Sanap Strong na Wetim De Bilong Jehova
‘Kisim pasin bilong sanap strong na karim hevi na mekim dispela pasin i stap strong olsem bilip.’—2 PITA 1:5, 6.
1, 2. Bilong wanem ol Kristen i mas i gat pasin bilong sanap strong na karim hevi?
DE BILONG Jehova em i klostu tru. (Joel 1:15; Sefanaia 1:14) Yumi Kristen i tingting strong long no ken lusim God, na yumi amamas long wetim taim Jehova bai kamapim klia olsem em i nambawan bos. Tasol taim yumi wetim dispela de, ol man i heitim yumi, toknogutim yumi, mekim nogut long yumi, na i laik kilim yumi i dai bikos yumi bilip long Jehova. (Matyu 5:10-12; 10:22; KTH 2:10) Olsem na yumi mas i gat pasin bilong sanap strong na karim hevi. Aposel Pita i tok: ‘Yupela i mas kisim pasin bilong sanap strong na karim hevi na mekim dispela pasin i stap strong olsem bilip.’ (2 Pita 1:5, 6) Yumi mas i gat pasin bilong sanap strong, olsem Jisas i tok: “Ol manmeri i stap strong inap long las de, God bai i kisim bek ol.”—Matyu 24:13.
2 Na tu, yumi save sik, bel hevi taim wanpela i dai, na sampela arapela hevi i save painim yumi. Satan bai amamas tru sapos yumi lusim bilip! (Luk 22:31, 32) Yumi inap sanap strong na karim kain kain hevi taim Jehova i helpim yumi. (1 Pita 5:6-11) Yumi laik skelim sampela ekspiriens i soim olsem yumi ken sanap strong na holimpas bilip taim yumi wetim de bilong Jehova.
Sik i No Pasim Ol
3, 4. Kamapim wanpela ekspiriens i soim olsem wanem yumi ken lotuim Jehova maski yumi gat sik.
3 God i no save oraitim sik bilong yumi long rot bilong mirakel, tasol em i save givim strong long yumi bilong karim dispela hevi. (Song 41:1-3) Sharon i tok: “Taim mi liklik yet i kam inap nau, mi save sindaun long wilsia. Taim mama i karim mi, sik bilong kru (cerebral palsy) i mekim na mi no kisim ol amamas em ol pikinini i save kisim.” Sharon i kisim save long Jehova na ol tok promis bilong em long givim gutpela helt long ol man, na dispela i helpim em long bilip na wetim gutpela samting. Maski Sharon i hatwok long toktok na wokabaut, em i amamas long mekim wok Kristen. Inap 15 yia i go pinis, em i bin tok: “Ating sik bilong mi bai i go bikpela, tasol mi bilip strong long God na mi pas gut wantaim em, na dispela i save strongim bel bilong mi. Mi amamas tru long i stap namel long lain bilong Jehova, na Jehova i save helpim na lukautim mi oltaim!”
4 Aposel Pol i kirapim ol Kristen long Tesalonaika long “strongim bel bilong ol man i save pret [“bel hevi,” NW].” (1 Tesalonaika 5:14) Sampela taim ol samting i painim yumi inap mekim yumi bel hevi tru. Long 1993, Sharon i bin tok: “Mi pilim olsem mi no inap mekim wanpela gutpela wok, na . . . bikpela bel hevi i kisim mi na mi stap olsem inap 3-pela yia. . . . Ol elda i givim gutpela tok bilong strongim bel bilong mi. . . . Long rot bilong Wastaua Jehova i givim gutpela skul long mi long dispela sik bilong bikpela bel hevi. Tru tumas, em i save tingim lain bilong em na em i save long ol samting yumi pilim.” (1 Pita 5:6, 7) Sharon i wok yet long lotuim God na em i wetim bikpela de bilong Jehova.
5. Wanem samting i soim olsem ol Kristen inap karim hevi bilong ol samting i mekim ol i pilim hevi na tingting planti?
5 Sampela Kristen i pilim hevi na tingting planti long ol samting i bin painim ol long pastaim. Harley i bin insait long ol pait nogut long Wol Woa 2 na em i driman long ol dispela pait. Taim em i slip em bai singaut: “Was gut! Lukaut!” Taim em i kirap, tuhat i karamapim em. Tasol em inap bihainim ol gutpela tok bilong God long laip bilong em, na isi isi ol dispela kain driman i no kamap klostu klostu.
