Jisas Krais—Em Nambawan Misineri
“Mi bin i stap wantaim em, na em i salim mi na mi kam.”—JO. 7:29.
1, 2. Misineri em wanem samting? Husat i nambawan Misineri?
TAIM yu harim dispela tok “misineri,” yu tingim wanem samting? Sampela i tingim ol misineri bilong Kristendom, em planti bilong ol i save insait long wok politik na wok mani bilong kantri we ol i save mekim wok misineri. Tasol ating yumi ol Witnes Bilong Jehova i tingim ol misineri em Gavening Bodi i bin salim i go bilong autim gutnius long ol narapela narapela kantri. (Mt. 24:14) Ol dispela misineri i save lusim bikpela hap taim na strong bilong ol long helpim ol man long i go klostu long God Jehova na pas gut wantaim em.—Jem. 4:8.
2 Dispela tok “misineri” i no stap long Buk Baibel. Tasol long Efesus 4:11, tok Grik ol i tanim olsem “[man] bilong autim gutnius” inap makim tu “misineri.” Jehova em i nambawan Man Bilong Autim Gutnius, tasol yumi no ken tok em i nambawan Misineri, long wanem, misineri em wanpela man em narapela i bin salim i go long wanpela hap, tasol i no gat wanpela man i bin salim Jehova. Tasol Jisas Krais i mekim dispela tok long Papa bilong em long heven: “Mi bin i stap wantaim em, na em i salim mi na mi kam.” (Jo. 7:29) Jehova i laikim tumas olgeta manmeri, olsem na em i salim Pikinini bilong em i kam long graun. (Jo. 3:16) Yumi ken tok Jisas em i nambawan gutpela Misineri, winim ol narapela misineri, long wanem, wanpela as na God i salim em i kam long graun em bilong “autim tok tru.” (Jo. 18:37) Em i mekim gut tru wok bilong autim gutnius bilong Kingdom, na dispela wok bilong em i save helpim yumi. Long wok bilong yumi long autim tok, yumi inap bihainim wok tisa bilong Jisas, maski yumi misineri o nogat.
3. Bai yumi stori long wanem ol askim?
3 Jisas em man bilong autim tok bilong Kingdom na yumi laik save: Wanem samting i painim Jisas taim em i mekim wok bilong em hia long graun? Wanem samting i mekim na pasin bilong em long skulim ol man i gutpela tru? Wanem samting i kirapim ol man long harim tok bilong em?
Amamas Long Mekim Wok Long Nupela Hap
4-6. Wanem sampela senis i painim Jisas hia long graun?
4 Ol misineri bilong nau na sampela Kristen husat i go sindaun long ol hap we i no gat planti man bilong autim tok bilong Kingdom, ating sindaun bilong ol i no gutpela olsem sindaun ol i bin lusim. Tasol sindaun bilong Jisas long graun em i narapela kain olgeta long sindaun em i bin lusim long heven we em i bin stap wantaim Papa bilong em na ol gutpela ensel i mekim wok bilong Jehova. (Jop 38:7) Long graun Jisas i stap namel long ol sinman na ol man i bihainim pasin nogut! (Mk. 7:20-23) Na tu, em i mas karim hevi i stap namel long ol gutpela disaipel bilong em taim narapela i jeles long narapela. (Lu. 20:46; 22:24) Tasol maski wanem wanem samting i bungim em hia long graun, em i save bihainim stretpela pasin tasol.
5 Jisas i no kirap nating na stat long mekim toktok long tok ples bilong man, nogat; em samting em i mas lain long mekim taim em i liklik. Dispela em wanpela bikpela senis tru! Long heven em i bin givim tok long ol ensel long ol samting ol i mas mekim! Long graun, Jisas i mekim wok long wanpela “tok ples bilong man.” Dispela tok ples i narapela kain olgeta long “tok bilong ol ensel.” (1 Ko. 13:1) Tasol long pasin bilong autim ol gutpela tok i swit long yau bilong man, i no gat narapela man olsem Jisas i bin mekim kain tok olsem.—Lu. 4:22.
