Bihainim Bilip Bilong Ol

Em i ‘Putim Dispela Tok Long Bel na Em i Tingim’

MARIA i sindaun long donki, tasol em i hatwok long sindaun gut. Em i bin raun long rot inap planti aua pinis. Josep i wok long wokabaut i go pas long em inap ol i kamap long Betlehem. Maria i pilim bebi i meknais gen insait long bel bilong em.

Klostu nau Maria bai karim pikinini. (Luk 2:5) Taim tupela i abrusim ol gaden i go, ating sampela fama em ol i wok long brukim graun o tromoi sid ol i apim het na lukluk long tupela na tingting planti long as na dispela meri, klostu em bai karim pikinini, i raun olsem. Wanem samting i bin kirapim Maria long mekim dispela raun i go longwe long ples bilong em long Nasaret?

Yumi ken tingim samting i bin kamap sampela mun paslain, taim dispela yangpela meri Juda i kisim wanpela wok i narapela kain. Em bai karim wanpela pikinini, na dispela pikinini bai kamap Mesaia, Pikinini Bilong God! (Luk 1:​35) Taim mun bilong karim pikinini i kam klostu, wok bilong mekim dispela raun i kamap. Bilong mekim dispela raun, i gat sampela samting i traim bilip bilong Maria. Orait nau yumi ken stori long ol samting i helpim em long holimpas strongpela bilip.

Ol i Go Long Betlehem

I no Josep na Maria tasol i mekim dispela raun, nogat. Nau tasol Sisar Ogastus i bin putim wanpela lo bilong rejistaim ol manmeri, na ol manmeri i mas i go long as ples bilong ol bilong gavman i ken kisim nem bilong ol. Josep i mekim wanem? Baibel i tok: “Josep em i bilong lain famili bilong King Devit. Olsem na em i lusim taun Nasaret long Galili, na em i go long Judia long taun bilong Devit, ol i kolim Betlehem.”​​—Luk 2:​1-4.

Dispela lo Sisar i putim i no samting i bin kamap nating long dispela taim, nogat. Inap 700 yia paslain, wanpela profet i bin tokaut olsem mama bai karim Mesaia long Betlehem. I gat wanpela taun nem bilong en Betlehem i stap klostu long Nasaret, inap 11 kilomita tasol. Tasol tok profet i kolim “Betlehem Efrata” olsem ples em Mesaia i mas kamap long en. (Maika 5:2) Ol rot namel long dispela liklik taun long hap saut na Nasaret i olsem 150 kilomita na i gat planti liklik maunten tu. Em dispela Betlehem tasol Josep i mas i go long en, long wanem, em as ples bilong famili bilong King Devit​​—em famili bilong Josep na Maria wantaim.

Olsem wanem? Bai Maria i sapotim Josep long bihainim dispela lo na go wantaim em long Betlehem? Ating bai i gat hatwok long em long mekim dispela raun. Taim bilong san i wok long pinis na ren inap pundaun. Na tu, Betlehem i stap long maunten i antap inap olsem 760 mita. Bilong kamap long Betlehem, em i mas raun inap sampela de, na long laspela hap bilong dispela raun, em i mas bihainim rot i go antap. Na bilong go antap, ating bikpela hap taim moa i mas lus, long wanem, Maria i gat bel na em i mas malolo planti taim. Klostu em bai karim pikinini, na ating em bai i gat laik long stap klostu long ples bilong em we i gat ol famili na pren em ol bai amamas long helpim em long taim em i karim pikinini. Olsem na bilong mekim kain raun olsem, Maria i mas i gat strongpela bel.

Maski i gat dispela hatwok, Luk i tok Josep i go bilong rejistaim nem bilong em “wantaim meri bilong en Maria.” (Luk 2:​4, 5) Maria i meri bilong Josep na dispela i stiaim ol samting Maria i mekim. Em i tingim man bilong em olsem het bilong em long ol samting bilong lotu, na em i tingim wok God i bin givim long ol meri marit olsem helpim bilong ol man bilong ol, olsem na em i sapotim Josep long ol samting em i laik mekim.a Long rot bilong bihainim tok bilong Josep em i daunim samting inap traim bilip bilong em.

