Strong Bilong God i Kamap Klia Long Ol Sta

“Yupela lukluk i go antap long skai na lukim ol sta samting i stap antap. Husat tru i bin wokim ol? Em Bikpela tasol. Ol dispela samting i olsem lain ami bilong Bikpela. Em i save long namba bilong ol, na em i save long nem bilong wan wan bilong ol, na em i save kolim ol long nem bilong ol. Em i gat olgeta strong, olsem na i no gat wanpela bilong ol dispela samting inap lus.”​—AISAIA 40:26.

SAN bilong yumi em i wanpela sta i no bikpela olsem sampela sta. Tasol sais bilong en i winim sais bilong graun inap 330,000 taim. Ol sta i stap klostu long graun, planti bilong ol i liklik long san. Tasol sampela sta, olsem sta ol i kolim V382 Cygni, ol i bikpela moa na i winim san bilong yumi inap 27 taim.

Olsem wanem long hat bilong san? Orait tingim olsem wanpela paia i stap longwe inap 15 kilomita samting na yu inap pilim hat bilong en, ating em wanpela bikpela paia stret. Orait san i stap longwe long graun inap olsem 150 milion kilomita. Tasol long taim bilong san, hat bilong en inap kukim skin bilong yumi! Yumi kirap nogut long dispela, long wanem, liklik hap tru bilong hat bilong san i save kamap long graun. Tasol dispela liklik hap tru bilong hat bilong san em inap mekim na ol samting i save stap laip long graun.

Ol saientis i tok, hat bilong san bilong yumi i bikpela tru na em inap helpim 31 trilion planet kain olsem graun bilong yumi long i stap. O yumi ken tok, sapos ol inap bungim olgeta pawa bilong san inap wanpela seken tasol, Amerika “bai i gat pawa inap long 9 milion yia.”​—Space Weather Prediction Center (SWPC) Web site.

Hat bilong san i save kamap long insait stret bilong en​—em kain olsem traipela masin nuklia i save brukbrukim ol atom wantaim na kamapim bikpela pawa moa yet. San i traipela nogut tru na insait tru bilong en i strong tumas, olsem na pawa i save kamap insait long en i lusim planti milion yia bilong kam antap long san. SWPC Web site i tok: “Sapos long nau San i pinis long kamapim pawa, bai Graun i no inap pilim tumas dispela samting i go inap 50 milion yia!”

Orait nau tingim dispela: Sapos long nait yu lukluk i go antap long skai taim i no gat klaut, bai yu lukim planti tausen sta, na olgeta wan wan i kamapim bikpela pawa tru, wankain olsem san bilong yumi. Na ol saientis i ting i gat planti bilion bilion sta i stap!

Orait ol dispela sta i bin kamap olsem wanem? Long nau, planti saveman i ting i gat wanpela samting i bin mekim na ol i no klia long en, na ol sta samting bilong antap i bin kamap wantu tasol, inap olsem 14 bilion yia i go pinis. Baibel i tok tasol olsem: “Bipo bipo tru God i mekim kamap skai na graun na olgeta samting i stap long en.” (Stat 1:1) Tru tumas yumi ken tok, Man i bin wokim ol dispela sta i save kamapim bikpela pawa moa yet, em “i gat olgeta strong.”​—Aisaia 40:26.

Jehova i Yusim Strong Bilong Em

God Jehova i save mekim wok long strong bilong em bilong helpim na strongim ol manmeri i mekim laik bilong em. Olsem: Aposel Pol i bin taitim bun tru long skulim ol man long God. Pol em i man bilong graun tasol, tasol em i bin mekim planti gutpela wok, maski ol man i birua tru long em. Olsem wanem em inap mekim? Em yet i tokaut olsem em i bin kisim “bikpela strong” long God.​—2 Korin 4:​7-9.

Na God Jehova i bin mekim wok long strong bilong em bilong bagarapim ol man i bikhet na kalapim ol stretpela lo bilong em. Jisas Krais i bin stori long bagarap bilong Sodom na Gomora na Bikpela Tait long taim bilong Noa bilong soim olsem Jehova i save mekim wok long bikpela strong bilong em long bagarapim ol man nogut tasol. Jisas i bin tok profet olsem klostu nau Jehova bai mekim wok gen long strong bilong em bilong bagarapim ol man i givim baksait long ol lo bilong Em.​—Matyu 24:​3, 37-​39; Luk 17:​26-​30.

Dispela i Mekim Wanem Long Yu?

Taim yu tingim gut long bel dispela bikpela strong bilong God i kamap ples klia long ol sta, ating bai yu gat wankain tingting olsem King Devit, em i bin tok: “Taim mi lukim skai yu bin wokim, na taim mi lukim mun na olgeta sta yu bin putim i stap antap, mi save ting olsem. Mipela man i wanem samting na yu save tingting long mipela? Mipela i samting nating. Bilong wanem yu save was gut long mipela?”​—Song 8:​3, 4.

Tru tumas, taim yumi skelim yumi yet wantaim traipela ples antap em ol sta i pulap tru long en, yumi pilim tru olsem yumi samting nating tasol. Tasol nogut yumi tingim bikpela strong bilong God na dispela i daunim yumi olgeta. Jehova i bin kirapim profet Aisaia long raitim dispela tok i mekim gut bel bilong yumi: “Bikpela i save strongim ol man i no gat strong, na taim bun bilong ol i slek pinis, em i save mekim ol i stap strong. Strong bilong ol strongpela yangpela man i save slek na pinis. Tasol ol manmeri i bilip long Bikpela na i wetim em i helpim ol, ol bai i stap strong oltaim. Na bai ol i flai olsem ol tarangau. Bai ol i ran na ol i no inap sotwin, na bai ol i wokabaut na ol i no inap les.”​—Aisaia 40:​29-​31.

Sapos yu gat laik long mekim laik bilong God, yu ken bilip tru olsem em bai givim holi spirit long yu bilong strongim yu long mekim olsem. Tasol yu mas askim em long givim long yu. (Luk 11:13) Long rot bilong helpim God i save givim, yu inap karim olgeta kain hevi i painim yu na kisim strong bilong mekim ol samting i stret.

[Rait long pes 7]

Long rot bilong helpim God i save givim, yu inap kisim strong long mekim ol samting i stret

[Ol Piksa long pes 7]

Kirap long han kais antap i go long han sut: Whirlpool galaksi, lain sta Pleiades, Orion Nebula, Andromeda galaksi

[Ol Piksa long pes 7]

Sais bilong san i winim sais bilong graun inap 330,000 taim

[Ol Piksa Kredit Lain long pes 7]

Pleiades: NASA, ESA and AURA/Caltech; all others above: National Optical Astronomy Observatories