Larim God i Stiaim Yu Long Olgeta Samting

“Dispela God i lukautim mipela, em i God bilong yumi oltaim oltaim. Na oltaim em bai i go pas na soim rot long yumi.”​​—SNG. 48:14.

1, 2. Bilong wanem yumi mas bihainim ol tok bilong Jehova bilong stiaim yumi na no ken bilip long save bilong yumi yet? Wanem ol askim i kamap?

TAIM yumi tingim ol samting i no inap helpim yumi o ol samting inap nogutim yumi, em i isi long giamanim yumi yet. (Snd. 12:11) Sapos yumi gat laik tru long mekim samting i no stret long Kristen i mekim, ating bel bilong yumi bai tingim sampela samting i olsem as na yumi ken mekim dispela samting. (Jer. 17:​5, 9) Olsem na man bilong raitim song i bihainim gutpela tingting taim em i beten long Jehova: “Yu mas salim tok tru na lait bilong yu i kam na soim rot long mi.” (Sng. 43:3) Em i bilip strong long Jehova i nambawan man bilong soim rot long em, em i no bilip long liklik save bilong em yet, nogat. Olsem man bilong raitim song, yumi tu i mas larim God i soim rot long yumi.

² Tasol bilong wanem yumi inap bilip long ol tok bilong Jehova long stiaim yumi? Long wanem kain taim yumi mas larim Jehova i soim rot long yumi? Yumi mas kisim wanem kain pasin na bai ol tok bilong em i ken helpim gut yumi? Jehova i save stiaim yumi olsem wanem long nau? Dispela stadi bai bekim ol dispela askim.

Bilong Wanem Yumi Inap Bilip Long Jehova Long Stiaim Yumi?

3-5. Bilong wanem yumi inap bilip long Jehova long stiaim yumi?

³ Jehova em i Papa bilong yumi long heven. (1 Ko. 8:6) Em i save gut tru long yumi na long olgeta tingting bilong yumi tu. (1 Sml. 16:7; Snd. 21:2) King Devit i tokim God: “Yu save long olgeta samting mi save mekim. Yu stap longwe, tasol yu save long olgeta tingting bilong mi. Na sapos mi laik mekim wanpela tok, yu save pinis long dispela tok.” (Sng. 139:​2, 4) Jehova i save gut tru long yumi, olsem na em i save long wanem samting i gutpela bilong helpim yumi. Em i gat bikpela savetingting, na em inap lukim olgeta samting. Save bilong em i daun tru, winim yumi ol man. Taim wanpela samting i no kamap yet, em i save long dispela samting. (Ais. 46:​9-​11; Ro. 11:33) Em dispela “God, em wanpela tasol i gat save.”​​—Ro. 16:​27.

⁴ Narapela samting, Jehova i save laikim tru yumi na em i laik bai gutpela samting tasol i ken painim yumi. (Jo. 3:​16; 1 Jo. 4:8) Dispela gutpela God i save givim yumi planti gutpela samting. Disaipel Jems i tok: “Olgeta gutpela samting yumi save kisim na olgeta presen i gutpela tru, em olgeta i save kam long heven. Papa . . . i save salim dispela ol samting i kam daun long yumi.” (Jem. 1:​17) Ol dispela samting i save helpim gut ol man i larim God i stiaim ol.

⁵ Laspela samting, Jehova i gat olgeta strong. Man bilong raitim song i tok: “Man i go long God Antap Tru, bilong God i ken lukautim em, em i stap klostu long God I Gat Olgeta Strong, na God i karamapim em. Bai dispela man i tok long Bikpela olsem, ‘Yu save banisim mi na yu was gut long mi. Yu God bilong mi. Mi save bilip long yu.’ ” (Sng. 91:​1, 2) Taim yumi bihainim ol tok bilong Jehova, yumi bihainim ol tok i nambawan tru. Taim pasin birua i painim yumi, em bai lukautim yumi. Bai em i no lusim yumi, nogat tru. (Sng. 71:​4, 5; Ritim Sindaun 3:​19-​26.) Yes, Jehova i save long wanem samting i gutpela bilong helpim yumi, em i laik bai gutpela samting tasol i ken painim yumi, na em i gat strong long givim dispela helpim long yumi. Olsem na em i longlong pasin stret sapos yumi givim baksait long rot em i soim yumi long bihainim! Tasol long wanem taim yumi mas kisim dispela helpim?

