Baibel i Tok Wanem?

Bilong Wanem Yumi Ken Larim Baibel i Stiaim Yumi?

“Spirit bilong God yet i bin kamapim olgeta tok i stap long buk bilong God. Na dispela tok em i gutpela samting tru bilong skulim yumi long tok tru na bilong stretim ol manmeri tingting bilong ol i no stret na bilong stretim wokabaut bilong yumi.”​—⁠2 Timoti 3:⁠16.

YU SAVE go long husat bilong stiaim laip bilong yu? Long nau i gat planti buk samting i stap bilong stiaim yumi long kain kain samting. Tasol planti manmeri i save lukim wanpela olpela buk, em Baibel, bilong stiaim ol.

Tasol long dispela taim nau yumi inap kisim save long planti samting long rot bilong kompiuta samting, olsem na planti man i ting olsem ol i no gat wok long lukim Baibel bilong stiaim ol. Sampela saientis na ol bikpela tisa i ting olsem tok bilong Baibel i no stret wantaim dispela taim nau yumi stap long en. Yu ting dispela tingting bilong ol i stret? Tingim, long nau i gat planti samting i olsem rot bilong stiaim ol man, olsem na i gat wanem as na ol man i ken larim Baibel i stiaim ol?

Ol Tok Bilong En i Tru

Wanpela taim Jisas Krais i malolo klostu long wanpela hul wara na em i toktok wantaim wanpela meri Samaria. Jisas i tokim em: “God em i Spirit. Na ol man i lotu long em, ol i mas lotu long strong bilong Holi Spirit na long pasin i tru.” (Jon 4:24) Ol dispela tok i soim olsem i gat wanpela pasin tasol bilong mekim lotu em God i orait long en. Bilong lotu tru long God, pasin bilong yumi long mekim lotu i mas stret wantaim ol tok God i bin kamapim long em yet na i stap long Baibel. Tok Bilong God em i tru olgeta.​—⁠Jon 17:⁠17.

Planti lotu i tok ol i bilip long Baibel, tasol ol i no skulim ol man long wankain samting. Olsem na planti man i paul long Baibel i tok wanem. Jisas em God, o em i Pikinini Bilong God? I gat laip bihain long yumi dai o nogat? Hel em wanpela ples tru we ol man i kisim pen oltaim bihain long ol i dai? Satan em wanpela man i stap tru? Wanem samting i makim olsem man em i wanpela Kristen tru? Pasin na tingting bilong yumi i bikpela samting long God o nogat? Sapos narapela i laikim tru narapela tasol ol i no marit, i orait long ol i mekim maritpasin? I gat rong long dring bia na wain samting?a Planti lotu i tok ol i lainim ol man long bekim bilong ol dispela askim. Tasol planti bilip bilong lotu i pait wantaim. I no inap long olgeta dispela bilip i stret.​—⁠Matyu 7:​21-23.

Orait, olsem wanem yu inap kisim stretpela save long God na long pasin em i laik yumi lotuim em long en? Sapos yu kisim save olsem yu gat wanpela bikpela sik na dokta i mas katim yu, bai yu mekim wanem? Sapos inap, yu bai wok strong long painim wanpela dokta em i save tru long mekim kain operesen olsem. Ating bai yu tingim ol namba samting em i gat bilong mekim dispela wok, na nau bai yu go lukim em na toktok wantaim em. Orait nau sapos yu bilip tru olsem em inap mekim dispela wok, bai yu larim em i katim yu. Maski ol arapela i gat narapela tingting, yu yet i save olsem dispela dokta inap mekim gut tru wok bilong em.

Long wankain pasin, sapos yu skelim gut ol tok bilong Baibel, yu inap kisim strongpela bilip long God na long Baibel. (Sindaun 2:​1-4) Taim yu wok long painim bekim bilong ol askim long wanem kain pasin bilong lotu God i orait long en, yu gat tupela rot. Yu ken larim ol tok na tingting bilong ol man i stiaim yu o yu ken tingim ol tok Baibel i mekim long dispela samting.

I Stret na i Helpim Tru Man

Taim yu skelim gut Baibel, bai yu lukim planti samting i kamapim klia olsem Baibel em “buk bilong God” na i helpim yumi.b (2 Timoti 3:​16, 17) Olsem: I gat planti tok profet long Baibel. Ol samting i bin kamap i makim olsem planti bilong ol dispela tok profet i kamap tru. (Aisaia 13:​19, 20; Daniel 8:​3-8, 20-22; Maika 5:⁠2) Maski Baibel i no buk bilong saiens, ol tok bilong Baibel i stret wantaim saiens. Em i stori tu long ol samting bilong helt na bilong dispela graun. Ol i bin raitim stori bilong ol dispela samting long dispela buk planti tausen yia paslain long ol saientis i kisim wankain save.​—⁠Wok Pris 11:​27, 28, 32, 33; Aisaia 40:⁠22.

Na tu, Baibel i helpim yumi long makim gut ol samting yumi mas mekim. Em i gat planti gutpela tok bilong helpim famili, ol samting bilong helt bilong yumi, bisnis, na ol arapela samting bilong olgeta wan wan de. Sindaun 2:​6, 7 i tok: “Bikpela yet em i as bilong gutpela tingting. Na em i save givim gutpela tingting na save long yumi. Em i save stiaim tingting bilong ol stretpela man.” Taim yu larim Baibel i stiaim tingting bilong yu, yu inap skulim gut tingting bilong yu long skelim gut “wanem ol pasin i gutpela na wanem ol pasin i nogut.”​—⁠Hibru 5:⁠14.

Na tu, Baibel i helpim yumi long save gut long as bilong laip. (Jon 17:3; Aposel 17:​26, 27) Em i kamapim as bilong ol hevi bilong nau. (Matyu 24:​3, 7, 8, 14; 2 Timoti 3:​1-5) Long Baibel God i soim yumi olsem wanem em bai rausim pasin nogut bilong dispela graun na helpim ol manmeri long kisim laip bilong i stap gut oltaim na i no gat sik.​—⁠Aisaia 33:24; Daniel 2:44; KTH 21:​3, 4.

Planti milion manmeri i luksave pinis olsem Baibel em i wanpela gutpela buk i gat gutpela savetingting long en bilong stiaim yumi. Lain bilong wokim dispela nius Kirap! i laik helpim yu long skelim gut dispela hap “Baibel i Tok Wanem?” i save kamap long dispela nius long olgeta 3-pela 3-pela mun. Taim yu mekim olsem, yu bai painim planti gutpela tok i kamapim klia olsem Baibel em i nambawan rot bilong stiaim laip bilong yu.

YU LAIK SAVE?

◼ God i orait long wanem kain pasin bilong mekim lotu long en?​—⁠Jon 4:⁠24.

◼ Yu mas mekim wanem bambai savetingting i kam long God i ken helpim yu?​—⁠Sindaun 2:​1-4.

◼ Long wanem rot Baibel em i gutpela samting bilong stiaim laip bilong yu?​—⁠Hibru 5:14.

[Ol Futnot]