Save Gut Long Ol “Tingting Hait Bilong God”
“Holi Spirit i save lukluk gut long olgeta samting, na em i save lukim tu olgeta tingting hait bilong God.”—1 KORIN 2:10.
1. Wanem sampela tok i tru bilong Baibel i mekim ol nupela Baibel sumatin i amamas?
PLANTI bilong yumi long kongrigesen Kristen inap tingim bikpela amamas yumi bin kisim long namba wan taim yumi kisim save long tok i tru. Yumi bin kisim save long mining bilong nem Jehova, na i gat wanem as na em i larim pen na hevi i stap, na bilong wanem sampela man i go long heven, na wanem samting bai painim ol arapela manmeri i stap gut long God. Tru, taim yumi no save yet long tok i tru, ating yumi bin ritim Baibel, tasol save bilong ol dispela samting i bin i stap hait long yumi, olsem em i save stap hait long planti manmeri. Yumi kain olsem man i lukluk i go insait long solwara bilong lukim rip. Sapos em i no gat glas bilong lukluk, em i no inap lukim gut ol naispela samting i stap long rip. Tasol sapos em i gat glas, orait nau em inap lukim gut ol naispela samting i gat kala kala—rip na kain kain pis samting—na em i amamas long ol dispela samting. Na olsem tasol, taim narapela i kirap helpim yumi long save gut long Baibel, yumi stat long kliagut long ol “tingting hait bilong God.”—1 Korin 2:8-10.
2. Bilong wanem amamas bilong kisim save long Tok Bilong God i no gat pinis bilong en?
2 Tasol olsem wanem? Sapos yumi save liklik tasol long ol tok i tru bilong Baibel, yumi ken ting dispela inap long yumi? Nogat. Insait long ol “tingting hait bilong God” i gat ol savetingting em God i kamapim long ol Kristen long rot bilong holi spirit, tasol i stap hait long ol narapela lain. (1 Korin 2:7) Savetingting bilong God i no gat pinis bilong en na yumi inap kisim bikpela amamas long kisim save long en. Bai i no gat wanpela taim we yumi inap save long olgeta tingting bilong God. Amamas yumi kisim long namba wan taim yumi kisim save long ol as tok bilong Baibel, dispela inap stap wantaim yumi oltaim oltaim sapos yumi wok yet long kisim save long ol “tingting hait bilong God.”
3. Bilong wanem yumi mas kliagut long as bilong ol bilip bilong yumi?
3 Bilong wanem yumi mas save gut long ol dispela “tingting hait”? Taim yumi kliagut long ol tok yumi bilip long en, na long as na yumi bilip olsem, dispela i save strongim bilip bilong yumi. Baibel i tok yumi mas mekim wok long “tingting” bilong yumi bilong yumi ken “save long ol pasin i gutpela na long ol pasin God i laikim tumas na long ol pasin i inap tru na i stret olgeta.” (Rom 12:1, 2) Taim yumi kliagut long as na Jehova i tokim yumi long wokabaut long rot em i makim, dispela i save strongim yumi long bihainim ol tok bilong em. Olsem na taim yumi kisim save long ol “tingting hait,” dispela inap strongim yumi long sakim ol samting i laik pulim yumi na inap kirapim yumi long “wok strong long mekim olgeta kain gutpela pasin.”—Taitus 2:14.
4. Pasin bilong stadi long Baibel i makim wanem samting?
4 Bilong save gut long ol strongpela tok, yumi mas stadi. Tasol stadi i no wankain long pasin bilong ritim nating tasol ol tok, nogat. Pasin bilong stadi i olsem yumi skelim gut ol tok na save long olsem wanem dispela tok i stret wantaim ol tok yumi save pinis long en. (2 Timoti 1:13) Yumi mas save i gat wanem as na Baibel i mekim wanpela tok. Na tu, taim yumi stadi long Baibel yumi mas tingim tingim long bel olsem wanem ol samting yumi kisim save long en inap helpim yumi long wokim ol gutpela disisen na helpim ol narapela. Na narapela samting, “spirit bilong God yet i bin kamapim olgeta tok i stap long buk bilong God” na ol dispela tok “i gutpela samting tru,” olsem na yumi mas stadi long “olgeta tok bilong God.” (2 Timoti 3:16, 17; Matyu 4:4) Tru, pasin bilong stadi long Baibel em bikpela wok! Tasol yumi inap kisim amamas long en, na i no hatwok tumas long kliagut long ol “tingting hait bilong God.”
