“Ol i Bin Raitim Bilong Skulim Yumi”

“OL MAN i save raitim planti buk, na dispela kain wok i no gat pinis bilong en.” (Saveman 12:12) Long nau i gat planti planti buk na nius, na dispela tok wanpela man i bin raitim long bipo i stret tru long bipo na long nau tu. Olsem na man i gat gutpela tingting, olsem wanem em inap skelim wanem ol buk samting i gutpela long ritim?

Planti man, taim ol i tingim wanpela buk ol i laik ritim, pastaim ol i laik kisim sampela save moa long man bilong raitim dispela buk. Sampela lain bilong prinim buk, ol i save raitim sotpela tok i kolim nem bilong ples bilong dispela man, em i bin winim wanem ol namba long bikpela skul, na lista bilong ol buk em i bin raitim. Nem bilong man bilong raitim buk i bikpela samting, na dispela i kamap klia long ol samting ol i bin mekim long bipo. Sapos wanpela meri i raitim buk, em i save haitim nem bilong em na putim nem bilong man long buk, nogut ol man i ting buk i no gutpela, long wanem, wanpela meri i bin raitim.

Sori tru, olsem yumi lukim long stori i kamap paslain long dispela, sampela i save givim baksait long Ol Skripsa Hibru, long wanem, ol i ting God bilong dispela hap bilong Baibel em i God nogut i save bagarapim ol birua na i no marimari liklik.a Orait nau yumi ken skelim ol tok em Ol Skripsa Hibru na Ol Skripsa Grik yet i mekim long Man i kamapim ol tok bilong Baibel.

Man i Kamapim Tok Bilong Baibel

Ol Skripsa Hibru i tok, God i bin tokim lain Israel: “Mi Bikpela na mi no save senisim tingting bilong mi.” (Malakai 3:6) Inap olsem 500 yia bihain, Jems, wanpela man bilong raitim Baibel, em i tok long God olsem: “Em i no save senisim nabaut pasin bilong en.” (Jems 1:17) Orait bilong wanem sampela i ting God bilong Ol Skripsa Hibru i narapela kain long God bilong Ol Skripsa Grik?

Ol narapela narapela pasin bilong God i save kamap ples klia long ol narapela narapela hap bilong Baibel. Buk Stat i stori olsem em i “bel hevi tru,” em i “God, Bikpela Antap Tru, em i bin wokim heven na graun,” na em i “Jas bilong olgeta graun.” (Stat 6:6; 14:22; 18:25) Olsem wanem? Ol dispela narapela narapela tok i makim wanpela God tasol? Yes, ol i makim wanpela God tasol.

 Olsem: I gat wanpela jas bilong haus kot em ol man i bin sanap long kot ol i tingim em olsem man bilong holim strong ol lo. Tasol ol pikinini bilong em i tingim em olsem gutpela papa i save givim ol gutpela samting long ol. Na ating ol pren bilong em i tingim em olsem man bilong mekim pasin pren, na man bilong lap na amamas. Dispela jas, na papa, na pren, em wanpela man tasol. Tasol ol narapela narapela pasin bilong em i save kamap ples klia long ol narapela narapela wok samting em i mekim.

Na olsem tasol, Ol Skripsa Hibru i tok long Jehova olsem “God bilong marimari na tingim man, em i no save belhat kwik na gutpela pasin sori bilong em i bikpela tru na em i save tok tru oltaim.” Tasol yumi kisim save tu olsem “em i no ken larim man i abrusim strafe.” (Kisim Bek 34:​6, 7, NW) Dispela tupela kain pasin bilong God i kamapim klia mining bilong nem bilong em. Mining bilong nem “Jehova” i olsem “Em i Mekim i Kamap.” Olsem: God i kamap wanem wanem kain em i mas kamap bilong inapim ol tok promis bilong em. (Kisim Bek 3:​13-​15, NW) Tasol em i dispela wanpela God tasol. Jisas i tok: “Bikpela em wanpela tasol em i God bilong yumi.”​—Mak 12:29.

Ol i Bin Senisim Ol Skripsa Hibru?

Long nau, sampela taim ol i save senisim ol skul buk taim ol i kisim ol nupela save long samting o taim tingting bilong ol man i senis. Orait yu ting Ol Skripsa Grik i senisim Ol Skripsa Hibru? Nogat.