Wanem samting moa inap kirapim Maria long bihainim tok? Tok profet i makim Betlehem olsem ples we Mesaia bai kamap long en. Maria i save long dispela tok profet o nogat, Baibel i no tokaut long dispela. Tasol yumi ken ting olsem em i save long dispela tok profet, long wanem, em samting ol hetman bilong lotu na ol narapela manmeri long taim bilong em ol i save long en. (Matyu 2:​1-7; Jon 7:​40-​42) Maria i save long planti tok bilong Baibel. (Luk 1:​46-​55) Tasol maski i gat wanem as na em i go long Betlehem​—em i laik bihainim tok bilong man bilong em o wanpela lo bilong gavman o tok profet bilong Jehova, o ol dispela 3-pela samting wantaim​​—em i stap gutpela piksa tru. Jehova i amamas tru taim ol man na meri i mekim pasin daun na bihainim tok. Long taim bilong yumi we pasin bilong bihainim tok i no bikpela samting tumas, pasin bilong Maria i stap olsem gutpela piksa bilong ol manmeri long olgeta hap i ken bihainim.

Krais i Kamap

Ating Maria i amamas tru taim em i lukluk long hap na lukim Betlehem i stap. Taim ol i go antap long ol liklik liklik maunten, na abrusim ol gaden oliv​​—em laspela kaikai bilong bungim​—ating Maria na Josep i tingim ol samting bipo i bin kamap long dispela liklik taun. Tru, Betlehem i liklik taun tru namel long ol taun bilong Juda, olsem profet Maika i tok pinis, tasol dispela taun em ples we Boas, Naomi, na Devit, i bin kamap long en, winim 1,000 yia paslain long Maria i karim pikinini.

Taim Maria na Josep i kamap pinis, ol i lukim planti man i stap. Planti ol i bin kamap paslain long tupela bilong rejistaim nem bilong ol, olsem na haus pasindia i pulap pinis.b Tupela i mas i stap long nait long haus bulmakau. Ating Josep i tingting planti taim em i lukim olsem meri bilong em i pilim bikpela pen em i no bin kisim bipo, na bihain pen i go bikpela moa. Hia, long dispela haus, pen bilong karim pikinini i kamap pinis.

Ol meri long olgeta hap inap pilim tru hevi bilong Maria. Inap 4,000 yia paslain, Jehova i bin tok profet olsem sin ol meri i bin kisim long Adam, dispela bai mekim na ol bai i gat bikpela pen long taim ol i laik karim pikinini. (Stat 3:​16) Yumi ken ting olsem Maria tu i bin kisim bikpela pen. Luk i no stori long dispela, em i mekim dispela tok tasol: “Em i karim namba wan pikinini man bilong en.” (Luk 2:7) Em nau, “namba wan pikinini man” bilong em i kamap pinis​​—em i namba wan bilong planti narapela pikinini em Maria i karim, inap olsem 7-pela o moa. (Mak 6:3) Tasol dispela pikinini bai i narapela kain. Tru, em i namba wan pikinini bilong Maria, tasol narapela samting tu, em i “namba wan pikinini bilong God, na em i stap het tru bilong olgeta samting God i bin mekim ol i kamap”!​​—Kolosi 1:​15.

Orait nau Baibel i tok: “[Maria] i karamapim em long laplap, na i slipim em insait long bokis kaikai bilong ol bulmakau.” (Luk 2:7) Ol pilai ol man i save mekim bilong bebi Jisas i slip long bokis kaikai na ol piksa ol i droim, i mekim dispela ples i luk olsem wanpela naispela hap bilong karim pikinini. Tasol tingim: Dispela bokis we ol i slipim Jisas, em bokis we ol bulmakau i save kaikai long en. Yes, dispela famili i stap long haus bulmakau​—na kain haus olsem i save smel nogut na i no klinpela tumas. Ol papamama i no laik makim kain ples olsem bilong karim pikinini, ol i laik karim pikinini bilong ol long gutpela ples. Yumi ken ting olsem Maria na Josep i laik bai Pikinini Bilong God em tu i ken kamap long gutpela ples!

