Ol i Amamas Long Mekim Laik Bilong God
LONG beten Jisas i mekim long Papa bilong em, Jisas i makim pasin olgeta Kristen i mas bihainim, em i tok: “Yu no ken bihainim laik bilong mi. Nogat. Yu mas bihainim laik bilong yu tasol.” (Luk 22:42) Planti milion wokboi bilong God long nau i save bihainim dispela tok i soim olsem Jisas i daun long Jehova. Sampela bilong ol dispela wokboi em 52 sumatin bilong namba 120 klas bilong Wastaua Baibel Skul Bilong Gileat. Long Mas 11, 2006, ol sumatin i winim skul i amamas long ol i ken go na mekim laik bilong God long narapela narapela kantri, maski ol bai bungim sampela hevi tu.
Wanem samting i kirapim ol dispela sumatin long larim Jehova i stiaim laip bilong ol? Chris na Leslie, em tupela marit ol i makim bilong mekim wok misineri long Bolivia, ol i tok: “Mipela i bin daunim laik bilong mipela yet, olsem na mipela i redi long mekim olgeta kain wok oganaisesen bilong Jehova i laik bai mipela i mas mekim.” (Mak 8:34) Jason na Chere, ol bai go long Albenia, ol i tok: “Olgeta asainmen mipela i bin kisim long oganaisesen bilong Jehova i bin i gat ol hevi bilong en. Tasol mipela i lukim olsem mipela inap long bilip tru long Jehova.”
Ol Tok Bilong Strongim Ol Long Daun Long Laik Bilong Jehova
George Smith, em wanpela bilong famili Betel na em i wok long Dipatmen Bilong Wokim Piksa, em i kirapim program long rot bilong beten. Stephen Lett, em wanpela bilong Gavening Bodi Bilong Ol Witnes Bilong Jehova na siaman bilong gretiuesen program, em i tok welkam long olgeta i kam bung. I gat ol visita bilong 23 kantri em ol i bin kam long Wastaua Ediukesen Senta long Patterson, New York, bilong stap long dispela bung bilong amamas. Brata Lett i tokim ol sumatin i winim skul olsem ol bai mekim “strongpela wok.” Em i toktok long “ol strongpela banis bilong ol birua”—olsem ol bilip giaman—em ol dispela nupela misineri inap daunim long rot bilong strong bilong tok bilong Baibel. (2 Korin 10:4, 5) Em i tok: “Bai yupela i amamas tru long Jehova i mekim wok long yupela bilong daunim ol bilip giaman em ol man i gat gutpela bel long ol kantri yupela bai i go long en, ol i bilip long en!”
Harold Jackson i wok long hetkota, na em i mekim tok “Ol Samting Bilong Tingim.” Em i tok ol nupela misineri i no ken lusim tingting long “wok pastaim long painim kingdom bilong God wantaim stretpela pasin bilong em.” (Matyu 6:33, Nupela Testamen na Ol Sam) Ol i mas tingim olsem pasin laikim i mekim na ol i kamap strongpela Kristen na i helpim wok bilong ol long kamap gutpela tru. (1 Korin 8:1) Brata Jackson i tok: “Larim pasin laikim i stiaim pasin yupela i mekim long ol narapela man.”
Orait nau, Geoffrey Jackson, wanpela bilong Gavening Bodi husat i bin mekim wok misineri long 1979 i go inap 2003, em i askim ol sumatin i winim skul, “Yu Save Mekim Ol Wok Bilong Yu?” Em i tok em i bikpela samting long ol Kristen i mas i gat stretpela tingting long ol yet na wok autim tok bilong ol. Ol i gat wok long wok strong long planim na givim wara long ol pikinini kaikai bilong tok i tru. Tasol em wok bilong Jehova long kirapim ol man long bihainim tok i tru, long wanem, “God i bin mekim kaikai i kamap.” (1 Korin 3:6-9) Brata Jackson i tok moa: “Jehova i bin givim wok long yupela long stap strong long lotu i tru. Tasol wanem samting em i nambawan bikpela wok bilong yupela? Yupela i mas laikim tru Jehova na ol manmeri yupela bai i go bilong helpim ol.”
