Larim Jehova i Bosim Yu

“Sapos yumi laikim tru God, orait yumi save bihainim ol lo bilong en. Na ol lo bilong en i no givim hevi long yumi.”​—1 JO. 5:3

1, 2. (a) Wai na planti manmeri long nau ol i les long larim narapela i bosim ol? (b) Yu ting ol man husat i tok ol i no gat man i bosim ol, tru tru ol i bosim wokabaut bilong ol yet? Stori long dispela.

PLANTI manmeri long nau ol i no laik larim wanpela i bosim ol. Ol i save tok olsem, “No gat man i bosim mi.” Tasol yu ting tru tru ol i bosim wokabaut bilong ol yet? Nogat. Ol i save bihainim wankain tingting bilong planti arapela husat i “wokabaut wankain olsem ol man bilong dispela graun.” (Ro. 12:2) Olsem aposel Pita i tok, ol i stap olsem “wokboi nating bilong pasin bilong bagarap.” (2 Pi. 2:19) Ol i wokabaut “long pasin nogut bilong dispela graun.” Na ol i “bihainim pasin bilong hetman bilong ol spirit nogut i stap long skai,” em Satan.​—Ef. 2:2.

² Wanpela man bilong raitim buk i hambak na tok: “Mi no larim papamama o wanpela pris o pasto . . . o Baibel i stiaim tingting bilong mi long wanem samting i stret.” Tru, sampela i save mekim wok nogut long namba bilong ol, olsem na yumi no laik bihainim tok bilong ol. Tasol yu ting i stret long sakim olgeta wok bos? Bilong bekim dispela askim yumi ken ritim ol stori bilong ol samting nogut em niuspepa i stori long en. Sori tru, long nau ol man i mas i gat sampela samting bilong stiaim ol, tasol klostu olgeta man i les long harim tok bilong stiaim ol.

Tingting Bilong Yumi Long Wok Bos Bilong Narapela

3. Ol Kristen long taim bilong ol aposel i bin mekim wanem bilong soim olsem ol i no bihainim nating wok bos bilong ol man?

³ Tingting bilong yumi ol Kristen i no wankain olsem ol man bilong dispela graun. Tasol i no olsem yumi bihainim nating ol samting ol man i tokim yumi long mekim. Nogat. Sampela taim yumi sakim tok bilong sampela man, maski ol i gat namba long bosim yumi. Dispela i bin kamap long ol Kristen long taim bilong ol aposel. Maski hetpris na ol man bilong Sanhedrin i tambuim ol aposel long autim tok, ol aposel i no pret na bihainim tok bilong ol. Ol i no lusim stretpela pasin bilong bihainim wok bos bilong ol man.​—Ritim Aposel 5:​27-​29.

4. Wanem ol eksampel i stap long Ol Skripsa Hibru i soim olsem planti manmeri bilong God i bin bihainim rot ol arapela i no laik bihainim?

⁴ Planti wokman bilong God paslain long taim bilong Krais i bin bihainim wankain pasin. Wanpela eksampel em Moses. Em i “no laik bai ol i kolim em pikinini bilong pikinini meri bilong king . . . Em i ting, mobeta em i kisim hevi wantaim ol lain bilong God” maski dispela i mekim na “King bilong Isip i belhat long em.” (Hi. 11:​24, 25, 27) Josep i strong long sakim ol traim meri bilong Potifar i putim long em maski em i save dispela meri i gat namba na em inap mekim nogut long em. (Stt. 39:​7-9) Daniel “i no laik kaikai na dring ol samting ol i givim em long haus bilong king. . . . Nogut em i . . . kamap doti long ai bilong God.” Em i mekim olsem maski i hatwok long namba wan ofisa bilong king long orait long tingting bilong em. (Dan. 1:​8-​14) Ol kain eksampel olsem i kamapim klia olsem ol manmeri bilong God long bipo ol i bin sanap strong na mekim pasin i stret, maski wanem samting i painim ol long bihain. Ol i no bin bihainim tok bilong ol man i ken amamas long ol. Nogat. Yumi tu i mas mekim olsem.