6. Wanpela brata i gat wanpela sik bilong tingting em i bin mekim wanem bilong karim dispela hevi?
6 Wanpela brata Kristen i gat sik bilong tingting (bipolar mood disorder) na dispela i mekim na i hatwok long em long autim tok. Tasol em i no lusim dispela wok, long wanem, em i save wok bilong autim tok i helpim em na ol man i harim tok bilong em long kisim laip. (1 Timoti 4:16) Sampela taim em i sanap long ai bilong haus tasol em i no inap paitim dua. Em i tok: “Bihain liklik, mi inap bosim bel bilong mi na nau mi save go long narapela haus na traim gen. Taim mi mekim yet wok autim tok, dispela i helpim mi long pas gut wantaim Jehova.” Brata hia i hatwok long i go long ol miting, tasol em i save pasin bilong bung wantaim ol brata em i bikpela samting. Olsem na em i save go long olgeta miting, maski i hatwok.—Hibru 10:24, 25.
7. Maski sampela i pret long mekim tok long ai bilong ol man o bung long ol miting, olsem wanem ol i sanap strong na karim hevi?
7 Sampela Kristen i save pret nogut tru long kain kain samting. Olsem: Ol i pret long mekim tok long ai bilong ol man o pret long bung long wanpela miting. Tingim hatwok bilong ol long bekim tok long ol miting Kristen o long mekim wanpela tok long Skul Tiokratik Bilong Autim Tok! Tasol ol i sanap strong na karim dispela hevi, na yumi amamas tru long ol i bung wantaim yumi na ol i insait long ol miting.
8. Wanem gutpela samting inap helpim tru yumi taim yumi gat sik bilong tingting?
8 Sampela taim sapos man i malolo na slip moa, dispela inap helpim em long karim hevi bilong sik bilong tingting. Ating i gutpela long lukim ol dokta. Tasol wanpela gutpela helpim tru em pasin bilong beten askim God long helpim yu. Song 55:22 i tok: “Olgeta hevi yu karim, em yu mas putim long han bilong Bikpela, bai em i karim na bai em i strongim yu. Bai em i no larim wanpela samting i bagarapim ol stretpela man.” Olsem na “bilip strong long Bikpela.”—Sindaun 3:5, 6.
Karim Hevi Taim Man i Dai
9-11. (a) Wanem samting inap helpim yumi long karim bel hevi taim wanpela bilong famili i dai? (b) Olsem wanem stori bilong Ana inap helpim yumi long karim bel hevi taim man i dai?
9 Taim dai i painim wanpela insait long famili, dispela i kamapim bikpela bel hevi tru. Abraham i laikim tru Sara, meri bilong em, na em i bin krai taim Sara i dai. (Stat 23:2) Jisas, em man i gutpela olgeta, i bin “krai” taim pren bilong em Lasarus i dai. (Jon 11:35) Olsem na em i nomol long bel hevi taim wanpela yumi laikim tumas i dai. Tasol ol Kristen i save bai i gat kirap bek. (Aposel 24:15) Olsem na ol i no “sori tumas, olsem ol arapela manmeri i no bilip long God na i no wetim taim bilong kirap bek.”—1 Tesalonaika 4:13.
10 Yumi ken mekim wanem taim yumi bel hevi long wanpela i dai? Ating wanpela tok piksa inap helpim yumi. Yumi no save bel hevi tumas taim wanpela pren i go raun long narapela hap bikos yumi save bai yumi lukim em taim em i kam bek. Sapos yumi kisim wankain tingting taim wanpela gutpela Kristen i dai, ating dispela inap mekim na bel hevi i no bikpela tumas, long wanem, yumi save em bai kirap bek.—Saveman 7:1.
