Ol Yangpela Em Ol i Laikim Tok i Tru

SAMPELA tausen yia i go pinis, wanpela Hibru, em man bilong raitim song, em i kamapim wanpela askim. Em i tok: “Olsem wanem na yangpela man i ken wokabaut long klinpela pasin?” (Song 119:⁠9) Dispela askim i stap yet olsem wanpela bikpela askim long nau, long wanem, planti hevi i painim ol yangpela manmeri long dispela graun. Long rot bilong pasin pamuk planti yangpela i kisim sik AIDS, na 50 pesen bilong ol yangpela i gat dispela sik nogut, ol i gat 15 i go inap 24 krismas. Na tu, pasin bilong kisim drak i save kamapim planti hevi, na i sotim laip bilong sampela yangpela. Ol musik nogut; piksa wokabaut bilong pait na pasin pamuk, ol piksa long TV, na ol video; na piksa nogut bilong pasin sem long Intenet i save givim tingting nogut long ol yangpela. Olsem na dispela askim em man bilong raitim song i kamapim, em i stap long tingting bilong planti papamama na ol yangpela long nau.

Long dispela askim, man bilong raitim song i bekim tok bilong em yet olsem: “Em i mas bihainim tok bilong yu na bai em i stap klin.” Tok Bilong God, em Baibel, i gat ol tok bilong helpim ol yangpela manmeri, na taim ol i bihainim, i stap bilong planti yangpela i kamap gutpela. (Song 119:105) Orait, nau yumi ken skelim tok bilong sampela yangpela em ol i laikim tumas God na ol i laik stap strong long ol samting bilong spirit namel long ol man bilong dispela graun em ol i tingting tasol long painim amamas na ol samting bilong skin.

Ol i Amamas Long Papamama i Stiaim Tingting Bilong Ol

Paslain long em i mekim wok long brens-ofis bilong ol Witnes Bilong Jehova long Meksiko, Jacob Emmanuel i bin mekim wok painia fultaim inap sampela yia. Em i tingim bek olsem wanem em i bin kisim pasin bilong laikim wok bilong God. Em i tok: “Tru, mi bin poromanim ol brata i strong long ol samting bilong spirit na ol i bin helpim mi gut, tasol nambawan bikpela samting i bin helpim mi em papamama bilong mi. Papamama bilong mi na ol brata spirit i kirapim mi long laikim tru wok bilong autim tok. Isi isi ol i stiaim mi long wokabaut long stretpela rot, mi no pilim olsem ol i subim mi.”

David, em i bin mekim fultaim sevis inap sampela yia pinis, em i tingim olsem wanem pasin bilong papamama bilong em i bin kirapim tru bel bilong em. Taim em na brata bilong em ol i liklik yet, papamama i kirap mekim wok painia salim. Na taim papa bilong em i dai, mama i mekim yet wok painia salim. Mama i bin lukautim ol, na em i autim tok tu. David i tok: “Ol i no subim mi long kamap painia, tasol mipela i kisim bikpela amamas long autim tok fultaim olsem wanpela famili, olsem na pasin bilong poroman gut wantaim i kirapim mi long mekim wankain wok.” Pasin bilong papamama long tingim gut ol pikinini na soim stretpela rot long ol em i bikpela samting, na David i tok long en olsem: “Long olgeta nait, mama bilong mi i ritim long mipela ol stori i stap long buk From Paradise Lost to Paradise Regained.a Pasin bilong em long kamapim ol dispela stori long mipela i helpim mipela long kisim dispela laik long kisim kaikai bilong spirit.”