5. Olsem wanem tingting bilong yumi long wok bos i no wankain olsem tingting bilong ol man bilong dispela graun?

⁵ Ol man i no ken ting olsem pasin bilong sanap strong na no ken pret i makim olsem yumi bikhet; na tu, yumi no bikhet bilong soim olsem yumi no wanbel long samting gavman i mekim. Nogat. Yumi strong long stap daun long wok bos bilong Jehova, bilong ol man, nogat. Disisen yumi mas mekim taim lo bilong ol man i pait wantaim lo bilong God i no hatwok long makim. Olsem ol aposel long bipo, yumi mas bihainim tok bilong God tasol, tok bilong ol man, nogat.

6. Bilong wanem i gutpela long bihainim ol lo bilong Jehova long olgeta taim?

⁶ Wanem samting i helpim yumi long daun long wok bos bilong God? Yumi wanbel long tok i stap long Sindaun 3:​5, 6: “Yu mas bilip strong long Bikpela. Yu no ken ting save bilong yu yet inap helpim yu. Long olgeta samting yu mekim, yu mas tingting strong long Bikpela na yu mekim, na em bai i soim yu stretpela rot long bihainim.” Yumi bilip olsem olgeta samting God i tokim yumi long mekim bai helpim yumi long bihain. (Ritim Lo 10:​12, 13.) Jehova i stori long em yet long ol Israel olsem “mi save skulim yupela na soim yupela long ol stretpela pasin yupela i mas bihainim na bai yupela i stap gut.” Na bihain em i tok: “Sapos yupela i bin harim tok bilong mi, orait nau yupela inap i stap gut na oltaim laip bilong yupela bai i pulap long amamas, olsem wara i ran oltaim na i no save pinis. Na stretpela pasin bilong yupela bai i kamap strong oltaim olsem solwara i save bruk long nambis.” (Ais. 48:​17, 18) Yumi bilipim ol dispela tok. Yumi bilip tru olsem taim yumi bihainim ol lo bilong God oltaim dispela bai helpim gut yumi.

7. Yumi mas mekim wanem sapos yumi no kliagut long wanpela lo em Tok Bilong God i kamapim?

⁷ Yumi save larim Jehova i bosim yumi na yumi bihainim tok bilong em maski yumi no kliagut olgeta long as bilong wanpela samting Baibel i tokim yumi long mekim. Dispela i no olsem yumi bilip nating, nogat; dispela em pasin bilong bilip tru. Dispela i makim olsem long bel yumi trastim Jehova na yumi save olsem em bai mekim ol samting bilong helpim gut yumi. Pasin bilong yumi long bihainim tok i soim olsem yumi laikim em tru. Aposel Jon i tok: “Sapos yumi laikim tru God, orait yumi save bihainim ol lo bilong en.” (1 Jo. 5:3) Tasol i gat narapela samting long pasin bilong yumi long bihainim tok yumi mas tingim.

Skulim Tingting Bilong Yumi

8. Olsem wanem pasin bilong “traim planti taim long skelim wanem ol pasin i gutpela na wanem ol pasin i nogut” i insait long pasin bilong larim Jehova i bosim yumi?

⁸ Baibel i tok yumi mas wok long “traim planti taim long skelim wanem ol pasin i gutpela na wanem ol pasin i nogut, na nau [yumi] save gut pinis na tingting bilong [yumi] i klia.” (Hi. 5:14) Olsem na i no olsem yumi bihainim nating ol lo bilong God. Nogat. Yumi laik tingim ol lo bilong Jehova na “skelim wanem ol pasin i gutpela na wanem ol pasin i nogut.” Yumi laik kliagut long savetingting bilong Jehova, bai yumi ken mekim wankain tok olsem man bilong raitim song, em i tok: “Lo bilong yu i stap insait long bel bilong mi.”​—Sng. 40:8.

