Stap Gut Long Jehova Wanpela Tasol

“Oltaim bai mi bihainim laik bilong yu. Lainim mi gut bai mi tingting long yu wanpela tasol.”​​—SNG. 86:11.

1, 2. (a) Olsem Song 86:​2, 11 i tok, wanem samting bai helpim yumi long bihainim tru Jehova taim ol traim i painim yumi? (b) Wanem taim yumi mas kirap na kisim pasin bilong stap gut long God?

SAMPELA Kristen i bin bihainim tru God maski ol man i mekim nogut long ol na kalabusim ol, tasol bihain ol i kirap laikim tumas mani kago. Bilong wanem ol i mekim olsem? Bilong bekim dispela askim, yumi mas tingim bel bilong yumi, olsem yumi wanem kain man tru. Song 86 i bungim pasin bilong bihainim God na stap gut long em, wantaim pasin bilong tingting long em wanpela tasol. Man bilong raitim song, Devit, i beten olsem: “Kisim bek mi na mi no ken i dai, long wanem, mi save bihainim yu. Mi wokman bilong yu, na mi save bilip long yu, olsem na yu mas helpim mi.” Na Devit i beten moa olsem: “Bikpela, yu mas skulim mi gut long pasin yu laik mi mekim, na oltaim bai mi bihainim laik bilong yu. Lainim mi gut bai mi tingting long yu wanpela tasol.”​​—Sng. 86:​2, 11.

² Yumi mas bilip long Jehova long bel olgeta bilong yumi. Sapos yumi no mekim olsem, ol narapela samting inap pulim yumi na yumi no strong moa long stap gut long trupela God. Ol laik nogut i stap long bel bilong yumi i kain olsem ol trap, o bom, ol i planim long graun yumi wokabaut long en. Maski yumi bin bihainim tru Jehova taim hevi i painim yumi, sapos yumi no was gut, yumi inap pundaun long ol trap bilong Satan. Olsem na paslain long ol traim i painim yumi, yumi mas kisim pasin bilong stap gut long Jehova! Baibel i tok: “Olgeta taim yu mas was gut tru long tingting [i stap long bel] bilong yu.” (Snd. 4:​23) Long dispela samting, yumi inap kisim gutpela skul long samting i bin kamap long wanpela profet bilong Juda em Jehova i bin salim em i go long King Jeroboam bilong Israel.

“Bai Mi Givim Yu Wanpela Presen”

3. Jeroboam i mekim wanem taim em i harim strongpela tok em profet bilong God i givim long em?

³ Piksaim dispela samting long tingting. Nau tasol wanpela profet bilong God i bin givim strongpela tok long King Jeroboam husat i bin kamapim pasin bilong lotuim bulmakau long kingdom bilong 10-pela lain Israel long hap not. King i kros nogut tru. Em i tokim ol soldia long holimpas dispela profet. Tasol Jehova i stap wantaim wokboi bilong em. Wantu, long rot bilong mirakel, han bilong king i bagarap, na alta bilong mekim lotu giaman i bruk i go tupela hap. Kwiktaim, pasin bilong Jeroboam i senis. Em i krai long dispela profet olsem: “Mi laik bai yu beten long God, Bikpela bilong yu, bai em i ken helpim mi na mekim han bilong mi i orait gen.” Profet i beten, na han bilong king i kamap gutpela gen.​​—1 Kin. 13:​1-6.

4. (a) Bilong wanem singaut bilong king i traim pasin bilong profet long stap gut long God? (b) Profet i bekim wanem tok?

⁴ Orait nau Jeroboam i tokim profet: “Mi laik bai yu kam long haus bilong mi na kaikai wantaim mi. Na bai mi givim yu wanpela presen.” (1 Kin. 13:7) Profet bai mekim wanem? Em bai sakim dispela singaut bilong king, long wanem, nau tasol em i bin givim strongpela tok long king? (Sng. 119:113) O em bai go long haus bilong king na kisim presen, long wanem, i luk olsem king i tanim bel? Jeroboam i gat planti mani, olsem na em inap givim planti gutpela presen long ol pren bilong em. Sapos long pasin hait profet bilong God i bin kisim pasin bilong laikim tumas ol gutpela samting bilong skin, ating em bai hatwok long sakim dispela singaut. Tasol Jehova i bin tokim profet: ‘Yu no ken kaikai na dring wanpela samting na tu yu no ken bihainim dispela rot yu bin kam long en na go bek long ples. Yu mas bihainim narapela rot.’ Olsem na profet i tokaut klia long king olsem: “Maski sapos yu ting long tilim ol mani samting bilong yu long tupela hap na givim wanpela hap long mi, mi no inap i go long haus bilong yu na mi no inap kaikai na dring hia long Betel.” Orait profet i lusim Betel na i bihainim narapela rot na i go. (1 Kin. 13:​8-​10) Dispela disisen bilong profet i lainim yumi long wanem samting long pasin bilong stap gut long God?​​—Ro. 15:4.

