Tok Bilong Jehova i Gat Laip
Sampela Bikpela Tok Bilong Buk Mak
LONG ol fopela Gutnius, Gutnius Mak i Raitim em i sotpela. Jon Mak i raitim dispela buk 30 yia bihain long indai na kirap bek bilong Jisas. Dispela buk i stori long planti samting Jisas i bin mekim taim em i mekim wok autim tok insait long 3 na hap yia.
Mak i raitim dispela stori bilong helpim ol man i no bilong lain Juda, em raitim bilong helpim moa yet ol Rom. Em i stori olsem Jisas em i Pikinini Bilong God na em man i bin wokim ol mirakel na i givim bel long autim tok. Em i stori planti long wok bilong Jisas; em i no stori planti long ol toktok Jisas i bin mekim bilong skulim ol manmeri. Taim yumi skelim tok bilong Gutnius Mak i Raitim dispela bai strongim bilip bilong yumi long Mesaia na em bai kirapim yumi long givim bel long autim tok bilong God taim yumi autim tok.—Hi. 4:12.
BIKPELA WOK AUTIM TOK LONG GALILI
Insait long 14 ves tasol Mak i stori long wok bilong Jon Bilong Baptais na 40 de we Jisas i bin stap long ples drai nating. Bihain long dispela, em i stori long wok autim tok bilong Jisas long Galili. Planti taim em i kolim tok olsem “wantu” olsem na stori bilong em i kirapim tru tingting bilong ol man.—Mk. 1:10, 12.
Jisas i pinisim wok bilong autim tok long Galili insait long 3-pela yia. Mak i stori long wanem samting i kamap pastaim na wanem samting i kamap bihain. Em i no stori long Bikpela Tok Long Maunten na em i no stori tu long ol narapela longpela tok bilong Jisas.
Bekim Bilong Ol Askim Bilong Baibel:
1:15—Dispela ‘taim God i makim i kamap pinis’ em wanem samting? Jisas i toktok long taim bilong em long kirapim wok bilong em long autim tok i kamap pinis. Em i stap olsem King God i makim, olsem na dispela i makim olsem Kingdom Bilong God i kam klostu pinis. Wok bilong Jisas long autim tok inap kirapim ol man i gat gutpela bel long mekim ol samting na bai God i ken orait long ol.
1:44; 3:12; 7:36—Bilong wanem Jisas i no laik bai ol man i tokaut long ol mirakel em i wokim? Jisas i no laik bai ol man i harim stori bilong ol narakain samting em i mekim o ol i paulim stori bilong ol mirakel em i bin wokim. Em i laik bai olgeta man wan wan i mas skelim ol samting em i mekim na ol i luksave olsem em i Krais na nau ol yet i ken wokim tingting olsem Jisas em i Krais o nogat. (Ais. 42:1-4; Mt. 8:4; 9:30; 12:15-21; 16:20; Lu. 5:14) I gat wanpela taim tasol we Jisas i orait long man i tokaut long mirakel em i wokim. Em man Gerasa, em bipo spirit nogut i stap long em. Jisas i tokim em long go long haus bilong em na stori long ol wanblut bilong em long samting i bin kamap. Ol manmeri bilong dispela ples i bin tokim Jisas long lusim ples bilong ol na i go, olsem na em i no gat rot long autim tok long ol. Gutpela pasin Jisas i mekim bilong oraitim dispela man i gat spirit nogut, dispela bai pasim tok kros bilong ol man long ol pik bilong ol i bin kisim bagarap.—Mk. 5:1-20; Lu. 8:26-39.
2:28—Bilong wanem dispela ves i tok Jisas em i “bosim de Sabat”? Aposel Pol i tok: “Long lo bilong Moses yumi save lukim piksa o tewel tasol bilong ol gutpela samting i laik kamap bihain.” (Hi. 10:1) Lo i tok de Sabat i save kamap bihain long 6-pela de bilong wok na Jisas i bin oraitim planti manmeri long dispela de. Dispela i stap olsem piksa bilong makim taim we ol manmeri bai stap bel isi na kisim ol narapela gutpela blesing long Taim Bilong Wan Tausen Yia Bilong Krais i Stap King bihain long taim Satan i no stap moa bilong bosim ol man. Olsem na dispela King bilong Kingdom “em i bosim de Sabat.”—Mt. 12:8; Lu. 6:5.
3:5; 7:34; 8:12—Olsem wanem Mak inap save long ol samting Jisas i pilim? Mak em i no wanpela bilong ol 12-pela aposel, na em i no bin raun wantaim Jisas. Ol buk bilong bipo i stori olsem gutpela poroman bilong Mak, em aposel Pita, em i tokim Mak long planti samting em Mak i bin raitim.—1 Pi. 5:13.
6:51, 52—Wanem samting ol disaipel i ‘no kliagut long en taim Jisas i tilim bret long ol manmeri’? Sampela aua i go pinis, Jisas i bin kisim 5-pela bret wantaim 2-pela pis na brukim na givim long 5,000 man wantaim ol meri na ol pikinini. Samting ol disaipel i mas kliagut long en em ol i mas luksave olsem Jisas i bin kisim strong long God Jehova long mekim ol dispela mirakel. (Mk. 6:41-44) Sapos ol i bin kliagut long bikpela strong Jisas i bin kisim, ol bai i no inap kirap nogut taim Jisas i wokabaut antap long wara.
8:22-26—Bilong wanem Jisas i mekim tupela samting bilong opim ai bilong man i aipas? Yumi ken ting olsem Jisas i tingim dispela man na em i mekim olsem. Ai bilong dispela man i save long tudak tasol, em i no bin lukluk bipo olsem na Jisas i oraitim ai bilong em isi isi na bai ai bilong em inap lain long lukim strongpela lait bilong san.