Amamas Long Ol Miting

I hatwok long sampela yangpela long amamas long go long ol miting Kristen. Ol i go long ol miting, long wanem, papamama i kisim ol i go wantaim ol. Tasol sapos ol i wok yet long go long ol miting, i no longtaim na bai ol i laikim ol miting. Tingim Alfredo, em i bin kirap mekim fultaim sevis taim em i gat 11-pela krismas. Em i tokaut olsem taim em i gat 5-pela krismas, em i bin traim long abrusim ol miting, long wanem, ol miting i save mekim em i slip, tasol papamama bilong em i no larim em i slip long taim bilong miting. Em i tok: “Taim mi go bikpela, isi isi mi kisim pasin bilong amamas long ol miting, na moa yet long taim mi save long rit rait, long wanem, nau mi inap bekim tok long toktok bilong mi yet.”

Cintia, em i wanpela yangpela meri i gat 17 krismas na em i mekim wok painia oltaim, em i stori long olsem wanem pasin bilong poromanim ol gutpela poroman i bin helpim em long kisim pasin bilong laikim tru wok bilong God. Em i tok: “Pasin bilong poroman gut wantaim ol brata sista na pasin bilong go oltaim long ol miting i helpim mi na mi no pilim olsem mi lus long ol pren bilong mi bilong ausait na ol samting ol yangpela i save mekim, olsem go long ol haus disko. Taim mi harim ol tok na ekspiriens ol brata i kamapim long ol miting, dispela i save kirapim laik bilong mi long lotuim Jehova long olgeta samting bilong mi, na nambawan gutpela samting mi gat em mi stap yangpela yet. Olsem na mi pasim tok olsem, mi laik mekim wok bilong em.”

Tasol em i tokaut olsem: “Taim mi no kisim baptais yet, mi bin lusim sampela miting na i no hatwok long mekim olsem, mi givim eskius olsem mi gat ol homwok o samting bilong skul long mekim. Mi lusim sampela miting, na dispela i wok long bagarapim mi long ol samting bilong spirit. Mi kirap poroman wantaim wanpela mangi em i no stadi long Baibel. Mi tenkyu long Jehova, mi stretim dispela pasin long taim stret.”

Em i Pasim Tok Long Bel

Pablo em narapela yangpela i mekim wok bilong Jehova fultaim, na taim ol i askim em olsem em i ting wanem samting i bikpela samting bilong kisim pasin bilong laikim tok i tru bilong Baibel, em i tok: “Mi ting i gat tupela samting: mekim stadi bilong yu yet long olgeta taim na givim bel long mekim wok autim tok. Mi amamas long papamama bilong mi i bin skulim mi long tok i tru bilong Jehova, na mi pilim olsem dispela em i nambawan gutpela samting ol inap givim long mi. Tasol mi yet mi mas tingim wanem as na mi laikim tru Jehova. Bilong mekim olsem, mi mas save gut long tok i tru bilong Baibel, em i ‘bikpela tru na i daun moa.’ Long dispela rot tasol yumi inap laikim tumas tok bilong Jehova long Baibel, na dispela bai i mekim ‘paia i lait’ insait long bel bilong yumi na kirapim yumi long toktok wantaim ol narapela long en. Dispela pasin bilong givim bel long autim tok bai mekim amamas bilong yumi long tok i tru i stap strong yet.”​​—⁠Efesus 3:​18; Jeremaia 20:⁠9.

Jacob Emmanuel, em yumi stori long em pastaim, em i tingim tu olsem em bikpela samting long olgeta wan wan yet i makim olsem ol bai mekim wok bilong Jehova. Em i tok, papamama bilong em i no bin subim em long kisim baptais. “Mi bilip olsem dispela em nambawan gutpela rot long bihainim, long wanem, mi lukim ol gutpela samting i kamap long dispela. Olsem: Sampela yangpela em mi bin poromanim planti taim, ol i bin pasim tok long kisim baptais wantaim. Tru, em i orait long mekim olsem, tasol mi pilim olsem bel bilong sampela i kirap nating na ol i kisim baptais, olsem na i no longtaim na pasin bilong ol long givim bel long mekim wok bilong Kingdom i pinis. Papamama bilong mi i no bin subim mi long dediketim mi yet long Jehova. Mi yet mi pasim tok long bel long mekim olsem.”

