Yu Save Givim Nupela Strong Long Ol Narapela?
MAUNTEN Hermon i stap long hap saut bilong ol maunten Anti-Lebanon, na het bilong en i go antap tru inap 2,814 mita antap long mak bilong solwara. Klostu long yia olgeta, ais i save karamapim het bilong maunten na dispela i mekim na win bilong nait i save ran antap long het bilong maunten i mekim ais i tanim i kamap wara na i pundaun olsem wara bilong nait. Wara bilong nait i save pundaun antap long ol diwai na long ol diwai prut i stap long arere bilong maunten na long ol gaden wain i stap long ples daun. Long Israel bilong bipo, long taim bilong bikpela san, dispela wara bilong nait i save wetim ol gras na diwai samting.
Long song em spirit bilong God i bin kamapim, pasin wanbel namel long ol lain i lotuim Jehova i kain olsem “wara bilong nait i pundaun long maunten Hermon na long ol maunten bilong Saion.” (Song 133:1, 3) Olsem maunten Hermon i save givim wara bilong nait long ol gras na diwai samting, yumi ken givim nupela strong long ol man em yumi bungim ol. Yumi inap mekim olsem wanem?
Pasin Bilong Jisas Long Givim Nupela Strong
Pasin bilong Jisas Krais i mekim bikpela samting long ol narapela. Maski ol i stap sotpela taim tasol wantaim em, ol i kisim strong. Olsem: Mak, em man bilong raitim Gutnius, em i tok: “[Jisas] i holim ol pikinini long han bilong en, na i putim han antap long ol, na em i askim God long mekim gut long ol.” (Mak 10:16) Man! Dispela i mas givim nupela strong long ol dispela yangpela, a?
Long laspela nait bilong em olsem man long graun, Jisas i wasim lek bilong ol disaipel bilong em. Ating ol i mas pilim tru pasin daun bilong em. Bihain Jisas i tokim ol: “Mi soim pasin long yupela, na yupela tu i mas mekim wankain pasin olsem nau mi mekim long yupela.” (Jon 13:1-17) Yes, ol tu i mas mekim pasin daun. Ol aposel i no kisimgut tok Jisas i mekim na bihain long dispela nait yet ol i kirap tok pait long husat i stap nambawan, tasol Jisas i no kros long ol. Long gutpela pasin em i toktok wantaim ol na em i no les kwik long ol. (Luk 22:24-27) Na tu, “ol [man] i bin tok nogut long em, tasol em i no bekim tok nogut bilong ol.” Tru “em i karim pen, tasol em i no tok long bagarapim ol. Nogat. Em i putim em yet long han bilong God, em dispela Jas i save skelim stret olgeta samting.” I gutpela yumi bihainim pasin bilong Jisas long strongim narapela.—1 Pita 2:21, 23.
Jisas i tok: “Yupela kisim save long mi na aninit long tok bilong mi, olsem yupela i kisim plang ol i save putim long nek bilong ol bulmakau bilong ol i ken pulim ol samting. Yupela kisim save long mi, long wanem, mi save mekim pasin isi long ol man na mi save daunim mi yet. Na bai ol samting i no ken givim hevi long yupela na bai yupela i kisim malolo.” (Matyu 11:29) Piksaim long tingting olsem Jisas yet i bin mekim dispela tok long yu. Taim ol i harim ol tok Jisas i skulim ol man long en long haus lotu, ol wanples bilong em i kirap nogut na i tok: “Dispela man em i kisim dispela save we? Na olsem wanem em inap wokim ol mirakel?” (Matyu 13:54) Taim yumi ritim stori long laip na wok bilong Jisas dispela inap skulim yumi long pasin bilong givim nupela strong long ol narapela. Orait nau yumi ken skelim olsem wanem Jisas i stap gutpela piksa tru long pasin bilong mekim ol tok i strongim ol man na oltaim tingting long helpim ol.
Oltaim Mekim Tok i Strongim Narapela
Em isi tru long brukim wanpela haus, tasol bilong wokim wanpela nupela haus em i hatwok tru. Pasin bilong brukim na wokim nupela haus i wankain long pasin bilong yumi long toktok. Yumi olgeta manmeri i gat sin na yumi gat pasin kranki. King Solomon i tok: “I no gat wanpela stretpela man i save mekim gutpela pasin oltaim. Nogat. Sampela taim em tu i mekim sin.” (Saveman 7:20) I no hatwok long luksave long ol pasin kranki bilong narapela na mekim ol tok bilong bagarapim na daunim em. (Song 64:2-4) Tasol bilong mekim tok i strongim man, yumi mas skelim na tingim gut tok yumi laik mekim.