Skul Yumi Kisim:
2:18; 12:18; 13:3. Mak i kamapim mining bilong ol pasin na bilip bilong ol Juda, na em i stori klia long ol ples na bai ol man i no bilong lain Juda ol inap kisimgut. Em i tokaut klia olsem ol Farisi i save “tambu long kaikai,” na ol Sadyusi i save tok “ol man i dai pinis, bai ol i no inap kirap bek,” na man i stap long “maunten Oliv” em inap “lukim tempel.” Mak i no stori long lain tumbuna bilong Mesaia, long wanem, ol Juda tasol bai i laik save long dispela samting. Mak i stap gutpela piksa bilong yumi. Yumi mas tingim wanem kain ol man i harim tok bilong yumi taim yumi autim tok o taim yumi mekim tok long ol miting bilong kongrigesen.
3:21. Ol wanblut bilong Jisas ol i no bilip long em. Olsem na em i pilim hevi bilong ol Kristen em ol wanblut bilong ol i no wanbilip na ol i birua o tok bilas long ol.
3:31-35. Long taim Jisas i kisim baptais God i makim em long holi spirit na em inap kisim laip long heven, na “Jerusalem i stap long heven” em i mama bilong em. (Ga. 4:26) Kirap long dispela taim na i go, ol disaipel bilong Jisas i bikpela samting moa long em, winim ol famili bilong em long graun. Dispela i skulim yumi long tingim ol samting bilong lotu i bikpela samting long laip bilong yumi.—Mt. 12:46-50; Lu. 8:19-21.
8:32, 34. Yumi mas luksave kwiktaim na sakim tok man i mekim long yumi mas tingim yumi yet na yumi no ken daunim laik bilong yumi yet na helpim ol narapela. Man i bihainim Krais i mas redi long “daunim laik bilong em yet” olsem em i mas tok nogat long ol samting bilong em yet. Em i mas redi long “karim diwai”—olsem karim pen na hevi, sapos em i mas mekim olsem, o kisim sem, o ol man i mekim nogut long em o kilim em i dai, long wanem, em i wanpela Kristen. Na em i mas wok yet long “bihainim” Jisas, na bihainim pasin bilong em. Bilong i stap disaipel man i mas kisim pasin bilong daunim laik bilong em yet wankain olsem bilong Krais Jisas.—Mt. 16:21-25; Lu. 9:22, 23.
9:24. Yumi no ken sem long tokim ol narapela long bilip bilong yumi o beten askim God long mekim bilip bilong yumi i kamap strong moa.—Lu. 17:5.
LASPELA MUN
Klostu long pinis bilong yia 32 C.E., Jisas i kam long “hap bilong distrik Judia na long hapsait bilong wara Jordan,” na planti manmeri i kam bung gen long em. (Mk. 10:1) Taim em i autim tok pinis long dispela ples, em i go long Jerusalem.
Long Nisan 8, Jisas i stap long Betani. Em i kaikai i stap long wanpela haus na wanpela meri i kam na kapsaitim sanda long het bilong em. Mak i stori long taim Jisas i go insait long Jerusalem na wanem ol samting i painim em i go inap long taim em i kirap bek.
Bekim Bilong Ol Askim Bilong Baibel:
10:17, 18—Bilong wanem Jisas i stretim wanpela man i kolim Em “Gutpela Tisa”? Jisas i no orait long kisim dispela biknem, em i givim biknem long Jehova na em i kamapim klia olsem God tru em i as bilong olgeta gutpela samting. Na tu, Jisas i kamapim klia olsem Man Bilong Wokim olgeta samting, em God Jehova, i stret em wanpela tasol i makim wanem samting i gutpela na wanem samting i nogut.—Mt. 19:16, 17; Lu. 18:18, 19.
14:25—Wanem mining bilong dispela tok Jisas i mekim long ol gutpela aposel bilong em: “Mi no ken dring wain moa inap long taim mi dringim nupela wain insait long kingdom bilong God”? Jisas i no tok olsem i gat wain long heven, nogat. Sampela taim wain i save makim pasin bilong amamas, olsem na Jisas i toktok long amamas em bai kisim long bung gen wantaim ol disaipel husat God i makim long holi spirit na ol i kirap bek na mekim wok king long Kingdom.—Sng. 104:15; Mt. 26:29.
14:51, 52—Husat dispela yangpela man i ‘lusim laplap na i ranawe as nating’? Mak wanpela tasol i stori long dispela samting, olsem na yumi ken ting olsem em i toktok long em yet.
15:34—Yu ting dispela tok bilong Jisas “God bilong mi, God bilong mi, bilong wanem yu lusim mi?” i makim olsem em i no gat strongpela bilip? Nogat. Yumi no save i gat wanem as na Jisas i mekim dispela tok, ating tok bilong em i soim olsem em i luksave olsem Jehova i no lukautim em moa, em i mekim olsem bambai Jisas i ken kamapim klia olsem em i stap gut long Papa i go inap long em i dai. Ating Jisas i mekim dispela tok tu, long wanem, em i laik truim tok bilong Song 22:1 i tok profet long em.—Mt. 27:46.
Skul Yumi Kisim:
10:6-9. God i laik bai man na meri marit i mas pas gut wantaim. Olsem na man na meri marit i no ken tingting long brukim marit hariap, ol i mas wok strong long bihainim ol stiatok bilong Baibel bilong stretim ol hevi i kamap insait long marit bilong ol.—Mt. 19:4-6.
12:41-44. Pasin bilong rabismeri i skulim yumi long givim olgeta samting yumi inap givim bilong helpim lotu i tru.
[Piksa long pes 29]
Bilong wanem Jisas i tokim dispela man long tokim ol wanblut bilong em long samting i bin painim em?