Gretiuesen Bilong Klas Namba 123
Ol i Tokim Ol Sumatin Bilong Skul Gileat Long “Kirap Digim Graun”
LONG Sarere, Septemba 8, 2007, inap 6,352 manmeri bilong 41 kantri i bung long gretiuesen bilong klas namba 123 bilong Wastaua Baibel Skul Bilong Gileat. Long 10:superscription0 long moning, siaman bilong program, Anthony Morris bilong Gavening Bodi, i tok welkam long olgeta i bung. Orait nau em i singautim brata bilong mekim namba wan tok, em Gary Breaux bilong Brens Komiti Bilong Yunaitet Stets.
Brata Breaux i tokim ol sumatin olsem maski lukluk bilong ol i wanem kain, long ai bilong Jehova, ol man i mekim laik bilong em, ol i luk nais tru. (Jer. 13:11, NW) Em i strongim ol sumatin long wok yet long i stap nais long ai bilong Jehova. Bihain, Gerrit Lösch bilong Gavening Bodi i mekim tok i stret long yumi ken ting olsem taim yumi mekim wok bilong Jehova, Em bai mekim gut long yumi. (Hi. 11:6) Tasol as tru na yumi mekim wok bilong Jehova em yumi laikim em tru.
Wasman bilong Dipatmen Bilong Ol Skul Tiokratik, William Samuelson, i strongim ol sumatin long stap gut long wok bilong tokaut long Jisas i stap King na oltaim ol i mas bihainim gutpela pasin.a Sam Roberson, em nambatu wasman bilong Dipatmen Bilong Ol Skul Tiokratik, i kirapim ol sumatin long tingim tasol ol gutpela pasin bilong ol narapela. Dispela bai helpim ol long laikim tru ol “manmeri bilong God.”—1 Pi. 2:17.
Bihain long ol dispela tok, wanpela tisa bilong Skul Gileat, em Mark Noumair, i toktok wantaim sampela sumatin em ol i kamapim sampela ekspiriens ol i kisim long taim bilong skul taim ol i autim tok. Olgeta i harim tok ol i luksave olsem ol sumatin i laikim tru wok autim tok na ol i gat bikpela laik long helpim ol narapela. Kent Fischer bilong Patterson Betel Ofis i toktok wantaim sampela memba bilong ol Brens Komiti bilong 3-pela kantri i gat ol misineri. Tok bilong ol dispela gutpela brata i mekim gut bel bilong ol papamama bilong ol sumatin na ol narapela tu long odiens, long save olsem long ol kantri we ol nupela misineri i go long en, ol i save lukautim gut ol misineri. Izak Marais bilong Dipatmen Bilong Helpim Ol Lain i Tanim Tok i toktok wantaim sampela bratasista em ol i bin mekim wok misineri longpela taim, na ol ekspiriens bilong ol i soim ol nupela sumatin long amamas ol bai kisim long mekim dispela wok.
Brata Geoffrey Jackson bilong Gavening Bodi i mekim bikpela tok bilong program, nem bilong en, “Yupela i Harim Pinis Olgeta Tok—Nau Yupela Bai Mekim Wanem?” Brata Jackson, em i bin mekim wok misineri klostu 25 yia long Saut Pasifik, em i kamapim stori bilong laspela hap bilong Bikpela Tok Long Maunten. Long dispela tok piksa, Jisas i stori long tupela man, wanpela man i gat gutpela tingting na narapela man em i no gat gutpela tingting na tupela wantaim i wokim haus. Brata i tok ating dispela tupela haus i stap long wankain ples. Man i no gat gutpela tingting em i wokim haus antap long wesan, tasol man i gat gutpela tingting em i wokim hul i go daun inap long em i kamap long hap ol bikpela ston i stap long en na nau em i sanapim haus antap long dispela. Taim bikpela win na ren i pundaun, haus man i sanapim antap long ol bikpela ston i no bagarap, tasol haus i stap antap long wesan em i pundaun.—Mt. 7:24-27; Lu. 6:48.
Jisas i tok olsem dispela man i no gat gutpela tingting em i makim ol man em ol i harim tok bilong Jisas, tasol ol i no bihainim. Man i gat gutpela tingting i makim ol man em ol i harim tok na bihainim. Brata Jackson i tokim ol sumatin olsem, “Taim yupela i bihainim ol samting yupela i bin lain na kisim save long en long rot bilong stadi long Baibel, bai yupela i kamap wankain olsem dispela man i gat gutpela tingting.” Bilong pinisim tok, em i strongim ol sumatin long ol i mas “kirap digim graun” taim ol i kamap long ples ol bai mekim wok misineri long en.
Laspela samting, ol sumatin i kisim setifiket bilong ol na ol i kisim toksave long wanem ples ol bai mekim wok misineri long en, na Brata Morris i mekim tok bilong pinisim program. Em i kirapim ol sumatin long oltaim bihainim pasin bilong Jisas na askim Jehova long helpim ol. Orait nau gretiuesen program i pinis.
[Futnot]
a Dipatmen Bilong Ol Skul Tiokratik, em i stap aninit long Komiti Bilong Wok Tisa, em i save lukautim skul bilong Gileat, skul bilong ol memba bilong Brens Komiti, na skul bilong ol wasman bilong raun.
[Blok long pes 31]
OL SAMTING BILONG OL SUMATIN
Hamas kantri ol i kam long en: 10
Hamas kantri ol bai go long en: 24
Hamas sumatin: 56
Krismas bilong ol, averes: 33.5
Hamas yia long tok i tru, averes: 17.9
Hamas yia long wok painia, averes: 13.8
[Piksa long pes 32]
Klas Namba 123 Bilong Wastaua Baibel Skul Bilong Gileat
Nem bilong ol bratasista i stap daunbilo. Namba wan lain i sanap paslain, na namba 9 lain i sanap baksait tru. Taim yu ritim nem bilong ol na lukim pes bilong ol, kirap long han kais na i go long han sut.
(1) Esparza, E.; Papaya, S.; Bilal, A.; Suárez, M.; Evers, E.; Dimichino, K. (2) Rosa, M.; Fujii, R.; Ratey, O.; Leveton, J.; Van Leemputten, M. (3) Boscaino, A.; Beck, K.; Budanov, H.; Braz, C.; Peltz, K.; Siaw, A. (4) Leveton, S.; Santikko, H.; Conte, S.; Wilson, J.; Rylatt, J.; Pierce, S.; Fujii, K. (5) Rosa, D.; Boscaino, M.; Austin, V.; Rodiel, P.; Bilal, P.; Dimichino, P. (6) Ratey, B.; Czyzyk, D.; Clarke, C.; Riedel, A.; Esparza, F.; Siaw, P.; Van Leemputten, T. (7) Rodiel, J.; Evers, J.; Green, J.; Czyzyk, J.; Santikko, M.; Rylatt, M. (8) Peltz, L.; Austin, D.; Riedel, T.; Beck, M.; Pierce, W.; Conte, S.; Green, S. (9) Suárez, J.; Clarke, J.; Papaya, S.; Budanov, M.; Wilson, R.; Braz, R.