Askim

Yu ting tok bilong Sindaun 22:6 i makim olsem taim ol papamama Kristen i skulim gut ol pikinini bilong ol, ol pikinini i no inap lusim rot bilong Jehova?

Dispela ves i tok: “Skulim pikinini bilong yu long bihainim gutpela pasin, na em bai i wokabaut long dispela rot inap long em i lapun tru.” Taim diwai i liklik yet, sapos yumi bendim liklik, orait taim em i wok long go bikpela, em bai bihainim dispela mak. Na olsem tasol sapos papamama i skulim gut ol pikinini, ating taim ol i bikpela pinis ol bai mekim yet wok bilong Jehova. Olgeta papamama i save, bilong skulim gut ol pikinini olsem, ol i mas lusim bikpela hap taim na bikpela strong. Bilong mekim ol pikinini bilong ol i kamap disaipel Kristen, papamama i mas skulim gut ol, givim tok long ol, strongim bel bilong ol, na stretim ol, na tupela i mas i stap olsem gutpela piksa ol pikinini i ken bihainim. Oltaim ol i mas mekim dispela wok long pasin sori, i go inap planti yia.

Tasol sapos pikinini i lusim wok bilong Jehova, yu ting dispela i makim olsem papamama i no bin skulim ol gut? Tru, sampela taim ating papamama i slek long skulim pikinini long ol lo na tok bilong Jehova taim ol i mekim bikpela long em. (Efesus 6:4) Tasol dispela tok bilong Sindaun 22:6 i no makim olsem sapos papamama i skulim gut ol pikinini, orait tru tru bai ol i stap gut long God. Papamama i no inap mekim na ol pikinini bai kamap olsem tupela i laikim, nogat. Ol pikinini i wankain olsem ol manmeri i bikpela pinis​—ol yet i stap fri long mekim ol samting ol i laikim, na taim ol i bikpela pinis ol yet i mas makim wanem rot ol i laik bihainim. (Lo 30:​15, 16, 19) Maski papamama i wok strong tru, sampela pikinini i save lusim God, wankain olsem Solomon, em yet i bin raitim dispela Sindaun 22 ves 6 nau yumi skelim. Jehova tu i gat sampela pikinini man ol i no bin stap gut long em.

Olsem na dispela Sindaun 22 ves 6 bilong Baibel i no makim olsem olgeta pikinini “bai i wokabaut long dispela rot” na stap gut long en​—tasol yumi ken ting planti pikinini bai mekim olsem. Dispela inap strongim tru bel bilong ol papamama! Ol i ken save, hatwok bilong ol long skulim ol pikinini long rot bilong Jehova bai kamapim gutpela samting, na dispela save i ken mekim gut bel bilong ol. Dispela wok bilong papamama i bikpela samting, na ol inap tru long stiaim ol pikinini, olsem na ol i mas tingim gut dispela wok ol i holim.​—Lo 6:​6, 7.

Na maski ol pikinini i lusim wok bilong Jehova, ol papamama husat i bin wok strong long skulim ol, ol i ken ting bihain ol pikinini bai kisim bek stretpela tingting. Tok i tru bilong Baibel i gat bikpela strong, na ol pikinini i no inap lusim tingting kwik long ol tok papamama i bin skulim ol long en.​—Song 19:7.