Go Klostu Long God
Wanpela Wasman i Save Tingim Yu
‘GOD i save tingim mi?’ Sapos yu bin mekim dispela askim, i no yu tasol i mekim. Planti bilong yumi i bin bungim kain kain hevi na hatwok, na sampela taim yumi tingting: Man Bilong Wokim dispela traipela ples antap na graun em i save tingim yumi o nogat? Yumi laik save, God Jehova i save tingim yumi olgeta wan wan man na meri o olsem wanem? Jisas i save gut tru long Jehova, na taim em i stap long graun em i mekim tok piksa i kamapim klia bekim bilong dispela askim, na dispela i mekim gut bel bilong yumi.
Jisas i mekim tok piksa long wok bilong ol wasman i save lukautim ol sipsip na em i tok: “Sapos wanpela man i gat 100 sipsip, na sapos wanpela sipsip i lus, ating bai em i no wok long painim, a? Nogat. Bai em i lusim ol 99 sipsip i stap long maunten, na bai em i go painim dispela wanpela sipsip i lus. . . . Em i save amamas long ol 99 sipsip i no bin lus, tasol taim em i kisim bek dispela wanpela sipsip i bin lus, amamas bilong en bai i moa moa yet. Olsem tasol Papa bilong yupela i stap long heven em i no laik bai wanpela bilong ol dispela liklik pikinini i lus.” (Matyu 18:12-14) Orait nau yumi ken tingim dispela tok piksa bilong pasin sori bilong Jehova, em i tingim olgeta wan wan i save lotuim Em.
Wasman i save em i gat wok long lukautim gut olgeta wan wan sipsip bilong em. Sapos wanpela sipsip i paul na lusim ol arapela, wasman bai save wanem sipsip i lus. Em i bin givim nem long ol sipsip na em i save long nem bilong olgeta wan wan. (Jon 10:3) Em i no gat malolo inap long taim em i painim pinis sipsip i lus na em i kisim i kam bek long lain sipsip. Taim em i go painim dispela sipsip, ol narapela 99 sipsip i no inap kisim bagarap—ol bai stap gut. Planti taim ol wasman i save stap wantaim na ol i larim ol sipsip bilong ol i bung wantaim.a Olsem na dispela wasman i bin go painim sipsip i lus, em inap lusim ol arapela sipsip bilong em long han bilong ol dispela wasman inap liklik haptaim. Taim em i painim pinis sipsip na i lukim sipsip i no bin kisim bagarap, em i amamas tru. Em bai holim sipsip na putim long sol bilong em na karim i go bek long lain sipsip na bai em i ken i stap gut.—Luk 15:5, 6.
Bilong kamapim klia dispela tok piksa, Jisas i tok God i no laik bai “wanpela bilong ol dispela liklik pikinini i lus.” Paslain long dispela, Jisas i bin tokim ol disaipel long ol i mas lukaut, nogut ol i pundaunim “wanpela bilong ol dispela liklik pikinini i bilip long [em].” (Matyu 18:6) Orait dispela tok piksa bilong Jisas i skulim yumi olsem wanem long Jehova? Em i wanpela Wasman i save tingim tru olgeta wan wan sipsip bilong em wantaim dispela “ol liklik pikinini”—em ol man i olsem man nating tasol long ai bilong ol lain bilong dispela graun. Tru tumas, long ai bilong God olgeta wan wan man na meri i lotuim em ol i samting tru na em i laikim tumas ol.
Sapos yu laik bilip tru olsem God i save tingim yu, yu ken kisim sampela save moa long Bikpela Wasman, God Jehova, na olsem wanem yu ken i go klostu moa long em. Sapos yu mekim olsem, bai yu inap bilip strong olsem aposel Pita, ating em i bin harim long yau bilong em yet dispela tok piksa bilong Jisas long sipsip i lus. Bihain Pita i raitim tok olsem: “God i save wari long yupela. Olsem na olgeta hevi yupela i karim, yupela i mas putim long han bilong en.”—1 Pita 5:7.
[Futnot]
a Wok bilong tilim ol sipsip i go long narapela narapela lain i no gat hatwok, long wanem, olgeta wan wan sipsip i save long nek bilong wasman bilong ol yet.—Jon 10:4.