Bihainim Pasin Bilong Nambawan Misineri
“Bihainim pasin bilong mi na wokabaut, olsem mi tu mi save bihainim pasin bilong Krais na wokabaut.”—1 KO. 11:1.
1. I gat wanem as na yumi mas bihainim pasin bilong Jisas Krais?
APOSEL POL i bihainim pasin bilong nambawan Misineri, em Jisas Krais. Pol i tokim ol brata Kristen: “Bihainim pasin bilong mi na wokabaut, olsem mi tu mi save bihainim pasin bilong Krais na wokabaut.” (1 Ko. 11:1) Taim Jisas i wasim pinis lek bilong ol aposel bilong skulim ol long pasin daun, em i tokim ol: “Mi soim pasin long yupela, na yupela tu i mas mekim wankain pasin olsem nau mi mekim long yupela.” (Jo. 13:12-15) Yumi ol Kristen long nau i gat wok long bihainim pasin bilong Jisas Krais long ol tok na wok na pasin yumi mekim.—1 Pi. 2:21.
2. Maski Gavening Bodi i no bin makim yu olsem misineri, yu ken bihainim wanem kain pasin?
2 Long stadi i kamap paslain long dispela, yumi kisim save olsem misineri em wanpela man em narapela i salim i go bilong autim gutnius. Pol i kamapim sampela gutpela askim long dispela samting. (Ritim Rom 10:11-15.) Pol i tok: “Sapos i no gat wanpela i autim tok long ol, olsem wanem bai ol i harim?” Orait nau em i kolim tok profet bilong Aisaia: “Ol manmeri i amamas tru long lukim man i kam bilong bringim gutnius.” (Ais. 52:7) Maski Gavening Bodi i no bin salim yu i go long narapela kantri bilong mekim wok misineri, yu ken bihainim pasin bilong Jisas na givim bel long autim gutnius. Long yia i go pinis, 6,957,852 pablisa bilong Kingdom i bin “mekim wok bilong autim gutnius” long 236 kantri.—2 Ti. 4:5.
“Mipela i Bin Lusim Olgeta Samting na Bihainim Yu”
3, 4. Jisas i bin lusim wanem samting long heven? Bilong kamap disaipel bilong em, yumi mas mekim wanem?
3 Bilong inapim wok God i makim em long mekim hia long graun, Jisas i lusim gutpela laip bilong em long heven na “kamap olsem wokboi nating.” (Fl. 2:7) Maski wanem wanem samting yumi mekim bilong bihainim pasin bilong Krais, dispela em i liklik taim yumi skelim wantaim ol samting Jisas i mekim taim em i kam long graun. Tasol yumi ol disaipel bilong em inap sanap strong na yumi no tingting bek na bel hevi long ol samting bipo yumi bin holim long dispela graun bilong Satan.—1 Jo. 5:19.
4 Wanpela taim, aposel Pita i tokim Jisas: “Lukim. Mipela i bin lusim olgeta samting na bihainim yu.” (Mt. 19:27) Taim Jisas i singautim Pita, Andru, Jems, na Jon long bihainim em, kwiktaim ol i lusim ol umben bilong ol. Ol i lusim wok mani bilong kisim pis, na nau wok bilong autim tok i kamap namba wan wok bilong ol. Long Gutnius Luk i Raitim, Pita i tok: “Harim. Mipela i lusim pinis ples wantaim ol samting bilong mipela, na mipela i bihainim yu.” (Lu. 18:28) Tru, bilong bihainim Krais, i no olsem yumi bin lusim olgeta “samting” bilong yumi, nogat. Tasol bilong kamap disaipel bilong Krais na gutpela wokman bilong Jehova, yumi olgeta i bin ‘daunim laik bilong yumi.’ (Mt. 16:24) Dispela i bin kamapim planti gutpela blesing. (Ritim Matyu 19:29.) Pasin bilong givim bel long autim gutnius olsem Krais i bin mekim, dispela i save mekim yumi belgut tru, na moa yet sapos yumi bin insait long wok bilong helpim narapela long go klostu long God na Pikinini bilong em.
5. Kamapim wanpela ekspiriens i soim samting em man i stap long narapela kantri inap mekim taim em i kirap lainim tok i tru bilong Baibel.