Long Wanem Taim Yumi Mas Kisim Tok Bilong Stiaim Yumi?

6, 7. Long wanem kain taim yumi mas i gat ol tok bilong Jehova bilong stiaim yumi?

⁶ Long olgeta taim yumi stap laip, taim yumi stap yangpela i go inap long yumi lapun, i gat wok long God i mas soim rot long yumi. Man bilong raitim song i tok: “Dispela God i lukautim mipela, em i God bilong yumi oltaim oltaim. Na oltaim em bai i go pas na soim rot long yumi.” (Sng. 48:14) Wankain olsem man bilong raitim song, ol Kristen i gat gutpela tingting ol i save larim God i soim rot long ol.

⁷ Tasol sampela taim i gat bikpela wok moa yet long yumi mas kisim helpim. Sampela taim “bikpela hevi” i painim yumi, olsem pasin birua, bikpela sik, o wantu bos i pinisim yumi long wok. (Sng. 69:​16, 17) Long kain taim olsem, yumi ken beten long Jehova na dispela bai mekim gut bel bilong yumi na yumi ken bilip olsem em bai strongim yumi long karim hevi na stiaim yumi long wokim gutpela disisen. (Ritim Song 102:17.) Tasol i gat ol narapela taim tu we yumi mas kisim helpim bilong em. Olsem: Taim yumi autim gutnius bilong Kingdom, Jehova i mas stiaim yumi na bai wok autim tok bilong yumi i ken kamap gutpela. Na taim yumi mas wokim disisen​—maski em long samting bilong amamas yumi laik mekim, o klos na bilas, ol poroman, ediukesen, o narapela samting​—bai yumi wokim gutpela disisen sapos yumi bihainim ol tok bilong Jehova bilong stiaim yumi. Tru tumas, long olgeta samting long laip bilong yumi, i gat wok long Jehova i mas stiaim yumi.

Hevi i Kamap Taim Man i No Larim God i Stiaim Em

8. Taim Iv i kisim prut tambu, dispela i makim wanem samting?

⁸ Tasol tingim, yumi mas i gat laik long bihainim ol tok bilong Jehova bilong stiaim yumi. Sapos yumi no gat laik long mekim olsem, orait God i no ken subim yumi. Namba wan bilong ol manmeri i no laik bihainim tok bilong Jehova, em Iv. Samting Iv i mekim i kamapim klia olsem samting nogut tru inap kamap taim man i no larim Jehova i stiaim em. Tingim tu samting pasin bilong em i makim. Iv i kisim prut tambu, long wanem, em i laik “kamap wankain olsem God” na “save long wanem samting i gutpela, na wanem samting i nogut.” (Stt. 3:5) Pasin bilong em i soim olsem em i laik mekim samting em wok bilong God tasol long mekim. Em i laik bai em yet i ken makim wanem samting i gutpela na wanem samting i nogut, em i no laik Jehova i soim rot long em. Em i givim baksait long wok bos bilong Jehova. Em i laik kamap bos bilong em yet. Man bilong em, Adam, i bihainim pasin bikhet bilong em.​​—Ro. 5:​12.

9. Sapos yumi sakim tok bilong Jehova, i olsem yumi mekim wanem? Bilong wanem dispela em longlong pasin?

⁹ Long nau, sapos yumi no bihainim ol tok bilong Jehova bilong stiaim yumi, i olsem yumi tu i no laik bai Jehova i stap bos bilong yumi. Olsem: Tingim man i kisim pasin bilong lukim ponografi. Sapos em i bung wantaim kongrigesen Kristen, orait em i save pinis long ol lo bilong Jehova long dispela samting. Ol pasin doti em samting ol Kristen i no ken toktok long en o amamas long lukluk long en na aigris. (Ef. 5:3) Taim man i givim baksait long ol tok bilong Jehova, i olsem em i givim baksait long wok bos bilong Em, em i no laik bai Jehova i stap het bilong em. (1 Ko. 11:3) Dispela em i longlong pasin, long wanem, olsem Jeremaia i tok, “mipela man i no inap bosim wokabaut bilong mipela yet.”​​—Jer. 10:23.

