Jehova Bai Kisim Bek Yumi Long Umben Bilong Man Bilong Kisim Pisin
“[ Jehova] yet bai kisim bek yu long umben bilong man bilong kisim pisin.”—SONG 91:3, NW.
1. Dispela “man bilong kisim pisin” em i husat? Em i laik mekim wanem long yumi?
I GAT wanpela birua i laik bagarapim olgeta Kristen tru. Save na pasin trik bilong em i winim tru save na pasin trik bilong yumi ol man. Long Song 91:3 (NW), Baibel i kolim em olsem “man bilong kisim pisin.” Dispela birua em i husat? Kirap long nius The Watchtower bilong Jun 1, 1883, dispela nius i bin tokaut olsem dispela birua em Satan. Dispela strongpela birua i save mekim pasin trik na i laik paulim ol manmeri bilong Jehova na kisim ol long umben bilong em, olsem wanpela man bilong kisim pisin i laik kisim pisin.
2. Bilong wanem Baibel i tok Satan i kain olsem man bilong kisim pisin?
2 Long bipo, ol man i save kisim ol pisin bilong harim naispela singsing bilong ol na bilong lukim gutpela kala bilong ol, na tu, ol i save kisim mit bilong pisin olsem abus na bilong mekim ofa. Tasol ol pisin i save pret kwik, olsem na i hatwok long kisim ol. Olsem na long taim bilong ol man i bin raitim Baibel, man bilong kisim pisin i save skelim gut pasin na raun bilong ol pisin em i laik kisim. Orait nau em i save wokim kain kain umben bilong kisim ol. Baibel i tok Satan i kain olsem man bilong kisim pisin, na dispela i helpim yumi long kliagut long ol samting em i mekim wok long en. Satan i save skelim gut yumi olgeta wan wan. Em i save lukim ol pasin bilong yumi na ol samting yumi save mekim, na em i save putim ol umben bilong kisim yumi. (2 Timoti 2:26) Sapos em i kisim yumi, dispela bai bagarapim pasin bilong yumi long pas gut wantaim Jehova na bihain yumi inap bagarap na pinis olgeta. Olsem na bilong yumi ken i stap gut, yumi mas luksave long ol samting em dispela “man bilong kisim pisin” i save mekim wok long en.
3, 4. Satan i save mekim pait olsem wanem na i kain olsem wanpela yangpela laion? Na em i save mekim pait olsem wanem na i kain olsem wanpela snek?
3 Man bilong raitim song i tok ol samting Satan i mekim wok long en i kain olsem bilong yangpela laion na snek. (Song 91:13) Olsem wanpela laion, Satan i save pait long yumi long ples klia, olsem: Ol birua i mekim nogut long yumi, o gavman i kamapim sampela lo bilong birua long yumi lain bilong Jehova. (Song 94:20) Dispela kain pasin bilong pait inap mekim na sampela i pundaun na lusim Jehova. Tasol planti taim ol dispela pait bilong Satan i save kamapim gutpela samting, em i save mekim ol manmeri bilong God i pas gut wantaim. Orait, olsem wanem long pasin bilong Satan long mekim pait long pasin hait olsem wanpela snek?
4 Olsem wanpela snek i stap long ples hait na i kaikaim yumi, Satan i save yusim bikpela save bilong em long mekim ol samting long pasin hait bilong bagarapim yumi. Long dispela rot em i bin kirapim sampela manmeri bilong God long kisim ol tingting kranki. Em i giamanim ol na ol i mekim laik bilong em na ol i no mekim laik bilong Jehova, na dispela i bagarapim ol. Em i gutpela tru olsem yumi save long ol tingting na pasin bilong Satan. (2 Korin 2:11) Orait nau yumi ken stori long 4-pela samting em i save yusim em ol i kain olsem umben em ol man i save mekim wok long en bilong kisim ol pisin.
Pret Long Man
5. Bilong wanem pasin bilong pret long man i kain olsem wanpela umben?
5 Dispela “man bilong kisim pisin” em i save olsem ol man i laik bai ol narapela i ken orait long ol na laikim ol. Ol Kristen tu i gat dispela laik. Satan i save long dispela, na em i laik mekim wok long dispela samting bilong pundaunim ol Kristen. Olsem: Em i save yusim pasin bilong ‘pret long man’ long pundaunim sampela manmeri bilong God. (Sindaun 29:25) Sapos pasin bilong pret long man i mekim na ol wokboi bilong God i bung wantaim ol narapela long mekim samting em Jehova i tambuim, o ol i no mekim moa ol samting em Baibel i tok long ol i mas mekim, orait dispela i makim olsem ol i pundaun pinis long umben bilong dispela “man bilong kisim pisin.”—Esekiel 33:8; Jems 4:17.
