Jehova i No Inap Lusim Ol Man i Stap Gut Long Em

“[God] i no inap larim ol manmeri bilong en i lus. Oltaim Bikpela i save lukautim ol.”​​—SNG. 37:28.

1, 2. (a) Inap 1,000 yia samting paslain long Krais, wanem ol samting i bin kamap na i traim pasin bilong ol wokboi bilong God long i stap gut long em? (b) Long wanem 3-pela samting Jehova i bin lukautim ol gutpela wokboi bilong em?

EM 1,000 yia samting paslain long Krais, na ol wokboi bilong Jehova i mas wokim disisen. Klostu tru wanpela bikpela pait i laik kamap, tasol ol samting i kamap i opim rot long ol lain bilong Israel long hap not i ken bosim ol yet, olsem na pait i no bin kamap. Kwiktaim nupela king bilong ol, Jeroboam, i kirap strongim wok king bilong em​—em i kamapim wanpela nupela lotu, olsem lotu bilong kantri. Em i strong long ol manmeri em i bosim ol i mas bihainim em wanpela tasol. Ol gutpela wokboi bilong Jehova bai mekim wanem? Ol bai stap gut long dispela God ol i lotuim? Planti tausen manmeri i mekim olsem, na Jehova i lukautim ol.​​—1 Kin. 12:​1-​33; 2 Sto. 11:​13, 14.

² Long nau tu i gat sampela samting i traim pasin bilong ol wokboi bilong God long stap gut long em. Baibel i tok lukaut olsem: “Yupela i mas stap redi na was gut. Satan, dispela birua bilong yupela, em i olsem wanpela laion i singaut strong. Oltaim em i save raun bilong painim ol manmeri bilong kaikai.” Olsem wanem? Yumi inap “stap strong long bilip na sakim em”? (1 Pi. 5:​8, 9) Orait nau yumi ken skelim sampela samting i bin kamap paslain na bihain long taim King Jeroboam i kamap king long 997 B.C.E. na ol skul yumi inap kisim long en. Long dispela taim nogut bipo, i gat ol samting i daunim na mekim nogut long ol gutpela wokboi bilong Jehova. Na tu, i gat ol apostet i laik pulim ol, em long taim ol i mekim ol wok i gat hatwok bilong en. Long dispela 3-pela samting, Jehova i no bin lusim ol man i stap gut long em, na long nau tu em i no inap mekim olsem.​​—Sng. 37:28.

Taim Ol Narapela i Mekim Nogut Long Ol

3. Wanem samting i mekim na wok king bilong Devit i no daunim na mekim nogut long ol manmeri?

³ Pastaim yumi ken skelim sindaun bilong ol manmeri taim Jeroboam i kamap king. Sindaun 29:2 i tok: “Sapos man bilong mekim pasin nogut i bosim kantri, olgeta manmeri i save bel hevi tumas na krai nogut.” Taim Devit i stap king bilong lain Israel bilong bipo, ol manmeri i no save bel hevi o krai nogut. Tru, Devit i no gutpela man olgeta, tasol em i stap gut long God na em i bilip tru long em. Wok king bilong Devit i no daunim na mekim nogut long ol manmeri, nogat. Jehova i wokim kontrak wantaim Devit, na em i tok: “Lain bilong yu bai i no inap pinis. Na bai mi mekim ol man long lain bilong yu i kamap king oltaim.”​​—2 Sml. 7:​16.

4. Bilong ol blesing aninit long wok king bilong Solomon i ken stap yet, ol manmeri i mas mekim wanem?

⁴ Pastaim, aninit long wok king bilong Solomon, em pikinini man bilong Devit, ol manmeri i stap bel isi na ol i gat gutpela sindaun na dispela i olsem piksa bilong Taim Bilong Wan Tausen Yia Bilong Krais i Stap King. (Sng. 72:​1, 17) Long dispela taim bipo, i no gat as na wanpela bilong ol 12-pela lain bilong Israel i mas bikhet. Tasol bilong Solomon na ol Israel i ken kisim yet ol dispela blesing, i gat sampela samting ol i mas mekim. Jehova i bin tokim Solomon: “Sapos yu bihainim gut olgeta lo na tok bilong mi, orait bai mi mekim ol gutpela pasin long yu olsem bipo mi bin promis long papa bilong yu, Devit. Na bai mi stap namel long yupela Israel, yupela manmeri bilong mi. Na bai mi no ken lusim yupela. Nogat tru.”​​—1 Kin. 6:​11-​13.