Sapos em laik bilong Jisas long ol stori bilong wok bilong em long graun na ol tok ol disaipel i bin raitim i mas senisim Ol Skripsa Hibru, em bai tokaut long dispela. Tasol Luk i raitim stori bilong taim Jisas i laik i go antap long heven, na Luk i tok: “Em i stat long tok bilong Moses na bilong olgeta profet [i stap long Ol Skripsa Hibru], na em i skulim tupela [disaipel] long as bilong olgeta hap bilong buk bilong God i toktok long em yet.” Bihain Jisas i kamap long ol gutpela aposel na sampela moa. Na Baibel i stori moa olsem: “Na em i tokim ol olsem, ‘Taim mi stap yet wantaim yupela, mi bin tokim yupela pinis olsem, olgeta samting bipo ol i raitim long mi long lo bilong Moses na long buk bilong ol profet na long Buk Song, dispela olgeta samting i mas kamap tru.’ ” (Luk 24:​27, 44) Orait sapos Ol Skripsa Hibru i olpela pinis na i no gat wok moa bilong en, bilong wanem Jisas i kamapim yet ol tok bilong en taim wok bilong em long graun i pinis?

Taim kongrigesen Kristen i kamap, ol disaipel bilong Jisas i mekim wok yet long Ol Skripsa Hibru bilong kamapim klia ol tok profet em truim bilong ol i no kamap yet, na ol stiatok bilong Lo Bilong Moses i skulim ol man long ol bikpela samting, na stori bilong ol wokman bilong God long bipo yet em ol i stap olsem gutpela piksa na i strongim ol Kristen long i stap gut long God. (Aposel 2:​16-​21; 1 Korin 9:​9, 10; Hibru 11:1–12:1) Aposel Pol i tok: “Spirit bilong God yet i bin kamapim olgeta tok i stap long buk bilong God. Na dispela tok em i gutpela samting tru bilong skulim yumi.”b (2 Timoti 3:16) Olsem wanem Ol Skripsa Hibru i save helpim yumi long nau?

Tok Bilong Helpim i Stap Bilong Yumi

Tingim pasin bilong bel nogut long man bilong narapela lain i stap long nau. Long wanpela bikpela taun long Isten Yurop, wanpela man Itiopia i gat 21 krismas i tok: “Sapos mipela i laik i go long wanpela hap, mipela mas bung olsem wanpela lain na wokabaut. Sapos mipela i bung olsem wanpela lain, ating ol man i no ken bagarapim mipela.” Na em i tok moa: “Mipela i no inap raun bihain long 6 klok apinun, na mipela i no ken tru raun long tren. Taim ol manmeri i lukluk long mipela, ol i save lukim kala bilong skin bilong mipela na em tasol.” Orait yu ting Ol Skripsa Hibru i kamapim sampela tok long dispela kain hevi?

God i bin tokim lain Israel bilong bipo olsem: “Yupela i no ken mekim nogut long ol manmeri bilong narapela lain ol i stap long graun bilong yupela. Yupela i mas mekim gutpela pasin long ol, olsem yupela i save mekim long ol wanlain bilong yupela, ol Israel. Na yupela i mas laikim ol tru, olsem yupela i save laikim yupela yet. Yupela i bin i stap long Isip bipo, olsem na yupela i save long pasin bilong man i lusim as ples na i stap long narapela kantri.” (Wok Pris 19:​33, 34) Em nau, long Israel bilong bipo, Lo i tok ol i mas mekim gut long “ol manmeri bilong narapela lain” i bin kam sindaun long graun bilong ol Israel, na dispela lo i stap yet long Ol Skripsa Hibru. Ating bai yu wanbel long tok olsem, sapos long nau ol man i bihainim ol stiatok i stap insait long dispela lo, em inap pinisim pasin bilong bel nogut long man bilong narapela lain, a?

Tru, Ol Skripsa Hibru i no save givim planti tok long yumi long ol samting bilong mani, tasol i gat ol stiatok long en long pasin bilong bihainim savetingting long wok yumi mekim long mani bilong yumi. Sindaun 22:7 i tok: “Ol man i gat dinau, ol i stap olsem wokboi nating bilong ol man i givim dinau.” Planti saveman bilong mani i wanbel long tok olsem sapos yumi no tingting gut na yumi baim planti samting long dinau, yumi inap kamap rabis olgeta.

Na tu, wanpela maniman tru, em King Solomon, em i stori stret long pasin bilong wok strong long kisim planti mani, maski wanem hevi i kamap​—olsem planti manmeri long nau i save mekim. Em i tok: “Sapos bel bilong man i skrap long kisim planti mani, orait oltaim bai em i ting em i sot long mani. Sapos man i tingting long kamap maniman, orait olgeta samting em i kisim i no inapim em. Olsem na dispela pasin . . . i no gat as bilong en.” (Saveman 5:10) Em i wanpela gutpela tok lukaut tru!

Samting Bilong Bilip na Wet Long En

Nambawan bikpela as tok bilong Baibel olgeta i olsem: Kingdom i stap long han bilong Jisas Krais em i rot bilong kamapim long ples klia olsem God i Nambawan Bos bilong heven na graun, na long rot bilong Kingdom God bai mekim holi nem bilong Em.​—Daniel 2:44; KTH 11:15.

