Ernst Glück na Bikpela Wok Bilong Em

WINIM 300 yia i go pinis, Ernst Glück i kirapim wanpela bikpela wok tru, em wanpela wok we wan wan man tasol long bipo na i kam inap long nau i laik mekim. Em i tingting long tanim Baibel i go long wanpela tok ples em yet i no save long en.

Mama i karim Glück long 1654 samting long liklik taun Wettin, klostu long Halle, Jemani. Papa bilong em i wanpela pasto bilong lotu Luteran, na pasin bilong famili long tingim ol samting bilong lotu i kirapim yangpela Ernst long kisim save long God. Taim em i gat 21 krismas, em i pinisim skul bilong lotu long Jemani na em i go long kantri nau ol i kolim Latvia. Long dispela taim bipo, planti manmeri bilong dispela hap ol i no bin skul, na i no gat planti buk long tok ples bilong ol. Glück i tok: “Taim mi yangpela yet na mi kamap long dispela kantri, namba wan samting mi lukim na i no gutpela tumas, em misin bilong Latvia i no gat Baibel . . . Dispela i kirapim mi long pasim tok long bel long ai bilong God olsem mi bai stadi na lain long dispela tok ples na save gut tru long en.” Em i tingting strong long kamapim wanpela Baibel long ol man Latvia long tok ples bilong ol yet.

Redim Ol Samting Bilong Tanim Tok

Ples we Glück i go sindaun long en bipo ol i kolim Livonia, na kantri Swiden i bosim. Mausman bilong king bilong Swiden long dispela hap em Johannes Fischer. Fischer i gat laik long stretim gut wok bilong ediukesen long Latvia, na tu, em i gat laik long kisim winmani long dispela wok. Glück i toktok wantaim Fischer long wok bilong tanim Baibel long tok ples Latvia. Fischer i gat wanpela bisnis long prinim ol buk long biktaun Riga. Sapos em i prinim Baibel long tok Latvia, dispela bai helpim wok bilong em long ediukesen, na tu, em inap kisim winmani long en. Fischer i askim King Charles Namba 11 bilong Swiden long givim tok orait long wokim dispela Baibel. King i tok orait long mekim dispela wok na em i tok em bai givim mani bilong mekim dispela wok. Wanpela tokaut em king i sainim long Ogas 31, 1681, i opim rot long kirapim wok bilong tanim tok bilong Baibel.

Long dispela taim, Glück i wok long redim ol samting bilong mekim dispela wok. Em i bilong Jemani, olsem na em inap mekim wok long Baibel bilong Martin Luther bilong tanim Baibel Latvia. Tasol Glück i laik kamapim wanpela Baibel i gutpela tru, na bilong mekim olsem, em i mas skelim Baibel i stap long tok Hibru na tok Grik bilong pastaim tru. Tasol Glück i no save gut tumas long ol tok ples bilong Baibel, olsem na em i go long Hamburg, Jemani, bilong lainim tok Hibru na tok Grik. Taim em i stap long dispela hap, ating wanpela pasto bilong Livonia, nem bilong en Jānis Reiters, i bin helpim em long lainim tok Latvia na tok Grik bilong Baibel.

Wok Planti Yia na Wet Planti Yia

Long 1680, Glück i pinisim wok bilong lainim tok ples, na em i go bek long Latvia na i kirap mekim wok pasto. I no longtaim na em i kirap long tanim Baibel. Long 1683, Glück i kisim nupela wok olsem pasto bilong wanpela bikpela lain manmeri long Alūksne, bihain dispela ples i gat nem olsem ples we Glück i bin tanim Baibel.

Long dispela taim, planti tok na tingting i stap long Baibel i hatwok long tanim long tok Latvia, long wanem, dispela tok ples i no gat ol dispela kain tok. Olsem na Glück i putim sampela tok Jeman i go insait long en. Tasol em i wok strong tru long tanim Tok Bilong God i go long tok Latvia, na ol saveman i wanbel long tok olsem Baibel em i bin tanim i nambawan tru. Na Glück i kamapim sampela nupela tok tu, na sampela i stap yet na long nau planti manmeri bilong Latvia i save yusim ol dispela tok. Sampela bilong ol dispela tok Latvia, em “stap gutpela piksa,” “bikpela kaikai,” “traipela man,” “lukstil,” na “stap witnes long kot.”

