Tingim Gut Ol Samting Bilong Bihain

“YUPELA i no ken tingting tumas long tumora.” Jisas Krais i mekim dispela tok long bikpela tok bilong em long maunten, long hap bilong Galili. Na em i tok moa: “De tumora em i ken tingting long samting bilong em yet.”​—Matyu 6:34.

Wanem mining bilong dispela tok “de tumora em i ken tingting long samting bilong em yet”? Yu ting Jisas i laik tok yu mas tingting long ol samting bilong nau tasol na no ken tingim ol samting bilong tumora? Yu ting dispela i stret wantaim samting Jisas na ol disaipel i bilip long en?

“No Ken Tingting Planti”

Yu ken ritim stret dispela tok bilong Jisas long Matyu 6:​25-​32. Hap tok bilong em i olsem: “Yupela i no ken tingting planti long laip bilong yupela na tok, ‘Bai yumi kaikai wanem samting? Bai yumi dring wanem samting?’ Na yupela i no ken tingting planti long bodi bilong yupela na tok, ‘Bai yumi pasim wanem laplap?’ . . . Yupela lukim ol pisin. Ol i no save planim kaikai, na ol i no save bungim na putim long haus kaikai. Tasol Papa bilong yupela i stap long heven em i save givim kaikai long ol. . . . Sapos wanpela bilong yupela i wok long tingting planti long rot bilong i stap gut, ating dispela pasin bilong tingting planti bai i skruim liklik hap taim moa long laip bilong en? I no inap tru. ‘Bilong wanem yupela i save tingting planti long ol klos samting?’ . . . Lukim gut ol plaua i stap nabaut, ol i kamap olsem wanem. Ol i no save hatwok. Ol i no save wokim laplap. . . . Yupela i no ken tingting planti na tok, ‘Bai yumi kaikai wanem samting? Bai yumi dring wanem samting?’ Nogat. Ol haiden i save wari long painim olgeta dispela samting. Tasol Papa bilong yupela i stap long heven em i save pinis, yupela i mas kisim dispela olgeta kain samting.”

Bilong pinisim dispela tok, Jisas i mekim tupela gutpela tok em yumi mas tingim gut. Namba wan i olsem: “Yupela i mas wok pastaim long painim Kingdom bilong God wantaim stretpela pasin bilong em. Na bihain bai em i givim dispela olgeta arapela samting tu long yupela.” Namba tu: “Yupela i no ken tingting tumas long tumora. De tumora em i ken tingting long samting bilong em yet. Hevi bilong wanpela de em inap long dispela de tasol.”​—Matyu 6:​33, 34; Nupela Testamen na Ol Sam.

Papa i Save Long Samting Yu Mas Kisim

Yu ting Jisas i laik tokim ol disaipel na ol fama tu long ol i no ken ‘wokim gaden o kisim kaikai i mau, o bungim kaikai na putim long haus kaikai o long wokim laplap bilong ol’? (Sindaun 21:5; 24:​30-​34; Saveman 11:4) Nogat. Sapos ol i lusim wok olgeta, orait “long taim bilong kisim kaikai i mau, [ol] bai i go painim nating long gaden” na ol i no gat kaikai o ol i no gat laplap bilong pasim.​—Sindaun 20:4.

Na olsem wanem long pasin bilong tingting planti? Yu ting Jisas i tok ol disaipel bilong em inap abrusim tru pasin bilong tingting planti? Nogat, ol i no inap abrusim olgeta. Jisas yet i bin pilim hevi nogut tru long dispela nait taim ol birua i kam holim em na bihain kilim em i dai.​—Luk 22:44.

Tok bilong Jisas i tru. Sapos yu tingting planti oltaim dispela i no inap helpim yu long stretim ol hevi i painim yu, na olsem Jisas i tok, “em i no inap skruim liklik hap taim moa long laip bilong [yu].” (Matyu 6:27) Pasin bilong tingting planti tumas long olgeta samting, dispela samting inap long sotim laip bilong yu.

Tok bilong Jisas em inap tru long helpim yumi. Planti samting yumi save wari na tingting planti long en, ol i no save kamap tru. Bikman Winston Churchill bilong Inglan em i pilim tru dispela samting long taim nogut bilong Wol Woa 2. Em i tingim sampela samting em i bin tingting planti long en long dispela taim na em i tok: “Taim mi tingting bek long ol dispela samting mi bin wari long en, mi tingim stori bilong wanpela lapun, taim em i laik i dai em i tok, long laip bilong em, em i gat planti hevi, tasol planti bilong ol dispela hevi i no bin kamap tru.” Tru tumas, em i savepasin long tingim hevi bilong wanpela de tasol, long wanem, long ol de bihain yumi inap painim ol kain kain hevi em bai mekim na yumi tingting planti moa yet.

