Go Klostu Long God
Em i Pilim Pen Yumi Karim
PASIN bilong pilim pen na hevi bilong narapela long bel bilong yumi em i wanpela gutpela pasin tru. God Jehova em i save kamapim moa yet dispela pasin. Em yet i save pilim pen na hevi bilong ol manmeri bilong em. Olsem wanem yumi save long dispela? Ol tok na wok Jisas i mekim taim em i stap long graun dispela i kamapim long ples klia gutpela pasin bilong Jehova long pilim tru hevi bilong ol man. (Jon 5:19) Tingim samting i bin kamap em Baibel i stori long en long Jon 11:33-35.
Taim pren bilong Jisas, em Lasarus, i dai, Jisas i go long ples bilong Lasarus. Ol susa bilong Lasarus em Marta na Maria ol i krai sori i stap. Jisas i laikim tumas dispela famili. (Jon 11:5) Em bai mekim wanem? Baibel i tok: “Jisas i lukim Maria i krai, na em i lukim ol Juda i kam wantaim Maria, ol tu i krai. Na bel bilong en i sori tru na em tu i laik krai. Na em i tok, ‘Yupela i bin putim em we?’ Na ol i tokim em, ‘Bikpela, yu kam lukim.’ Na Jisas i krai.” (Jon 11:33-35) Bilong wanem Jisas i krai? Tru, gutpela pren bilong em Lasarus i dai, tasol Jisas bai kirapim em bek. (Jon 11:41-44) Orait, olsem wanem? I gat narapela samting tu i mekim na Jisas i krai?
Lukim gen tok bilong ves i stap antap. Taim Jisas i lukim Maria na ol lain i stap wantaim em ol i krai, “bel bilong en i sori tru na em tu i laik krai.” Tok Grik ol i bin raitim Baibel long en bipo, dispela tok i makim bikpela bel hevi tru.a Jisas i pilim tru long bel samting em i lukim. Dispela bikpela bel hevi Jisas i pilim i mekim na em i krai. Tru tumas, Jisas i pilim tru pen bilong ol narapela long bel bilong em. Olsem wanem? Sampela taim yu krai, long wanem, yu lukim wanpela yu laikim tumas i krai?—Rom 12:15.
Pasin bilong Jisas long pilim tru hevi bilong ol man i helpim yumi long kliagut long pasin bilong Papa bilong em, Jehova. Tingim, Jisas i bihainim tru ol pasin bilong Papa bilong em olsem na i stret em i tok: “Man i lukim mi, em i lukim Papa.” (Jon 14:9) Olsem na taim yumi ritim olsem “Jisas i krai,” yumi inap bilip tru olsem Jehova yet i save pilim pen em ol man i lotuim em i pilim. Ol arapela man bilong raitim Baibel ol i kamapim ples klia tu dispela samting. (Aisaia 63:9; Sekaraia 2:8, King James Version) Tru tumas, Jehova em i gutpela God tru!
Pasin bilong pilim tru hevi bilong narapela dispela i save pulim man. Taim yumi bel hevi o narapela hevi i daunim yumi, yumi save go klostu long man i save gut na i pilim tru bel hevi bilong yumi. Olsem na taim yumi save olsem Jehova, em God i gat pasin sori, i save pilim tru hevi bilong yumi na i kliagut long as na yumi krai, dispela i save pulim yumi i go klostu em!—Song 56:8.
[Futnot]
a Tok Grik ol i tanim olsem “krai,” planti taim em i makim “krai isi,” tasol tok ol i tanim bilong makim krai bilong Maria na ol arapela inap makim “krai strong.”