Wanpela Yia Long Graun Bilong Promis

LONG 1908 ol i painim wanpela samting long taun Geser em wanpela taun Baibel i stori long en. Dispela taun i stap klostu long stretpela graun bilong nambis long hap wes bilong Jerusalem. Ol i painim wanpela liklik plet ston, ol i ting em bilong yia 900 B.C.E. samting. Ol i bin raitim ol tok i stap long dispela ston long tok Hibru bilong bipo, na em i stori long taim bilong planim na kisim kaikai long gaden, na ol bung samting ol i save mekim long dispela taim. Ol i kolim dispela plet ston olsem Kalenda Bilong Geser.

Dispela ston i gat wanpela nem long en: Abiya. Planti saveman bilong painim ol samting bilong bipo ol i ting dispela em i homwok bilong wanpela skulmangi, tasol i no olgeta saveman i wanbel wantaim dispela tok.a Olsem wanem? Yu laik piksaim long tingting Graun Bilong Promis long rot bilong stori bilong wanpela mangi i bin stap long dispela taim bipo? Taim yu mekim olsem, dispela inap helpim yu long tingim sampela stori bilong Baibel.

Tupela Mun Bilong Kisim Kaikai

Mangi bilong raitim dispela kalenda bilong bipo i stori pastaim long wok bilong kisim kain kain kaikai bilong gaden. Maski dispela em i namba wan samting em i raitim long kalenda, yumi ken save long as na ol Israel i ting dispela wok em i pinis bilong bikpela hap bilong wok gaden. Mun Etanim (bihain ol i kolim Tisri) i makim Septemba/Oktoba long kalenda bilong yumi. Taim bikpela hap bilong wok bilong kisim kaikai i pinis, dispela em i taim bilong amamas em yangpela Abiya tu i insait long en. Tingim bikpela amamas em i kisim taim em i helpim papa bilong em long wokim haus win em ol bai stap long en inap wanpela wik, taim ol i amamas na tok tenkyu long Jehova long gutpela kaikai ol i kisim long gaden bilong ol!​—Lo 16:​13-​15.

Long dispela taim, ol oliv klostu i redi na bai famili bilong Abiya i ken kisim ol long rot bilong paitim ol han bilong diwai. Ating em wanpela wok i hatwok tumas long yangpela Abiya i mekim, tasol em i amamas long lukim ol narapela i mekim. (Lo 24:​19, 20) Orait nau ol bai bungim ol oliv na kisim i go long wanpela ples i gat ston bilong wilwilim oliv bilong wokim wel. O famili inap kisim sampela wel long rot i no hatwok tumas​—ol i putim ol oliv i bruk insait long wara na kisim wel i drip i kam antap long wara. Dispela gutpela wel i bilong kaikai, na tu, ol i yusim olsem wel bilong lam na marasin bilong wasim ol sua samting, olsem ol sua yangpela Abiya inap kisim taim em i pilai.

Tupela Mun Bilong Planim Kaikai

Taim namba wan ren i kirap, ating Abiya i amamas long pilim wara i wasim skin bilong em. Ating papa bilong em i tokim em olsem ren em i bikpela samting bilong helpim graun. (Lo 11:14) San i bin kukim graun inap planti mun na graun i go strong, tasol ren i mekim na graun i go malumalum na i redi long ol man i ken brukim graun. Man bilong brukim graun long bipo i yusim gut hap plang bilong brukim graun, ating dispela plang i gat hap ain long en na wanpela animal i pulim. Em i laik wokim ol liklik baret long graun na ol i no ken krungut. Graun em i bikpela samting, olsem na ol fama bilong Israel i wokim gaden long ol liklik hap graun tu, na long sait bilong ol maunten. Tasol ating long maunten ol i mas yusim baira samting bilong wokim gaden.

Taim ol i brukim graun pinis, ol inap planim wit na bali. Namba tu samting Kalenda Bilong Geser i tok long en, em tupela mun bilong planim ol dispela kaikai. Ating man bilong planim kaikai i putim ol sid insait long laplap bilong em na tromoi nabaut ol sid long gaden.

Tupela Mun Bilong Planim Ol Narapela Kaikai

“Dispela graun i gat planti gris” i save karim kaikai long olgeta taim. (Lo 3:25) Long Disemba, bikpela ren i pundaun na ples i kamap grin. Em taim bilong planim kain kain bin na ol narapela kumu sayor samting. (Amos 7:​1, 2, NW) Long plet ston, Abiya i kolim dispela olsem “nupela gras” o olsem narapela buk i tok, “planim ol narapela kaikai,” em taim bilong kukim switpela kaikai long kumu sayor samting ol i kisim long gaden long dispela taim.