10. Bilong wanem yumi mas bihainim stretpela tingting taim yumi makim rot yumi laik bihainim?

¹⁰ Ating sampela i no wanbel long dispela tok bilong Jeremaia. Ol i save ting olsem Jehova i bin wokim yumi bambai yumi yet i ken makim wanem rot yumi laik bihainim, olsem na em i no ken kros long yumi taim yumi mekim olsem. Tasol yumi no ken lusim tingting, pasin bilong makim wanem rot yumi laik bihainim em i wanpela presen, tasol tu, em i wanpela samting yumi mas mekim gutpela wok long en. God bai skelim yumi long ol tok na ol pasin yumi mekim. (Ro. 14:10) Jisas i tok: “Man em i save autim kain tingting i pulap long bel bilong en.” Na tu, em i tok: ‘Olkain samting i save kamap long tingting bilong man, em ol tingting nogut, kilim man i dai, pasin pamuk, bagarapim marit, stil, tok giaman long kot, na tok nogut.’ (Mt. 12:34; 15:19) Ol tok na ol pasin yumi mekim i save kamapim ples klia ol tingting i stap long bel bilong yumi. Ol i kamapim klia yumi wanem kain man o meri. Olsem na Kristen i gat gutpela tingting em i save askim Jehova long stiaim em long olgeta samting. Long dispela rot Jehova bai lukim olsem em i “bihainim ol lo” bilong Em na Em bai “mekim gutpela pasin” long em.​​—Sng. 125:4.

11. Yumi kisim wanem skul long lain Israel?

¹¹ Tingim ol samting i bin painim lain Israel. Taim dispela lain i wokim ol gutpela disisen na bihainim ol tok bilong Jehova, Jehova i lukautim ol. (Jos. 24:​15, 21, 31) Tasol planti taim ol i no mekim gutpela wok long dispela presen long makim rot ol i laik bihainim. Long taim bilong Jeremaia, Jehova i tok long ol olsem: “Ol i no harim tok na ol i no bihainim. Ol i tingting tasol long mekim pasin nogut, na ol i bikhet na bihainim laik bilong ol yet. Olsem na ol i no i go het. Nogat. Ol i wok long daunim ol yet.” (Jer. 7:​24-​26) Sori tru! Nogut yumi tu i bikhet na givim baksait long ol tok bilong Jehova na bihainim laik bilong yumi yet na yumi “no i go het”!

Bilong Bihainim Tok Bilong God, Yumi Mas Kisim Wanem Ol Pasin?

12, 13. (a) Wanem pasin i kirapim yumi long bihainim ol tok bilong Jehova? (b) Bilong wanem pasin bilong bilip em i bikpela samting?

¹² Pasin bilong laikim tru Jehova i save kirapim yumi long bihainim ol tok bilong em. (1 Jo. 5:3) Tasol olsem Pol i tok, i gat narapela samting tu yumi mas kisim. Em i tok: “Yumi bilip tasol long em na yumi wokabaut. Yumi no lukim em yet.” (2 Ko. 5:​6, 7) Bilong wanem pasin bilong bilip em i bikpela samting? Jehova i save bringim yumi long “ol gutpela rot,” tasol ol dispela rot i no bringim yumi long kisim mani o namba long dispela graun, nogat. (Sng. 23:3) Long dispela as, yumi mas bilip strong long ol gutpela blesing yumi inap kisim long mekim wok bilong Jehova. (Ritim 2 Korin 4:​17, 18.) Na pasin bilong bilip i helpim yumi long kisim tingting olsem sapos yumi gat ol samting bilong lukautim yumi, orait em inap long yumi.​​—1 Ti. 6:8.