5, 6. Wanem samting i kamap taim Solomon i lusim pasin bilong stap gut long God?

⁵ Taim Solomon i lapun, em i lusim pasin bilong bihainim tru Jehova na em i kirap lotuim ol god giaman. (1 Kin. 11:​4-6) Isi isi, Solomon i lusim pasin bilong bihainim ol lo bilong Jehova na em i wok long givim bikpela hevi long ol manmeri. Em i daunim na mekim nogut tru long ol, na taim em i dai pinis, ol i komplein long em long man i kisim wok king bilong em, em pikinini man bilong em, Rehoboam. Ol i askim em long isi long ol na pinisim sampela hevi bilong ol. (1 Kin. 12:4) Jehova i mekim wanem taim Solomon i lusim pasin bilong bihainim em tru?

⁶ Baibel i tok: “God, Bikpela bilong Israel, i bin kamap tupela taim long Solomon na i tambuim em long lotu long ol giaman god. Tasol Solomon i sakim tok bilong Bikpela na i givim baksait long em. Olsem na Bikpela i kros long Solomon.” Jehova i tokim Solomon: “Yu bin bihainim laik bilong yu tasol na yu brukim kontrak bilong mi, na yu no bihainim tok bilong mi. Olsem na mi ting pinis long rausim yu long wok king na yu bai i no inap bosim dispela kantri moa. Na bai mi mekim wanpela ofisa bilong yu i kamap king.”​​—1 Kin. 11:​9-​11.

7. Maski Jehova i no orait long Solomon, em i mekim wanem bilong lukautim ol manmeri i stap gut long Em?

⁷ Orait nau Jehova i salim profet Ahiya i go bilong makim wanpela man long kisim bek ol manmeri. Dispela man em Jeroboam, bipo em i wanpela ofisa insait long gavman bilong Solomon. Jehova i stap gut long kontrak bilong Kingdom em i bin mekim wantaim Devit, tasol em i orait long ol 12-pela lain i bruk i go tupela lain. Jeroboam bai kisim 10-pela lain, na tupela lain bai stap long lain famili bilong Devit, em long dispela taim, Rehoboam, em i bilong lain famili bilong Devit, em i stap king bilong dispela tupela lain. (1 Kin. 11:​29-​37; 12:​16, 17, 21) Jehova i tokim Jeroboam: “Sapos yu bihainim olgeta lo na tok bilong mi na yu wokabaut long ol gutpela rot mi makim bilong yu na yu mekim olgeta pasin mi save laikim, olsem Devit i bin mekim, orait bai mi stap wantaim yu na helpim yu. Na bai mi mekim yu i stap king bilong ol Israel. Na oltaim bai mi mekim ol king i kamap long lain bilong yu, olsem mi mekim long Devit.” (1 Kin. 11:38) Em nau, Jehova i helpim ol manmeri bilong em na wokim rot bilong ol i ken i kamap fri long ol dispela pasin i daunim ol.

8. Wanem ol hevi i daunim na mekim nogut long ol manmeri bilong God long nau?

⁸ Nau long taim bilong yumi i gat kain kain pasin bilong daunim na mekim nogut long ol man. Saveman 8:9 i tok: “Sampela bikman i wok long daunim ol arapela manmeri na mekim nogut long ol.” Pasin bilong ol bikpela bisnis long mangalim mani na pasin korapsen long wok politik, dispela inap daunim ol man long sait bilong mani. Planti bikman bilong gavman na bisnis na lotu ol i no stap gutpela piksa long sait bilong stretpela pasin. Olsem stretpela man Lot, ol manmeri bilong God long nau ol i “lukim ol kain kain pasin pamuk samting bilong ol dispela man nogut na [ol] i bel hevi tru.” (2 Pi. 2:7) Na tu, maski yumi wok long bihainim ol stretpela pasin na stap isi, planti taim ol bikman nogut i birua long yumi.​​—2 Ti. 3:​1-5, 12.