11 Pasin bilong bilip tru long God em Man “bilong mekim isi bel bilong olgeta man,” dispela i helpim yumi long karim dispela hevi. (2 Korin 1:3, 4) Sapos yumi tingting long samting Ana, wanpela wido long taim bilong Jisas, i bin mekim, dispela tu inap helpim yumi. Man bilong em i dai 7-pela yia bihain long ol i bin marit. Tasol taim em i gat 84 krismas, em i mekim yet wok holi bilong Jehova long tempel. (Luk 2:36-38) Pasin bilong em long givim bel long mekim wok bilong God i bin helpim em long karim bel hevi na hevi bilong i stap wanpis. Pasin bilong mekim ol wok Kristen long olgeta taim, olsem autim tok bilong Kingdom, dispela inap helpim yumi long karim bel hevi taim man i dai.
Karim Kain Kain Hevi
12. Sampela Kristen i bin sanap strong na karim wanem hevi insait long famili bilong ol?
12 Sampela Kristen i mas sanap strong na karim ol hevi insait long famili. Olsem: Sapos poroman marit i pamuk, dispela inap bagarapim tru sindaun bilong famili! Dispela inap mekim na poroman i no bin mekim rong i bel hevi tru na ating em i no inap slip na em i krai planti. Bel hevi i mekim na ol liklik wok em i laik mekim i hatwok long mekim, na em i popaia na samting nogut i kamap. Ating poroman i no mekim rong bai i no inap kaikai gut, em i lusim skin, na bel i bagarap tru. Ating i hatwok long mekim ol wok Kristen. Na dispela inap bagarapim tru ol pikinini!
13, 14. (a) Beten Solomon i mekim bilong dediketim tempel i strongim yu olsem wanem? (b) Bilong wanem yumi beten askim God long givim holi spirit long yumi?
13 Taim ol kain hevi olsem i painim yumi, Jehova i save helpim yumi. (Song 94:19) God i save harim ol beten bilong ol manmeri bilong em. Beten King Solomon i mekim taim ol i dediketim tempel bilong Jehova i kamapim klia dispela samting. Solomon i beten long God olsem: “Sapos wanpela bilong mipela Israel, ol manmeri bilong yu, i pilim dispela hevi i bin kamap long em, na em i lukluk i kam long dispela haus na i litimapim han bilong en na i beten long yu, orait Bikpela, yu stap long ples bilong yu long heven na yu ken harim beten bilong en na rausim sin bilong en na helpim em. Yu tasol yu save long tingting bilong olgeta man, olsem na yu ken skelim pasin bilong olgeta wan wan man na bekim pe long ol inap long pasin ol i bin mekim. Sapos yu mekim olsem, orait mipela ol manmeri bilong yu bai i stap aninit long yu long olgeta taim mipela i stap long dispela graun yu bin givim long ol tumbuna bilong mipela.”—1 King 8:38-40.
14 Samting inap helpim yumi tru em pasin bilong beten askim God long givim holi spirit long yumi. (Matyu 7:7-11) Tupela pasin em holi spirit i save kamapim em amamas na bel isi. (Galesia 5:22, 23) Bel bilong yumi i stap isi tru taim Papa bilong yumi long heven i harim prea bilong yumi—amamas na bel isi em i givim i pinisim pasin bilong tingting planti na bel hevi!
15. Wanem ol skripsa inap helpim yumi long daunim pasin bilong yumi long wari na tingting planti?
15 Yumi save, taim bikpela hevi i painim yumi, bai yumi wari. Tasol yumi inap daunim dispela wari sapos yumi tingim tok Jisas i mekim, em i tok: “Yupela i no ken tingting planti long laip bilong yupela na tok, ‘Bai yumi kaikai wanem samting? Bai yumi dring wanem samting?’ Na yupela i no ken tingting planti long bodi bilong yupela na tok, ‘Bai yumi pasim wanem laplap?’ ” “Yupela i mas wok pastaim long painim kingdom bilong God wantaim stretpela pasin bilong em. Na bihain bai em i givim dispela olgeta arapela samting tu long yupela.” (Matyu 6:25, 33, 34; Nupela Testamen na Ol Sam) Aposel Pita i tokim yumi olsem “God i save wari long [yumi]. Olsem na olgeta hevi [yumi] karim, [yumi] mas putim long han bilong en.” (1 Pita 5:6, 7) I stret yumi traim long stretim hevi bilong yumi. Taim yumi mekim olgeta samting yumi inap mekim, pasin bilong beten bai helpim yumi, tasol pasin bilong wari long dispela hevi i no inap helpim yumi. Man bilong raitim song i tok: “Yu mas putim laip bilong yu long han bilong Bikpela. Bilip strong long em, na em bai i helpim yu.”—Song 37:5.