5 Valmir, wanpela man bilong Brasil i stap long kantri Surinam, em i gat bisnis bilong em yet long painim gol. Em i man bilong dring na mekim pasin pamuk. Wanpela taim em i kam long biktaun na wanpela Witnes Bilong Jehova i kirap stadi wantaim em long Baibel. Em i stadi long olgeta de, na senisim planti pasin bilong em, na i no longtaim na em i kisim baptais. Taim em i luksave olsem bisnis bilong em i pasim em long bihainim ol tok bilong Baibel, em i salim dispela gutpela bisinis na i go bek long Brasil bilong helpim famili bilong em long painim tok i tru. Planti man, taim ol i kirap lainim tok i tru bilong Baibel, ol i redi long lusim ol wok long ol kantri i gat planti mani na ol i go bek long kantri bilong ol bilong helpim ol wanblut na ol narapela long go klostu long God. Ol dispela pablisa bilong Kingdom i gat pasin bilong givim bel long autim gutnius.
6. Sapos yumi no inap go sindaun long hap i sot long ol man bilong autim tok bilong Kingdom, yumi ken mekim wanem?
6 Planti Witnes i bin go sindaun long ol hap i sot long ol man bilong autim tok bilong Kingdom. Na sampela i bin go mekim wok long ol narapela kantri. Ating yumi yet i no inap mekim olsem, tasol sapos oltaim yumi wok strong long mekim wok autim tok, orait yumi bihainim pasin bilong Jisas.
Jehova i Skulim Yumi
7. I gat wanem ol skul bilong helpim ol brata na sista husat i laik bai pasin bilong ol long autim tok bilong Kingdom i ken kamap gutpela moa?
7 Wankain olsem Jisas i bin kisim skul long Papa bilong em, yumi tu inap kisim skul long Jehova. Jisas yet i tok: “Tok i stap long buk bilong ol profet olsem, ‘God bai i skulim olgeta manmeri.’ ” (Jo. 6:45; Ais. 54:13) Long nau, i gat ol skul bilong lainim yumi long mekim wok autim tok bilong Kingdom. Yumi olgeta i bin kisim gutpela helpim long Skul Tiokratik Bilong Autim Tok long ol kongrigesen bilong yumi. Ol painia i save go long Skul Bilong Wok Painia. Sampela painia i bin mekim wok painia inap planti yia ol i bin go tupela taim long dispela skul. Ol elda na kongrigesen sevan ol i bin go long Skul Bilong Wok Kingdom bilong helpim ol long kamap gutpela tisa moa, na bilong mekim gut moa wok bilong helpim ol wanbilip. Planti elda na kongrigesen sevan em ol i singel ol i bin go long Ministerial Trening Skul bilong lain long helpim ol narapela long mekim wok autim tok. Na planti bratasista i bin go long ol narapela kantri olsem misineri, ol i bin kisim skul long Wastaua Baibel Skul Bilong Gileat.
8. Sampela brata i bin mekim wanem na bai ol inap kisim skul i kam long Jehova?
8 Planti Witnes Bilong Jehova i bin mekim sampela senis na bai ol inap go long ol dispela skul. Bilong go long Ministerial Trening Skul long Kanada, Yugu i lusim wok bilong em, long wanem, bos i no orait long em i kisim malolo. Yugu i tok: “Mi no bel hevi long dispela. Sapos ol i bin givim malolo long mi, ating bihain ol inap ting olsem mi mas stap gut long kampani na stap olgeta taim long en na no ken lusim. Tasol nau mi stap fri long kisim wanem wanem asainmen Jehova i givim long mi.” Bilong kisim skul God i save givim, planti Witnes i bin amamas long lusim ol samting em pastaim ol i bin tingim i bikpela samting long ol.—Lu. 5:28.
9. Stori long wanpela ekspiriens i soim olsem pasin bilong kisim skul long Baibel wantaim pasin bilong wok strong, dispela inap kamapim gutpela samting.
9 Skul em Baibel i as bilong en na pasin bilong wok strong, tupela wantaim inap kamapim gutpela samting. (2 Ti. 3:16, 17) Tingim samting i bin kamap long Saulo long Guatemala. Taim mama i karim em, tingting bilong em i no wok gut, na wanpela tisa bilong Saulo i tokim mama bilong Saulo olsem em i no ken subim Saulo long rit, long wanem, dispela bai mekim em i kros na bel hevi. Taim Saulo i pinis long skul, em i no save long rit. Tasol wanpela Witnes i mekim wok long buklet Wok Strong Long Lain Long Rit na Rait na lainim Saulo long rit. Pasin bilong em long rit i wok long kamap gutpela na em inap long mekim ol tok long Skul Tiokratik Bilong Autim Tok. Bihain, taim mama bilong Saulo i autim tok long ol haus, em i bungim dispela tisa. Taim tisa i kisim save olsem Saulo i lain pinis long rit, em i askim Mama long bringim Saulo i kam lukim em long wik bihain. Taim Saulo i kamap long haus bilong tisa long wik bihain, tisa i askim Saulo, “Bai yu skulim mi long wanem samting?” Saulo i stat long ritim wanpela paragraf long buk Tru Tru Baibel i Tok Wanem? Tisa i tok: “Man! Mi kirap nogut tru olsem nau yu yet i skulim mi.” Aiwara i pundaun na em i holimpas Saulo.