Jisas i mekim wok long maus bilong em bilong strongim ol man. Em i mekim ol tok i givim nupela strong long ol long pas gut wantaim God taim em i autim gutnius bilong Kingdom long ol. (Luk 8:1) Jisas i givim nupela strong tu long ol manmeri i kamap disaipel bilong em taim em i kamapim klia Papa bilong em long heven long ol. (Matyu 11:25-27) Olsem na ol manmeri i amamas tru long go long Jisas!
Tasol ol saveman bilong lo na ol Farisi ol i no olsem, ol i no save tingim ol samting ol narapela i mas kisim. “Ol i save laik long kisim ol namba wan sia long ol bikpela kaikai, na ol namba wan ples bilong sindaun long ol haus lotu.” (Matyu 23:6) Na ol i lukim ol man nating i olsem ol pipia lain, na ol i tok: “Ol dispela lain manmeri ol i no save long lo. God i tok pinis long ol bai i bagarap.” (Jon 7:49) Tru tumas, pasin bilong ol i no givim nupela strong long ol man!
Planti taim toktok bilong yumi i save kamapim klia yumi wanem kain man na yumi gat wanem tingting long narapela. Jisas i tok: “Gutpela man i gat planti gutpela tingting i stap long bel bilong en. Olsem na em i save mekim gutpela pasin. Man nogut em i gat planti tingting nogut i stap long bel bilong en. Olsem na em i save mekim pasin nogut. Kain tingting i pulap long bel, em maus i save autim.” (Luk 6:45) Orait, yumi inap mekim wanem na bai toktok bilong yumi i givim nupela strong long ol narapela?
Wanpela samting yumi inap mekim, em yumi mas tingting gut pastaim na bihain yumi toktok. Sindaun 15:28 i tok: “Stretpela man i save tingting gut pastaim, na bihain em i bekim tok long arapela man.” Yumi no gat wok long lusim bikpela hap taim long tingim tingim ol tok yumi laik mekim. Tasol taim yumi tingting gut pastaim, yumi inap save olsem tok yumi laik mekim inap givim nupela strong long narapela o nogat. Yumi ken askim yumi yet olsem: ‘Tok nau mi laik mekim i kamapim pasin laikim? Em i tok tru, o em i wanpela tok win tasol? Em i “gutpela taim” long mi mekim dispela tok? Em bai givim nupela strong long ol man mi toktok wantaim ol?’ (Sindaun 15:23) Sapos yumi save olsem tok yumi laik mekim i no inap strongim narapela o i no gutpela taim long mekim, orait yumi mas tingting strong long no ken mekim. Tasol yumi inap mekim ol gutpela tok i strongim ol man na i stret long mekim. Taim man i no tingting gut na mekim tok, tok bilong em i olsem “bainat i sutim [narapela],” tasol taim man i mekim gutpela tok, orait tok bilong em i olsem “gutpela marasin.”—Sindaun 12:18.
Narapela samting bilong helpim yumi em long tingim ol samting i mekim na ol wanbilip bilong yumi i gutpela samting long ai bilong God. Jisas i tok: “Papa i bin salim mi na mi kam. Na i no gat wanpela man inap i kam long mi long laik bilong em yet. Nogat. Papa i mas kirapim tingting bilong en na bringim em i kam long mi.” (Jon 6:44) Jehova i save lukim ol gutpela pasin bilong olgeta wan wan wokman bilong em—maski em ol man yumi lukim olsem i hatwok long save long pasin bilong ol. Taim yumi wok strong long save long ol gutpela pasin bilong ol, i gat as na yumi inap mekim gutpela tok long pasin bilong ol.
Helpim Ol Narapela
Jisas i save gut long hevi bilong ol man em narapela i daunim ol. Taim ‘em i lukim ol bikpela lain manmeri, em i sori tru long ol, long wanem, tingting bilong ol i paul nabaut, na ol i stap nogut tru, olsem ol sipsip i no gat wasman.’ (Matyu 9:36) Tasol Jisas i lukim ol i stap tarangu man tru na sori long ol, na em i mekim samting bilong helpim ol. Em i singautim ol: “Yupela ol man i save hatwok tru na i karim ol bikpela hevi, yupela olgeta kam long mi na bai mi givim malolo long yupela.” Na tu, em i mekim gutpela tok olsem: “Dispela plang mi putim long nek bilong yupela, em i isi long karim, na samting mi givim yupela bilong karim, em i no hevi.”—Matyu 11:28, 30.
