehova. Jim i laik bai laip bilong em tu i mas i gat as bilong en, olsem na em i kirap stadim Baibel.

I no longtaim na Jim i luksave olsem ol samting em i mekim i pasim rot bilong em long mekim ol gutpela wok Kristen. Oltaim em i raun long Esia, Amerika, na Yurop, na em i no gat taim long stadi long Baibel na bung wantaim ol wanbilip. Olsem na em i mas wokim disisen: ‘Bai mi mekim yet ol wankain samting mi mekim pinis inap 50 yia, o bai mi mekim nupela samting olgeta?’ Taim em i beten na tingim pinis ol samting disisen bilong em bai kamapim long bihain em i lusim olgeta wok bilong em na holim wanpela wok tasol na bai em i gat taim bilong mekim ol samting bilong lotu. (1 Timoti 6:​6-8) Samting em i makim i givim amamas long em na i opim rot long em i ken givim bel long mekim ol wok Kristen.

Maski samting yumi makim bilong mekim em i liklik samting o bikpela samting, olgeta disisen i bikpela samting. Ol samting yu makim long nau inap helpim yu long stap gut o givim hevi long yu, na bihain em inap makim olsem yu bai stap laip o kisim bagarap. Yu inap tru long makim gut ol samting yu bai mekim sapos yu tingim ol stiatok bilong Baibel, maus bilong bel bilong ol narapela, na ol samting i kamap bihain. Makim ol samting God i laikim.

[Piksa long pes 13]

Ol samting yu makim bilong mekim inap givim bikpela hevi long yu

[Piksa long pes 14]

Olsem wanem ol stiatok bilong Baibel inap helpim em long wokim gutpela disisen?

[Piksa long pes 15]

Jisas i mekim gutpela tok long Pita