9. Olsem wanem bel na tingting bilong yumi i ken wanbel long tok bilong Jehova? Bilong wanem i bikpela samting long yumi mekim olsem?

⁹ Bilong laikim tumas ol lo bilong God olsem man bilong raitim song i bin laikim, yumi mas tingim tingim long bel ol tok bilong Baibel yumi ritim. Kain olsem: Taim yumi kisim save long wanpela samting Jehova i laik bai yumi mekim, yumi ken kamapim ol kain askim olsem: ‘Bilong wanem dispela lo o stiatok em i gutpela? Bilong wanem i gutpela mi bihainim dispela tok? Wanem samting nogut i bin painim ol man husat i no bihainim dispela tok bilong God?’ Taim bel na tingting bilong yumi i wanbel wantaim tok bilong Jehova, ol disisen yumi mekim bai i stret wantaim laik bilong em. Yumi inap “save gut long laik bilong Bikpela” na bihainim tok bilong em. (Ef. 5:17) Sampela taim dispela i hatwok long mekim.

Satan i Wok Long Daunim Wok Bos Bilong God

10. Wanem wanpela samting Satan i wok strong long en bilong daunim wok bilong God long bosim ol man?

¹⁰ Inap longpela taim tru Satan i bin wok long daunim wok bos bilong God. Em i laik bosim wokabaut bilong em yet na em i kamapim dispela pasin long kain kain rot. Tingim ol man i no save rispektim lo bilong God long marit. Sampela i sindaun nating wantaim narapela, na sampela i painim rot bilong brukim marit bilong ol. Ating ol dispela manmeri i wanbel long tok bilong wanpela meri i gat nem long insait long ol muvi samting, em i tok: “Ol manmeri marit i no inap stap gut long poroman marit bilong ol.” Em i tok moa olsem: “Mi no save long wanpela man o meri husat i save stap gut long poroman marit bilong ol o i gat laik long i stap gut long ol.” Wanpela man i gat nem long insait long ol muvi, husat i no bin stap gut wantaim ol meri em i bin prenim em i tok olsem: “Mi no ting em i pasin bilong yumi manmeri long i stap wantaim wanpela poroman i go inap yumi i dai.” I gutpela yumi askim yumi yet olsem, ‘Mi save daun long tok bilong Jehova long ol samting bilong marit? O tingting bilong ol man bilong graun olsem marit i no bilong i stap oltaim i bin paulim tingting bilong mi?’

11, 12. (a) Wanem samting i mekim na em i hatwok long ol yangpela long larim Jehova i bosim ol? (b) Kamapim wanpela ekspiriens i soim olsem em i longlong pasin long sakim ol lo na stiatok bilong Jehova.

¹¹ Olsem wanem? Yu wanpela yangpela insait long oganaisesen bilong Jehova? Sapos olsem, orait ating Satan inap wok strong tru long kirapim yu long ting olsem wok bos bilong Jehova i no gutpela samting bilong helpim yu. ‘Ol laik i save kamap long bel bilong ol yangpela’ wantaim pasin bilong ol arapela yangpela long pulim yu long bihainim ol inap mekim na yu inap kisim tingting olsem ol lo bilong God i hatwok tumas long bihainim. (2 Ti. 2:22) No ken larim dispela samting i painim yu. Wok long kliagut olsem em savetingting long bihainim ol lo bilong God. Olsem: Baibel i tok “stap longwe long pasin pamuk.” (1 Ko. 6:18) Orait, askim yu yet: “Bilong wanem em i savetingting long bihainim dispela lo? Taim mi bihainim dispela lo dispela bai helpim mi olsem wanem? Ating yu save long sampela husat i bin sakim tok bilong God na bikpela hevi i painim ol. Ol i save amamas long nau? Sindaun bilong ol i gutpela moa long nau, winim sindaun bilong ol taim ol i stap gut wantaim oganaisesen bilong Jehova? Ol i painim pinis rot bilong i stap amamas em ol arapela wokboi bilong Jehova i no painim?​—Ritim Aisaia 65:14.