16, 17. (a) Bilong wanem yumi no inap lusim olgeta pasin bilong tingting planti? (b) Bai yumi pilim olsem wanem sapos yumi bihainim tok bilong Filipai 4:6, 7?
16 Pol i tok: “Yupela i no ken wari long wanpela samting. Nogat. Oltaim yupela i mas tokim God long olgeta hevi bilong yupela. Yupela i mas prea long God na tok tenkyu long em, na askim em long helpim yupela. Bel isi God i save givim yumi, em i gutpela samting tru, na yumi man i no inap tru long save long as bilong en. Orait God bai i mekim yupela i stap bel isi tru, na long dispela pasin yupela bai i pas gut wantaim Krais Jisas, na bel na tingting bilong yupela bai i stap gut tru.” (Filipai 4:6, 7) Yumi save, ol pikinini bilong Adam i gat sin ol i no inap lusim olgeta pasin bilong wari na tingting planti. (Rom 5:12) Tupela meri bilong Iso, em ol i bilong lain Hit, ol i mekim Aisak na Rebeka, gutpela papamama bilong Iso, “i bel pen tru.” (Stat 26:34, 35) Sik bilong skin i mekim na tupela Kristen em Timoti na Trofimus i tingting planti. (1 Timoti 5:23; 2 Timoti 4:20) Pol i save tingting planti long ol hevi bilong ol wanbilip. (2 Korin 11:28) Tasol Man bilong “harim beten” i save redi oltaim long helpim ol manmeri i save laikim em.—Song 65:2.
17 Taim yumi wetim de bilong Jehova, Jehova em God bilong “bel isi” i save helpim na mekim gut bel bilong yumi. (Filipai 4:9) Jehova em i “as bilong marimari na sori,” na em i ‘gutpela tru na i save rausim sin bilong yumi,’ na em i save “tingim yumi i olsem das tasol.” (Kisim Bek 34:6; Song 86:5; 103:13, 14) Olsem na yumi ‘mas prea long God na askim em long helpim yumi,’ na bai yumi kisim “bel isi God i save givim”—em bel isi yumi man i no inap kliagut long en.
18. Olsem Jop 42:5 i kamapim, olsem wanem yumi inap “lukim” God?
18 Taim God i harim ol beten bilong yumi, yumi save em i stap wantaim yumi. Taim Jop i winim pinis ol traim i bin painim em, em i tok: “Bikpela, bipo mi bin harim tok bilong ol man tasol na mi kisim save long yu. Tasol nau mi lukim yu stret long ai bilong mi yet.” (Jop 42:5) Long ai bilong tingting, na bilip, na long pasin bilong tok tenkyu, yumi inap tingting long ol samting God i bin mekim long yumi, na long dispela rot i olsem yumi “lukim” em stret, olsem save gut long em. Yumi stap klostu long God, olsem na bel na tingting bilong yumi i stap isi tru!
19. Wanem samting bai kamap sapos yumi ‘putim olgeta hevi bilong yumi long han bilong God’?
19 Sapos yumi ‘putim olgeta hevi bilong yumi long han bilong God,’ em bai givim yumi kain bel isi i save mekim bel na tingting bilong yumi i stap gut tru, na yumi inap sanap strong na karim ol hevi. Bel bilong yumi bai stap isi tru, na bai yumi no tingting planti na pret na wari long ol samting.
20, 21. (a) Samting i bin painim Stiven, olsem wanem dispela i soim olsem ol wokboi bilong God i save stap bel isi taim ol man i mekim nogut long ol? (b) Kamapim stori bilong ol wokboi bilong God long nau husat i bin stap bel isi taim ol i sanap strong na karim hevi.