Jehova i Save Helpim Ol Man i Gat Pasin Daun Long Kisim Save
5. Husat inap save long ol “tingting hait bilong God”?
5 Maski yu no bin kisim bikpela mak long skul na yu no save gut long pasin bilong stadi, yu no ken ting olsem yu no inap kliagut long ol “tingting hait bilong God,” nogat. Taim Jisas i stap long graun, ol samting Jehova i tingting pinis long mekim, Em i haitim long ol man i gat gutpela tingting na save, na em i kamapim long ol man nating tasol em ol i no bin kisim bikpela skul. Tasol ol dispela man i gat pasin daun, olsem na ol inap save long ol tok em dispela wokboi bilong God i skulim ol long en. Ol i stap olsem liklik pikinini tasol taim yumi skelim ol wantaim ol man i bin kisim bikpela skul. (Matyu 11:25; Aposel 4:13) Aposel Pol i stori long “ol samting God i bin redim i stap bilong ol man i save laikim em tru,” na em i tokim ol wanbilip: “Tok bilong ol dispela samting i bin i stap hait, tasol long wok bilong Spirit bilong em yet, God i bin kamapim long mipela. Holi Spirit i save lukluk gut long olgeta samting, na em i save lukim tu olgeta tingting hait bilong God.”—1 Korin 2:9, 10.
6. Wanem mining bilong 1 Korin 2:10?
6 Olsem wanem spirit bilong God i lukluk long “olgeta samting, na em i save lukim tu olgeta tingting hait bilong God?” Jehova i no kamapim narapela narapela tok i tru long ol wan wan Kristen, nogat, em i save yusim spirit bilong em long stiaim oganaisesen bilong em, na dispela oganaisesen i save helpim ol manmeri bilong God—em ol i wanbel long mekim wok bilong God—long kisim save bilong Baibel. (Aposel 20:28; Efesus 4:3-6) Long olgeta hap bilong graun, olgeta kongrigesen i save bihainim wankain program bilong Baibel stadi. Ol i stadi long olgeta bikpela tok bilong Baibel. Long rot bilong kongrigesen, holi spirit i save helpim ol manmeri long kisim ol pasin ol i mas i gat na bai ol inap save long ol “tingting hait bilong God.”—Aposel 5:32.
Ol “Tingting Hait Bilong God”
7. Bilong wanem planti manmeri i no kliagut long ol “tingting hait bilong God”?
7 Yumi no ken ting olsem ol “tingting hait” bilong God i hatwok tumas long kliagut long en, nogat. I no olsem ol savetingting bilong God i hatwok tumas long kisim na long dispela as ol “tingting hait bilong God” i stap hait long planti manmeri. Ol dispela tingting i stap hait long ol, long wanem, Satan i giamanim ol man long sakim ol helpim Jehova i save givim long rot bilong oganaisesen bilong Em.—2 Korin 4:3, 4.
8. Long namba 3 sapta long pas Pol i raitim long ol Efesus, em i stori long wanem ol tingting hait?
8 Namba 3 Efesus sapta 3 bilong pas Pol i raitim long ol Efesus i soim olsem insait long ol “tingting hait bilong God,” i gat planti tok i tru em planti bilong lain bilong Jehova i save gut long en. Ol i save pinis long dispela Pikinini bilong promis em i husat, God i makim sampela namel long ol manmeri long graun bilong i go long heven, na Kingdom Bilong Mesaia. Pol i tok: “Long olgeta taim bipo, God i no bin autim klia dispela tok hait. Tasol nau long Holi Spirit, God i autim klia long mipela ol aposel na profet bilong em. Dispela tok i olsem. Long gutnius yupela man bilong ol arapela lain yupela i kamap wanlain na wanpela bodi wantaim mipela. Na yumi olgeta i save kisim olgeta samting God i bin makim bilong yumi long Krais Jisas.” Pol i tok em i bin kisim wok bilong “autim klia dispela tingting bilong [God]” i bin i stap hait.—Efesus 3:5-9.