Wok Bilong Kongrigesen

Sampela yangpela, ol yet i bin lainim tok i tru bilong Baibel, papamama i no helpim ol. Long kain taim olsem em i hatwok tru long lain long mekim ol samting i stret na holim strong.

Noé i tingim olsem wanem tok i tru i bin helpim gut em. Taim em i liklik yet, em i gat pasin bilong kros na pait. Taim em i gat 14 krismas, em i kirap stadi long Baibel na pasin bilong em i wok long senis, na papamama bilong em, em pastaim ol i no laik kisim save long Baibel, ol i amamas tru. Taim Noé i wok long kamap strong long ol samting bilong spirit, em i laik givim laip bilong em yet long mekim wok bilong God. Nau em i mekim wok autim tok fultaim.

Na i wankain long Alejandro, em i kirap laikim tok i tru bilong ol Kristen taim em i liklik mangi, maski papamama i no gat laik long kisim save long tok i tru. Em i kamapim amamas bilong em long tok i tru, na em i tok: “Mi kamap bikpela insait long famili Katolik. Tasol isi isi mi wok long bilip strong olsem i no gat God, long wanem, lotu i no bekim ol askim mi bin tingting planti long en taim mi liklik mangi yet. Oganaisesen bilong Jehova i helpim mi long kisim save long God. Dispela i lukautim mi, long wanem, sapos mi no bin stadi long Baibel, ating mi insait long pasin pamuk, dring longlong, o kisim drak. Na ating mi inap insait long ol lain i daunim gavman, na bihain mi kisim bikpela hevi long en.”

Olsem wanem wanpela yangpela inap strong long painim tok i tru na pas long en, maski papamama i no helpim em? Ol elda na ol narapela insait long kongrigesen i stap olsem bikpela samting bilong helpim yu. Noé i tok: “Mi no bin pilim liklik olsem mi stap wanpis, long wanem, long olgeta taim Jehova i bin stap klostu long mi. Na tu, mi kisim helpim long planti brata sista em ol i kamap olsem papa, mama, na brata spirit bilong mi.” Nau Noé i wok long Betel, na em i yusim taim bilong em long mekim wok bilong God. Alejandro tu i tok: “Samting mi save amamas tru long en, em mi stap insait long wanpela kongrigesen i gat ol elda i soim mi olsem ol i laikim mi. Mi amamas moa long dispela samting, long wanem, taim mi gat 16 krismas na mi kirap stadi long Baibel, ol hevi i save painim ol yangpela i laik painim mi tu. Ol famili insait long kongrigesen i no lusim mi. Long olgeta taim i gat wanpela i kisim mi na lukautim mi long haus bilong em na givim kaikai long mi, na laikim mi tru.” Alejandro i mekim wok fultaim winim 13 yia pinis.

Sampela manmeri i ting olsem lotu em i samting bilong ol manmeri i lapun pinis. Tasol planti yangpela i kisim save long tok i tru bilong Baibel long taim ol i liklik yet na ol i laikim tru Jehova na ol i stap gut long em. Tok bilong Devit i stap long Song 110:3 i stret long ol dispela yangpela, em i tok: “Taim yu laik pait long ol birua ol manmeri bilong yu bai i go wantaim yu na helpim yu, na bai yupela i go antap long maunten bilong God. Olgeta nait, wara i save kamap long gras, na gras i kisim nupela strong. Na bai yu tu yu kisim strong long olgeta de.”

Em i hatwok long ol yangpela long kisim save long tok i tru na pas long en. Tasol yumi amamas long save olsem planti i stap klostu long oganaisesen bilong Jehova, na ol i go olgeta taim long ol miting, na ol i stadi gut long Baibel. Taim ol i mekim olsem, dispela i bin helpim ol long kisim pasin bilong laikim Tok Bilong God na wok bilong em!​​—⁠Song 119:​15, 16.

[Futnot]