Ol Man i Askim
Bilong Wanem Ol Witnes Bilong Jehova i No Save Mekim Wok Long Kruse Long Lotu?
Ol Witnes Bilong Jehova i bilip strong olsem dai bilong Jisas Krais i bin opim rot bilong ol man i bilip long em ol inap kisim laip i stap oltaim oltaim. (Matyu 20:28; Jon 3:16) Tasol ol i no bilip olsem Jisas i dai long diwai kros, o kruse, olsem planti piksa i save kamapim. Ol i bilip olsem Jisas i dai long wanpela pos na i no long tupela hap diwai em narapela i slip antap long narapela.
Ol man i bin yusim kruse long Mesopotemia olsem 2 tausen yia samting paslain long Krais. Long buk Symbols Around Us, saveman Sven Tito Achen bilong Denmark i tok, ol dispela haiden i bin yusim ol kruse “olsem wanpela mak bilong majik . . . bilong lukautim ol na bilong bringim ol gutpela samting.” Buk New Catholic Encyclopedia i tokaut olsem: “Ol lain i bin stap paslain long lotu Kristen i kamap na ol lain man bilong ol kantri i no Kristen, ol i bin yusim kruse olsem piksa bilong makim ol samting bilong ples antap.” Sapos olsem, bilong wanem ol lotu i yusim kruse olsem wanpela mak holi bilong lotu?
Wanpela saveman bilong Briten i gat nem, em W. E. Vine, i tok: “Long 250 C.E. samting . . . ol misin i orait long ol haiden i kam insait long lotu . . . na ol i larim ol i holim yet ol mak haiden bilong ol. Olsem na ol i kisim mak bilong leta Tau o T, . . . na daunim han bilong en na mekim i kamap olsem mak bilong kruse.”—Vine’s Expository Dictionary of Old and New Testament Words.
Vine i tok moa olsem dispela tok “kruse” i makim “wanpela pos . . . em i no wankain long dispela bilip em ol lotu i holim olsem kruse em tupela hap diwai, narapela i slip saitwei antap long narapela.” Baibel Companion Bible bilong Oxford University i tok: “Samting tru i . . . olsem Bikpela i dai long wanpela pos, na i no long tupela hap diwai em narapela i slip antap long narapela.” Em i klia tru olsem ol misin i kirap bihainim wanpela pasin em Baibel i no as bilong en.
Saveman Achen, em yumi kamapim pinis tok bilong em, em i tok: “Insait long 200 yia bihain long dai bilong Krais, i luk olsem ol Kristen i no bin mekim wok long kruse.” Long ol Kristen bilong pastaim, kruse i bin “makim dai na samting i nogut tru.”
Tasol bikpela samting moa, maski ol i yusim wanem samting bilong givim pen na kilim Jisas long en, piksa o mak bilong dispela samting i no ken kamap olsem samting bilong ol Kristen long givim bel long en o lotuim, nogat. Baibel i tok: “Yupela i mas i stap longwe long pasin bilong lotu long ol giaman god.” (1 Korin 10:14) Jisas yet i kamapim klia mak bilong ol disaipel tru bilong em. Em i tok: “Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.”—Jon 13:35.
Long olgeta pasin bilong lotu, ol Witnes Bilong Jehova i wankain long ol Kristen bilong pastaim. Ol i wok strong long bihainim tok bilong Baibel na ol i no save bihainim ol kastam samting. (Rom 3:4; Kolosi 2:8) Long dispela as ol i no save yusim kruse long lotu bilong ol.
[Piksa long pes 22]
Piksa bilong wanpela king haiden bilong Asiria i werim kruse, long 800 b.c.e. samting.
[Kredit Lain]
Photograph taken by courtesy of the British Museum