9. Bilong wanem em i gutpela samting tru long yumi inap kliagut long ol “tingting hait bilong God”?
9 Pol i tok moa: “[God] i mekim sios bilong en i kamap, na long dispela pasin em i mekim ol kain kain gutpela tingting na save bilong en i kamap ples klia, bai ol strongpela ensel na spirit bilong heven i ken save long tingting bilong God.” (Efesus 3:10) Ol ensel inap lain na kisim save long ol tingting bilong God long rot bilong lukim na save gut long ol samting God i mekim long kongrigesen Kristen. Em i gutpela samting tru yumi inap kliagut long ol samting em ol ensel i laik kisim save long en! (1 Pita 1:10-12) Orait nau Pol i tok yumi mas wok strong long save gut long bilip Kristen, “em i bikpela tru, na i go longpela moa, na i go antap tru, na i go daun moa.” (Efesus 3:11, 18-19) Nau yumi ken stori long sampela tingting hait em sampela bilong yumi i no bin tingim.
Sampela Tingting Hait
10, 11. Olsem Baibel i makim, wanem taim Jisas i kamap Pikinini bilong “meri” bilong God long heven?
10 Yumi save, Jisas em i Pikinini bilong “meri” bilong God long heven em Stat 3:15 i stori long en. Bilong kliagut moa, yumi ken skelim kain askim olsem: ‘Wanem taim Jisas i kamap Pikinini bilong promis? Long taim em i no kam daun yet long graun, o long taim mama i karim em, o long taim em i kisim baptais, o long taim em i kirap bek?’
11 God i bin tok promis olsem oganaisesen bilong em long heven, em tok profet i kolim olsem “meri” bilong em, em bai kamapim wanpela pikinini na dispela Pikinini bai krungutim het bilong snek. Planti handet yia i kamap na i go pinis, tasol meri bilong God i no bin kamapim wanpela pikinini em inap bagarapim Satan na ol wok bilong em. Olsem na tok profet bilong Aisaia i tok em i “tarangu meri i no save karim pikinini” na “lewa bilong en i bruk.” (Aisaia 54:1, 5, 6) Bihain mama i karim Jisas long Betlehem. Tasol taim Jisas i kisim baptais na holi spirit i makim em na em i kamap wanpela pikinini spirit bilong God, long dispela taim tasol Jehova inap tokaut: “Dispela em i Pikinini bilong mi.” (Matyu 3:17; Jon 3:3) Em nau, Pikinini bilong meri i kamap pinis. Bihain, holi spirit i makim tu ol disaipel bilong Jisas. Orait nau dispela “meri” bilong Jehova, em longtaim tru em i bin pilim olsem wanpela “meri i no bin pilim pen bilong karim pikinini,” em inap “amamas na singaut.”—Aisaia 54:1; Galesia 3:29.
12, 13. Wanem ol skripsa i soim olsem olgeta Kristen long graun em God i bin makim ol, olgeta wantaim em dispela “wokboi i gat gutpela tingting”?
12 Narapela tingting hait em God i bin kamapim long yumi, em dispela laik bilong God long makim 144,000 manmeri namel long olgeta manmeri long graun. (KTH 14:1, 4) Yumi bilip olsem olgeta Kristen God i bin makim long holi spirit, taim ol i stap yet long graun, olgeta wantaim em dispela “wokboi i gat gutpela tingting” em Jisas i tok em bai givim “kaikai” long ol arapela wokboi bilong em long taim stret. (Matyu 24:45) Wanem ol tok bilong Baibel i kamapim klia olsem dispela bilip bilong yumi i stret? O yu ting Jisas i tok long ol Kristen wan wan husat i save strongim ol brata long ol kaikai bilong spirit?
