Jisas Em i God i Gat Olgeta Strong?

Bekim bilong planti man:

▪ “Yes, Jisas em i God i Gat Olgeta Strong.”

▪ “Jisas em God i bin kamap ples klia olsem wanpela man long graun.”

Jisas i tok wanem?

▪ “Sapos yupela i laikim mi tru, orait dispela inap mekim yupela i amamas, long wanem, mi go long Papa, na Papa i stap namba wan tru na i winim mi.” (Jon 14:28) Jisas i tok em na Papa bilong em, tupela i no gat wankain namba.

▪ “Mi bai go antap, na mi go long Papa bilong mi na Papa bilong yupela. Na mi go long God bilong mi na God bilong yupela.” (Jon 20:17) Jisas i no tok em yet i God, nogat, em i tok God em i narapela Man.

▪ “Mi no mekim tok long tingting bilong mi yet. Nogat. Papa i bin salim mi na mi kam, em yet i tokim mi long olgeta tok mi mas mekim na autim.” (Jon 12:49) Jisas i no as bilong ol tok em i mekim, nogat; Papa yet i as bilong ol dispela tok.

JISAS i tok em i Pikinini Bilong God, em i no tok em i God i Gat Olgeta Strong. Sapos Jisas em i God, orait em i beten long husat taim em i stap long graun? (Matyu 14:23; 26:​26-​29) Jisas i no giaman olsem em i toktok long narapela, nogat!

Taim tupela disaipel i askim Jisas long givim bikpela namba long ol long Kingdom bilong em, em i tok: “Husat bai i sindaun long han sut na long han kais bilong mi, dispela em i no samting bilong mi long makim. Nogat. Dispela ol sia ol i bilong ol man Papa bilong mi i redim pinis bilong ol.” (Matyu 20:23) Olsem wanem? Jisas i giaman taim em i tok em i no gat rait long mekim olsem ol i tok? Nogat! Long pasin daun em i tokaut olsem God tasol i gat rait long givim dispela namba long ol. Na tu, Jisas i tok i gat sampela samting we em yet na ol ensel i no save long en, Papa wanpela tasol i save long en.​​—Mak 13:32.

Olsem wanem? Taim Jisas i stap olsem wanpela man long graun, long dispela taim tasol em i bin stap aninit long God? Nogat. Bihain long dai na kirap bek bilong em, Baibel i tok em i aninit yet long God. Aposel Pol i tok: “Het bilong Krais em God.” (1 Korin 11:3) Baibel i tok olsem bihain, “taim olgeta samting i stap aninit long Krais pinis, orait Pikinini Bilong God bai i putim em yet aninit long God. Pastaim God i bin putim olgeta samting aninit long Pikinini bilong en, tasol taim Pikinini Bilong God i putim em yet aninit long God, orait God bai i stap het tru bilong olgeta samting.”​​—1 Korin 15:28.

Tru tumas, Jisas i no God i Gat Olgeta Strong. Olsem na em i kolim Papa bilong em olsem “God bilong mi.”​​—KTH 3:​2, 12; 2 Korin 1:​3, 4.a

[Futnot]

[Rait long pes 7]

Jisas i tok i gat sampela samting we em yet na ol ensel i no save long en, Papa wanpela tasol i save long en