Taim san i wok long kamap strong moa, diwai amon i putim ol waitpela na pinkpela plaua, na dispela i olsem mak bilong taim bilong san i kam klostu. Sampela taim dispela inap kamap long mun Janueri taim san i wok long kamap hat liklik.​—Jeremaia 1:​11, 12.

Mun Bilong Kisim Gras i Gat Plaua

Orait nau Abiya i tok long wanpela kain gras i gat plaua. Dispela inap kirapim yu long tingim samting i bin kamap long hap is bilong ol maunten bilong Judia inap planti handet yia paslain long taim bilong Abiya. Tupela man bilong lukstil i kam long taun Jeriko, na Rahap i bin haitim tupela “aninit long ol mekpas gras,” dispela gras i stap long rup bilong haus bambai em i ken drai. (Josua 2:6) Dispela kain gras i bikpela samting long ol Israel. Bilong kisim ol rop bilong en, gras i mas sting pastaim. Wara bilong nait i mekim na dispela samting i kamap isi isi o ol i putim gras insait long wara na bai em i sting hariap. Taim ol i kisim ol rop bilong en ol i wokim laplap long en, na long dispela laplap ol i wokim ol sel bilong bot, ol haus sel, na ol klos. Ol i yusim tu dispela rop olsem wik bilong lam.

Sampela i ting ol man i no bin planim dispela kain gras i gat plaua long Geser we i no gat planti wara. Na sampela narapela i tok ol i save planim dispela kain gras sampela mun bihain. Olsem na sampela i ting dispela tok “gras i gat plaua” long Kalenda Bilong Geser i makim wanpela kain “gras” ol i save givim long ol animal bilong kaikai.

Mun Bilong Kisim Bali

Long olgeta yia, bihain long mun bilong katim gras i gat plaua, Abiya i lukim ol kaikai bilong bali i grinpela yet, em dispela kaikai em i stori long en long kalenda bilong em bihain long wok bilong katim gras. Long tok Hibru dispela mun em Abip, na i makim taim kaikai i mau pinis, tasol i malumalum yet. Jehova i tok: “Long mun Abip long olgeta yia, yupela i mas mekim kaikai bilong tingim De God I Larim yupela I Stap Gut.” (Lo 16:1) Mun Abip (bihain ol i kolim Nisan) i makim hap bilong Mas na Epril long kalenda bilong nau. Ating ol i tingim taim bilong bali i mau na ol i makim kirap bilong dispela mun. Long nau tu, ol Karait Juda i tingim taim bilong bali i mau na ol i makim kirap bilong nupela yia bilong ol. Ol i mas kisim ol namba wan kaikai bilong bali na mekim i go i kam long ai bilong Jehova long Abip 16.​—Wok Pris 23:​10, 11.

Bali em i bikpela samting tru long laip bilong planti Israel. Pe bilong en i daun moa long wit, olsem na planti taim ol i wokim bret long en, na moa yet ol rabisman i mekim olsem.​—Esekiel 4:​9, 12.

Mun Bilong Kisim na Skelim Kaikai

Sapos yu tingting i go bek long taim bilong Abiya, yu ken piksaim long tingting olsem wanpela moning em i lukim olsem ol klaut i wok long lusim skai​—bai i no gat ren inap sampela hap taim. Orait nau ol kaikai na plaua samting bilong graun bilong promis i mas kisim wara bilong nait long givim wara long en. (Stat 27:28) Ol fama bilong Israel i save olsem sampela kaikai ol i kisim long taim bilong bikpela san i mas kisim ol win i stret i kam inap long taim bilong Pentikos. Kolwin i kam long hap not na i gat wara long en i helpim wit na bali samting long kamap gut, tasol dispela win inap bagarapim ol diwai prut taim ol i putim plaua pinis. Win i kam long hap saut i hat na i drai, em i helpim ol plaua long op na long paura bilong ol plaua i ken go long ol narapela plaua.​—Sindaun 25:23; Solomon 4:16.

Jehova, em Man i bosim win na ren samting, em i mekim na ol samting bilong graun i wok gut. Long taim bilong Abiya, Israel i wanpela “kantri i save kamapim wit na bali, na pikinini bilong diwai wain na diwai fik na diwai pomigranet na diwai oliv, na hani bilong binatang.” (Lo 8:8) Ating bubu man bilong Abiya i bin tokim em long taim ol i gat planti gutpela samting aninit long wok bos bilong saveman King Solomon, em dispela samting i kamapim klia olsem Jehova i bin blesim ol.​—1 King 4:20.