13 God i tokim lain Israel: “Yupela i witnes bilong mi. Mi bin makim yupela bilong i stap wokman bilong mi.” (Aisaia 43:10) Tasol long Nisan 11 bilong yia 33 C.E., Jisas i tokim ol hetman bilong Israel olsem God i bin sakim lain bilong ol na ol i no stap moa olsem wokman bilong Em. Em i tok: “God bai i rausim kingdom bilong en long han bilong yupela, na givim long wanpela lain manmeri ol i save kamapim kaikai bilong dispela kingdom.” Jisas i tokim bikpela lain manmeri: “Harim. Nau ples bilong yupela bai i bagarap na i stap nating.” (Matyu 21:43; 23:38) Taim lain Israel i bin stap wokboi bilong Jehova, ol i no gat gutpela tingting. (Aisaia 29:13, 14) Bihain, long dispela de yet, taim Jisas i askim: “Wanem wokboi i gat gutpela tingting, na i save mekim gutpela wok oltaim?” i olsem em i askim, ‘Wanem lain bai kamap olsem senis bilong Israel na stap gutpela wokboi bilong God?’ Aposel Pita i bekim dispela askim taim em i tokim kongrigesen bilong ol Kristen God i bin makim ol long holi spirit: “Yupela i stap lain manmeri i holi, em ol lain manmeri tru bilong God.” (1 Pita 1:4; 2:9) Dispela lain bilong spirit, em “lain Israel tru bilong God,” em i kamap nupela wokboi bilong Jehova. (Galesia 6:16) Olgeta memba bilong lain Israel bilong bipo olgeta wantaim ol i stap olsem wanpela “wokman,” na olsem tasol olgeta Kristen God i bin makim, taim ol i stap yet long graun olgeta wantaim em dispela “wokboi i gat gutpela tingting.” Em i gutpela samting tru yumi inap kisim “kaikai” long rot bilong dispela wokboi bilong God!
Amamas Long Mekim Stadi
14. Bilong wanem pasin bilong stadi long Baibel i kamapim bikpela amamas, winim pasin bilong ritim tasol?
14 Taim yumi kisim nupela save long ol tok bilong Baibel, yumi save amamas, long wanem, dispela i strongim bilip bilong yumi. Long dispela as, pasin bilong stadi long Baibel, na i no pasin bilong ritim tasol, i save kamapim bikpela amamas. Olsem na taim yu ritim ol buk Kristen, askim yu yet: ‘Taim mi skelim dispela nupela tok wantaim ol tok em bipo mi bin ritim long dispela samting, dispela tupela tok i wankain o i narapela kain liklik? Mi inap tingim wanem ol narapela ves bilong Baibel bilong sapotim dispela tok nau mi stadi long en?’ Sapos yu mas mekim wok painimaut moa, raitim askim yu laik kisim bekim bilong en long wanpela pepa, na bihain mekim stadi long dispela.
15. Wanem sampela samting yu ken stadi na kisim amamas long en? Yu ken mekim wanem na bai dispela stadi i ken helpim yu long bihain?
