Go Klostu Long God
Wanpela Jas Em Oltaim Em i Mekim Stretpela Pasin Tasol
MEKIM stretpela kot. Skelim ol man long wankain pasin tasol. Yu save laikim tru kain pasin olsem, a? Yes, yumi man i gat laik long narapela i mas mekim stretpela pasin long yumi. Tasol sori tru, nau long dispela taim, stretpela pasin i wok long i go liklik. Tasol i gat wanpela Jas em yumi ken bilip long en—em God Jehova. Oltaim em i mekim stretpela pasin tasol. Dispela samting i bin kamap ples klia long wanpela toktok i kamap namel long Jehova na Abraham, em Stat 18:22-32 i stori long en.a
Taim Jehova i tokim Abraham long Em bai skelim ol samting i kamap long Sodom na Gomora, Abraham i tingim ol stretpela man i stap long dispela hap, na Lot tu—em pikinini bilong brata bilong Abraham—nogut ol i kisim bagarap. Abraham i krai long Jehova olsem: “Ating yu laik bagarapim ol gutpela man wantaim ol man nogut? Sapos i gat 50 gutpela man i stap long dispela taun, . . . inap yu tingim dispela 50 gutpela man na yu larim dispela taun i stap na yu no bagarapim?” (Stat sapta 18 Ves 23, 24) God i tok sapos i gat 50 gutpela man i stap, bai em i no bagarapim tupela taun. Abraham i krai long Jehova inap 5-pela taim moa, na long olgeta wan wan taim em i wok long daunim namba i go inap long 10-pela man tasol i stap. Long olgeta wan wan taim, God i tok em i no ken bagarapim ol taun sapos i gat ol dispela gutpela man i stap olsem Abraham i kolim namba bilong ol.
Olsem wanem? Ol tok bilong Abraham i makim olsem em i no orait long samting God i tok long mekim? Nogat! Abraham i no man bilong hambak. Tok bilong Abraham i makim olsem em i daun long God na i rispek long em. Em i tok long em yet olsem, “Mi man nating tasol.” (Stat sapta 18 Ves 27) Na tu, ol tok bilong Abraham i kamapim olsem em i bilip long Jehova bai bihainim stretpela pasin na i no ken kilim ol gutpela man wantaim ol man nogut. Abraham i tok: “Jas bilong olgeta graun” bai “bihainim stretpela pasin.”—Stat sapta 18 Ves 25.
Olsem wanem? Dispela tok Abraham i mekim i stret? Yes—na nogat tu. Em i popaia taim em i ting i gat 10-pela gutpela man i stap long Sodom na Gomora. Tasol em i tok stret taim em i tok God i no ken “bagarapim ol gutpela man wantaim ol man nogut.” Bihain, taim God i bagarapim ol dispela taun nogut, ol ensel i helpim stretpela man Lot wantaim tupela pikinini meri bilong em long abrusim bagarap.—2 Pita 2:7-9.
Dispela stori i skulim yumi olsem wanem long Jehova? Taim Jehova i tokim Abraham long Em bai skelim dispela tupela taun, i olsem em i singautim Abraham long kamapim tingting bilong em. Na taim pren bilong em, Abraham, i kamapim ol tingting i stap long bel bilong em, Jehova i putim gut yau. (Aisaia 41:8) Dispela i skulim yumi olsem Jehova em God i gat pasin daun, na em i save soim rispek long ol wokboi bilong em long graun! Tru tumas, i gat as na yumi ken bilip strong long Jehova, em dispela Jas em oltaim i save mekim stretpela pasin tasol.
[Futnot]
a Long dispela taim, wanpela ensel i stap olsem mausman bilong Jehova na i kamapim tok bilong em. Narapela eksampel i stap long Stat 16:7-11, 13.
[Piksa long pes 24]
Abraham i kamapim long Jehova tingting bilong em long Sodom na Gomora