Long nau, yumi stap long “taim bilong planti hevi nogut tru.” (2 Timoti 3:1) Planti man i “tingting planti long ol samting bilong graun” na dispela i givim bikpela hevi long ol. (Matyu 13:22) Ol samting long sindaun bilong sampela i putim hevi long ol yet. (1 Tesalonaika 5:14) Long wanem ol rot yumi ken givim nupela strong long ol man em yumi mas helpim ol? Olsem Krais i bin mekim, yumi ken mekim sampela samting bilong helpim ol na hevi i no ken daunim ol.
Sampela manmeri i painim rot long pinisim bel hevi bilong ol taim ol i toktok wantaim narapela long hevi bilong ol. Sapos wanpela i gat hevi i kam long yumi long kisim helpim. Olsem wanem? Yumi save lusim hap taim bilong putim yau long tok bilong em? Bilong kamap man bilong pilim hevi bilong narapela na putim gut yau, yumi mas bosim gut yumi yet. Em i makim olsem yumi mas putim gut yau long samting man i toktok long en, na no ken tingting long wanem tok bai yu bekim o rot bilong stretim hevi. Taim yumi putim gut yau, lukluk long em taim em i toktok, na smail long taim i stret long mekim, yumi soim em olsem yumi tingim tru em.
Insait long kongrigesen Kristen, planti rot i op bilong strongim ol wanbilip bilong yumi. Olsem: Taim yumi go long ol miting long Haus Kingdom, yumi ken painim ol man husat i hatwok long karim hevi bilong sik. Sampela taim yumi ken lusim liklik hap taim paslain o bihain long miting bilong mekim sampela tok bilong strongim ol. Na tu, yumi ken tingim ol man husat i no kam long Buk Stadi Bilong Kongrigesen em yumi save go long en. Ating yumi ken ringim ol na tokim ol olsem yumi tingim ol long ol samting i kamap long ol na yumi laik helpim ol.—Filipai 2:4.
Ol elda Kristen i save mekim planti wok insait long kongrigesen. Yumi ken mekim planti samting bilong helpim ol na ol i no ken pilim hevi tumas; wok gut wantaim ol na long pasin daun bihainim tok bilong ol na mekim wok ol i givim yumi long mekim. Baibel i tokim yumi olsem: “Ol lida bilong yupela ol i laik helpim yupela, na ol i save was long yupela oltaim. Na bihain bai ol i mas tokim God long olgeta wok ol i bin mekim. Olsem na yupela i mas bihainim tok bilong ol na i stap aninit long ol. Sapos yupela i mekim olsem, orait ol bai i amamas na mekim wok bilong ol, na ol bai i no inap bel hevi. Sapos ol i bel hevi long lukautim yupela, dispela bai i no helpim yupela.” (Hibru 13:17) Taim yumi kamapim olsem yumi amamas long mekim olsem, yumi inap givim nupela strong long ol dispela man “i mekim gutpela wok.”—1 Timoti 5:17.
Oltaim Mekim Tok i Strongim na Helpim Narapela
Wara bilong nait i save givim nupela strong long ol samting em i kam long planti tausen liklik liklik wara i wok long pundaun isi isi. Olsem tasol, bilong givim nupela strong long ol narapela i no olsem yumi mekim wanpela bikpela wok i gat nem, nogat. Isi isi ol i kisim nupela strong taim yumi wok long kamapim ol gutpela pasin bilong Krais long olgeta de.
Aposel Pol i tok: “Yupela i mas givim bel bilong yupela long ol arapela manmeri bilong God, na laikim ol tru olsem ol brata bilong yupela stret. Yupela i mas strong long litimapim nem bilong ol arapela tasol.” (Rom 12:10) Yumi mas bihainim dispela tok bilong Pol. Long toktok na pasin bilong yumi, yumi laik wok yet long givim nupela strong long ol narapela.
[Ol Piksa long pes 16]
Wara bilong nait bilong maunten Hermon—em i save givim wara long ol bus na diwai samting
[Piksa long pes 17]
Man i pilim hevi bilong narapela na putim gut yau, em i save givim nupela strong long narapela