Yu Inap Kisim Laip i Gat As Tru Bilong En!

MANI na ol samting ol man i baim, ol dispela samting i as bilong i stap bilong planti man. Sampela i wok strong long kisim biknem bilong dispela graun. Sampela i laik mekim wok bilong ol long penim piksa samting i kamap gutpela tru. Na namba wan wok long laip bilong sampela em bilong helpim ol tarangu lain. Tasol planti i no save long as bilong ol samting ol i mekim na wanem as na ol i stap laip.

Olsem wanem long yu? Yu bin tingting strong long as na yu stap long graun? Orait, skelim sampela samting em ol man i save wok strong long kisim na bai yu ken save ol dispela samting i mekim na ol i amamas long gutpela wok ol i bin mekim o nogat? Wanem samting i mekim na laip inap i gat as tru bilong en?

Mani na Amamas​—I Gat Wok Bilong En

Long Saveman 7:​12, Baibel i tok: “Gutpela tingting i olsem mani, na i save helpim yumi long taim nogut. Tasol gutpela tingting na save i winim mani, na i helpim yumi moa yet na yumi stap gut olgeta.” Em nau, mani i gat wok bilong en. Yu mas i gat mani bilong lukautim yu, na moa yet sapos yu gat famili bilong lukautim.​—1 Timoti 5:8.

Yumi save kisim amamas long ol samting yumi baim, laka? Jisas Krais, em man i bin kamapim lotu Kristen, em i tok em i no gat ples bilong slip, tasol sampela taim em i save amamas long kisim ol gutpela kaikai na gutpela wain. Na tu, em i bin pasim klos i gat bikpela pe long en.​—Matyu 8:20; Jon 2:​1-​11; 19:​23, 24.

Tasol as na Jisas i stap i no bilong kisim amamas, nogat. Em i putim ol samting i bikpela samting i stap namba wan. Jisas i tok: “Maski yu yet yu gat planti samting moa, tasol yu no inap kisim laip long ol dispela samting bilong yu.” Em i mekim tok piksa long wanpela maniman em gaden bilong em i karim planti kaikai na em i tingting olsem: “Bai mi mekim wanem nau? Mi no gat haus inap long bungim olgeta kaikai bilong mi. . . . Bai mi brukim olgeta haus kaikai bilong mi, na wokim ol bikpela bikpela haus. Na bai mi bungim olgeta wit na olgeta gutpela samting bilong mi long ol dispela haus. Na bai mi tok long mi yet olsem. Man, mi win tru ya. Mi gat planti gutpela samting i stap inap long planti yia. Orait nau mi ken i stap malolo. Bai mi sindaun na mekim bikpela kaikai oltaim na amamas i stap.” Wanem samting i no stret long tingting bilong dispela man? Tok piksa i go moa olsem: “God i tokim em [maniman] olsem, ‘Yu longlong man tru. Nau long dispela nait tasol bai yu dai. Na olgeta dispela samting yu bin redim i stap, em husat bai i kisim?’ ” Maski dispela man i bungim bungim ol kaikai bilong em, taim em i dai em i no inap kisim amamas long ol samting em i bin bungim. Bilong pinisim tok, Jisas i givim dispela tok bilong skulim ol man i harim tok bilong em: “Dispela kain samting bai i kamap long ol man i hipim hipim planti samting bilong ol yet, tasol ol i stap rabis long ai bilong God.”​—Luk 12:​13-​21.

Em nau, yumi mas i gat mani, na i stret yumi mekim sampela samting bilong kisim sampela amamas. Tasol mani na amamas i no nambawan samting tru long laip bilong yumi. Bilong i stap gutpela man long ai bilong God, yumi mas bihainim ol pasin em God i laikim, dispela em i bikpela samting tru yumi mas wok long kisim.

Yu Ting Em i Bikpela Samting Long Kisim Biknem?

Planti man i laik mekim ol samting bilong kisim biknem bilong ol man i ken tingim ol. Laik bilong kisim biknem, olsem laik long ol man i ken tingim ol, dispela i no samting nogut. Baibel i tok: “Gutpela nem i winim gutpela wel, na de man i dai em i winim de mama i karim em.”​—Saveman 7:​1, NW.

Yumi ken tok, i olsem taim man i dai, olgeta samting em i mekim long laip bilong em ol i bin raitim pinis long wanpela buk. Sapos em i bin mekim ol gutpela wok samting, orait de em i dai i winim de mama i karim em, long wanem, de mama i karim em, i olsem ol i no raitim yet wanpela tok long dispela buk.