Johannes Fischer i salim toksave long king bilong Swiden long wok bilong tanim Baibel i kamap gutpela olsem wanem, na ol pas ol i bin salim i go i kam i soim olsem, long 1683 Glück i tanim pinis hap bilong Baibel ol i kolim Ol Skripsa Grik. Long 1689, em i pinisim wok bilong tanim Baibel olgeta​—em i bin mekim dispela traipela wok insait long 8-pela yia tasol.a Em i wet longpela taim long ol i prinim dispela Baibel, tasol long 1694 em i winim pinis mak em i bin putim​—gavman i givim tok orait long tilim Baibel Latvia.

Sampela saveman i ting i no Glück wanpela tasol i bin tanim dispela Baibel Latvia. Tru, ating em i bin lukim Baibel bilong Luther na kisim sampela tingting long en, na em i kisim sampela tok long sampela hap bilong Baibel i stap pinis long tok Latvia. Tasol dispela em i liklik hap tasol bilong Baibel em i bin tanim. Olsem wanem? Sampela man i bin wok wantaim em long tanim tok? I tru, Glück i gat wanpela helpim long taim em i wok long tanim tok, na sampela i bin helpim em long ritim na sekim gut ol tok na bai em i stret tru. Tasol i luk olsem ol i no bin helpim em long wok bilong tanim Baibel. Olsem na yumi ken ting Glück wanpela tasol i bin tanim tok.

Wok bilong Glück long tanim Baibel i bikpela samting tru long kirapim pasin bilong raitim tok ples Latvia, tasol wanpela bikpela samting moa i bin kamap long dispela wok. Nau ol man Latvia inap ritim Tok Bilong God long tok ples bilong ol yet na kisim ol tok bilong en i save givim laip long man. Ol i no lusim tingting long samting Ernst Glück i bin mekim bilong helpim ol. Inap 300 yia samting, ol manmeri bilong Alūksne ol i lukautim tupela diwai ok ol i kolim Glika ozoli, olsem diwai ok bilong Glück. Em i bin planim bilong tingim Baibel Latvia. I gat wanpela liklik haus tumbuna long Alūksne i gat sampela Baibel ol man i bin tanim, na wanpela em Baibel bilong Glück ol i bin prinim long namba wan taim tru. Na piksa i gat mak bilong taun Alūksne i gat piksa bilong Baibel tu na yia 1689, em yia Glück i bin pinisim wok bilong em long tanim Baibel.

Wok Em i Mekim Bihain

Bihain liklik long taim Glück i kamap pinis long Latvia, em i kirap lainim tok Rasia. Long 1699, em i raitim pas i tok em i wok long inapim narapela laik bilong em​—em bilong tanim Baibel long tok Rasia. Long wanpela pas em i bin raitim long 1702, em i tok em i bin kirap long stretim sampela tok bilong Baibel Latvia. Tasol em i no gat gutpela taim moa bilong tanim Baibel. Inap planti yia i gat gutaim long Latvia, tasol nau em i kamap ples bilong pait. Long 1702, ol ami bilong Rasia i daunim ami bilong Swiden na ol i kisim taun Alūksne. Ol i rausim Glück wantaim famili bilong em i go long Rasia.b Long dispela taim nogut bilong pait, ol rait bilong nupela Baibel Latvia bilong em na Baibel Rasia em i bin tanim ol i lus. Glück i dai long Moscow long 1705.

Ol dispela Baibel long tok Latvia na tok Rasia em Glück i tanim bihain, ol i lus na ol man i bel hevi long dispela samting. Tasol i kam inap long nau, dispela namba wan Baibel Glück i bin tanim i helpim tru olgeta man i ritim Baibel Latvia.

Ernst Glück, em i wanpela bilong ol man i bin mekim bikpela wok bilong tanim Baibel long kain kain tok ples bilong ol man. Olsem na klostu olgeta lain bilong graun ol inap ritim Tok Bilong God long tok ples bilong ol yet na kisim gutpela wara bilong tok i tru i stap long en. Tru tumas, long rot bilong ol Baibel ol i bin wokim long 2,000 samting tok ples, Jehova i wok long kamapim em yet long ol manmeri bilong olgeta hap.

[Ol Futnot]

[Piksa long pes 13]

Baibel em Glück i tanim

[Piksa long pes 14]

Ol Witnes Bilong Jehova i save skulim ol manmeri long Baibel long dispela taun Glück i bin tanim Baibel long en