6. Stori long olsem wanem dispela “man bilong kisim pisin” inap pundaunim wanpela yangpela.
6 Olsem: Ating wanpela yangpela inap bihainim tok bilong sampela wanskul na em i smokim wanpela sigaret. Taim em i bin i go long skul long moningtaim, em i no bin tingting liklik olsem em bai mekim dispela samting. Tasol i no longtaim na em i mekim samting bilong bagarapim helt bilong em na i nogut tru long ai bilong God. (2 Korin 7:1) Olsem wanem em i pundaun na mekim dispela samting? Ating em i bung wantaim ol poroman nogut na em i pret olsem nogut ol bai i no orait long em. Yupela ol yangpela, no ken larim dispela “man bilong kisim pisin” i pulim yupela na kisim yupela long umben bilong em! Bilong abrusim umben bilong Satan, yupela i mas lukaut na no ken brukim lo bilong Jehova long ol liklik samting! Bihainim tok lukaut bilong Baibel na abrusim ol poroman nogut.—1 Korin 15:33.
7. Satan inap mekim wanem bilong pulim sampela papamama na bai ol i no ken bihainim stretpela tingting long ol samting bilong lotu?
7 Ol gutpela papamama Kristen i save tingim tru wok bilong ol olsem Baibel i makim long lukautim famili bilong ol long klos na kaikai samting. (1 Timoti 5:8) Tasol Satan i laik pulim ol Kristen bambai ol i no ken bihainim stretpela tingting long dispela samting. Ating planti taim ol i lusim ol miting, long wanem, bos bilong ol i strong long ol i mas stap bek taim wok i pinis na mekim sampela wok moa. Ating ol i pret long askim bos long kisim de malolo bilong i go long olgeta de bilong kibung distrik na lotuim Jehova wantaim ol bratasista bilong ol. Bilong abrusim dispela hevi, ol i mas “bilip strong long Bikpela.” (Sindaun 3:5, 6) Na tu, sapos yumi tingim olsem yumi insait long lain famili bilong Jehova na em yet i mekim wok bilong lukautim yumi, dispela bai helpim yumi long bihainim stretpela tingting. Olsem wanem? Yupela ol papamama, yupela i bilip olsem Jehova bai lukautim yupela yet na famili bilong yupela taim yupela i mekim laik bilong em? O, yupela bai larim Satan i kisim yupela long umben bilong em na pulim yupela long mekim laik bilong em, long wanem, yupela i pret long man? Mipela i laik kirapim yupela long beten na skelim gut ol dispela askim.
Pasin Bilong Laikim Tumas Mani Kago
8. Olsem wanem Satan i mekim wok long pasin bilong laikim tumas mani kago?
8 Narapela samting em Satan i save yusim olsem umben, em pasin bilong laikim tumas mani kago. Ol bikpela wok bisnis i save kirapim ol man long laikim pasin bilong kisim kwik mani, na dispela inap giamanim sampela manmeri bilong God. Sampela taim ol narapela inap tok: “Yu mas wok hat. Taim yu bungim pinis planti mani, orait nau yu ken stap isi na amamas long laip bilong yu. Yu ken mekim wok painia tu.” Ol kain tok olsem inap kamap long maus bilong sampela em ol i gat tingting kranki na ol i laik bai ol narapela long kongrigesen Kristen i helpim ol long sait bilong mani. Skelim gut astingting bilong ol kain tok olsem. Dispela tok i wankain long tingting bilong dispela “longlong” maniman long tok piksa bilong Jisas, a?—Luk 12:16-21.