“Em Inap Long Mi”

5. Olsem wanem pasin bilong laikim tumas mani kago inap traim pasin bilong yumi long stap gut long God?

⁵ Pasin bilong laikim tumas mani kago inap traim pasin bilong yumi long stap gut long God. Olsem wanem? Yumi bilip long promis bilong Jehova long em bai givim yumi olgeta samting yumi mas i gat? (Mt. 6:​33; Hi. 13:5) Sapos long nau yumi sot long mani long kisim sampela gutpela samting bilong skin, bai yumi wok strong long kisim, maski wanem hevi i kamap long dispela, o bai yumi tok nogat long en? (Ritim Filipai 4:​11-​13.) Bai yumi lusim sampela wok insait long kongrigesen o wok autim tok bambai yumi ken kisim ol samting bilong skin em yumi laik kisim long nau? Bai yumi larim pasin bilong stap gut long God i stap namba wan samting long laip bilong yumi? Pasin bilong yumi long givim bel olgeta long wok bilong God o nogat, dispela bai makim wanem kain bekim yumi givim long ol dispela askim. Aposel Pol i tok: “Taim mama i karim yumi na yumi kamap long graun, yumi no bin karim wanpela samting i kam. Na taim yumi lusim graun yumi bai i no inap karim wanpela samting i go. Tasol sapos yumi gat kaikai na laplap samting, orait yumi ken tok, ‘Em inap long mi.’ ”​​—1 Ti. 6:​6-8.

6. Ating rot inap op long yumi kisim wanem ol samting i olsem “presen”? Wanem samting bai helpim yumi long skelim olsem yumi bai kisim o nogat?

⁶ Tingim: Ating bos i laik givim yumi bikpela wok moa i gat bikpela pe. O ating yumi inap kisim bikpela mani moa sapos yumi go sindaun long narapela kantri na painim wok mani. Ating pastaim yumi inap ting ol dispela samting i olsem blesing i kam long Jehova. Tasol paslain long yumi wokim disisen long ol dispela samting, i gutpela sapos yumi skelim olsem yumi gat wanem tingting na yumi laik mekim ol dispela samting. Nambawan bikpela samting yumi mas tingim i olsem: “Disisen bilong mi bai mekim wanem long pasin bilong mi long pas gut wantaim Jehova?”

7. Bilong wanem yumi mas rausim pasin bilong laikim tumas mani kago long bel bilong yumi?

⁷ Dispela graun Satan i bosim i save wok strong long kirapim ol man long laikim tumas mani kago. (Ritim 1 Jon 2:​15, 16.) Satan i laik paulim ol tingting i stap long bel bilong yumi. Olsem na yumi mas was gut na sapos pasin bilong laikim tumas mani kago i kamap long bel bilong yumi, orait kwiktaim yumi mas rausim. (KTH 3:​15-​17) Jisas i no hatwok long sakim ol kingdom bilong dispela graun em Satan i laik givim em. (Mt. 4:​8-​10) Em i tok: “Yupela lukaut na was gut. Nogut yupela i mangal long kisim ol kain kain samting. Maski yu yet yu gat planti samting moa, tasol yu no inap kisim laip long ol dispela samting bilong yu.” (Lu. 12:15) Pasin bilong stap gut long God bai helpim yumi long bilip na wetim Jehova i helpim yumi na yumi no bilip long yumi yet.

Lapun Profet i “Giamanim Em”

8. Wanem samting i traim pasin bilong profet bilong God long stap gut long Em?

⁸ Sapos profet bilong God i bin go stret long ples bilong em, samting nogut i no inap painim em. Tasol nau, olsem wantu tasol, narapela traim i painim em. Baibel i tok: “Long dispela taim wanpela lapun profet i stap long Betel,” na “ol pikinini man bilong en i kam na tokim em” long olgeta samting i bin kamap long dispela de. Lapun papa i harim pinis, na em i tokim ol long go putim satel long donki bilong em na em i go bihainim profet bilong God. Bihain liklik, em i lukim dispela profet i sindaun long as bilong wanpela bikpela diwai na i tokim em: “Mi laik yu kam long haus bilong mi na kaikai wantaim mi.” Taim profet bilong God i tok nogat, lapun i tok: “Mi tu mi wanpela profet olsem yu. Na Bikpela i bin salim wanpela ensel i kam tokim mi long mi mas kisim yu i go bek long haus bilong mi na givim yu sampela kaikai na wara bilong dring.” Tasol Baibel i tok: “Dispela lapun i giamanim em.”​​—1 Kin. 13:​11-​18.