Skul i Kirapim Bel
10. Wanem gutpela tul inap helpim yumi long skulim ol man long tok i tru bilong Baibel?
10 Ol tok Jisas i skulim ol man long en, em ol tok em i bin kisim long Jehova na Baibel. (Lu. 4:16-21; Jo. 8:28) Yumi bihainim pasin bilong Jisas taim yumi bihainim ol tok bilong em na ol tok i stap long Baibel. Olsem na yumi olgeta i wanbel long ol toktok yumi mekim na yumi gat wankain tingting, na dispela i mekim na yumi stap wanlain tru. (1 Ko. 1:10) Yumi tenkyu tru olsem lain “wokboi i gat gutpela tingting” ol i save wokim ol buk na nius em Baibel i as bilong en bilong helpim yumi long stap wanlain tru long wok tisa bilong yumi, na wok bilong yumi long autim gutnius! (Mt. 24:45; 28:19, 20) Wanpela buk olsem em buk Baibel i Tok, em yumi inap kisim long 179 tok ples.
11. Olsem wanem wanpela sista long Itiopia i daunim pasin birua long rot bilong buk Baibel i Tok?
11 Pasin bilong stadi long Baibel long rot bilong buk Baibel i Tok inap senisim tingting na bel bilong ol birua tu. Wanpela taim, Lula, wanpela painia sista long Itiopia, em i mekim Baibel stadi na wanpela wanblut bilong sumatin em i kam na tok kros long ol i no ken mekim kain stadi olsem. Long pasin isi Lula i toktok wantaim wanblut na kamapim tok piksa bilong giaman mani i stap long sapta 15 bilong buk Baibel i Tok. Wanblut i stap isi na larim ol i kirap gen long stadi. Long neks stadi, em tu i stap na em i tok em yet i laik stadi na i redi long givim mani bilong baim dispela stadi! I no longtaim na em i kirap stadi 3-pela taim long olgeta wik na em i kamap strong long tok i tru.
12. Stori long wanpela ekspiriens bilong soim olsem wanem ol yangpela i ken lainim gut ol narapela long ol tok i tru bilong Baibel.
12 Ol yangpela inap helpim ol narapela long rot bilong yusim buk Baibel i Tok. Long Hawaii, Keanu i gat 11-pela krismas em i ritim dispela buk long skul, na wanpela klasmeit i askim em, “Bilong wanem yupela i no save selebretim ol bikpela de?” Keanu i opim buk long apendiks, long het tok “Yumi Mas Amamasim Ol Bikpela De o Nogat?” na ritim bekim bilong dispela askim. Bihain em i opim buk long lista bilong ol tok i stap insait long buk na askim klasmeit long wanem tok em i gat laik long save long en. Keanu i kirapim Baibel stadi. Long sevis yia i go pinis, ol Witnes Bilong Jehova i mekim 6,561,426 Baibel stadi, em planti bilong ol i mekim wok long buk Baibel i Tok. Olsem wanem? Yu save yusim dispela tul long ol Baibel stadi?
13. Olsem wanem pasin bilong stadi long Baibel inap stiaim man?
13 Pasin bilong stadi long Baibel long rot bilong buk Baibel i Tok i gat bikpela strong na inap stiaim ol man i laik bihainim laik bilong God. Tupela painia salim long Nowe ol i kirapim Baibel stadi wantaim tupela marit bilong Sambia. Dispela tupela marit i gat 3-pela pikinini meri na ol i no laik kamapim narapela pikinini gen. Olsem na taim meri i kisim bel, ol i pasim tok long rausim bel. Sampela de paslain long ol i go lukim dokta, ol i stadi long sapta i gat het tok “Tingting Bilong God Long Laip.” Long dispela sapta i gat piksa bilong bebi i stap yet long bel, na taim ol i lukim, ol i pilim tru, na nau ol i no laik rausim bel. Ol i wok long kamap strong long ol samting bilong spirit na ol i givim nem bilong brata i stadi wantaim ol long nupela pikinini man bilong ol.