¹³ Jisas i tok olsem, bilong man i ken lotu tru long God, em i mas daunim sampela laik bilong em yet, na bilong mekim olsem, em i mas i gat bilip. (Lu. 9:​23, 24) Sampela bilipman i bin daunim planti laik bilong ol yet na karim kain kain hevi​—ol i stap rabis, ol man i bel nogut long ol, daunim ol, na mekim nogut tru long ol. (2 Ko. 11:​23-​27; KTH 3:​8-​10) Strongpela bilip tasol i bin helpim ol long amamas na karim ol dispela hevi. (Jem. 1:​2, 3) Strongpela bilip i helpim yumi long bilip olsem olgeta taim pasin bilong bihainim tok bilong Jehova bai helpim yumi. Na em bai helpim yumi i go inap olgeta taim bihain. Yumi bilip tru olsem God bai mekim gut tru long ol man i stap gut long em​—ol hevi ol i karim i bilong i stap sotpela taim tasol.​​—Hi. 11:6.

14. Bilong wanem Hagar i mas daunim em yet?

¹⁴ Pasin daun tu bai helpim yumi long bihainim ol tok bilong Jehova. Pasin bilong Hagar, wokmeri bilong Sara, i kamapim klia dispela samting. Taim Sara i luksave olsem em i no inap kisim pikinini, em i givim Hagar long Abraham na Hagar i kisim bel. Bihain Hagar i bikhet long Sara. Dispela i mekim na Sara i “birua long Hagar na mekim nogut long em,” na Hagar i ranawe. Wanpela ensel bilong Jehova i bungim Hagar na i tokim em: “Yu go bek long Sarai na bihainim olgeta tok bilong en.” (Stt. 16:​2, 6, 8, 9) Ating Hagar i laik bai ensel i tokim em long mekim narapela samting. Bilong bihainim tok bilong ensel, em i mas lusim pasin bikhet bilong em. Hagar i daunim em yet na mekim olsem ensel i tokim em, na bihain em i karim pikinini man bilong em Ismael aninit long lukaut bilong papa bilong Ismael.

15. Stori long sampela kain taim long nau we yumi mas daunim yumi yet bilong bihainim tok bilong Jehova.

¹⁵ Bilong bihainim tok bilong Jehova, ating yumi tu i mas daunim yumi yet. Ating sampela i mas luksave olsem sampela amamas ol i save laikim tumas long mekim em samting Jehova i no laikim. O ating Kristen i bin mekim narapela i bel hevi na em i mas tok sori. O ating em i bin mekim wanpela popaia na em i mas tokaut long dispela. Tasol olsem wanem sapos wanpela i mekim bikpela sin? Orait em i mas daunim em yet na autim dispela sin long ol elda. O ating wanpela i raus long kongrigesen. Bilong kongrigesen i ken kisim em bek, em i mas daunim em yet na tanim bel na baut. Long ol kain taim olsem, tok bilong Sindaun 29:23 inap mekim gut bel bilong yumi: “Sapos man i hambak na litimapim nem bilong em yet, orait ol bai i daunim nem bilong en. Tasol man i daunim em yet bai i kisim biknem.”

Jehova i Save Stiaim Yumi Olsem Wanem?

16, 17. Yumi ken mekim wanem na bai ol tok bilong God long Baibel i ken stiaim gut yumi?

¹⁶ Nambawan samting God i mekim wok long en bilong stiaim yumi em Baibel. (Ritim 2 Timoti 3:​16, 17.) Bilong Baibel i ken helpim gut yumi, yumi no ken wet inap wanpela hevi i kamap na nau tasol yumi wok long painim sampela tok bilong Baibel bilong helpim yumi, nogat. Gutpela sapos yumi bihainim pasin bilong ritim Baibel long olgeta de. (Sng. 1:​1-3) Long dispela rot, yumi bai kisim save long ol tok i stap long Baibel. Tingting bilong yumi bai kamap wankain olsem tingting bilong God, na yumi bai redi taim ol hevi i painim yumi, maski ol i kamap long wanpela taim yumi no tingim.