6 Tingim sampela bikpela senis moa i painim Pikinini Bilong God taim em i kam long graun. Tru, Jisas i no kisim sin long Adam, tasol Em i kamap man, wankain tru olsem ol man em bihain ol i kamap “brata” bilong em, o disaipel God i makim ol long holi spirit. (Ritim Hibru 2:17, 18.) Long nait paslain long em i dai, Jisas i no askim Papa long heven long salim ol “ensel” i kam helpim em. Tasol tingim, taim em i stap Nambawan Ensel Maikel long heven, em i bin bosim planti ensel! (Mt. 26:53; Ju. 9) Tru, Jisas i bin wokim ol mirakel, tasol ol samting em i mekim hia long graun em i liklik tasol taim yumi skelim ol samting em inap mekim sapos em i bin i stap long heven.
7. Ol Juda i bihainim Lo o olsem wanem?
7 Taim Jisas i no kamap man yet long graun na em i stap olsem “Tok,” ating em i Mausman bilong God i bin lukautim ol Israel taim ol i stap long ples drai nating. (Jo. 1:1; Kis. 23:20-23) Tasol ol Israel i bin “kisim lo bilong God long han bilong ol ensel, tasol [ol i no bin] bihainim.” (Ap. 7:53; Hi. 2:2, 3) Ol hetman bilong lotu Juda long taim bilong ol aposel ol i no luksave long as tru na ol i bin kisim Lo. Tingim lo bilong Sabat. (Ritim Mak 3:4-6.) Ol saveman bilong lo na ol Farisi ol i “lusim pinis olgeta bikpela hap tok bilong lo, olsem tok bilong stretpela pasin bilong skelim man na pasin bilong marimari na pasin bilong bilip.” (Mt. 23:23) Tasol Jisas i no givap na ting em i no inap helpim ol na lusim wok bilong autim tok tru, nogat.
8. Bilong wanem Jisas inap helpim yumi?
8 Jisas i amamas long mekim wok. Em i laikim tru ol manmeri na em i gat bikpela laik long helpim ol. I no gat wanpela taim em i no gat laik bilong autim gutnius. Jisas i stap gut long Jehova taim em i stap long graun, olsem na em i “kamap Man bilong helpim na kisim bek olgeta manmeri i bihainim tok bilong em, bai ol i stap gut oltaim oltaim.” Na narapela samting i olsem: “Ol traim i bin kamap long em na em yet i bin karim pen. Olsem na em inap long helpim ol manmeri [olsem yumi] long taim ol traim i kamap.”—Hi. 2:18; 5:8, 9.
Em i Skul Long Mekim Wok Tisa
9, 10. Paslain long Jisas i kam long graun, em i kisim wanem kain skul?
9 Paslain long Gavening Bodi i salim ol Kristen long nau i go mekim wok misineri, ol i stretim rot bilong ol i skul. Olsem wanem? Jisas Krais i bin skul? Yes, tasol paslain long em i kamap Mesaia, em i no go long skul bilong ol rabai o kamap sumatin bilong ol bikpela hetman bilong lotu, nogat. (Jo. 7:15; skelim Aposel 22:3.) Orait, wanem samting i mekim na Jisas inap tru long mekim wok tisa?
10 Tru, ating em i bin kisim skul long mama bilong em, Maria, na waspapa bilong em, Josep, tasol bikpela skul em i kisim bilong mekim wok autim tok, em i kisim long nambawan bikpela Tisa, Jehova yet. Jisas i stori long dispela olsem: “Mi no mekim tok long tingting bilong mi yet. Nogat. Papa i bin salim mi na mi kam, em yet i tokim mi long olgeta tok mi mas mekim na autim.” (Jo. 12:49) Lukim, Papa yet i tokim Pikinini long ol tok em i mas autim. Paslain long Jisas i kam long graun, yumi ken ting olsem em i lusim bikpela hap taim long putim yau long ol tok Papa i skulim em long en. I no gat narapela skul inap winim dispela, a?
11. Jisas i gat wanem tingting long ol manmeri wankain olsem Papa bilong em?
11 Kirap long taim God i wokim em, Pikinini i bin pas gut wantaim Papa bilong em. Taim em i no kamap man yet long graun, Jisas inap luksave long tingting bilong God long ol manmeri long rot bilong lukim ol samting Jehova i mekim long ol. God i laikim tumas ol manmeri, na Pikinini tu i laikim tumas ol, na em i tok: “Mi bin amamas long lukim . . . ol manmeri.”—Snd. 8:22, 30-31.
12, 13. (a) Taim Jisas i lukim ol samting Papa i mekim long ol Israel, em i skul long wanem samting? (b) Jisas i mekim wanem long dispela skul em i kisim?