¹² Tingim tok bilong wanpela Kristen, nem bilong em Sharon: “Mi bin sakim lo bilong Jehova na long dispela as mi kisim dispela sik nogut AIDS. Planti taim mi save tingim ol amamas mi bin kisim long ol yia mi bin mekim wok bilong Jehova.” Em i luksave olsem em i longlong pasin long brukim ol lo bilong Jehova na mobeta em i bin luksave olsem ol i bikpela samting tru bilong helpim em. Ol lo bilong Jehova i stap bilong lukautim yumi. Sharon i bin i dai 7-pela wik bihain long em i mekim dispela tok i stap antap. Samting nogut i painim Sharon i kamapim klia olsem Satan i no gat wanpela gutpela samting long givim ol man husat i laik insait long dispela pasin nogut bilong nau. Satan, em i “papa tru bilong pasin bilong tok giaman,” em i save mekim planti tok promis, tasol em i no save truim ol, wankain olsem em i no truim promis em i bin mekim long Iv. (Jo. 8:44) Tru tumas, nambawan rot long bihainim, em long larim Jehova i bosim yu.

No Ken Bihainim Laik Bilong Bosim Yumi Yet

13. Yumi no ken bihainim laik bilong bosim yumi yet long wanem samting?

¹³ Bilong larim Jehova i bosim yumi, yumi no ken bihainim laik bilong bosim yumi yet. Pasin hambak inap kirapim yumi long ting olsem yumi no gat wok long narapela i stiaim yumi. Ating yumi sakim tok bilong ol brata i go pas long lain bilong God. God i bin kamapim wanpela rot we wanpela lain wokboi i gat gutpela tingting i save givim kaikai bilong spirit long yumi long taim stret. (Mt. 24:​45-​47) Long pasin daun yumi mas luksave olsem, long dispela rot Jehova i save lukautim lain bilong em long nau. Yumi laik bihainim pasin bilong ol gutpela aposel. Taim sampela i no laik bihainim moa Jisas, Jisas i askim ol aposel: “Ating yupela tu i laik lusim mi na i go?” Pita i bekim tok olsem: “Bikpela, bai mipela i go long husat? Tok bilong yu tasol i save givim laip i stap gut oltaim oltaim.”​—Jo. 6:​66-​68.

14, 15. Bilong wanem yumi mas bihainim pasin daun na daun long tok bilong Baibel?

¹⁴ Bilong larim Jehova i bosim yumi, yumi mas bihainim tok em Baibel i as bilong en. Olsem: Lain wokboi i gat gutpela tingting i wok long tok lukaut long yumi olsem ‘ai bilong yumi i mas op i stap, na tingting bilong yumi i mas klia.’ (1 Te. 5:6) Dispela tok i stret tru long nau long taim bilong las de taim planti manmeri i “laikim ol yet tasol, na ol . . . i laikim tumas long kisim mani.” (2 Ti. 3:​1, 2) Yu ting kain tingting inap pulim yumi? Yes. Ol samting bilong graun yumi laik kisim inap mekim na yumi no tingting long pasin bilong yumi long pas gut wantaim God, o yumi kisim pasin bilong tingim tumas mani kago samting. (Lu. 12:​16-​21) Olsem na em i savepasin long bihainim tok bilong Baibel na abrusim pasin bilong tingim yumi yet tasol, em pasin planti man hia long graun Satan i bosim i save bihainim!​—1 Jo. 2:16.

¹⁵ Lain wokboi i gat gutpela tingting i save givim yumi ol gutpela tok bilong Baibel long rot bilong ol elda bilong ol kongrigesen. Baibel i tokim yumi olsem: “Ol lida bilong yupela ol i laik helpim yupela, na ol i save was long yupela oltaim. Na bihain bai ol i mas tokim God long olgeta wok ol i bin mekim. Olsem na yupela i mas bihainim tok bilong ol na i stap aninit long ol. Sapos yupela i mekim olsem, orait ol bai i amamas na mekim wok bilong ol, na ol bai i no inap bel hevi. Sapos ol i bel hevi long lukautim yupela, dispela bai i no helpim yupela.” (Hi. 13:17) Yu ting dispela i makim olsem ol elda bilong kongrigesen i no inap popaia? Nogat! God i lukim olgeta pasin kranki bilong ol, em ol pasin kranki ol man i no inap lukim. Tasol maski i olsem, em i laik bai yumi aninit long ol. Taim yumi bihainim tok bilong ol elda, maski ol i no gutpela olgeta, dispela i kamapim klia olsem yumi larim Jehova i bosim yumi.