9. (a) Jehova i mekim pinis wanem samting bilong kisim bek ol manmeri bilong em? (b) Olsem wanem yumi ken save olsem oltaim Jisas bai stap gut long God?

⁹ Tasol yumi ken bilip tru long dispela tok i tru: Jehova i no inap lusim ol man i stap gut long em! Tingim sampela samting em i mekim pinis bilong rausim ol hetman nogut bilong dispela graun. Olsem: Kingdom Bilong God long han bilong Mesaia, Krais Jisas, i kamap pinis. Klostu 100 yia pinis Jisas Krais i bin mekim wok king long heven. Klostu nau em bai pinisim olgeta hevi bilong ol man i pret long God na i stap aninit long Em. (Ritim KTH 11:​15-​18.) Jisas i bin kamapim klia olsem em i stap gut long God i go inap long taim em i dai. Em i no inap mekim ol manmeri em i bosim i bel hevi olsem Solomon i bin mekim, nogat.​​—Hi. 7:​26; 1 Pi. 2:6.

10. (a) Yumi ken mekim wanem bilong soim olsem yumi amamas tru long Kingdom Bilong God? (b) Taim ol hevi i painim yumi, yumi ken bilip tru long wanem samting?

¹⁰ Kingdom Bilong God em wanpela gavman tru na em bai pinisim olgeta kain pasin i bin daunim na mekim nogut long ol man. Yumi mas i stap aninit long God Jehova na Kingdom bilong em. Yumi bilip tru long Kingdom, olsem na yumi givim bel long mekim olgeta kain gutpela pasin na yumi sakim pasin bilong givim baksait long God. (Ta. 2:​12-​14) Yumi wok strong na bai ol pasin bilong dispela graun i no ken mekim yumi kamap doti long ai bilong God. (2 Pi. 3:​14) Maski wanem wanem ol hevi i painim yumi long nau, yumi ken bilip tru olsem Jehova bai lukautim yumi na bai ol samting i no ken bagarapim bilip bilong yumi. (Ritim Song 97:10.) Na Song 116:15 i tok: “Ol manmeri bilong God ol i nambawan tru long ai bilong en. Na sapos wanpela i dai em i no save ting dispela em i samting nating.” Long ai bilong Jehova, ol manmeri i lotuim em ol i dia tumas, olsem na em i no inap larim ol i dai olsem wanpela lain olgeta, nogat.

Taim Pasin Apostet i Laik Pulim Ol

11. Olsem wanem Jeroboam i lusim pasin bilong stap gut long God?

¹¹ King Jeroboam inap isi long ol manmeri bilong God na pinisim sampela hevi bilong ol, tasol em i no mekim olsem. Ol samting em i mekim i traim pasin bilong ol long stap gut long God. Em i ting gutpela wok na namba em i kisim i no inap, olsem na em i wok long strongim moa yet wok king bilong em. Em i tingting olsem: “Nogut ol manmeri bilong mi i lusim mi na ol i stap aninit long lain bilong Devit gen. Nau yet ol i save go long haus bilong Bikpela long Jerusalem na mekim ofa long em. Tasol sapos ol i mekim olsem oltaim, bai ol i senisim tingting na bai ol i laik i stap gen aninit long bikman bilong ol, em King Rehoboam bilong Juda. Olsem na bai ol i kilim mi i dai na i go bek long Rehoboam.” Olsem na Jeroboam i wokim tupela bulmakau gol na kamapim wanpela nupela lotu. “Em i putim wanpela bulmakau gol long taun Betel na narapela em i putim long taun Dan. Orait ol manmeri i save lotuim dispela tupela bulmakau. Na long dispela pasin ol i mekim sin. Maski Dan i longwe, ol manmeri i save go long lotuim dispela bulmakau i stap long Dan. Na Jeroboam i wokim tu ol ples bilong lotu antap long ol maunten nabaut. Na em i makim ol sampela man long kamap pris. Tasol ol dispela man i no bilong lain Livai.” Na tu, Jeroboam yet i makim wanpela de olsem wanpela “bikpela de bilong lotu bilong ol Israel,” na em i ‘mekim ol ofa long alta em i bin wokim.’​​—1 Kin. 12:​26-​33.