12 Pikinini i kisim skul tu taim em i lukim ol samting Papa i mekim taim hevi i kamap. Tingim samting Jehova i mekim long ol bikhet Israel. Nehemia 9:28 i tok: “Taim ol i gat gutpela sindaun, ol i mekim sin gen, na yu [God] bin larim ol birua i winim ol na bosim ol. Na long dispela taim tu ol i tanim bel na ol i askim yu long helpim ol. Na yu stap long heven na harim singaut bilong ol. Planti taim ol i bin mekim dispela kain pasin nogut, tasol yu marimari long ol na olgeta taim yu bin kisim bek ol long han bilong ol birua.” Jisas i wok wantaim Jehova na lukim ol samting em i mekim, na long dispela rot em inap soim wankain pasin sori long ol manmeri em i autim tok long ol.—Jo. 5:19.
13 Jisas i bihainim skul em i kisim na em i mekim pasin sori long ol disaipel bilong em. Long nait paslain long em i dai, olgeta aposel em i laikim tumas ol, ol “i lusim Jisas na ol i ranawe.” (Mt. 26:56; Jo. 13:1) Inap 3-pela taim aposel Pita i tok em i no save long Krais! Tasol Jisas i larim rot i op i stap long ol aposel i ken kam bek long em. Em i tokim Pita: “Mi beten pinis bilong helpim yu, bai bilip bilong yu i no ken pundaun. Na taim yu tanim na yu kam bek, orait yu mas strongim ol brata bilong yu.” (Lu. 22:32) Ol “aposel wantaim ol profet” ol i namba wan lain bilong lain Israel tru bilong God; ol ston bilong strongim banis bilong Nupela Jerusalem i gat nem bilong ol 12-pela gutpela aposel bilong Pikinini Sipsip, Jisas Krais, long en. I kam inap long nau, ol Kristen God i bin makim, wantaim ol poroman bilong ol i dediket pinis, em “ol arapela sipsip,” ol i stap olsem wanpela oganaisesen bilong autim tok bilong Kingdom aninit long strongpela han bilong God na wok bos bilong Pikinini bilong em.—Ef. 2:20; Jo. 10:16; KTH 21:14.
Pasin Jisas i Bihainim Long Skulim Man
14, 15. Olsem wanem pasin bilong Jisas long skulim ol man em i narapela kain long pasin bilong ol saveman bilong lo na ol Farisi?
14 Taim Jisas i skulim ol disaipel bilong em, olsem wanem em i bihainim skul em i bin kisim? Taim yumi skelim pasin bilong Jisas long skulim ol man wantaim pasin bilong ol hetman bilong lotu Juda, yumi lukim klia olsem pasin bilong Jisas long skulim ol man em i win tru. Ol saveman bilong lo na ol Farisi ol i “save daunim tok bilong God na litimapim pasin [ol] i bin kisim long ol tumbuna.” Tasol ol tok Jisas i mekim, em i no mekim long tingting bilong em yet, nogat; em i save skulim ol man long tok bilong God tasol. (Mt. 15:6; Jo. 14:10) Em samting yumi tu i mas mekim.
15 I gat narapela samting tu i mekim na Jisas i narapela kain olgeta long ol hetman bilong lotu. Em i tok long ol saveman bilong lo na ol Farisi olsem: “Olgeta tok ol i givim long yupela, em yupela i mas harim na bihainim. Tasol pasin ol i save mekim, em yupela i no ken bihainim. Nogat. Ol i save mekim planti tok, tasol ol yet ol i no save bihainim.” (Mt. 23:3) Jisas i bihainim ol tok em yet i autim. Orait nau yumi ken stori long wanpela samting i kamapim klia dispela samting.
16. Olsem wanem yu inap tok, Jisas i bihainim ol tok bilong em long Matyu 6:19-21?
16 Jisas i tokim ol disaipel long ol i mas “bungim ol gutpela samting . . . long heven.” (Ritim Matyu 6:19-21.) Yu ting Jisas yet i bihainim dispela tok? Yes, em inap tok olsem: “Ol weldok i gat hul long graun, na ol pisin i gat haus bilong ol. Tasol Pikinini Bilong Man em i no gat ples bilong slip.” (Lu. 9:58) Jisas i no holim planti samting bilong skin. Nambawan tingting bilong em i bilong autim gutnius bilong Kingdom, na bel bilong em i stap isi na em i no tingting planti, long wanem, em i no wok long bungim ol samting hia long graun. Jisas i tok i gutpela moa sapos man i bungim ol samting long heven, we “ol binatang na ros i no save bagarapim ol samting, na ol stilman i no save brukim banis na stilim.” Olsem wanem? Yu wok long bihainim dispela tok bilong Jisas long bungim ol samting long heven?