“Wok Pastaim Long Painim Kingdom Bilong God”

Jisas i no tingting tasol long ol man i harim tok bilong em ol i ken stap gutpela long skin na long bel, nogat. Em i save, pasin bilong tingting planti long painim kaikai, na laik bilong kisim planti samting bilong skin na ol amamas, ol dispela samting inap mekim na yumi no tingim moa ol bikpela samting. (Filipai 1:10) Tasol ating yu bai tingting olsem, ‘I gat wanpela samting i bikpela samting i winim wok bilong painim ol kaikai samting?’ Yes, i gat. Em ol samting bilong lotu yumi mas mekim bilong lotuim God. Jisas i tok, nambawan bikpela samting long laip bilong yumi, em long “wok pastaim long painim Kingdom bilong God wantaim stretpela pasin bilong em.”​—Matyu 6:​33, Nupela Testamen na Ol Sam.

Long taim bilong Jisas, planti manmeri i givim bel tru long painim ol samting bilong skin. Wok bilong bungim planti mani kago em i nambawan samting long laip bilong ol. Tasol Jisas i laik kirapim dispela lain i harim tok bilong em long kisim narapela kain tingting. Ol Juda i harim tok bilong Jisas ol i bin dediket long God, olsem na “namba wan samting” long laip bilong ol, em ol i mas “aninit long God tasol na bihainim ol lo bilong em.”​—Saveman 12:13.

Tingting oltaim long ol samting bilong skin​—em pasin bilong “tingting planti long ol samting bilong graun, na . . . wari long bungim planti mani”​—dispela pasin inap paulim ol man i harim tok bilong Jisas na ol i no tingting moa long lotuim God. (Matyu 13:22) Aposel Pol i tok: “Ol man i laikim tumas long kisim planti mani samting, ol traim bai i kamap na holimpas ol olsem umben i holimpas wanpela abus. Bel bilong ol bai i kirap long mekim planti samting nogut na dispela bai i paulim ol tru. Na long dispela pasin ol bai i bagarap olgeta.” (1 Timoti 6:9) Bilong helpim ol long abrusim dispela “umben,” Jisas i tokim ol disaipel olsem Papa bilong ol long heven i save long ol samting em ol i mas kisim. God bai lukautim ol long kaikai samting olsem em i save lukautim “ol pisin” long kaikai. (Matyu 6:​26, 32) Ol i no ken larim pasin bilong tingting planti i daunim ol. Ol i mas mekim olgeta samting ol inap mekim, na nau ol i ken putim dispela hevi long han bilong Jehova.​—Filipai 4:​6, 7.

Taim Jisas i tok “de tumora em i ken tingting long samting bilong em yet,” em i laik tok, yumi no ken tingting planti tumas long ol samting inap kamap long tumora na skruim dispela hevi i go antap long ol hevi bilong dispela tude. Wanpela Baibel i tanim tok bilong em olsem: “Yupela no ken tingting planti long ol samting bilong tumora; em bai i gat ol hevi bilong em yet. Nogut yupela i skruim sampela hevi moa long ol hevi i save kamap long ol wan wan de.”​—Matyu 6:​34, Today’s English Version.

“Kingdom Bilong Yu i Mas i Kam”

Tru, yumi no ken tingting planti oltaim long ol samting bilong tumora, tasol nogut yumi givim baksait olgeta long ol samting bai kamap tumora o long bihain. Jisas i no bin kirapim ol disaipel long lusim tingting olgeta long ol samting bai kamap bihain, nogat. Em i tokim ol long tingim gut ol samting bilong bihain. I stret ol i mas beten long kisim kaikai bilong nau tasol. Tasol pastaim ol i mas beten long ol samting bilong bihain​—long Kingdom Bilong God i mas i kam na laik bilong God i ken kamap long graun.​—Matyu 6:​9-​11.