12. Ol manmeri bilong God long hap not ol i mekim wanem taim Jeroboam i kamapim pasin bilong lotuim ol bulmakau long kantri Israel?

¹² Ol manmeri bilong God long kingdom long hap not, ol bai mekim wanem? Ol Livai husat i sindaun long ol taun bilong ol long hap not, ol i bihainim pasin bilong ol gutpela tumbuna bilong ol na kwiktaim ol i kirap mekim sampela samting. (Kis. 32:​26-​28; Nam. 35:​6-8; Lo 33:​8, 9) Ol wantaim ol famili bilong ol, ol i lusim hap graun bilong ol long hap not na ol i go sindaun long Juda long hap saut we ol inap lotuim yet Jehova. (2 Sto. 11:​13, 14) Ol arapela Israel husat i bin kam sindaun long Juda inap sotpela taim, ol i no go bek long ples bilong ol. Ol i stap tasol long Juda. (2 Sto. 10:17) Jehova i larim rot bilong lotuim em i op i stap na bai bihain sampela man moa long hap not ol inap lusim pasin bilong lotuim ol bulmakau na go bek long kantri Juda.​​—2 Sto. 15:​9-​15.

13. Long nau, olsem wanem ol apostet na kain kain pasin bilong ol i bin traim bilip bilong ol manmeri bilong God?

¹³ Ol apostet na kain kain pasin bilong ol inap bagarapim bilip bilong ol manmeri bilong God long nau tu. Sampela hetman i bin kamapim wanpela kain lotu i olsem lotu bilong kantri, na ol i bin strong long ol lain bilong kantri i mas bihainim. Ol pris pasto bilong Kristendom na sampela narapela hambakman ol i bin tok ol i lain pris bilong God. Tasol namel long ol trupela Kristen tasol, i gat dispela lain em God i bin makim long i stap olsem “ol pris bilong lain bilong king.”​​—1 Pi. 2:9; KTH 14:​1-5.

14. Yumi mas mekim wanem long ol tingting bilong ol apostet?

¹⁴ Olsem ol gutpela Livai em ol i bin stap 1,000 yia samting paslain long Krais, ol manmeri husat i stap gut long God long nau, ol tu i no larim ol tingting bilong ol apostet i giamanim ol. Ol Kristen God i bin makim na ol Kristen poroman bilong ol, ol i save kirap kwik na sakim ol tingting apostet na stap longwe long en. (Ritim Rom 16:17.) Tru, yumi amamas long aninit long ol gavman long ol samting i no bilong lotu, tasol yumi no insait long ol pait bilong dispela graun​—yumi stap gut long Kingdom Bilong God. (Jo. 18:36; Ro. 13:​1-8) Yumi sakim ol giaman tok bilong ol man i tok ol i mekim wok bilong God tasol pasin bilong ol i soim olsem ol i givim baksait pinis long God.​​—Ta. 1:16.

15. Bilong wanem i stret yumi mas stap gut long “wokboi i gat gutpela tingting”?

¹⁵ Tingim dispela samting tu: Jehova i bin stretim rot bilong ol man i gat gutpela bel i ken lusim ol pasin nogut bilong dispela graun na go insait long paradais bilong spirit em i bin kamapim. (2 Ko. 12:​1-4) Yumi pilim tru ol gutpela samting Jehova i bin mekim, na yumi stap klostu long dispela “wokboi i gat gutpela tingting,” em bikman i bin makim “bilong bosim ol arapela wokboi bilong en, na bilong skelim kaikai long ol long taim bikman i makim.” Krais i bin makim dispela wokboi “bilong bosim olgeta samting bilong en.” (Mt. 24:​45-​47) Olsem na maski sapos yumi wan wan i no kliagut long sampela tok lain wokboi i bin kamapim, i no gat as na yumi mas sakim dispela tok o go bek gen long dispela graun Satan i bosim. Pasin bilong stap gut long God bai kirapim yumi long mekim pasin daun na wet long Jehova long kamapim klia ol tok yumi no kliagut long en.

Taim Ol i Mekim Wok Bilong God

16. Jehova i givim wanem wok long wanpela profet long Juda?

¹⁶ Jehova i no bin orait long pasin apostet em Jeroboam i bihainim. Em i tokim wanpela profet long Juda long go long Betel long hap not na lukim Jeroboam taim em i mekim ofa long alta bilong em. Profet i mas givim strongpela tok long Jeroboam. Em wanpela wok i gat hatwok bilong en.​​—1 Kin. 13:​1-3.