Tisa bilong Skul Gileat, Lawrence Bowen, em i mekim tok “Save Long Pasin Yu Mas Bihainim.” Em i kirapim ol sumatin long tingim olsem Jehova i bin wokim ol mirakel bilong stiaim na lukautim lain Israel long ples drai nating. (Kisim Bek 13:21, 22) Em i save stiaim na lukautim yumi long nau, wanpela rot bilong mekim olsem em long rot bilong ol Kristen God i bin makim, em dispela lain i “olsem strongpela pos i karim tok tru.” (1 Timoti 3:14, 15) Ol nupela misineri i mas litimapim tok i tru i save stiaim na lukautim ol man i gat pasin daun.
Wallace Liverance, narapela tisa bilong Skul Gileat, em i tokim ol sumatin long ol i no ken lusim tingting olsem tok bilong God i stap “baksait” long ol. Yumi ken tok olsem, long wanem, wok bilong raitim Baibel i pinis inap planti handet yia i go pinis. Olsem wasman bilong ol sipsip i stap baksait long lain sipsip na i singaut long ol, Jehova i stap baksait long lain bilong em, na em i stiaim ol long rot bilong “wokboi i gat gutpela tingting.” (Aisaia 30:21; Matyu 24:45-47) Skul Gileat i helpim ol sumatin i winim skul long amamas moa yet long lain wokboi. Lain “wokboi” i bin kamapim Baibel New World Translation of the Holy Scriptures. Brata Liverance i tokim ol sumatin: “Kisim dispela gutpela samting i gat ol tok i givim save na mekim wok long en bilong skulim ol narapela.”—Matyu 13:52.
Mekim Laik Bilong Jehova Long Wok Autim Tok
Insait long tok “Bel i Kirap Long Autim Gutnius,” tisa bilong Skul Gileat, Mark Noumair, i stori long sampela ekspiriens ol sumatin i kisim long wok autim tok long taim ol i stap long Skul Gileat. (Rom 1:15) Ol inteviu em i mekim wantaim ol sumatin i winim skul i kamapim klia olsem ol i bin givim bel tru long autim tok taim rot i op.
Kenneth Flodin i inteviuim tripela wasman raun i mekim wok nau long Amerika na dispela i strongim bel bilong ol sumatin i winim skul. Richard Keller na Alejandro Lacayo, i bin wok long Saut na Sentral Amerika, ol i stori long ol samting ol i bin mekim bilong karim ol hevi na ol blesing ol i bin kisim taim ol i mekim wok misineri. Moacir Felisbino i stori long skul em i bin kisim taim em i wok wantaim ol misineri long Brasil we em i bin kamap bikpela.
David Schafer i inteviuim tripela misineri i bin mekim dispela wok inap planti yia, em Robert Jones, Woodworth Mills, na Christopher Slay. Dispela tripela brata i stori long olsem wanem ol i bin lain long bilip long Jehova taim ol hevi i painim ol. Ol i tokim ol sumatin olsem skul ol i bin kisim long oganaisesen bilong Jehova i bin redim ol gut long mekim wok misineri. Brata Mills i tok: “Save mi kisim long Skul Gileat i no nambawan bikpela samting i bin helpim mi, nogat, samting i helpim mi tru em ol tok bilong skul i lainim mi long pasin daun na pasin laikim.”
