Taim Yu Kisim Save Long Hel Em i Wanem Samting Tru, Dispela i Mekim Wanem Long Yu?
OL MAN i skulim ol arapela olsem hel em i ples bilong kisim pen, ol i mekim God Jehova i kamap olsem wanpela man nogut. Tru, Baibel i tok olsem God bai bagarapim ol man nogut. (2 Tesalonaika 1:6-9) Tasol stretpela belhat bilong God i no nambawan bikpela pasin bilong em.
God i no save amamas long man nogut i dai. Em i tok: “Yupela i ting mi save amamas taim wanpela man nogut i dai, a?” (Esekiel 18:23) Sapos God i no amamas taim wanpela man nogut i dai, orait yumi ken save olsem em i no inap amamas long lukim ol man nogut i kisim pen inap oltaim oltaim, nogat.
Nambawan bikpela pasin bilong God em pasin laikim. (1 Jon 4:8) Tru tumas, “em i save mekim gutpela pasin long olgeta manmeri na em i save marimari long olgeta samting em i bin wokim.” (Song 145:9) Olsem na God i laik bai yumi kisim wankain pasin na laikim em tru.—Matyu 22:35-38.
Pret Long Hel o Laikim God —Wanem Pasin i Kirapim Yu?
Dispela bilip olsem ol man i save pilim pen long hel i kirapim ol man long pret nogut tru long God. Man i kisim save long God i wanem kain man na i laikim em, em tu i pret long God, tasol dispela em i gutpela kain pret. Song 111:10 i tok: “Sapos man i laik kamap saveman em i mas pret long Bikpela. Em i save givim gutpela tingting long ol manmeri i save bihainim laik bilong en.” Dispela gutpela kain pret, em pasin we man i rispek na daun long Man i wokim olgeta samting. Em i pret long God, olsem em i no laik mekim ol samting God i no orait long en.
Tingim stori bilong Kathleen, em i gat 32 krismas, bipo em i save kisim drak. Em i meri bilong i go long ol pati, em i save kros pait, na em i no laikim em yet, na em i save mekim pasin pamuk. Em i tok: “Mi save lukluk long pikinini meri bilong mi i gat 1-pela krismas na mi tingting olsem: ‘Man, pasin bilong mi i nogutim em. Paia bai kukim mi long hel long pasin mi mekim.’ ” Kathleen i traim kain kain rot bilong lusim drak, tasol ol dispela samting i no helpim em long lusim drak. Em i tok: “Mi laik bihainim gutpela pasin, tasol olgeta samting long laip bilong mi na long graun i stap nogut. I luk olsem i no gat gutpela as long mi bihainim gutpela pasin.”
Orait bihain Kathleen i bungim ol Witnes Bilong Jehova. Em i tok: “Mi kisim save olsem i no gat hel. Ol tok Baibel i mekim long hel i stret tru long tingting bilong mi. Taim mi kisim save olsem mi no inap go long hel na paia i kukim mi, dispela i mekim gut bel bilong mi.” Tasol em i kisim save tu long tok promis bilong God long ol man bai stap oltaim long graun we i no gat ol pasin nogut i stap long en. (Song 37:10, 11, 29; Luk 23:43, KJNT) Em i tok, “nau mi gat gutpela samting bilong wetim i kamap bihain—em laip oltaim long Paradais long graun!”
Nau Kathleen i no bilip moa na pret long helpaia, yu ting em inap lusim drak? Em i tok: “Taim mi gat strongpela laik long kisim drak, mi save beten askim God Jehova long helpim mi. Mi save tingim tingting bilong em long dispela pasin doti na mi no laik mekim em i bel hevi. Em i save harim beten bilong mi.” (2 Korin 7:1) Dispela pasin bilong Kathleen long pret long mekim samting God i no laikim, dispela i helpim em long lusim pasin bilong kisim drak.
Tru tumas, pasin bilong laikim God na pret long em—i no pasin bilong pret long hel—inap kirapim yumi long mekim laik bilong God na bai yumi inap i stap amamas inap oltaim. Man bilong raitim Song i tok: “Yu wanem man o meri i save pret long Bikpela na i save bihainim tok bilong en, yu ken amamas.”—Song 128:1.
[Blok/Ol Piksa long pes 9]
HUSAT BAI LUSIM HEL?
Sampela man i bin tanim tok bilong Baibel ol i kolim tupela tok Grik—Geʹen·na na Haiʹdes—olsem “hel.” Long Baibel, dispela tok Geʹen·na i makim olsem man i bagarap na lus olgeta na i no gat rot bilong em long kirap bek. Tasol ol man i stap long Haiʹdes, o Hades, ol bai kirap bek.
Olsem na taim Jisas i kirap bek na i go long heven, aposel Pita i tokim ol man olsem God i no bin larim Jisas “i stap long hel.” (Aposel 2:27, 31, 32, KJNT; Song 16:10) Tok ol i tanim olsem “hel” long dispela ves em dispela tok Grik Haiʹdes. Jisas i no go long wanpela ples paia. Hades, o “hel,” em matmat. Tasol i no Jisas wanpela tasol God i kirapim em bek long Hades, nogat.
Baibel i stori long kirap bek olsem: “Dai wantaim hel i givim bek olgeta daiman i stap long tupela.” (Revelesen 20:13, 14, KJNT) “Hel” i givim bek olgeta man i stap long en i makim olsem olgeta man em God i skelim na i orait long ol, ol bai kirap bek. (Jon 5:28, 29; Aposel 24:15) Man! Em gutpela samting tru bai kamap bihain—bai yumi lukim ol famili bilong yumi husat i bin i dai ol i kirap bek long matmat. God Jehova em man i gat bikpela pasin laikim bai mekim dispela samting.