Tasol ol i no larim dispela i mekim ol i bel hevi, nogat, ol i mekim wok long ol samting ol i gat bilong helpim gut pikinini. Tingim: Maria yet i karamapim bebi bilong em long laplap, nogut em i kol, na slipim em gut insait long bokis we em i ken slip na stap gut. Maria i no larim sindaun bilong em long dispela taim i pasim em long mekim gut tru long pikinini bilong em. Ating Maria i tingting planti, tasol em i no larim dispela i pasim em long mekim gut tru long pikinini inap tru long skel bilong em. Maria na Josep i save, pasin bilong lukautim pikinini long ol samting bilong lotu, dispela em i nambawan bikpela samting. (Lo 6:​6-8) Long nau tu, ol papamama i gat savetingting ol i save lukautim gut ol pikinini bilong ol long ol samting bilong lotu taim ol i mekim bikpela long ol namel long ol man i no save mekim wok bilong God.

Sampela i Kam Strongim Bel Bilong Ol

Orait nau bikpela nois i kamap. Sampela wasman bilong sipsip i hariap i kam insait long haus bulmakau. Ol i gat bikpela laik long lukim dispela famili, na moa yet dispela pikinini. Pes bilong ol i lait na ol i amamas tru. Ol i bin lusim ol liklik maunten we ol i bin stap wantaim ol sipsip bilong ol na ol i kam hariap.c Ol i tokim dispela papamama long wanpela gutpela samting i bin painim ol nau tasol. Wantu wanpela ensel i bin kam long ol long maunten, long biknait. Lait bilong glori bilong Jehova i bin raunim ol, na ensel i tokim ol olsem nau tasol wanpela meri i bin karim Krais, o Mesaia, long Betlehem. Ol bai lukim wanpela bebi em ol i bin pasim em long laplap, na em i slip i stap long bokis kaikai bilong bulmakau. Orait nau narapela samting i kamap​​—wanpela bikpela lain ensel i kam na ol i singsing na litimapim nem bilong Jehova!

Olsem na yumi no kirap nogut olsem ol dispela wasman i hariap i kam long Betlehem! Ating ol i amamas nogut tru long lukim dispela nupela pikinini i stap olsem ensel i tok. Ol i no haitim dispela gutnius, nogat. “Ol i autim tok . . . Na olgeta man i harim dispela tok ol wasman bilong sipsip i mekim, ol i tingting planti long en.” (Luk 2:​17, 18) Ol hetman bilong lotu long dispela taim ol i save ting olsem ol wasman bilong sipsip ol i man nating tasol. Tasol i klia tru olsem long ai bilong Jehova, ol dispela man i gat pasin daun ol i gutpela samting tru. Taim ol i kam lukim Maria, dispela i mekim wanem long em?

Nau tasol Maria i karim pikinini na ating em i no gat strong, tasol em i putim gut yau long olgeta tok bilong ol. Na em i mekim sampela samting moa: “Maria i putim dispela olgeta tok long bel bilong en, na em i tingim i stap.” (Luk 2:​19) Dispela yangpela meri i save tingting gut long ol samting. Em i save olsem dispela tok bilong ol ensel i bikpela samting. God bilong em Jehova i laik bai em i ken save long pikinini bilong em i husat na long bikpela wok pikinini bai mekim. Olsem na Maria i putim gut yau. Em i putim olgeta dispela tok long bel bilong em na bai em i ken tingim gen long ol mun na ol yia bihain. Dispela em i as bilong strongpela bilip em Maria i save kamapim long ol yia em i stap laip.