Guy Pierce bilong Gavening Bodi i mekim tok, “Jehova i No Inap Lus Long Kamapim Laik Bilong Em.” Adam i lus long bihainim tok bilong God, tasol yu ting dispela i mekim na God i lus long kamapim laik bilong em? Sampela man i save tok, ating God i no bin wokim Adam i gutpela olgeta, a? I no olsem, long wanem, ‘God i wokim ol manmeri na olgeta samting em i wokim i gutpela.’ (Stat 1:27, 31) Brata Pierce i tok, pasin bilong Jisas long stap gut long God maski bikpela traim tru i painim em hia long graun i kamapim klia olsem “Adam i no gat eskius, na i no gat as na em i lus long bihainim tok bilong God.” Samting i traim pasin bilong Adam long bihainim tok bilong God long gaden Iden i no bikpela tumas, traim bilong Jisas i bikpela tru, tasol em i bin stap gut long God. Maski traim bilong Adam i liklik, em i lus long bihainim tok bilong God. Tasol Jehova i no inap lus long kamapim laik bilong em. Laik bilong em bai kamap tru. (Aisaia 55:11) Brata Pierce i tokim ol nupela misineri: “Yupela i gat gutpela wok bilong litimapim nem bilong Jehova long rot bilong daunim laik bilong yupela yet. Mipela i laik bai Jehova i stap wantaim yupela olgeta wan wan long wanem wanem hap yupela bai mekim wok bilong em olsem ol misineri.”
Brata Lett em siaman na em i ritim ol gude i kam long sampela brens ofis bilong ol Witnes Bilong Jehova, na bihain em i givim setifiket long ol sumatin na kolim ol kantri ol bai go long en. Vernon Wisegarver i bin stap longpela taim long famili Betel, em i pinisim program long rot bilong beten.
Ol 6,872 manmeri i kam bung ol i pilim olsem gretiuesen program i bin kirapim ol long givim bel long mekim laik bilong God. (Song 40:8) Tupela sumatin i winim skul, Andrew na Anna i tok: “Mipela i bin dediketim laip bilong mipela long Jehova. Mipela i bin tok promis long Jehova long mekim wanem wanem samting em i askim mipela long mekim. Na nau Jehova i askim mipela long i go long Kamarun, Afrika.” Tupela hia na ol narapela sumatin bilong klas i winim skul ol i amamas long kirap mekim wok em ol bai kisim bikpela amamas long en. Yes, ol i amamas long mekim laik bilong God.
[Blok long pes 17]
OL SAMTING BILONG OL SUMATIN
Hamas kantri ol i kam long en: 6
Hamas kantri ol bai go long en: 20
Hamas sumatin: 52
Krismas bilong ol, averes: 35.7
Hamas yia long tok i tru, averes: 18.3
Hamas yia long fultaim sevis, averes: 14.5
[Piksa long pes 18]
Klas Namba 120 Bilong Wastaua Baibel Skul Bilong Gileat
Nem bilong ol bratasista i stap daunbilo. Namba wan lain i sanap paslain, na namba 9 lain i sanap baksait tru. Taim yu ritim nem bilong ol na lukim pes bilong ol, kirap long han kais na i go long han sut.
(1) Wright, S.; Suárez, B.; Croisant, B.; Davenport, L. (2) Johnson, A.; Ali, C.; Cady, K.; Guerrero, P.; Ases, A. (3) Ortiz, L.; Lyall, K.; Uzeta, M.; Perez, R.; Backus, K.; Caterina, C. (4) Palmer, B.; Loving, D.; Macdonough, J.; Bostock, D.; Benetatos, L. (5) Jasicki, M.; Sarafianos, E.; Stelter, C.; Vaira, R.; Woon, J.; Prentice, K. (6) Davenport, H.; Croisant, H.; Perez, M.; Vaira, E.; Suárez, A.; Caterina, I.; Wright, C. (7) Cady, K.; Macdonough, J.; Ortiz, M.; Woon, J.; Ali, J.; Ases, M. (8) Sarafianos, G.; Lyall, D.; Uzeta, C.; Stelter, P.; Prentice, G.; Johnson, A.; Benetatos, C. (9) Palmer, J.; Jasicki, W.; Backus, J.; Bostock, S.; Guerrero, J. M.; Loving, S.