Wanem Samting i Mekim na Laip Bilong Yu i Gat As Tru?
KENNY i holim wok i gat namba long wanpela bikpela kampani, em i gat ka bilong ol maniman, na em i gat wanpela flet i stap long hap we ol maniman tasol i save sindaun long en long wanpela bikpela siti. Em i hapman bilong go long balus na kalap long parasut i go daun inap planti handet mita long graun, na em i save kisim amamas long mekim olsem. Olsem wanem? Ol dispela samting i mekim em i stap amamas tru? Long nius The Wall Street Journal, em i tok: “Nau mi gat 45 krismas na mi no save laip bilong mi long bihain bai go olsem wanem . . . Laip bilong mi i no gat as tru bilong en.”
Elyn i bin wok strong bilong kamap hapmeri bilong spot bilong raun long ais, olsem ais sketa. Em i mekim gut na em i kisim biknem em i laik kisim. Em i tok: “Tasol ol amamas em mi bin tingting long kisim mi no bin kisim. Mi stap wanpis na bel hevi tru. Bihain bai mi kamap lapun na maski mi gat planti mani samting na gutpela sindaun, laip bilong mi bai i no gat as tru bilong en sapos ol dispela samting tasol i olsem as bilong i stap bilong mi.”
Pasin bilong kamapim kain kain save bilong penim piksa i as bilong i stap bilong Hideo, na em i gat nem long yusim kain kain kala. Em i no save salim ol piksa bilong em. Em i ting ol dispela piksa i bikpela samting na sapos em i salim i olsem dispela i mekim wok bilong em i samting nating. Taim em i gat 98 krismas, klostu long taim em i laik i dai em i givim planti piksa em i bin penim long wanpela haus tumbuna. Wok bilong penim piksa i stap olsem as bilong i stap bilong em. Tasol em i no amamas olgeta long wok em i bin mekim, em i ting em i no gat rot long mekim dispela wok i kamap nambawan olgeta.
Sampela man i insait tru long wok bilong helpim ol man. Olsem wanpela man i gat namba long wanpela kampani bilong wokim ol muvi long Hollywood. Em i namba tu presiden bilong wanpela bikpela kampani bilong wokim ol muvi long Amerika, olsem na em i save stap wantaim ol man na meri ekta samting ol i gat nem na em i save sindaun long wanpela hap bilong taun we ol maniman i sindaun long en. Taim em i go limlimbur long Kambodia, wanpela yangpela meri i kam long em na i singaut long mani taim em i sindaun kaikai long wanpela haus kaikai long Phnom Penh. Em i givim yangpela meri wan dola na kol dring. Yangpela meri i amamas. Tasol long nait bihain meri i stap gen long dispela hap na wok long singaut yet long mani samting. Dispela man i lukim olsem liklik helpim tasol i no inap, ol i mas kisim bikpela helpim tru.
Wanpela yia bihain, dispela man i senisim wok bilong em—em i lusim wok bilong wokim ol muvi samting na kirap mekim wok bilong helpim ol rabisman bilong Kambodia. Em i kamapim wanpela skul i save givim ples slip, kaikai na ediukesen long ol sumatin. Tasol long olgeta taim bel bilong em i no stap isi—em i amamas long gutpela wok em i bin mekim tasol em i bel hevi na bel kaskas tu, long wanem, em i gat planti hevi em i mas karim.
Dispela fopela manmeri mipela i stori long ol, ol i ting olsem ol i save pinis long samting ol i laik mekim long laip bilong ol. Tasol taim ol i kisim pinis olgeta samting em ol i bin wok strong long kisim, ol i pilim olsem laip bilong ol i no gat as tru bilong en. Wanem as bilong i stap bilong yu? Wanem samting i stap namba wan long laip bilong yu? Olsem wanem? Bihain bai yu bel hevi long ol samting yu mekim nau long laip bilong yu?