Yu Redi Long Tokaut Long Bilip Bilong Yu?
OLSEM WANEM? I gat wanpela taim we samting i kamap na yu bin pilim olsem yu mas tokaut long bilip bilong yu? Tingim samting i bin painim Susana, wanpela yangpela sista long Paragwai em i gat 16 krismas. Long wanpela lesen long klas bilong em long haiskul, wanpela sumatin i tok olsem ol Witnes Bilong Jehova i no bilip long “Olpela Testamen,” Jisas Krais, na Maria. Sampela i tok ol Witnes ol i wanpela lain bilong strong tumas long bihainim lotu bilong ol, na maski ol bai dai, ol i no save kisim ol helpim long dokta. Sapos dispela samting i bin painim yu, bai yu mekim wanem?
Susana i beten long Jehova na apim han bilong em. Klostu lesen i laik pinis olsem na em i askim tisa bilong em long larim em i kamapim wanpela ripot long klas long ol bilip bilong em olsem wanpela Witnes Bilong Jehova. Tisa i amamas na tok orait. Insait long tupela wik Susana i redim ol tok bilong mekim long klas, na em i mekim wok long buklet Ol Witnes Bilong Jehova—Ol i Husat? Ol i Bilip Long Wanem Samting?
De bilong mekim tok i kamap. Susana i stori long olsem wanem ol i kisim dispela nem Witnes Bilong Jehova. Em i stori tu long bilip bilong yumi long gutpela samting bai kamap bihain, na as na yumi no kisim blut. Na bihain em tokim ol sumatin long kamapim ol askim. Planti sumatin i apim han bilong ol. Tisa i amamas long yangpela meri i kolim ol tok bilong Baibel bilong bekim ol askim.
Wanpela sumatin i tok: “Wanpela taim mi i go insait long wanpela Haus Kingdom, na i no gat wanpela imis i stap insait.” Tisa hia i laik save bilong wanem na i no gat ol imis insait long Haus Kingdom. Susana i ritim Song 115:4-8 na Kisim Bek 20:4. Tisa i kirap nogut na i tok: “Olsem wanem na ol imis i pulap long ol haus lotu bilong mipela tasol Baibel i tok nogat long en?”
Ol i toktok i go inap 40 minit olgeta. Taim Susana i askim ol sumatin olsem ol i laik lukim vidio No Blood—Medicine Meets the Challenge, olgeta i tok yes. Olsem na tisa i makim taim long neks de. Bihain long vidio, Susana i stori long ol narapela narapela marasin samting em sampela Witnes Bilong Jehova i orait long mekim wok long en, na ol i no kisim blut. Tisa i stori long dispela samting na i tok: “Mi no bin save olsem i gat planti narapela narapela marasin samting bilong yusim na no gat wok long blut; na mi no bin save olsem planti gutpela samting inap kamap taim man i no kisim blut. Na olsem wanem? Ol dispela samting em bilong ol Witnes Bilong Jehova tasol?” Taim em i harim olsem ol dispela helpim i bilong olgeta manmeri, em i tok: “Neks taim ol Witnes Bilong Jehova i kam long haus bilong mi, mi bai toktok wantaim ol.”
Pastaim Susana i bin ting olsem em bai stori inap 20 minit tasol, tasol nogat, ol i toktok inap 3-pela aua olgeta. Wanpela wik bihain, ol arapela sumatin i mekim tok long bilip bilong ol. Long pinis bilong tok, ol i givim planti askim long ol, tasol ol sumatin i insait long dispela tok ol i no inap tokaut long bilip bilong ol. Tisa i askim ol: “Olsem wanem na yupela i no inap tokaut long bilip bilong yupela olsem wanklas bilong yupela em wanpela Witnes Bilong Jehova i bin mekim?”
Ol i tok: “Ol Witnes i save stadi long Baibel. Mipela i no save stadi.”
Tisa i lukluk long Susana na i tok: “Yu stadi gut tru long Baibel na wok strong long bihainim ol tok bilong en. Mi amamas long yu mekim olsem.”
Susana inap long pasim maus i stap. Tasol nogat, taim em i tokaut long bilip bilong em, em i bihainim gutpela pasin bilong liklik meri Israel em ol Siria i bin kisim em i go kalabus. Dispela yangpela meri i stap long haus bilong jeneral bilong ami bilong Siria, em Naman, husat i gat wanpela sik nogut tru. Yangpela meri Israel i tokaut long bilip bilong em long bosmeri bilong em na i tok: “I gutpela sapos man bilong yu i go long dispela profet i stap long Samaria. Dispela profet inap long mekim sik bilong en i orait gen.” Dispela yangpela meri i pilim olsem em i mas tokaut long trupela God. Dispela i opim rot na bikman bilong em, Naman, i lotuim Jehova.—2 Kin. 5:3, 17.
Na olsem tasol, Susana i pilim olsem em i mas tokaut long Jehova na lain bilong Em. Taim Susana i tokaut long bilip bilong em taim ol i sutim tok long en, Susana i bihainim dispela tok bilong Baibel: “Long bel bilong yupela, yupela i mas putim Krais wanpela em i stap Bikpela bilong yupela. Na sapos ol i askim yupela long as bilong dispela gutpela samting yupela i wetim i stap, orait yupela i mas redi oltaim long bekim tok long ol.” (1 Pi. 3:15) Olsem wanem? Yu redi long autim bilip bilong yu na tingim ol samting yu ken mekim taim ol rot i op?
[Piksa long pes 17]
Ol dispela tul inap helpim yu long tokaut long bilip bilong yu