Yumi no ken i stap wankain olsem ol man long taim bilong Noa. Ol i wok long “kaikai na dring, na ol man i maritim ol meri,” na ol i no tingim samting i laik kamap. Orait wanem samting i painim ol? “Bikpela tait i kamap na i pinisim olgeta dispela manmeri.” (Matyu 24:​36-​42) Aposel Pita i stori long dispela samting i bin kamap bilong kirapim yumi long tingim ol samting bai kamap bihain. Em i tok: “Sapos dispela olgeta samting bai i pinis long dispela kain pasin, orait yupela i ting yupela i mas bihainim wanem kain pasin? Yupela i mas . . . wokabaut long pasin holi na bihainim olgeta pasin bilong God. Long dispela pasin yupela i mas wetim De bilong God i kamap.”​—2 Pita 3:​5-7, 11, 12.

Bungim Ol Gutpela Samting Long Heven

Tru tumas, yumi mas tingim gut na “wetim” de bilong Jehova. Taim yumi mekim olsem, dispela bai kirapim yumi long mekim gutpela wok long taim, strong, save, na mani bilong yumi. Yumi no ken tingting tingting oltaim long ol samting bilong skin​—olsem ol samting yumi mas kisim o ol amamas bilong graun​—na yumi no gat taim bilong mekim ol wok i kamapim olsem yumi givim bel tru long God. Sapos yumi tingting tasol long ol samting bilong nau, ating yumi inap kisim kwik ol gutpela samting, tasol ol i bilong sotpela taim tasol. Jisas i tok, i gutpela moa long “bungim ol gutpela samting bilong [yumi] long heven,” na i no long graun.​—Matyu 6:​19, 20.

Jisas i kamapim strong dispela samting taim em i mekim tok piksa long wanpela man i tingting long ol samting em bai mekim bihain, tasol em i no tingting liklik long God. Graun bilong dispela man i gat gutpela gris na i kamapim planti kaikai. Em i tingting long brukim ol haus kaikai bilong em na wokim ol bikpela bikpela haus na bungim planti kaikai long en na bai em i ken malolo gut na kaikai na dring na amamas. Tasol i gat wanem rong long dispela? Em i dai paslain long em i kisim amamas long ol gutpela samting em i bin wok strong tru long kisim. Na samting i nogut moa, em i no bin mekim ol samting bilong pas gut wantaim God. Bilong pinisim tok piksa Jisas i tok: “Dispela kain samting bai i kamap long ol man i hipim hipim planti samting bilong ol yet, tasol ol i stap rabis long ai bilong God.”​—Luk 12:​15-​21; Sindaun 19:21.

Yu Ken Mekim Wanem?

Yu no ken mekim wankain popaia olsem dispela man long tok piksa bilong Jisas. Kisim save long ol samting God i laik mekim long bihain, na mekim ol samting i stret wantaim dispela. Ol samting God i laik mekim, em i no bin haitim long ol man. Profet Amos i bin tok: “Tru tumas, olgeta samting God, Bikpela i laik mekim, em i save autim pastaim long ol wokman bilong en, em ol profet, na bihain em i save mekim olsem em i bin tok.” (Amos 3:7) Olgeta samting Jehova i bin kamapim klia long rot bilong ol profet, ol i stap long Baibel, em Tok bilong em, na yumi inap ritim.​—2 Timoti 3:​16, 17.

Wanpela samting Baibel i kamapim klia, em ol samting liklik taim bai kamap na em bai mekim bikpela samting tru long olgeta hap bilong graun. Jisas i tok: “Long dispela taim bai i gat bikpela hevi tru. Stat long taim graun i nupela yet na i kam inap long nau, kain hevi olsem i no bin kamap bipo.” (Matyu 24:21) I no gat wanpela man bilong graun inap pasim dispela samting long kamap. Na tu, i no gat as na lain i lotu tru long God ol i laik pasim dispela samting. Bilong wanem? Long wanem, dispela samting i laik kamap em bai pinisim olgeta pasin nogut bilong graun na em bai kamapim “nupela skai na nupela graun,” olsem wanpela nupela gavman bilong heven na wanpela lain bilong nupela graun. Long dispela nupela taim, God bai “mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen.”​—KTH 21:​1-4.

Man i gat gutpela tingting, em bai kirap nau long makim hap taim bilong skelim ol dispela samting Baibel i tok bai kamap. Yu laik bai wanpela i helpim yu long mekim olsem? Orait askim ol Witnes Bilong Jehova long helpim yu. O yu ken raitim pas i go long lain bilong wokim dispela nius. Tru tumas, yu mas tingting long i stap bilong yu long nau​—tasol yu mas tingim tu dispela gutpela taim tru bai kamap bihain.

[Ol Piksa long pes 7]

“Yupela i no ken tingting tumas . . . de tumora em i ken tingting long samting bilong em yet”