Gretiuesen Bilong Klas Namba 125
Ol i Strongim Ol Misineri Long Bihainim Pasin Bilong Jeremaia
“DISPELA klas bilong skul Gileat i wanpela bikpela samting,” em tok Geoffrey Jackson bilong Gavening Bodi i mekim. Em i mekim tok long 6,156 manmeri husat i kam long gretiuesen bilong klas namba 125 bilong Wastaua Baibel Skul Bilong Gileat long Septemba 13, 2008. Skul Gileat i bin salim winim 8,000 misineri i go “long olgeta hap bilong graun,” na dispela 56 sumatin i grediuet long dispela klas, ol i insait long dispela namba!—Ap. 1:8.
Brata Jackson, em siaman bilong program, em i mekim dispela askim, “Sapos ol narapela i bilip long yu, yu ting dispela bai helpim wok autim tok bilong yu?” Em i kolim fopela samting i mekim na ol narapela inap bilip long yumi: holim stretpela tingting, stap olsem gutpela piksa, skulim ol man long ol tok em Baibel i as bilong en, na strong long kamapim nem bilong Jehova long ol man.
David Schafer, em i wok long Komiti Bilong Wok Tisa, em i mekim tok “Bai Yu Kliagut Long Olgeta Samting?” Em i tokim ol sumatin bilong Skul Gileat olsem, ol inap “kliagut long olgeta samting” em ol i mas kliagut long en bilong mekim wok misineri sapos ol i wok long askim Jehova long stiaim ol na ol i daun long “wokboi i gat gutpela tingting.”—Snd. 28:5, NW; Mt. 24:45.
Orait nau, John E. Barr bilong Gavening Bodi i mekim tok “No Ken Larim Wanpela Samting i Pasim Yu Long Stap Insait Long Pasin Laikim Bilong God.” Olsem gutpela papa, Brata Barr i strongim bel bilong ol sumatin na papamama bilong ol, na dispela i mekim na ol i no tingting planti moa long ol samting bai painim ol nupela misineri long hap ol bai go long en. Em i tok: “Taim yumi stap insait long pasin laikim bilong God, dispela em i wanpela gutpela hap we yumi ken stap gut na stap bel isi long en.” I no gat wanpela samting inap pasim ol misineri long stap insait long pasin laikim bilong God, sapos ol yet i no lusim God.
Sam Roberson bilong Dipatmen Bilong Ol Skul Tiokratik, em i kirapim odiens long werim “ol nambawan gutpela klos.” Long rot bilong stadi long ol samting Jisas i bin mekim na bihainim ol pasin bilong em, ol sumatin i ken “kisim Bikpela Jisas Krais na pasim em olsem klos.” (Ro. 13:14) Bihain long dispela, William Samuelson, em wasman bilong Dipatmen Bilong Ol Skul Tiokratik, em i stori long wanem samting i mekim na man i gat nem. Tingting God i gat long man, dispela i mekim na man i gat nem, na i no tingting bilong ol man, nogat.
Michael Burnett, wanpela bilong ol tisa, i inteviuim ol sumatin na ol i stori long ol ekspiriens ol i bin kisim taim ol i autim tok. Taim ol sumatin i stap long Skul Gileat long Patterson, New York, ol i bin painim ol man i laik harim tok, maski ol i autim tok long ol teritori we planti taim ol Witnes i save autim tok long en. Gerald Grizzle bilong Ofis Bilong Lukautim Ol Kibung i inteviuim tripela brata i go long Skul Bilong Ol Memba Bilong Brens Komiti. Tok bilong ol i helpim ol sumatin bilong Skul Gileat long redi long ol samting bai painim ol long ol kantri ol bai i go mekim wok misineri long en.
David Splane bilong Gavening Bodi na em i sumatin bilong klas namba 42, em i mekim tok “Bihainim Pasin Bilong Jeremaia.” Jeremaia i tingting planti long wok em i bin kisim, tasol Jehova i strongim em. (Jer. 1:7, 8) God bai mekim wankain long ol nupela misineri. Brata Splane i tok: “Sapos yu gat hevi wantaim wanpela, sindaun na raitim tenpela gutpela pasin bilong dispela man em yu save amamas long en. Na sapos yu no inap raitim tenpela samting, dispela i makim olsem yu no save gut long dispela man.”
Jeremaia i daunim sampela laik bilong em yet. Taim em i laik lusim wok, em i beten, na Jehova i stap wantaim em. (Jer. 20:11) Brata Splane i tok: “Taim yu bel hevi, toktok wantaim Jehova long dispela samting. Bai yu kirap nogut long lukim pasin bilong Jehova long helpim yu.”
Bilong pinisim program bilong gretiuesen, siaman i tokim odiens olsem ol sumatin i bin lainim planti samting ol i ken mekim na bai ol narapela i ken bilip long ol. Taim ol misineri i autim tok long ol hap ol bai go long en, ol man bai bilip long ol na dispela bai strongim ol tok ol i autim.—Ais. 43:8-12.
[Blok long pes 22]
OL SAMTING BILONG OL SUMATIN
Hamas kantri ol i kam long en: 6
Hamas kantri ol bai go long en: 21
Hamas sumatin: 56
Krismas bilong ol, averes: 32.9
Hamas yia long tok i tru, averes: 17.4
Hamas yia long wok painia, averes: 13
[Piksa long pes 23]
Klas Namba 125 Bilong Wastaua Baibel Skul Bilong Gileat
Nem bilong ol bratasista i stap daunbilo. Namba 1 lain i sanap paslain, na namba 9 lain i sanap baksait tru. Taim yu ritim nem bilong ol na lukim pes bilong ol, kirap long han kais na i go long han sut.
(1) Hodgson, A.; Wall, A.; Beerens, K.; Hortelano, M.; Newman, L.; De Caso, A. (2) Jenkins, J.; Jarzemski, T.; Méndez, N.; Corona, V.; Canalita, L. (3) Fryer, H.; Savage, M.; Tidwell, K.; Erickson, N.; Dyck, E.; McBeath, R. (4) Perez, L.; Puse, L.; Skidmore, A.; Young, B.; McBride, N.; Rondón, P.; Goodman, E. (5) Beerens, M.; Ferguson, J.; Pearson, N.; Chapman, L.; Wardle, J.; Canalita, M. (6) Perez, P.; De Caso, D.; Young, T; Rondón, D.; Goodman, G.; Jenkins, M.; Dyck, G. (7) Corona, M.; Wall, R.; Puse, S.; Méndez, F.; Jarzemski, S.; Savage, T. (8) Newman, C.; Ferguson, D.; Skidmore, D.; Erickson, T.; McBride, J.; Pearson, M.; Chapman, M. (9) Hodgson, K.; Wardle, A.; McBeath, A.; Tidwell, T.; Fryer, J.; Hortelano, J.