Long rot bilong Ol Skripsa Hibru, yumi kisim save long kain sindaun yumi bai kisim aninit long Kingdom Bilong God, na dispela i mekim gut bel bilong yumi na i helpim yumi long i go klostu moa long As bilong dispela gutpela samting, em God Jehova. Olsem: Profet Aisaia i bin tok profet long ol animal bai i stap isi wantaim ol man: “Ol wel dok na ol pikinini sipsip bai i stap gut wantaim, na ol lepat bai i slip wantaim ol pikinini meme. Ol pikinini bulmakau wantaim ol yangpela laion bai i raun na kaikai wantaim, na ol liklik mangi bai i was long ol.” (Aisaia 11:​6-8) Em gutpela samting tru, a?

Na olsem wanem long ol lain bilong narapela skin o kantri em ol man i save birua long ol, o ol man i gat bikpela sik, o ol i stap rabis na i no gat rot bilong stretim ol dispela hevi? Ol Skripsa Hibru i tok profet long Krais Jisas olsem: “Em i save helpim ol rabisman i singaut long em. Na ol manmeri i sot long ol samting na i no gat helpim, orait em yet bai i helpim ol. Em i save sori long ol manmeri i no gat strong na i stap rabis. Na ol manmeri i no gat samting em i save kisim bek ol.” (Song 72:​12, 13) Ol kain tok promis olsem i save helpim ol man i bilip long en long strongim bel na wetim gutpela samting bai kamap bihain.​—Hibru 11:6.

Olsem na holi spirit i kirapim Pol long raitim tok olsem: “Olgeta tok bipo ol i bin raitim long buk bilong God, em ol i bin raitim bilong skulim yumi. Dispela tok i bilong strongim bel bilong yumi na mekim yumi sanap strong na wetim God i kisim yumi”! (Rom 15:4) Tru tumas, Ol Skripsa Hibru i stap yet olsem bikpela hap bilong Baibel, em Tok Bilong God. Ol i bikpela samting bilong helpim yumi long nau. Mipela i laik bai yu wok strong long kisim sampela save moa long ol tok em Baibel olgeta i skulim yumi long en na bai yumi ken i go klostu moa long dispela Man i kamapim ol tok bilong Baibel, em God Jehova.​—Song 119:​111, 112.

[Ol Futnot]

[Blok long pes 6]

OLPELA TESTAMEN O OL SKRIPSA HIBRU?

Dispela tok “olpela testamen” i stap long 2 Korin 3:14 long Baibel King James Version. Dispela tok “testamen” long dispela Baibel, ol i kisim long tok Grik di·a·theʹke. Tasol Buk Baibel na planti Baibel moa ol i bin tanim long nau olsem New International Version, ol i tanim dispela tok di·a·theʹke olsem “kontrak” na i no “testamen.” Bilong wanem?

Saveman Edward Robinson i tok: “Olpela kontrak bilong bipo i stap long ol buk bilong Moses, olsem na [di·a·theʹke] i makim buk bilong kontrak, ol rait bilong Moses, olsem lo.” Long 2 Korin 3:​14, aposel Pol i toktok long Lo Bilong Moses, em wanpela hap tasol bilong Baibel ol i bin raitim paslain long taim bilong ol Kristen.

Orait wanem nem i stret tru long kolim ol 39 buk i stap long namba wan hap bilong Baibel Holi? Jisas Krais na ol disaipel bilong em ol i bin kolim ol dispela skripsa olsem “tok i stap long buk bilong God,” na ol i no makim olsem ol dispela tok i bilong bipo yet na i no gat wok moa. (Matyu 21:42; Rom 1:2) Olsem na ol Witnes Bilong Jehova i mekim pasin i stret wantaim ol dispela tok bilong Baibel na ol i save kolim Olpela Testamen olsem Ol Skripsa Hibru, long wanem, long pastaim tru ol i bin raitim planti bilong dispela hap bilong Baibel long tok Hibru. Na olsem tasol, ol i save kolim Nupela Testamen olsem Ol Skripsa Grik, long wanem, ol man em God i bin kirapim ol long raitim dispela hap bilong Baibel ol i bin mekim tok ples Grik.

[Ol Piksa long pes 4]

Ol inap tingim wanpela man olsem strongpela jas, gutpela papa, na gutpela pren

[Piksa long pes 5]

Jisas i bin yusim Ol Skripsa Hibru taim em i mekim wok bilong em long graun

[Ol Piksa long pes 7]

Wanem ol stiatok bilong Baibel inap helpim man long mekim ol gutpela disisen?