Skul Yumi Kisim Long Jisas

Long Pasin Yumi Mas Mekim Long Ol Arapela

Bilong wanem yumi mas mekim gutpela pasin?

Olsem wanem? Yu save mekim gutpela pasin maski ol man i no mekim gutpela pasin long yu? Sapos yumi laik bihainim pasin bilong Jisas, yumi mas mekim gutpela pasin long ol man i save heitim yumi. Jisas i tok: “Sapos yupela i laikim tasol ol man i save laikim yupela, orait husat bai i ting yupela ol gutpela manmeri? Ol man bilong mekim sin ol tu i save laikim ol man i laikim ol. . . . Tasol yupela i mas laikim ol birua bilong yupela . . .  na bai yupela i stap pikinini bilong God Antap Tru. Em i save mekim gutpela pasin tu long ol man i no save tenkyu long em na long ol man nogut.”​—Luk 6:​32-​36; 10:​25-​37.

Bilong wanem yumi mas fogivim ol arapela?

Taim yumi popaia, yumi laik bai God i fogivim yumi. Jisas i skulim yumi olsem i stret yumi ken askim God long fogivim yumi. (Matyu 6:12) Tasol Jisas i tok tu olsem God bai fogivim yumi sapos yumi yet i redi long fogivim ol arapela. Em i tok: “Sapos yupela i lusim rong bilong ol arapela manmeri, orait Papa bilong yupela long heven em bai i lusim rong bilong yupela tu. Tasol sapos yupela i no lusim rong bilong ol arapela manmeri, orait Papa bilong yupela em tu bai i no lusim ol rong bilong yupela.”​—Matyu 6:​14, 15.

Olsem wanem famili i ken i stap amamas?

Jisas i no bin marit, tasol yumi ken lainim planti samting long em long pasin bilong kamapim amamas insait long famili. Long toktok na pasin bilong em, em i stap olsem gutpela piksa yumi ken bihainim. Tingim dispela 3-pela poin:

1. Man marit i mas laikim tru meri bilong em olsem em i save laikim bodi bilong em yet. Jisas i stap gutpela piksa long ol man marit. Em i tokim ol disaipel bilong em: ‘Nau mi givim nupela lo long yupela olsem, yupela wan wan i mas laikim tru ol arapela.” Ol i mas laikim ol arapela inap long wanem mak? Em i tok: “Laikim tru ol arapela olsem mi bin laikim yupela tru.” (Jon 13:34) Baibel i givim dispela stiatok long ol man marit na i tok: “Yupela man, yupela i mas laikim tumas ol meri bilong yupela, olsem Krais i laikim tumas sios na i givim laip bilong em yet bilong helpim sios. Olsem tasol yupela man, yupela i mas laikim tru ol meri bilong yupela, olsem yupela i save laikim bodi bilong yupela yet. Man i laikim tru meri bilong en, em i laikim tru em yet. Yumi save, i no gat wanpela man i save birua long bodi bilong em yet. Nogat. Em i save givim kaikai long en na lukautim gut, olsem Krais i save mekim long sios.”​—Efesus 5:​25, 28, 29.

2. Ol marit i mas i stap gut long poroman marit bilong ol. Taim maritman o maritmeri i slip wantaim wanpela i no poroman marit bilong em, em i mekim sin long ai bilong God na i bagarapim famili. Jisas i tok: “Ating yupela i no bin ritim tok i stap long buk bilong God? Dispela tok i tok olsem, . . . ‘Man i save lusim papamama na i pas wantaim meri bilong en, na tupela i kamap wanpela bodi tasol.’ . . . Olsem na tupela i no i stap olsem tupela moa. Nogat. Tupela i kamap olsem wanpela bodi. Olsem na samting God i pasim pinis, em man i no ken katim. . . . Mi tok olsem long yupela. Sapos meri bilong wanpela man em i no bin mekim pasin pamuk, na man i rausim em na i maritim narapela meri, dispela man yet em i mekim pasin pamuk.”​—Matyu 19:​4-9.

3. Ol pikinini i mas aninit long papamama bilong ol. Maski Jisas i gutpela olgeta na papamama bilong em i gat sin, taim em i stap liklik pikinini em i bin bihainim tok bilong ol. Baibel i stori long Jisas taim em i gat 12-pela krismas olsem: “Em i go bek wantaim tupela [papamama bilong em], na ol i kamap long Nasaret, na oltaim em i save bihainim tok bilong tupela.”​—Luk 2:51; Efesus 6:​1-3.

Bilong wanem i gutpela long bihainim ol dispela stiatok?

Jisas i toktok long ol samting em i bin skulim ol disaipel long en na em i tok: “Nau yupela i save pinis long as tingting bilong dispela pasin mi mekim, na sapos yupela i bihainim gut, orait yupela i ken amamas.” (Jon 13:17) Bilong stap Kristen tru, yumi mas bihainim ol tok Jisas i skulim yumi long en long pasin yumi mas mekim long ol narapela. Em i tok: “Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.”​—Jon 13:35.

Bilong kisim sampela save moa, lukim buk Tru Tru Baibel i Tok Wanem? long sapta 14a

[Futnot]

[Piksa long pes 16, 17]

Tok piksa bilong Jisas long pikinini man husat i pinisim nating mani em i kisim, i skulim yumi olsem gutpela pasin na pasin bilong fogivim rong i bikpela samting.​—Luk 15:​11-​32.

[Piksa long pes 17]

Ol marit i mas stap gut long poroman marit bilong ol