15 Wanem sampela samting moa yu ken stadi na kisim amamas long en? Yu inap kisim sampela save moa long rot bilong stadi gut long ol kontrak God i bin mekim wok long en bilong helpim ol manmeri. Yu ken strongim bilip bilong yu long rot bilong stadi long ol tok profet i makim Jisas Krais o yu ken skelim ol wan wan ves bilong wanpela buk bilong Baibel i gat ol tok profet long en. Narapela samting bilong strongim bilip bilong yu em yu ken ritim stori bilong ol Witnes Bilong Jehova long nau, long buk Jehovah’s Witnesses—Proclaimers of God’s Kingdom, sapos yu gat dispela buk long tok ples bilong yu.a Na sapos yu skelim gen ol “Askim” i stap long Wastaua, dispela bai helpim yu long kliagut moa long sampela ves bilong Baibel. Taim yu skelim gen, skelim gut ol skripsa na pasin ol i bihainim bilong kamapim klia wanpela tok. Dispela bai helpim yu long skulim gut “tingting” bilong yu na yu bai kisim pasin bilong skelim gut ol samting. (Hibru 5:14) Taim yu mekim stadi, raitim ol tok yu kisim save long en insait long Baibel bilong yu yet o long wanpela pepa na bai stadi yu mekim inap helpim tru yu na ol narapela yu helpim ol.
Helpim Ol Yangpela Long Amamas Long Stadi Long Baibel
16. Olsem wanem yu inap helpim ol yangpela long amamas long stadi long Baibel?
16 Ol papamama i ken mekim planti samting bilong helpim ol pikinini bilong ol long kisim laik bilong pas gut wantaim God. No ken ting olsem ol pikinini i no inap kliagut long ol strongpela tok bilong Baibel. Sapos yu tokim ol yangpela long mekim wok painimaut long sampela samting bilong redi long famili Baibel stadi, yu ken askim ol long stori long samting ol i lainim. Narapela samting yu ken mekim long famili stadi, em mekim traim long olsem wanem ol yangpela i ken sambai long bilip bilong ol na kamapim klia olsem samting ol i bin lainim em tok i tru. Na tu, yu ken mekim wok long buklet “See the Good Land”b bilong skulim ol pikinini long ol ples em Baibel i kolim na ol ples em Baibel ritim bilong olgeta wik i stori long en.
17. Bilong wanem yumi mas bihainim stretpela tingting long ol Baibel stadi projek bilong yumi yet?
17 Ol Baibel stadi projek bilong yu yet inap strongim bilip bilong yu na yu inap kisim amamas long en, tasol no ken larim ol dispela projek i kisim bikpela hap taim bilong yu na yu no gat taim bilong redim ol miting bilong kongrigesen. Ol miting em narapela rot Jehova i skulim yumi, na em i mekim olsem long rot bilong “wokboi i gat gutpela tingting.” Pasin bilong mekim wok painimaut inap helpim yu long mekim ol gutpela bekim long ol miting, olsem long Buk Stadi Bilong Kongrigesen o long taim brata i kamapim ol bikpela tok bilong Baibel long Skul Tiokratik.
18. Bilong wanem i gutpela long yumi wok strong long kliagut long ol “tingting hait bilong God”?
18 Pasin bilong stadi long ol strongpela tok bilong Baibel inap helpim yu long go klostu long Jehova. Baibel i tok long dispela pasin bilong stadi, olsem: “Gutpela tingting i olsem mani, na i save helpim yumi long taim nogut. Tasol gutpela tingting na save i winim mani, na i helpim yumi moa yet na yumi stap gut olgeta.” (Saveman 7:12) Olsem na i gutpela tru sapos yu wok strong long kliagut long ol tok i tru God i givim long yumi. Baibel i mekim dispela tok promis long ol man i wok strong long stadi: “Bai yu save gut long God.”—Sindaun 2:4, 5.
[Ol Futnot]
a Ol Witnes Bilong Jehova i wokim.
b Ol Witnes Bilong Jehova i wokim.
Yu Inap Stori Long Dispela?
• Wanem sampela “tingting hait bilong God”?
• Bilong wanem yumi no ken lusim wok bilong stadi long ol strongpela tok?
• Bilong wanem pasin bilong kliagut long ol “tingting hait bilong God” i op long olgeta Kristen?
• Yu ken mekim wanem bilong save moa long ol “tingting hait bilong God”?
[Piksa long pes 28]
Wanem taim Jisas i kamap Pikinini bilong meri?
[Piksa long pes 31]
Ol papamama i ken givim sampela wok painimaut long ol pikinini bilong ol bilong redi long famili stadi