9. Bilong wanem sampela Kristen inap pundaun long pasin bilong laikim ol samting?
9 Satan i save mekim wok long pasin bilong graun bilong kirapim ol man long laikim ol samting. Isi isi ol Kristen inap kisim dispela laik na dispela inap karamapim tok bilong God na bai “em i no karim kaikai.” (Mak 4:19) Baibel i kirapim yumi long holim tingting olsem klos na kaikai yumi gat pinis em inap long yumi. (1 Timoti 6:8) Tasol dispela “man bilong kisim pisin” i save pundaunim planti man, long wanem, ol i no save bihainim dispela tok. Olsem wanem? Pasin antap i mekim na ol i pilim olsem ol i mas holim yet wanpela kain sindaun? Olsem wanem long yumi wan wan? Laik bilong kisim ol samting i kirapim yumi long putim ol wok bilong lotu i stap namba tu? (Hagai 1:2-8) Sori tru olsem long taim bilong bikpela hevi bilong mani, sampela i bin givim baksait long ol wok bilong lotu bambai ol i ken holim yet wanpela kain sindaun ol i lain pinis long en. Dispela kain pasin bilong laikim tumas mani kago i save amamasim dispela “man bilong kisim pisin”!
Ol Amamas Nogut
10. Olgeta wan wan Kristen i mas skelim ol yet long wanem samting?
10 Narapela pasin bilong dispela “man bilong kisim pisin” em long bagarapim tingting bilong ol man bambai ol i no ken save wanem pasin i gutpela na wanem pasin i nogut. Planti amamas bilong nau i kamapim kain tingting olsem i bin i stap long Sodom na Gomora. Ol nius long televisen na niuspepa, ol tu i soim pasin bilong pait na bagarapim man na pasin sem i nogut tru. Planti piksa bilong televisen samting i bagarapim tingting bilong ol man long “skelim wanem ol pasin i gutpela na wanem ol pasin i nogut.” (Hibru 5:14) Tasol tingim tok Jehova i mekim long rot bilong profet Aisaia: “Bai yupela i bagarap, yupela ol man i save tok, pasin nogut em i gutpela na gutpela pasin em i nogut.” (Aisaia 5:20) Olsem wanem? Dispela “man bilong kisim pisin” i paulim tingting bilong yu long rot bilong ol amamas nogut? Em i bikpela samting long yumi olgeta wan wan i mas skelim yumi yet.—2 Korin 13:5.
11. Nius Wastaua i bin kamapim wanem tok lukaut long sampela program i kamap long televisen?
11 Klostu olsem 25 yia i go pinis, nius Wastaua i givim tok lukaut long ol lain i lotuim God long sampela program i kamap long televisen.a Dispela nius i stori long ol kain program olsem, na i tok: “Ol man i painim rot bilong mekim na bai narapela i laikim ol, olsem na ol i tok i no gat rong sapos ol i mekim pasin i no stret. Olsem: Wanpela yangpela meri husat i kisim bel nating i tokim meri pren bilong em: ‘Tasol mi laikim Victor. Mi no wari. . . . Nambawan bikpela samting em mi karim bebi bilong em!’ Naispela musik ol i pilaim wantaim piksa i mekim na i hatwok long yu tingim olsem em i mekim pasin pamuk. Yu tu i laikim Victor. Yu sori long dispela meri. Yu orait long rong ol i mekim. Wanpela meri em bipo em i bin lukim ol kain piksa olsem, em i tok: ‘Em i isi tru long yu senisim tingting bilong yu. Yumi save pinis olsem pasin pamuk em i samting nogut. . . . Tasol mi luksave olsem long tingting bilong mi, mi wanbel wantaim ol dispela man na meri i mekim pasin pamuk.”
12. Wanem ol samting i makim olsem dispela tok lukaut long sampela program bilong televisen i stret tru long nau?
12 Kirap long taim ol dispela tok lukaut i bin kamap, ol kain program olsem i pulap tru. Long planti kantri, ol kain program olsem i save kamap long televisen long san na nait wantaim. Ol man na meri na planti yangpela tu ol i save lukluk long ol kain program olsem long olgeta taim—tingting na bel bilong ol i pulap long ol samting ol i lukim. Tasol yumi no ken giamanim yumi yet na ting olsem ol samting yumi lukim long televisen i wankain olsem ol samting i save kamap tru tru na i no gat rong long lukim. Olsem wanem? Taim wanpela Kristen i makim ol amamas em i laik kisim, yu ting i stret long em i makim ol amamas i kamap long rot bilong ol lain em i nolaik tru long singautim ol i kam long haus bilong em?