Man bilong raitim Buk Saveman em King Solomon. Bikpela brata bilong Solomon em Apsalom, em i laik kisim nem em ol man i ken tingim. Tasol tripela pikinini man bilong Apsalom em ol inap kisim nem bilong em na bihain givim long ol pikinini bilong ol i kamap bihain, ol i dai taim ol i yangpela yet. Olsem na Apsalom i mekim wanem? Baibel i tok: “Apsalom i . . . kisim wanpela bikpela longpela ston na sanapim long Ples Daun Bilong King, bilong makim nem bilong em yet. Na em i bin tok olsem, ‘Mi no gat pikinini man bilong senisim mi na mekim ol Israel i tingim mi.’ Olsem na Apsalom i givim nem bilong em yet long dispela ston.” (2 Samuel 14:27; 18:18) Ol i no bin painim sampela hap bilong dispela ston. Tasol long tingting bilong ol sumatin bilong Baibel, Apsalom i gat nem olsem wanpela bikhetman husat i bin wokim rot bilong kilim papa bilong em, Devit, na kisim wok king bilong em.

Planti man long nau i laik bai ol man i tingim ol long ol wok samting ol i bin mekim. Ol i laik kisim biknem long ai bilong ol man em tingting bilong ol i save senis senis long olgeta taim. Tasol olsem wanem long dispela kain biknem? Long buk The Culture of Narcissism, Christopher Lasch i tok: “Long taim bilong yumi, ol man i ting yu gat nem sapos yu yangpela na yu luk nais na ol man i laikim yu, na wok yu mekim i nupela samting na i no gat wanpela i bin mekim bipo. Tasol kain nem olsem i no save stap longpela taim. Na ol man em ol i kisim kain nem olsem, ol i save wari oltaim long ol man bai i lusim tingting long biknem bilong ol.” Em as na planti man i gat nem long wokim musik na muvi samting ol i save kisim drak na alkohol, na planti taim ol i dai taim ol i yangpela yet. Tru tumas, wok bilong kisim biknem i no inap helpim tru man.

Orait, yumi mas wok strong long kisim gutnem long ai bilong husat? Long rot bilong profet Aisaia, Jehova i tok long ol man i bihainim Lo bilong em, olsem: “Bai mi putim wanpela mak i gat nem bilong ol i stap long en insait long haus bilong mi. Na oltaim ol manmeri bai i lukim na tingim ol. . . . Bai mi no inap larim nem bilong ol i pinis.” (Aisaia 56:​4, 5) Ol man i bihainim tok bilong God na em i orait long ol bai ol i gat “wanpela mak i gat nem bilong ol.” God bai tingim nem bilong ol oltaim na em i “no inap larim nem bilong ol i pinis.” Em dispela kain nem Baibel i kirapim yumi long kisim​—gutnem long ai bilong Jehova, Man Bilong Wokim yumi.

Aisaia i tok profet long wanpela taim bai kamap we ol gutpela man bai kisim laip oltaim long Paradais long graun. “Laip i stap gut oltaim oltaim” long Paradais “em i laip tru”​—em dispela kain laip God i tingting pinis long givim long ol man taim em i bin wokim ol. (1 Timoti 6:​12, 19) Yumi mas wok strong long kisim dispela laip bilong i stap oltaim oltaim, na yumi no ken painim kain sindaun em i bilong sotpela taim tasol na i no gat amamas tru long en.

Penim Piksa o Helpim Ol Man​—Dispela Tasol i No Inap

Planti atis i gat laik long mekim wok bilong ol i kamap gutpela moa na inapim mak em ol yet i tingim em i nambawan olgeta. Long nau laip bilong yumi i sotpela tumas na yumi no inap mekim olsem. Taim Hideo i gat 90 krismas samting, em man yumi stori long en long stori i kamap paslain long dispela, em i wok strong long kisim ol nupela nupela save bilong wok atis. Maski sapos wanpela atis i inapim pinis mak bilong wok i nambawan olgeta na em i amamas long wok bilong em, long dispela taim em i no inap mekim planti wok olsem em inap mekim taim em i bin i stap yangpela yet. Tasol olsem wanem sapos em i stap laip oltaim oltaim. Tingim ol samting em inap mekim na bai wok bilong em i ken kamap nambawan olgeta!

Olsem wanem long wok bilong helpim ol man? Em i gutpela samting tru long man i helpim ol man i stap rabis na em i yusim mani samting bilong em long helpim ol man i sot long ol samting. Baibel i tok: “Amamas bilong man i givim samting long ol arapela man, dispela i winim amamas bilong man i kisim samting bilong em yet.” (Aposel 20:35) Taim man i tingim i stap bilong ol narapela na helpim ol, em i mekim gutpela wok na em i amamas long dispela. Tasol maski wanpela man i mekim kain wok long laip olgeta bilong em, yu ting em inap helpim hamas man? Yumi man i no inap helpim olgeta man i karim pen na hevi. Maski hamas mani samting yumi givim dispela i no inap helpim ol long wanpela samting em ol i mas kisim, em samting planti man i no save tingim na ol i sot long en. Em wanem samting?