17. Jehova i mekim wanem bilong lukautim mausman bilong em?

¹⁷ Jeroboam i kros nogut tru taim em i harim dispela tok bilong Jehova. Em i apim han na makim dispela mausman bilong God na singaut strong long ol man i stap klostu olsem: “Holimpas dispela man”! Tasol wantu, taim ol i no mekim yet wanpela samting, “han bilong Jeroboam i kamap stret olgeta na em i no inap daunim. Na tu alta i bruk na sit bilong paia i kapsait nabaut long graun.” Jeroboam i mas askim dispela profet long beten askim Jehova long mekim han bilong em i kamap orait gen. Profet i mekim olsem, na han bilong king i kamap gutpela gen. Long dispela rot Jehova i lukautim mausman bilong em na bagarap i no painim em.​​—1 Kin. 13:​4-6.

18. Taim yumi daunim pret na mekim wok bilong Jehova, em i lukautim yumi olsem wanem?

¹⁸ Taim yumi mekim wok bilong autim tok bilong Kingdom na kamapim ol disaipel, sampela taim ol man i save birua long yumi. (Mt. 24:14; 28:​19, 20) Tasol yumi no ken larim pasin bilong pret olsem ol man bai sakim tok bilong yumi i mekim na yumi no givim bel moa long wok autim tok. Olsem dispela profet long taim bilong Jeroboam, em yumi no save long nem bilong em, yumi “holim wok bilong [Jehova], na yumi no ken pret.”a (Lu. 1:​74, 75) Tru, Jehova i no save wokim ol kain mirakel olsem long nau, tasol em i wok yet long lukautim yumi ol Witnes bilong em long rot bilong holi spirit bilong em na ol ensel. (Ritim Jon 14:​15-​17; KTH 14:6.) God i no inap lusim ol man i daunim pret na i wok yet long autim tok bilong em.​​—Fl. 1:​14, 28.

Jehova Bai Lukautim Ol Man i Stap Gut Long Em

19, 20. (a) Olsem wanem yumi ken bilip tru olsem Jehova i no inap lusim yumi? (b) Stadi i kamap bihain long dispela bai stori long wanem ol askim?

¹⁹ Jehova em God bilong yumi na em i save “stap gut long yumi long olgeta samting em i mekim.” (Sng. 145:​17, NW) Na Baibel i tok promis olsem: “Em i was long rot bilong ol man i stap gut long em.” (Snd. 2:​8, NW) Taim ol hevi i painim yumi o ol apostet i laik pulim yumi o i gat ol wok yumi mas mekim i gat hatwok bilong en, ol man i stap gut long God ol i ken bilip tru olsem Jehova bai stiaim ol na helpim ol.

²⁰ Orait nau yumi wan wan i mas tingim dispela samting: Wanem samting bai helpim mi long holimpas pasin bilong mi long stap gut long Jehova maski wanem wanem ol hevi o traim i painim mi? Mi ken mekim wanem bilong strongim pasin bilong mi long stap gut long God?

[Futnot]

Bai Yu Bekim Olsem Wanem?

• Jehova i bin mekim wanem bilong kamapim klia olsem em i no save lusim ol man i stap gut long em taim ol man i daunim na mekim nogut long ol?

• Yumi mas mekim wanem long ol apostet na ol tingting bilong ol?

• Taim ol manmeri bilong Jehova i mekim wok autim tok, em i save lukautim ol olsem wanem?

[Mep/Piksa long pes 5]

(Bilong save ol dispela rait i stap we long pes, lukim buk o magasin)

KINGDOM LONG HAP NOT (Jeroboam)

 Dan

SEKEM

Betel

KINGDOM LONG HAP SAUT (Rehoboam)

JERUSALEM

[Piksa]

Taim Jeroboam i kamapim pasin bilong lotuim ol bulmakau, Jehova i no lusim ol manmeri i stap gut long em

[Piksa long pes 3]

Bilong Solomon na ol manmeri em i bosim i ken kisim yet ol blesing, ol i mas mekim sampela samting