13, 14. Sampela i tok wanem long ol tok lukaut bilong Wastaua i bin helpim ol?
13 Planti Kristen ol i bihainim dispela tok lukaut i kam long “wokboi i gat gutpela tingting” na dispela i bin helpim ol. (Matyu 24:45-47) Taim ol i ritim pinis ol dispela tok kaunsel em Baibel i as bilong en, sampela i bin salim pas na stori long olsem wanem ol dispela stori bilong nius Wastaua i bin helpim ol.b Wanpela meri i tok: “Inap 13 yia mi bin stap kalabus long lukim ol kain piksa olsem. Mi ting olsem mi bai stap gut long ol samting bilong lotu, long wanem, mi save go long ol miting Kristen na autim tok sampela taim. Tasol mi kisim tingting bilong ol piksa mi lukim, olsem, sapos man bilong yu i no mekim gut long yu o yu pilim olsem em i no laikim yu, orait i no gat rong long prenim narapela na mekim pasin pamuk—man bilong yu yet i gat asua long dispela samting. Olsem na taim mi pilim olsem man bilong mi yet i bin mekim kain pasin olsem long mi, mi kirap prenim narapela na mekim sin long ai bilong Jehova na long poroman marit bilong mi.” Dispela meri i bin raus long kongrigesen. Isi isi em i kisim bek stretpela tingting, na em i tanim bel, na kongrigesen i kisim em bek. Ol tok lukaut long pasin bilong lukluk long ol kain piksa olsem long televisen i strongim em long sakim ol amamas em Jehova i nolaik tru long en.—Amos 5:14, 15.
14 Narapela meri tu husat i save lukim ol kain piksa olsem, em i tok: “Mi krai taim mi ritim ol dispela stori, long wanem, mi luksave olsem mi no givim bel olgeta long Jehova. Mi tok promis long God bilong mi olsem mi no inap i stap wokboi moa long ol kain piksa olsem.” Wanpela meri Kristen i tok tenkyu long ol dispela stori bilong Wastaua na em i tokaut olsem em i kalabus long ol kain piksa olsem. Em i tok: “Mi tingting planti olsem . . . dispela bai bagarapim pasin bilong mi long pas gut wantaim Jehova o nogat. Olsem wanem mi inap larim ol lain insait long ol dispela piksa i stap pren bilong mi na long wankain taim mi stap pren bilong Jehova?” Sapos ol dispela kain program bilong televisen i bin bagarapim tingting bilong ol man inap 25 yia i go pinis, orait olsem wanem long nau? (2 Timoti 3:13) Yumi mas lukaut gut long umben bilong Satan, em olgeta kain amamas nogut, maski em ol piksa long televisen o ol vidio gem i soim pasin bilong pait na bagarapim man o ol musik vidio i soim pasin pamuk.
Ol Hevi Namel Long Yu na Narapela
15. Olsem wanem Satan i pundaunim sampela?
15 Satan i save yusim hevi namel long yu na narapela olsem wanpela umben bilong brukim lain bilong Jehova. Satan inap yusim dispela samting bilong pundaunim yumi maski yumi mekim wanem wanem wok long lain bilong Jehova. Satan i pundaunim pinis sampela, long wanem, ol i larim ol hevi namel long ol na narapela i bagarapim bel isi na pasin wanbel na pasin bilong stap gut long ol samting bilong lotu, em ol samting Jehova i bin kamapim.—Song 133:1-3.
16. Satan i wok long mekim wanem bilong bagarapim pasin bilong yumi long i stap wanbel?
16 Long taim bilong Wol Woa 1, Satan i laik bagarapim oganaisesen bilong Jehova long graun na em i birua long en, tasol em i bin lus. (KTH 11:7-13) Kirap long dispela taim na i kam, em i wok long mekim pasin trik bilong bagarapim pasin bilong yumi long i stap wanbel. Taim yumi larim hevi namel long yumi yet na narapela i mekim na yumi no stap wanbel, yumi opim dua long dispela “man bilong kisim pisin.” Dispela bai pasim rot bilong holi spirit long mekim wok long i stap bilong yumi yet na long kongrigesen tu. Sapos dispela samting i kamap, Satan bai amamas, long wanem, taim kongrigesen i no stap wanbel, dispela i save nogutim wok autim tok.—Efesus 4:27, 30-32.