Ol Pasin Bilong Jisas i Kirapim Ol Man Long Kam Long Em
17. Wanem ol pasin i mekim na Jisas i mekim gut tru wok bilong autim gutnius?
17 Wanem ol pasin i mekim na Jisas i mekim gut tru wok bilong autim gutnius? Wanpela samting, em tingting em i holim long ol man em i helpim. Sampela gutpela pasin bilong Jehova em Jisas i kamapim em pasin daun, pasin laikim, na pasin sori. Tingim olsem wanem ol dispela pasin i pulim planti man i kam long Jisas.
18. Olsem wanem yumi ken tok Jisas i gat pasin daun?
18 Jisas i orait long kam daun long graun. Em i “daunim em yet na em i kamap olsem wanpela wokboi. Na em i kamap olsem man.” (Fl. 2:7) Em pasin daun em i mekim. Na taim Jisas i tingim ol man, em i no ting ol i man nating tasol. Em i no gat dispela tingting, ‘Mi bin lusim heven na i kam, olsem na yu mas harim tok bilong mi.’ Ol man i makim ol yet olsem mesaia ol i save tokaut olsem ol i dispela man God i makim, tasol Jisas i no olsem—em i no tokaut long namba em i holim olsem Mesaia, nogat. Sampela taim em i tambuim ol man long ol i no ken tokaut long em i husat tru na long ol samting em i bin mekim. (Mt. 12:15-21) Jisas i laik bai ol manmeri i ken lukim ol samting em i bin mekim na long dispela as mekim disisen bilong bihainim em. Ol disaipel inap amamas olsem Bikman bilong ol i no tok ol i mas stap olsem ol gutpela ensel em i bin bung wantaim ol bipo long heven!
19, 20. Olsem wanem pasin laikim na pasin sori i kirapim Jisas long helpim ol manmeri?
19 Na tu, Jisas Krais i soim pasin laikim—em wanpela bikpela pasin bilong Papa bilong em long heven. (1 Jo. 4:8) Pasin laikim i kirapim Jisas long skulim ol man. Tingim tingting bilong em long wanpela yangpela man i gat namba. (Ritim Mak 10:17-22.) Jisas “i laikim em tumas” na i laik helpim em, tasol dispela man i gat namba i no lusim ol planti samting bilong em bambai em inap kamap disaipel bilong Krais.
20 Narapela gutpela pasin bilong Jisas em pasin sori bilong em. Wankain olsem ol narapela sinman, ol man i harim na bihainim tok bilong Jisas ol i gat hevi i daunim ol. Jisas i save long dispela, olsem na taim em i skulim ol, em i mekim long pasin sori. Olsem: Wanpela taim, Jisas na ol aposel bilong em ol i bisi stret na ol i no gat taim bilong kaikai. Tasol Jisas i gat wanem tingting taim em i lukim bikpela lain manmeri i bung i stap? “Em i sori tru long ol, long wanem, ol i olsem ol sipsip i no gat wasman. Na em i stat long givim planti tok long ol.” (Mk. 6:34) Jisas i lukim olsem ol i stap tarangu na em i lusim taim na strong bilong em long skulim ol na wokim ol mirakel bilong helpim ol. Ol gutpela pasin bilong em, na ol gutpela tok em i autim, dispela i pulim sampela na ol i kamap disaipel bilong em.
21. Bai yumi stori long wanem samting long stadi i kamap bihain long dispela?
21 I gat planti samting moa bilong wok bilong Jisas hia long graun em yumi inap kisim save long en, olsem stadi i kam bihain long dispela bai stori long en. Wanem sampela pasin moa bilong Jisas Krais, em nambawan Misineri, em yumi ken bihainim?
Bai Yu Bekim Olsem Wanem?
• Paslain long Jisas i kam daun long graun, em i kisim wanem skul?
• Olsem wanem pasin bilong Jisas long skulim ol man i winim pasin bilong ol saveman bilong lo na ol Farisi?
• Wanem ol pasin bilong Jisas i kirapim ol man long kam long em?
[Piksa long pes 15]
Jisas i bihainim wanem pasin long skulim ol manmeri?