14. Stori long olsem wanem pasin bilong bihainim ol tok yumi skulim ol man long en inap kamapim gutpela samting.
14 Wanpela bikpela samting long pasin bilong Jisas long skulim ol man, em pasin bilong em long bihainim ol tok em i skulim ol man long en. Planti manmeri i pilim tru gutpela pasin bilong ol Witnes Bilong Jehova, em ol i bihainim Jisas long dispela samting. Long Nu Silan, ol i brukim ka bilong wanpela bisnisman na stilim bek bilong em. Bisnisman i toksave long plisman, na plisman i tok: “Yu inap kisim bek dispela bek bilong yu sapos wanpela Witnes Bilong Jehova i painim.” Wanpela Witnes i raun tilim ol niuspepa em i painim dispela bek. Polis i tokim bisnisman olsem wanpela meri i painim pinis bek bilong em, olsem na em i go long haus bilong em. Em i amamas tru long lukim olsem insait long bek, wanpela pepa i bikpela samting long em i stap yet. Witnes i tokim em, “I stret mi givim bek dispela bek long yu, long wanem, mi wanpela Witnes Bilong Jehova.” Bisnisman i kirap nogut tru, long wanem, em i tingim tok plisman i bin mekim nau tasol long dispela moning. Tru tumas, ol Kristen tru i save bihainim ol tok bilong Baibel na pasin bilong Jisas.—Hi. 13:18.
Bihainim Pasin Jisas i Mekim Long Ol Narapela
15, 16. Yumi ken mekim wanem bilong kirapim ol man long harim ol tok yumi autim?
15 Pasin Jisas i mekim long ol manmeri i kirapim ol long harim tok bilong em. Pasin laikim na pasin daun bilong em i kirapim ol man nating long kam long em. Em i mekim pasin sori long ol man i kam long em, na gutpela tok em i kamapim i mekim gut bel bilong ol, na em i oraitim sik bilong planti manmeri. (Ritim Mak 2:1-5.) Yumi no inap wokim ol mirakel, tasol yumi inap kamapim pasin laikim, pasin daun, na pasin sori—em ol pasin i save kirapim ol man long kam long tok i tru.
16 Pasin sori i bin helpim wanpela lapun man, nem bilong em Beere, taim wanpela painia salim, Tariua, i go long haus bilong em long wanpela liklik ailan bilong Kiribati long Saut Pasifik. Lapun ya i no gat laik long harim tok, tasol Tariua i lukim olsem hap bodi bilong em i paralais na em i sori long em. Tariua i askim em: “Yu save long samting God i bin tok promis long en bilong helpim ol sikman na ol lapun?” Orait nau em i ritim wanpela hap bilong tok profet bilong Aisaia. (Ritim Aisaia 35:5, 6.) Man i kirap nogut tru na i tok, “Inap planti yia pinis mi bin ritim Baibel, na tu wanpela misineri bilong misin bilong mi i save kam lukim mi, tasol mi no bin lukim dispela tok long Baibel.” Painia i kirapim Baibel stadi wantaim Beere, na Beere i kisim save long tok i tru. Maski hap bodi bilong em i bagarap, nau em i baptais pinis, na i save lukautim wanpela liklik grup, na em inap wokabaut long olgeta hap bilong ailan na autim gutnius.
Bihainim Yet Pasin Bilong Krais
17, 18. (a) Olsem wanem yu inap mekim gut wok bilong autim gutnius? (b) Wanem samting bai painim ol bratasista em ol i tingim tru wok bilong ol long autim tok?
17 Ol gutpela ekspiriens ol bratasista i kisim long wok autim tok i soim olsem yumi inap mekim gut wok bilong autim gutnius sapos yumi kisim na mekim ol pasin em Jisas i bin kamapim. Olsem na i stret yumi bihainim pasin bilong Krais na givim bel long wok bilong autim gutnius!
18 Taim sampela i kamap disaipel bilong Jisas, Pita i askim Jisas: “Bai mipela i kisim wanem samting?” Jisas i tok: “Olgeta manmeri i bin ting long nem bilong mi na i lusim haus o brata o susa o papa o mama o pikinini o gaden, bai ol i kisim 100 moa, na bai ol i kisim laip i stap gut oltaim oltaim.” (Mt. 19:27-29) Dispela samting bai painim yumi tu sapos yumi wok yet long bihainim nambawan Misineri, Jisas Krais.
Bai Yu Bekim Olsem Wanem?
• Olsem wanem Jehova i skulim yumi long mekim wok bilong autim gutnius?
• Olsem wanem na buk Baibel i Tok i helpim gut wok autim tok bilong yumi?
• Olsem wanem yumi ken bihainim Jisas long pasin em i mekim long ol manmeri?
[Piksa long pes 17]
Taim Jisas i singautim Pita, Andru, Jems, na Jon long bihainim em, wantu ol i kirap bihainim em
[Piksa long pes 19]
Ol buk olsem “Baibel i Tok” i helpim yumi long stap wanlain tru long mekim wok tisa