Yu Tingim Yet?

Olsem wanem? Yu bin amamas long ritim ol tok bilong ol nupela Wastaua? Orait, yu ken traim bekim ol dispela askim i stap daunbilo:

• Wanem taim ol saveman i go lukim Jisas?

Wanpela Baibel i tok: “Ol saveman i no bin i go lukim Jisas long dispela nait mama i karim em na em i slip i stap long bokis kaikai bilong ol bulmakau, nogat, tasol ol wasman bilong sipsip tasol i bin i go lukim Jisas. Ol dispela saveman i go lukim Jisas sampela mun bihain.” Long dispela taim Jisas i bikpela liklik na em i stap long haus. (Mt. 2:​7-​11) Sapos ol dispela saveman i bin givim gol na ol narapela gutpela presen long Jisas long dispela nait mama i karim em, yu ting Maria bai givim 2-pela pisin tasol olsem ofa long tempel 40 de bihain?​—1/1, pes 31.

• Planti i ken mekim wanem bilong mekim i stap bilong ol i kamap gutpela moa?

Ating yu gat askim olsem, ‘Mi inap stretim ol samting long sindaun bilong mi na lusim sampela samting bilong skin?’ Amy i bin mekim olsem. Em i gat planti mani samting, tasol em i no amamas. Em i luksave olsem pasin bilong em long insait tru long wok skin i mekim na klostu em i lusim bilip. Olsem na em i tingting long putim wok bilong Kingdom i go pas long ol narapela samting, na em inap mekim wok painia inap liklik taim. Amy i tok, ‘Nau mi pilim wanpela kain amamas mi no bin kisim’ taim mi givim bel long wok mani samting.​—1/15, pes 19.

• Wanem samting inap helpim ol mama long kisim amamas?

Planti mama i save mekim wok mani. Sampela i mekim olsem bilong baim ol samting famili i mas i gat, na sampela i mekim wok mani bambai ol i gat mani bilong ol yet o ol i ken baim planti gutpela samting. Na sampela i wok mani, long wanem, ol i amamas long mekim wok bilong ol. Ol mama Kristen i gat bikpela wok long haus​—na moa yet long taim pikinini i liklik. Sampela i mekim wok haptaim tasol o lusim wok olgeta bilong ol i ken lukautim famili, na ol i kisim bikpela amamas long en.​—2/1, pes 28-​31.

• Long Matyu 24:​34, Jisas i toktok long wanem lain taim em i tok “ol manmeri bilong dispela taim”?

Taim Jisas i stori long “ol manmeri bilong dispela taim,” planti taim em i stori long ol man nogut o long ol samting nogut bilong ol. Tasol em i no toktok long samting nogut taim em i toktok wantaim ol disaipel bilong em, em klostu nau God bai makim ol long holi spirit. Ol yet inap kisim tingting long samting em Matyu 24:​32, 33 i stori long en. Olsem na i luk olsem taim Jisas i stori long “ol manmeri bilong dispela taim,” dispela i makim ol disaipel em God i bin makim ol long holi spirit, em ol i bin stap long taim bilong Jisas na long taim bilong yumi.​—2/15, pes 23-4.

• Olsem wanem Lo i olsem wanpela waspapa, olsem Galesia 3:24 i tok?

Planti taim ol i save trastim lapun wokboi nating bilong was long pikinini na bai i no gat samting nogut i painim em, na em i mas kirapim pikinini long mekim ol samting Papa i laik bai em i mas mekim. Long wankain pasin, Lo i lukautim ol Israel na bai ol i no ken kisim ol pasin nogut bilong ol narapela lain, olsem maritim ol haiden. Tasol olsem waspapa bilong pikinini, Lo i bilong stap sotpela taim tasol, Lo i stap inap long taim Krais i kam.​—3/1, pes 18-​21.

• Olsem Jems 3:17 i tok, yumi mas kamapim wanem ol pasin?

Bilong bihainim klinpela pasin, wantu yumi mas sakim ol samting nogut. (Stt. 39:​7-9) Yumi mas stap wanbel wantaim ol narapela tu, na abrusim pasin bilong kros na kirapim pait, o mekim ol samting i bagarapim pasin wanbel. Olsem na yumi wan wan i ken askim yumi yet: ‘Olsem wanem? Mi gat nem olsem man bilong kamapim pasin bilong stap wanbel, o man bilong bagarapim pasin bilong stap wanbel? Planti taim mi save tok pait wantaim ol narapela? Bel bilong mi i save bagarap hariap o planti taim mi yet i save bagarapim bel bilong ol narapela? O mi save redi long fogivim rong bilong narapela na mi no strong long ol narapela i mas bihainim ol pasin mi laikim?’​—3/15, pes 24-5.

• Bilong wanem Jisas i oraitim isi isi man aipas? (Mak 8:​22-​26)

Baibel i no stori stret long as bilong dispela samting. Tasol i luk olsem long dispela taim, taim Jisas i oraitim isi isi man aipas, em i givim sampela hap taim long man long lain long pasin bilong lukim ol samting. Dispela i kamapim pasin bilong Jisas long tingim tru dispela man aipas.​—4/1, pes 30.