Yu Save Long Dispela?
Bilong wanem isi isi Jisas i oraitim wanpela man aipas?
Long Mak 8:22-26, yumi ritim stori bilong Jisas long oraitim wanpela man aipas long Betsaida. Baibel i tok, pastaim Jisas i putim spet long ai bilong man na bihain Jisas i askim em long em inap lukim wanem samting. Tok man i bekim i kamapim klia olsem em i paul. Man hia i tok: “Mi lukim sampela man. Tasol mi lukim ol i olsem ol diwai i wokabaut i go.” Jisas i putim han long ai bilong man gen na nau “dispela man i lukluk strong, na ai bilong en i kamap gutpela, na em i lukim olgeta samting i kamap klia.” Jisas i oraitim dispela man isi isi. Bilong wanem em i mekim olsem?
Baibel i no bekim stret dispela askim, tasol yumi inap tingim wanpela as na Jisas i mekim olsem. Taim man i stap aipas inap planti yia—o laip olgeta bilong em—na em i kirap long lukim ol samting namba wan taim, dispela i wanpela bikpela senis tru long em. Olsem: Bipo ol i save putim ol pikinini hos long ol main aninit long graun na bai ol i wok. Ol dispela pikinini hos i lain pinis long stap long ples tudak, olsem na taim ol i kam antap long graun, wanpela de olgeta i mas lus na bai ai bilong ol i lain long lukluk long lait bilong san. Long ol man i aipas, pasin bilong lukim ol samting i bikpela senis moa. Long nau, sampela dokta i bin stretim sampela hevi bilong ai bilong sampela aipas na ol inap lukluk gen. Tasol taim ol dispela man i lukim ol samting, i hatwok tru long kru bilong ol long kliagut long kain kain kala na lukluk bilong ol samting. Dispela i mekim na ol i save paul na ol i no luksave long samting ol i save pinis long en. Bihain isi isi, kru i lain long save long ol samting ai i lukim.
Pasin bilong Jisas long oraitim isi isi dispela man aipas, ating dispela i kamapim pasin bilong em long tingim tru dispela man. Bihain, man “i lukim olgeta samting i kamap klia,” na em i kliagut long olgeta samting em i lukim.
Long taim bilong Jisas, bilong wanem i hatwok long ritim ol tok bilong skrol?
Longpela bilong ol pepa em ol man i save yusim bilong wokim ol skrol em 23 i go 28 sentimita, na braitpela bilong ol em 15 i go 23 sentimita. Ol i save gluim arere bilong ol pepa wantaim o samapim long strongpela rop na joinim wantaim. Sampela taim, ol i mekim wok long ol pepa i longpela moa. Olpela Rait Bilong Detsi i gat tok bilong Aisaia long en, ol i raitim long 17 hap skin bilong animal em ol i joinim wantaim, na hap bilong dispela skrol i stap yet long nau, longpela bilong en em inap olsem 7 mita. Skrol bilong Aisaia em Jisas i bin yusim long haus lotu long Nasaret, ating longpela bilong en i wankain.—Luk 4:16, 17.
Allan Millard i stori long dispela samting long buk Discoveries From the Time of Jesus, na em i tok: “Man bilong ritim skrol i holim wanpela sait bilong buk [skrol] long han kais na opim i go, na narapela sait bilong en em i holim long han sut na rolim gen taim em i ritim pinis ol wan wan blok. Bilong ritim Aisaia 61, em sapta Jisas i bin ritim long haus lotu, em i mas opim klostu skrol olgeta na bihain rolim gen.”
Long dispela taim, i no gat sapta na ves bilong Buk Aisaia olsem yumi gat long nau. Taim ol i givim Buk Aisaia long Jisas long haus lotu long Nasaret, em i mas painim ol tok em nau ol i makim olsem Aisaia 61:1, 2 long ol Baibel bilong yumi. Jisas i no hatwok long “painim dispela hap,” na dispela i kamapim olsem em i save gut long Tok Bilong God.