20 Bel bilong disaipel Stiven i bin i stap isi taim bikpela traim i kamap long bilip bilong em. Paslain long em i mekim laspela tok bilong em, ol man bilong Sanhedrin i “lukim pes bilong en i lait olsem pes bilong wanpela ensel.” (Aposel 6:15) Pes bilong en, em pes bilong man i stap bel isi tru—olsem wanpela ensel i gat wok long givim tok bilong God long ol man. Taim Stiven i kamapim long ples klia olsem ol i gat asua long kilim i dai Jisas, ol dispela hetman “i belhat nogut tru long em na ol i kaikaim tit bilong ol. . . . Holi Spirit i pulap long Stiven, na em i lukluk i go antap long heven. Em i lukim gutpela lait na bilas bilong God long heven, na em i lukim Jisas i sanap i stap long han sut bilong God.” Driman samting em i lukim i strongim em, na em i stap gut long God i go inap long em i dai. (Aposel 7:52-60) Yumi no save lukim ol kain driman olsem, tasol God i save givim bel isi long yumi taim ol man i mekim nogut long yumi.
21 Tingim tok bilong sampela Kristen em ol Natsi i bin kilim ol i dai long taim bilong Wol Woa 2. Wanpela i kamapim stori bilong em long samting i bin kamap long kot, em i tok: “Kot i tokaut olsem mi mas i dai. Mi harim tok bilong kot, na bihain mi mekim tok olsem, ‘Holim bilip i go inap long taim yu dai,’ na mi kamapim sampela narapela tok bilong Bikpela bilong yumi, na nau kot i pinis. Tasol no ken wari long dispela samting. Mi pilim bikpela bel isi tru!” Wanpela yangpela Kristen em ol bai katim nek bilong em, i raitim pas long papamama olsem: “Em biknait pinis. Mi gat taim yet long senisim tingting bilong mi. Tasol yupela i ting mi inap i stap amamas sapos mi givim baksait long Bikpela bilong yumi? Nogat tru! Yupela i ken save tru olsem mi bin stap amamas na bel isi taim mi lusim laip bilong mi.” Yumi ken bilip tru olsem Jehova i save helpim ol gutpela wokboi bilong em.
Yu Inap Sanap Strong na Karim Hevi!
22, 23. Yu inap bilip tru long wanem samting taim yu sanap strong na wetim de bilong Jehova?
22 Ating ol hevi yumi stori pinis long en i no bin painim yu. Tasol gutpela man Jop i bin tok stret taim em i tok: “Mipela ol manmeri i save stap sotpela taim tasol long graun, na stat long taim mama i karim mipela, ol kain kain trabel i save kamap long mipela.” (Jop 14:1) Ating yu wanpela papa o mama i save wok hat long kamapim tok bilong Baibel bilong skulim na stiaim ol pikinini bilong yu. I gat ol traim ol i mas karim long skul, tasol yu save amamas tru taim ol i sanap strong long sait bilong Jehova na bihainim ol stretpela stiatok bilong em! Ating ol hevi na ol traim i wok long painim yu long ples wok. Tasol yu inap sanap strong na karim olgeta kain hevi, long wanem, ‘olgeta de God i save karim ol hevi bilong yu.’—Song 68:19.
23 Yu inap ting olsem yu wanpela man nating tasol, tasol tingim, Jehova i no inap lusim tingting long ol gutpela wok yu bin mekim na pasin bilong yu long laikim tru nem holi bilong em. (Hibru 6:10) Helpim em i givim long yu inap mekim na yu inap winim ol samting i traim bilip bilong yu. Olsem na ol prea bilong yu na ol samting yu tingting long mekim i mas kamapim klia olsem yu tingting long mekim laik bilong God. Sapos yu mekim olsem, orait yu ken bilip tru olsem God bai blesim yu na sapotim yu taim yu sanap strong na wetim de bilong Jehova.
Bai Yu Bekim Olsem Wanem?
• Bilong wanem ol Kristen i mas sanap strong na karim hevi?
• Wanem samting inap helpim yumi long sanap strong na karim hevi taim yumi gat bikpela sik o wanpela i dai?
• Olsem wanem prea i save helpim yumi long karim hevi?
• Bilong wanem yumi inap sanap strong na wetim de bilong Jehova?
[Piksa long pes 29]
Yumi bilip long Jehova na yumi inap karim bel hevi taim man i dai
[Piksa long pes 31]
Pasin bilong kamapim bel bilong yumi long beten i save helpim yumi long winim ol hevi i traim bilip bilong yumi