Inapim Dispela Laik Bilong Lotuim God

Long Bikpela Tok Long Maunten, Jisas i tok long dispela samting em ol man i mas inapim taim em i tok: “Ol manmeri i save, ol i stap rabis tru long ol samting bilong God, em ol i ken amamas. Ol dispela manmeri bai i kisim ol gutpela samting bilong kingdom bilong heven.” (Matyu 5:3) Olsem na Baibel i tok, planti mani samting, biknem, wok atis, na helpim ol man, ol dispela samting i no inap mekim man i stap amamas tru, nogat. Bilong i stap belgut tru na amamas yumi mas inapim dispela laik​—em laik bilong lotuim God.

Aposel Pol i kirapim ol man em ol i no save long Man Bilong Wokim yumi long painim God. Pol i tok: “Long wanpela tumbuna tasol em i bin mekim olgeta lain manmeri i kamap. Na em i putim ol i stap long olgeta hap bilong graun. Em yet i bin makim taim bilong ol i ken i stap, na em i bin putim mak bilong graun bilong ol. God i laik bai ol manmeri i ken kam long em na save tru long em, olsem na em i putim ol i stap, bai ol i ken wok long painim em. Tasol em i no i stap longwe long yumi olgeta wan wan. ‘Yumi save kisim laip long em na em wanpela tasol i givim strong long yumi na yumi save wokabaut.’ ”​—Aposel 17:​26-​28.

Yumi mas inapim dispela laik bilong lotu long God tru, dispela em i rot bilong i stap amamas tru. Taim yumi inapim dispela laik bilong kisim save long God, dispela i helpim yumi tu long kisim laip “em i laip tru.” Tingim Teresa, em nambawan ekta long wanpela televisen program i save kamap wanpela taim long olgeta wik. Em i namba wan blakskin meri ekta bilong Amerika bilong mekim olsem. Tasol i no longtaim na em i lusim dispela wok. Bilong wanem em i mekim olsem? Em i tok: “Mi bilip olsem pasin bilong bihainim Tok Bilong God em i nambawan gutpela rot long bihainim.” Teresa i no laik bagarapim pasin bilong em long pas gut wantaim God, olsem na em i no laik insait long dispela program bilong televisen i save litimapim pasin sem na pasin pait. Em i lusim dispela wok na ol man i no tingim em moa. Tasol em i insait long wanpela wok we laip bilong em i gat as tru bilong en, em i autim gutnius bilong Kingdom Bilong God fultaim, na em i laik helpim ol narapela long pas gut wantaim God.

Wanpela wanwok bilong em bipo i tok long disisen bilong Teresa long lusim dispela wok, olsem: “Mi bel hevi tru, long wanem, mi nolaik lukim em i tromoi nating dispela gutpela wok. Tasol i luk olsem em i bin painim samting i bikpela samting moa na i gutpela tru.” Bihain Teresa i dai. Bihain long indai bilong em, dispela wanwok bilong em bipo i tok: “Em i bin stap amamas, na dispela em i bikpela samting tru. Hamas bilong yumi inap mekim wankain tok olsem?” Ol man husat i putim pasin bilong pas gut wantaim God i stap namba wan long laip bilong ol, tasol ol i dai, i gat gutpela samting tru i wetim ol, em kirap bek long taim Kingdom i bosim graun.​—Jon 5:​28, 29.

Man Bilong Wokim olgeta samting em i tingting pinis long samting em bai mekim long dispela graun na long ol man i stap long en. Em i laik bai yu kliagut long dispela samting em i tingting pinis long mekim na amamas long laip oltaim long Paradais long graun. (Song 37:​10, 11, 29) Nau em i taim bilong kisim sampela save moa long Jehova, em Man Bilong Wokim heven na graun, na long samting em i tingting pinis long yu bai mekim. Ol Witnes Bilong Jehova long hap bilong yu bai amamas long helpim yu long kisim dispela save. Yu ken toktok wantaim ol o raitim pas i go long lain bilong wokim dispela nius.

[Piksa long pes 5]

Long tok piksa bilong Jisas, wanem samting i no stret long tingting bilong dispela maniman?

[Piksa long pes 7]

Olsem wanem? Yu laik i stap amamas oltaim oltaim long Paradais long graun?