17. Ol man i gat hevi namel long ol yet na narapela, wanem samting inap helpim ol long dispela stretim hevi?
17 Yu ken mekim wanem sapos hevi i kamap namel long yu na narapela Kristen? Olgeta hevi i narapela narapela, ol i no wankain. Em i tru olsem sampela taim i gat as long ol hevi i kamap, tasol i no gat as long larim hevi i stap na yumi no stretim. (Matyu 5:23, 24; 18:15-17) God yet i bin kamapim ol gutpela tok i stap long Baibel, na dispela tok i gutpela olgeta. Taim man i bihainim ol stiatok bilong Baibel, oltaim ol dispela tok bai helpim em. Ol dispela tok i save kamapim gutpela samting!
18. Taim yumi bihainim pasin bilong Jehova, bilong wanem dispela bai helpim yumi long stretim hevi namel long yumi na narapela?
18 Jehova i redi long “rausim sin” bilong yumi. (Song 86:5; 130:4) Taim yumi bihainim pasin bilong Jehova, yumi soim olsem yumi ol pikinini tru bilong em. (Efesus 5:1) Yumi olgeta i sinman na i gat wok long Jehova i mas fogivim yumi. Olsem na yumi mas was gut sapos yumi no laik fogivim ol narapela. Yumi inap kamap olsem dispela wokboi long tok piksa bilong Jisas, em i no laik fogivim liklik dinau bilong wanwok bilong em, tasol em yet i bin i gat bikpela dinau tru na bosman bilong em i bin fogivim em. Taim bosman i harim tok long dispela samting, em i tok na ol i tromoi dispela wokboi nogut i go long kalabus. Bilong pinisim dispela tok piksa, Jisas i tok: “Olsem tasol Papa bilong mi i stap long heven, em bai i mekim wankain pasin tasol long yupela sapos yupela i no lusim tru ol rong ol brata i mekim long yupela.” (Matyu 18:21-35) Taim yumi skelim dispela tok piksa long bel na tingim hamas taim Jehova i bin fogivim yumi, dispela bai helpim yumi taim yumi laik stretim ol hevi i kamap namel long yumi na narapela brata o sista bilong yumi!—Song 19:14.
Stap Gut Long Ples Hait Bilong God
19, 20. Yumi mas i gat wanem tingting long ples hait bilong Jehova nau long dispela taim nogut?
19 Yumi stap long taim nogut. Satan inap bagarapim pinis yumi olgeta, tasol em i no mekim, long wanem, Jehova i lukautim yumi. Olsem na sapos yumi no laik bai dispela “man bilong kisim pisin” i kisim yumi long umben bilong em, yumi mas stap yet long dispela ples hait bilong “God Antap Tru” na em bai “karamapim” yumi.—Song 91:1.
20 Jehova i save givim ol tok bilong kirapim gen tingting bilong yumi na soim yumi long rot yumi mas bihainim, na oltaim yumi mas tingim olsem ol dispela tok i bilong lukautim yumi, i no bilong kalabusim yumi. Yumi olgeta i gat wanpela birua em save bilong em i winim save bilong yumi ol man. Sapos Jehova i no helpim yumi, i no gat wanpela bilong yumi bai abrusim umben bilong dispela birua. (Song 124:7, 8) Olsem na yumi ken beten olsem Jehova bai kisim bek yumi long ol umben bilong dispela “man bilong kisim pisin”!—Matyu 6:13.
[Ol Futnot]
a The Watchtower, Disemba 1, 1982, pes 3-7.
b The Watchtower, Disemba 1, 1983, pes 23.
Yu Inap Tingim?
• Bilong wanem pasin bilong ‘pret long man’ inap bagarapim man?
• Olsem wanem Satan i mekim wok long pasin bilong laikim tumas mani kago?
• Olsem wanem Satan i bin pundaunim sampela long rot bilong ol amamas nogut?
• Satan i save yusim wanem samting olsem umben bilong bagarapim pasin bilong yumi long i stap wanbel?
[Piksa long pes 27]
Sampela i bin pundaun long pasin bilong pret long man
[Piksa long pes 28]
Olsem wanem? Yu kisim amamas long ol samting em Jehova i nolaik tru long en?
[Piksa long pes 29]
Yu ken mekim wanem sapos i gat hevi i kamap namel long yu na narapela Kristen?