9. Baibel i tok wanem long ol man bilong pasin giaman? Ol i mekim nogut long husat?

⁹ Yumi no save long as na lapun profet i mekim tok giaman. Ating bipo em i wanpela gutpela profet bilong Jehova, tasol nau em i man bilong giaman. Baibel i demim kain pasin olsem. (Ritim Sindaun 6:​16, 17.) Ol man bilong pasin giaman i save bagarapim pasin bilong ol yet long pas gut wantaim Jehova, na bilong ol arapela tu.

“Em i Go Bek Wantaim Lapun”

10. Taim lapun man i singautim profet bilong God long i go wantaim em long haus, profet i mekim wanem? Wanem samting i kamap long dispela?

¹⁰ Yumi ken ting olsem profet bilong Juda inap save olsem lapun profet i trikim em. Em inap askim em yet olsem: ‘Bilong wanem Jehova i salim wanpela ensel i go givim ol nupela tok long dispela lapun long ol samting mi mas mekim?’ Profet inap askim Jehova long kamapim klia dispela samting, tasol Baibel i no tok em i mekim olsem. Em “i go bek wantaim lapun long haus bilong em na i kaikai na dring.” Jehova i no orait long dispela. Taim profet bilong Juda i kirap gen na go bek long Juda, wanpela laion i bungim em na kilim em i dai. Sori tru! Em i no inap mekim wok moa olsem profet bilong God!​​—1 Kin. 13:​19-​25.a

11. Ahiya i mekim wanem na em i stap gutpela piksa yumi ken bihainim?

¹¹ Tasol profet Ahiya em God i bin salim em i go bilong makim Jeroboam long kamap king, em i stap gut long God i go inap long taim em i lapun tru. Taim Ahiya i lapun pinis na aipas, pikinini man bilong Jeroboam i kisim sik. Jeroboam i salim meri bilong em i go askim Ahiya long wanem samting bai kamap long pikinini bilong tupela. Ahiya i no pret long tokaut olsem pikinini bilong Jeroboam bai dai. (1 Kin. 14:​1-​18) Ahiya i kisim planti blesing, na wanpela bilong ol i olsem: Em i helpim wok bilong raitim Baibel. Em i mekim olsem wanem? Em i raitim wanpela stori em bihain pris Esra i mekim wok long en taim em i raitim Buk Esra.​​—2 Sto. 9:​29.

12-14. (a) Yumi inap kisim wanem skul long yangpela profet? (b) Stori long olsem wanem yumi mas beten na tingim gut ol tok kaunsel bilong Baibel em ol elda i givim.

¹² Baibel i no tokim yumi long as na yangpela profet i no askim Jehova long samting em i mas mekim taim lapun man i singautim em long kam dring na kaikai wantaim em. Ating lapun man i tokim yangpela profet long samting em i gat laik long harim. Yumi inap kisim wanem skul long dispela? Yumi mas bilip strong olsem ol lo bilong Jehova i stret. Na yumi mas tingting strong long bihainim ol dispela lo, maski wanem samting i painim yumi.

¹³ Taim wanpela i givim tok kaunsel long narapela, ating sampela i laik harim tasol ol tok ol i gat laik long harim. Olsem: Ating pablisa i gat rot long kisim wanpela wok we sapos em i kisim, dispela inap sotim taim em i lusim wantaim famili bilong em na long mekim ol wok tiokratik. Em i askim elda long tingting bilong em. Ating pastaim elda bai tokaut olsem i no wok bilong em long tokim brata long samting em i mas mekim bilong lukautim famili bilong em. Na bihain, ating elda bai stori wantaim brata long ol samting em dispela wok inap mekim long brata long ol samting bilong spirit. Brata bai mekim wanem? Em bai tingim tasol ol tok em elda i bin mekim pastaim, o em bai tingim gut ol tok em elda i mekim bihain? Brata i mas skelim wanem wanem samting bai helpim em gut long ol samting bilong spirit.

¹⁴ Tingim narapela samting. Ating wanpela sista i askim elda long em i ken lusim poroman marit bilong em husat i no bilip. Elda bai tokim sista olsem disisen bilong lusim man bilong em o nogat, em samting bilong sista yet long makim. Orait nau ating em bai kamapim sampela tok bilong Baibel i stori long dispela samting. (1 Ko. 7:​10-​16) Sista bai mekim wanem? Em bai tingim gut ol tok bilong elda? O em i pasim tok pinis long bel olsem em bai lusim man bilong em? Taim em i wokim disisen, i gutpela sapos em i beten na tingim gut ol tok em Baibel i as bilong en.