Taim kalenda i stori pinis long wok bilong kisim kaikai, orait nau kalenda i gat wanpela tok em sampela i ting em i makim “skelim.” Dispela inap makim wok bilong skelim kaikai ol i kisim na givim sampela hap long ol papa bilong gaden na ol wokboi bilong ol o bilong baim takis. Tasol sampela narapela saveman i ting dispela tok Hibru i makim “taim bilong kaikai na amamas” na ol i ting em i makim Bikpela De Bilong Amamas Long Kisim Kaikai Long Gaden, em dispela i kamap long mun Sivan (Me/Jun).​—Kisim Bek 34:22.

Tupela Mun Bilong Katim Ol Han Bilong Diwai

Orait nau Abiya i stori long tupela mun bilong lukautim ol diwai wain. Ating em i bin helpim wok bilong katim ol han bilong ol diwai wain na bai san i ken holim ol pikinini wain. (Aisaia 18:5) Orait bihain, taim bilong kisim ol pikinini wain i kamap, em taim bilong amamas bilong ol yangpela long dispela taim bipo. Ol namba wan pikinini wain i swit tru! Ating Abiya i bin harim stori bilong 12-pela man bilong lukstil em Moses i bin salim ol i go long Graun Bilong Promis. Ol i go long taim ol namba wan pikinini wain i kamap na bai ol i ken lukim dispela graun i gutpela olsem wanem. Long dispela taim, wanpela rop bilong pikinini wain i bikpela tru na tupela man i mas karim!​—Namba 13:​20, 23.

Mun Bilong Ol Prut

Laspela samting Abiya i raitim long kalenda em i stori long ol prut. Long Midel Is long bipo, taim bilong san em i taim bilong mekim wok long ol prut. Bihain long taim bilong Abiya, Jehova i tok long “basket i gat planti gutpela kaikai [“prut,” NW]” bilong makim olsem ‘taim bilong bagarapim ol manmeri bilong Israel i kamap pinis.’ Long tok Hibru dispela i olsem wanpela tok piksa na i makim olsem taim bilong kisim prut i olsem taim bilong bagarapim ol samting. (Amos 8:2) Dispela i mas kirapim bikhetlain Israel long tingim olsem pinis bilong ol i klostu na Jehova bai kotim ol. Ol fik tu i sampela bilong ol dispela prut em Abiya i stori long en. Ol inap wokim kek long ol fik o yusim olsem marasin bilong ol buk long skin.​—2 King 20:7.

Kalenda Bilong Geser na Yu

Ating yangpela Abiya i bin insait long wok gaden i kamap long kantri bilong em. Long dispela taim bipo, planti man bilong Israel i insait long wok gaden. Maski yu no save tumas long wok gaden, ol tok bilong dispela plet ston bilong Geser inap helpim yu long piksaim long tingting ol stori bilong Baibel na bai yu ken kliagut moa long ol tok bilong en.

[Futnot]

[Blok/Piksa long pes 11]

Ating Kalenda Bilong Geser I Gat Ol Kain Tok Olsem:

“Ol mun bilong kisim pikinini wain na oliv;

ol mun bilong planim kaikai;

ol mun bilong nupela gras;

mun bilong kisim rop bilong gras i gat plaua;

mun bilong kisim bali;

mun bilong kisim na skelim wit;

ol mun bilong katim ol han bilong diwai;

mun bilong ol prut.”

[sainim:] Abiyab

[Futnot]

[Kredit Lain]

Archaeological Museum of Istanbul

[Sat/Ol Piksa long pes 9]

(Bilong save ol dispela rait i stap we long pes, lukim buk o magasin)

NISAN (ABIP)

Mas​—Epril

IYAR (SIV)

Epril​—Me

SIVAN

Me​—Jun

TAMUS

Jun​—Julai

AP

Julai​—Ogas

ELUL

Ogas​—Septemba

TISRI (ETANIM)

Septemba​—Oktoba

HESVAN (BUL)

Oktoba​—Novemba

KISLEV

Novemba​—Disemba

TEBET

Disemba​—Janueri

SEBAT

Janueri​—Februeri

ADAR

Februeri​—Mas

VEADAR

MAS

[Kredit Lain]

Farmer: Garo Nalbandian

[Piksa long pes 8]

Ol samting ol i painim long Geser

[Kredit Lain]

© 2003 BiblePlaces.com

[Ol Piksa long pes 10]

Diwai amon

[Piksa long pes 10]

Gras i gat plaua

[Kredit Lain]

Dr. David Darom

[Piksa long pes 10]

Bali

[Kredit Lain]

U.S. Department of Agriculture