¹⁷ Na tu, yumi mas tingim tingim ol tok yumi ritim long Baibel na beten long en. Taim yumi tingim, yumi mas wok long tingim olsem wanem yumi inap bihainim. (1 Ti. 4:​15) Taim bikpela hevi i painim yumi, yumi mas beten askim Jehova long helpim yumi long painim ol tok bilong soim rot long yumi. Spirit bilong Jehova bai helpim yumi long tingim bek ol gutpela stiatok yumi bin ritim long Baibel o long ol buk na nius bilong Baibel.​​—Ritim Song 25:​4, 5.

18. Jehova i save mekim wanem wok long lain brata Kristen bilong stiaim yumi?

¹⁸ Lain brata Kristen tu inap helpim yumi long bihainim ol tok bilong Jehova. Wanpela hap bilong dispela lain i mekim bikpela wok em “wokboi i gat gutpela tingting” wantaim Gavening Bodi i stap mausman bilong en. Dispela wokboi i save kamapim planti kaikai bilong spirit long ol buk na nius na ol miting na kibung. (Mt. 24:​45-​47; skelim Aposel 15:​6, 22-​31.) Na tu, insait long lain brata Kristen, i gat ol elda na ol narapela strongpela Kristen em ol inap helpim yumi na givim yumi sampela tok kaunsel bilong Baibel. (Ais. 32:1) Ol yangpela insait long ol famili Kristen ol i gat narapela samting tu bilong helpim ol. God i bin givim wok long ol papamama long ol i mas lainim ol pikinini long ol tok bilong em, na ol pikinini i mas larim papamama i soim rot long ol.​​—Ef. 6:​1-3.

19. Yumi wok long larim Jehova i stiaim yumi, olsem na yumi kisim wanem ol blesing?

¹⁹ Yes, Jehova i save mekim wok long kain kain rot bilong stiaim yumi, na i gutpela sapos yumi larim Jehova i stiaim yumi olsem. Taim lain Israel i stap gut long God, King Devit i tok: “Bipo ol tumbuna bilong mipela ol i bilip long yu. Ol i bilip na yu helpim ol na ol birua i no daunim ol. Ol i beten long yu na yu kisim bek ol long han bilong ol birua. Ol i bilip tru long yu na bilip bilong ol i no lus nating.” (Sng. 22:​3-5) Sapos yumi bilip na bihainim ol tok bilong Jehova bilong stiaim yumi, bilip bilong yumi tu bai i “no lus nating.” Samting yumi bilip na wetim, em bai kamap tru. Sapos yumi ‘putim laip bilong yumi long han’ bilong Jehova na yumi no bilip long save bilong yumi yet bilong helpim yumi, bai yumi kisim planti blesing long nau tu. (Sng. 37:5) Na sapos yumi wok long bihainim yet ol tok bilong Jehova na pas gut wantaim em, ol dispela blesing bai stap oltaim oltaim. King Devit i tok: “God i save laikim tumas stretpela pasin. Em i no inap larim ol manmeri bilong en i lus. Oltaim Bikpela i save lukautim ol manmeri i wokabaut stret. . . . Ol stretpela man bai i kisim graun God i givim ol, na bai ol i stap oltaim long en.”​​—Sng. 37:​28, 29.

Yu Inap Stori Long Dispela?

• Bilong wanem yumi bilip long ol tok bilong Jehova bilong stiaim yumi?

• Sapos yumi givim baksait long tok bilong Jehova, i olsem yumi mekim wanem?

• Long wanem kain taim Kristen i mas i gat pasin daun?

• Olsem wanem Jehova i save stiaim yumi long nau?

[Ol Piksa long pes 8]

Yu save larim Jehova i stiaim yu long olgeta samting long laip bilong yu?

[Piksa long pes 9]

Iv i givim baksait long wok bos bilong Jehova

[Piksa long pes 10]

Hagar i mas i gat wanem pasin na bai em inap bihainim tok bilong ensel?