Daunim Yumi Yet

15. Yumi kisim wanem skul long pasin kranki profet bilong God i mekim?

¹⁵ Yumi inap kisim wanem skul moa long dispela pasin kranki bilong profet bilong Juda? Sindaun 3:5 i tok: “Bilip strong long Bikpela. Yu no ken ting save bilong yu yet inap helpim yu.” Pastaim dispela profet i bilip na wetim Jehova i stiaim em, tasol bihain em i larim tingting bilong em yet i stiaim em. Dispela pasin kranki i mekim na em i lusim laip bilong em na gutpela nem em i gat long ai bilong God. Samting i painim em i kamapim klia olsem yumi mas daunim yumi yet na stap gut long Jehova long wok bilong em yumi mekim!

16, 17. Wanem samting bai helpim yumi long stap gut long Jehova?

¹⁶ Pasin bilong tingim yumi yet tasol i stap long bel bilong yumi na dispela inap giamanim yumi. “Bel bilong olgeta man i save tingting oltaim long mekim pasin giaman. Tingting bilong man em i nogut.” (Jer. 17:9) Bilong stap gut long Jehova, yumi mas wok strong yet long rausim pasin bilong olpela man, olsem pasin bilong hambak na pasin bilong bilip long strong bilong yumi yet. Na yumi mas kamap ol nupela manmeri, “em ol manmeri God i mekim ol i kamap nupela na ol i [gat pasin olsem bilong] God yet, long wanem, pasin bilong ol i stretpela olgeta na i holi tru.”​​—Ritim Efesus 4:​22-​24.

¹⁷ Sindaun 11:2 i tok: “Ol man i gat gutpela tingting i save daunim ol yet.” Taim yumi daunim yumi yet na wetim Jehova i helpim yumi, dispela i helpim yumi na yumi no mekim ol pasin kranki em inap kamapim bikpela hevi. Olsem: Pasin bilong bel hevi na bun i slek, dispela inap mekim na yumi no tingting klia. (Snd. 24:10) Ating i gat sampela hap wok lotu we yumi inap les long mekim na yumi stat long ting olsem inap planti yia yumi bin mekim bikpela wok na nau em taim bilong ol narapela long mekim wok. O ating yumi laik kisim ol samting em ol narapela manmeri i ting i “nomol” long kisim. Tasol sapos yumi “taitim bun tru” na ‘oltaim yumi wok strong long mekim wok bilong Bikpela,’ dispela bai lukautim ol tingting i stap long bel bilong yumi.​​—Lu. 13:24; 1 Ko. 15:58.

18. Sapos yumi gat wok long mekim disisen na yumi no save long samting yumi mas mekim, orait yumi ken mekim wanem?

¹⁸ Sampela taim yumi gat wok long mekim ol bikpela disisen, na stretpela rot yumi mas bihainim i no stap ples klia. Long kain taim olsem, bai yumi larim tingting bilong yumi yet i stiaim yumi? Taim yumi mas wokim ol kain disisen olsem, yumi mas askim Jehova long helpim yumi. Jems 1:5 i tok: “Sapos wanpela man namel long yupela em i sot long gutpela tingting, orait em i mas beten long God i givim tingting long em, na bai God i givim em.” Papa bilong yumi long heven bai givim holi spirit long yumi na bai yumi inap mekim ol gutpela disisen.​​—Ritim Luk 11:​9, 13.

Tingting Strong Long Stap Gut Long God

19, 20. Yumi mas tingting strong long mekim wanem?

¹⁹ Long ol yia bihain long taim Solomon i lusim lotu i tru, ol hevi i kamap na i traim pasin bilong ol wokboi bilong God long i stap gut long Em. Tru, planti manmeri i lusim pasin bilong bihainim tru God, tasol i gat sampela i stap gut long Em.

²⁰ Long olgeta de, i gat ol disisen yumi mas wokim na dispela samting i traim pasin bilong yumi long stap gut long God. Tasol yumi tu inap bihainim tru God. Oltaim yumi mas stap gut long Jehova wanpela tasol, na bilip tru olsem em bai wok yet long mekim gut long ol man i stap gut long em.​​—2 Sml. 22:26.

[Futnot]

Bai Yu Bekim Olsem Wanem?

• Bilong wanem yumi mas rausim pasin bilong laikim tumas mani kago long bel bilong yumi?

• Wanem samting bai helpim yumi long stap gut long Jehova?

• Olsem wanem pasin bilong daunim yumi yet inap helpim yumi long stap gut long God?

[Ol Piksa long pes 9]

Yu hatwok long sakim ol traim?

[Ol Piksa long pes 10]

Bai yu beten na tingim gut ol tok em Baibel i as bilong en?