Olsem wanem? Bai yu bihainim pasin bilong Maria? Jehova i bin putim planti bikpela tok i tru long Baibel. Tasol ol dispela tok i tru i no inap helpim yumi sapos yumi no tingim gut. Yumi inap mekim olsem long rot bilong ritim Baibel long olgeta taim​​—tasol no ken ritim olsem wanpela buk nating, nogat, yumi mas ritim olsem em i Tok Bilong God. (2 Timoti 3:​16) Orait nau, olsem Maria, yumi mas putim ol dispela tok long bel na kisim sampela save moa long ol. Sapos yumi tingim tingim ol tok yumi ritim long Baibel, na tingim olsem wanem yumi ken bihainim gut moa ol tok bilong Jehova, dispela bai strongim bilip bilong yumi.

Sampela Tok Moa Bilong Tingim

Long de namba 8, Maria na Josep i katim skin bilong pikinini olsem Lo Bilong Moses i tok, na ol i kolim nem bilong em Jisas, olsem ensel i bin tokim ol long mekim. (Luk 1:​31) Long de namba 40, ol i lusim Betlehem na kisim em i go long tempel long Jerusalem, em i stap klostu, inap sampela kilomita tasol, na ol i givim ofa bilong mekim mama i kamap klin. Ol i givim ofa em Lo i tok ol lain i no gat planti mani i ken mekim​—tupela namba wan balus, o tupela yangpela namba 2 balus. Maski ol i givim tupela liklik pisin tasol na ol i no givim sipsip man olsem ofa olsem planti narapela papamama i save mekim, ol i no larim dispela i pasim ol. Taim ol i stap long tempel, ol i kisim planti tok bilong strongim ol.​​—Luk 2:​21-​24.

Wanpela lapun man, nem bilong em Simeon, em i kam na i givim Maria sampela tok moa bilong em i ken putim long bel. Simeon i bin kisim promis olsem taim em i no dai yet, em bai lukim Mesaia, na holi spirit bilong Jehova i bin kamapim long em olsem bebi Jisas em dispela Man Bilong Kisim Bek olgeta man. Na Simeon i toksave long Maria long bikpela pen Maria bai karim bihain. Em i tok dispela pen bai i olsem wanpela longpela bainat i sutim em. (Luk 2:​25-​35) Ating dispela tok, maski em samting bilong hevi long en, i bin helpim Maria long sanap strong taim dispela hevi i kamap long 33 yia bihain. Simeon i tok pinis, orait nau wanpela profet meri, nem bilong em Ana, i kam lukim bebi Jisas na em i kirap autim tok bilong dispela pikinini long olgeta manmeri i wet long God i kisim bek Jerusalem.​​—Luk 2:​36-​38.

Em i gutpela samting tru olsem Josep na Maria i bin pasim tok long kisim bebi bilong ol i kam long tempel bilong Jehova long Jerusalem! Long dispela pikinini, dispela em kirap bilong pasin bilong em long go oltaim long tempel bilong Jehova. Taim ol i stap long dispela hap, ol i wok strong inap long skel bilong ol long mekim wok bilong God na ol i kisim ol tok bilong strongim ol. Taim Maria i stap long tempel, yumi ken ting olsem bilip bilong em i kamap strong moa, na taim em i lusim tempel em i gat planti gutpela tok i stap long bel bilong em long em i ken tingim na tokim ol narapela long en.

Em i wanpela gutpela samting tru long lukim ol papamama long nau ol i bihainim dispela pasin. Namel long ol Witnes Bilong Jehova, ol papamama i save bringim ol pikinini bilong ol i kam long olgeta miting Kristen. Ol dispela papamama i save mekim olgeta samting ol inap mekim; ol i save mekim sampela tok bilong strongim ol wanlotu bilong ol. Taim ol i stap long miting, ol i kisim strong na amamas na taim ol i lusim miting ol i gat planti gutpela tok bilong tokim ol narapela long en. Mipela i singautim yu long bung wantaim ol. Sapos yu mekim olsem, orait olsem Maria, bai yu lukim olsem bilip bilong yu bai kamap strong moa yet.

[Ol Futnot]

[Piksa long pes 25]

Simeon i lukim dispela Man Bilong Kisim Bek yumi