“Kam Long Mi na Bai Mi Givim Malolo Long Yupela”
Ol Yangpela Em Ol i Olsem Wara Bilong Nait i Givim Nupela Strong
YUMI save Jisas Krais i toktok long ol yangpela disaipel tu taim em i mekim dispela tok: “Kam long mi na bai mi givim malolo long yupela.” (Matyu 11:28) Taim ol manmeri i kirap bringim ol pikinini bilong ol i kam long em, ol disaipel bilong em i laik pasim ol. Tasol Jisas i tok: “Yupela larim ol pikinini i kam long mi. Yupela i no ken pasim ol.” Na tu, Jisas i “holim ol pikinini long han bilong en . . . na em i askim God long mekim gut long ol.” (Mak 10:14-16) Jisas i tingim ol yangpela olsem ol i samting i gutpela tru.
Baibel i stori long ol yangpela man na meri em ol i stap gut long God, na ol liklik pikinini tu, em ol i stap olsem gutpela piksa tru long mekim wok bilong God. Buk Song i tok profet long ol yangpela man ol i olsem wara bilong nait i givim nupela strong. Em i tok tu long “ol yangpela man na ol yangpela meri” ol i litimapim nem bilong Jehova.—Song 110:3, NW; 148:12, 13.
Wanpela Ples Bilong Ol Yangpela i Ken Kamap Strong
Tok piksa Baibel i mekim long wara bilong nait i stret, long wanem, wara bilong nait i makim ol planti blesing. (Stat 27:28) Wara bilong nait i save kam daun isi isi na i givim nupela strong long ol samting. Nau long dispela taim bilong Krais i kam i stap pinis, bikpela lain yangpela Kristen ol i givim ol yet bilong mekim wok bilong God na ol i amamas long mekim. Olsem wara bilong nait i save givim nupela strong long ol samting, planti yangpela man na meri i amamas long mekim wok bilong Jehova na helpim ol wanlotu bilong ol.—Song 71:17.
Ol yangpela Kristen i no givim nupela strong long ol narapela tasol, nogat; ol yet tu i save kisim nupela strong long wok ol i mekim. Oganaisesen bilong God em i wanpela gutpela ples we ol i ken kamap strong long en. Ol yangpela man na meri i save bihainim ol stretpela pasin, olsem na ol i pas gut wantaim God. (Song 119:9) Insait long kongrigesen, ol i insait tu long mekim ol gutpela wok na ol i gat ol gutpela pren—em ol samting i mekim na i stap bilong ol i gat as bilong en na ol i amamas long laip bilong ol.
‘Samting Bilong Oraitim na Givim Nupela Strong’
Olsem wanem? Ol yangpela Kristen yet i pilim olsem ol i olsem ‘wara bilong nait’? Tingim Tania, em wanpela yangpela meri i save insait long ol wok bilong kongrigesen na em i amamas long autim tok inap 70 aua samting long mun. Em i pilim olsem wanem? Em i tok: “Mi pilim olsem mi kisim nupela strong na bel bilong mi i stap gut. Long laip bilong mi, Jehova na oganaisesen bilong em long graun i bin i stap olsem ‘samting bilong oraitim na givim nupela strong’ long mi.”—Sindaun 3:8.
Ariel, em narapela yangpela i insait long fultaim sevis, em i amamas long ol gutpela samting bilong spirit em i save kisim insait long kongrigesen. Em i tok: “Taim mi go long ol miting Kristen, ol kibung distrik, na kibung sekit, mi inap kisim kaikai long tebol spirit bilong Jehova, na dispela i givim nupela strong long mi long ol samting bilong spirit. Na taim mi tingim olsem mi gat ol wanwok i stap long olgeta hap bilong graun, dispela i save strongim mi.” Em i stori long nambawan as bilong dispela nupela strong em i kisim, na em i tok: “Jehova i stap olsem pren bilong mi na dispela i givim nupela strong long mi, na moa yet taim mi harim o lukim ol samting nogut em pasin bilong dispela graun i mekim long ol man.”—Jems 2:23.
Abishai i gat 20 krismas, na em i autim tok fultaim na mekim wok olsem kongrigesen sevent. Em i stori long i stap bilong em olsem: “Mi kisim nupela strong, long wanem, mi save long olsem wanem mi ken karim ol planti hevi i save painim ol yangpela long nau. Tok i tru bilong Baibel i helpim mi long putim tingting long ol samting mi mas mekim bilong givim bel olgeta long mekim wok bilong Jehova.”
Taim Antoine i gat 13 krismas samting em i gat pasin bilong belhat kwik. Wanpela taim em i paitim wanpela wanskul long sia, na em i sutim narapela long pensil. Antoine i no man bilong strongim narapela, a? Tasol ol tok bilong Baibel i bin senisim pasin bilong em. Nau em gat 19 krismas na em wanpela kongrigesen sevent na man bilong autim tok fultaim. Em i tok: “Mi tenkyu long Jehova i larim mi long kisim save long em na long helpim mi long save olsem mi mas wok long bosim skin na senisim pasin bilong mi. Long dispela rot, mi bin abrusim planti ol hevi.”
Ol narapela man i save lukim gutpela pasin bilong ol yangpela Kristen, olsem ol i save tingting long strongim ol narapela. Matteo em wanpela yangpela Witnes long Itali. Tisa bilong em i bin tok olsem ol pikinini i mekim tok doti insait long klas ol i mas givim liklik mani olsem strafe bilong dispela pasin. Bihain liklik, ol pikinini i askim tisa long pinisim dispela lo, long wanem, ol i tok, “ol i no inap tru long bihainim.” Matteo i tok, “Tasol tisa i tok dispela i no tru, na em i makim mi, mi wanpela Witnes Bilong Jehova, olsem gutpela piksa, na em i litimapim nem bilong mi long ai bilong klas, long wanem, mi save mekim klinpela tok.”
Long Tailan, tisa bilong wanpela klas em pasin bikhet bilong ol skulmangi i go bikpela tru, em i singautim Racha, em mangi i gat 11-pela krismas, long go sanap long ai bilong ol sumatin na tisa i mekim gutpela tok long pasin bilong em. Em i tok: “Bilong wanem yupela olgeta i no bihainim gutpela pasin bilong Racha? Em i save mekim gut stadi bilong em na mekim gutpela pasin.” Orait nau em i tokim ol sumatin: “Ating yupela i mas kamap Witnes Bilong Jehova, olsem Racha, bambai yupela i ken senisim pasin bilong yupela.”
Em gutpela samting tru long lukim planti tausen yangpela Kristen i kisim gut save long Jehova na ol i mekim laik bilong em. Ol kain gutpela yangpela olsem ol i save kamapim gutpela tingting olsem bilong ol manmeri i bikpela pinis. God inap helpim ol long mekim i stap bilong ol long nau i kamap gutpela, na tu, em bai givim ol gutpela samting tru long ol long nupela taim bihain. (1 Timoti 4:8) Planti yangpela em ol i sot long sampela samting na ol i no stap isi, ol i pulap tru long dispela graun i sot long ol samting bilong spirit, tasol ol yangpela Kristen ol i stap narapela kain tru, olsem gutpela wara bilong nait!