Pasin Daun Em i Bikpela Samting

16. Olsem wanem yumi ken soim rispek long Jisas olsem em i Het bilong kongrigesen Kristen?

¹⁶ Oltaim yumi mas tingim, Jisas em i Het tru bilong kongrigesen. (Kl. 1:18) Dispela em i wanpela as na yumi bihainim pasin daun na daun long ol elda na yumi “belgut tru long ol na laikim ol tru.” (1 Te. 5:​12, 13) Ol elda bilong kongrigesen inap soim olsem ol tu i gat pasin daun taim ol i kamapim tingting bilong God long kongrigesen, i no tingting bilong ol yet. Ol i “bihainim pasin i stret olsem buk bilong God i tok long en, na [ol] i no ken kalapim dispela tok” bilong strongim tingting bilong ol yet.​—1 Ko. 4:6.

17. Bilong wanem pasin bilong laik long kisim biknem o namba em inap bagarapim man?

¹⁷ Olgeta long kongrigesen i mas was gut, no ken trai hat long mekim ol man i givim biknem long ol. (Snd. 25:27) I luk olsem dispela samting i bin pundaunim wanpela disaipel em aposel Jon i bin bungim. Jon i tok: “Tasol Diotrefes em i laik i stap namba wan bilong ol, na em i no save harim tok bilong mipela. Olsem na sapos mi kam long yupela, mi bai tokaut long dispela pasin em i mekim. Em i save toktok nabaut long mipela long ol kain kain tok nogut.” (3 Jo. 9, 10) Dispela inap skulim yumi long nau. Sapos yumi luksave olsem yumi gat laik o tingting long kisim biknem o namba, orait yumi mas rausim. Baibel i tok: “Pasin bilong hambak na litimapim nem bilong yu yet bai i mekim yu i pundaun na bagarap.” Ol man i larim Jehova i bosim ol i mas sakim pasin bilong litimapim nem bilong ol yet, long wanem, dispela pasin bai mekim ol i kisim bikpela sem.​—Snd. 11:2; 16:18.

18. Wanem samting bai helpim yumi long larim Jehova i bosim yumi?

¹⁸ Tru tumas, yumi mas sakim pasin bilong bosim wokabaut bilong yumi yet na kisim pasin bilong larim Jehova i bosim yumi. I gutpela long tingim tingim long bel gutpela wok yumi holim olsem wokman bilong Jehova. Yumi stap wantaim lain bilong God na dispela i makim olsem long rot bilong holi spirit em i bin bringim yumi i kam long em. (Jo. 6:44) No ken ting pasin bilong yumi long pas gut wantaim God em i liklik samting. Long olgeta samting yumi save mekim yumi mas wok long soim olsem yumi sakim pasin bilong bosim yumi yet na yumi amamas long larim Jehova i bosim yumi.

Yu Inap Tingim?

• Bilong larim Jehova i bosim yumi, yumi mas mekim wanem?

• Olsem wanem pasin bilong skulim tingting bilong yumi i insait long pasin bilong larim Jehova i bosim yumi?

• Satan i save mekim wanem bilong daunim wok bos bilong God?

• Bilong larim Jehova i bosim yumi, bilong wanem pasin daun em i bikpela samting?

[Piksa long pes 18]

“Mipela i mas bihainim tok bilong God tasol. Mipela i no ken bihainim tok bilong ol man”

[Piksa long pes 20]

Em i savepasin long bihainim ol lo bilong God long olgeta taim