Yu Save Long Dispela?

Bilong wanem Jisas i tok “Aba, Papa” long Jehova taim em i beten?

Tok Arameik ʼab·baʼʹ inap makim “papa” o “O Papa.” Dispela tok i stap 3-pela taim long Baibel na em i hap bilong beten na ol i yusim dispela tok bilong makim Jehova, Papa long heven. Long taim Jisas i stap long graun, wanem mining bilong dispela tok?

Buk The International Standard Bible Encyclopedia i tok: “Long taim bilong Jisas ol man i save yusim dispela tok ʼabbāʼ bilong makim pasin pren i stap namel long pikinini wantaim papa, na tu, i soim pasin rispek em pikinini i gat long papa.” Em wanpela naispela tok pikinini i save kolim long papa na em wanpela bilong ol namba wan tok pikinini i lainim. Jisas i kolim dispela tok taim em i beten askim Papa bilong em long helpim em. Long gaden bilong Getsemani, sampela aua paslain long Jisas i dai, em i beten na kolim Jehova olsem “Aba, Papa.”​​—Mak 14:36.

Buk i tok moa, “long taim bilong ol Grik na Rom, wan wan taim tasol ol i raitim tok ʼAbbāʼ long buk bilong ol Juda. Ating ol i ting dispela i no soim rispek long God.” Tasol “Jisas . . . i yusim dispela tok long beten bilong soim olsem Em i pas gut tru wantaim God.” Narapela tupela skripsa i gat dispela tok “Aba”​—long ol pas aposel Pol i raitim​—​i soim olsem ol Kristen long taim bilong ol aposel, ol tu i save yusim dispela tok taim ol i beten.​—Rom 8:15; Galesia 4:6.

Bilong wanem ol i raitim wanpela hap bilong Baibel long tok ples Grik?

Aposel Pol i tok, “God i bin givim tok bilong en” long ol Juda bilong lukautim. (Rom 3:​1, 2) Long dispela as ol i bin raitim namba wan hap bilong Baibel long tok ples Hibru, em tok ples bilong ol Juda. Tasol ol i bin raitim Ol Skripsa Grik long tok ples Grik.a Bilong wanem i olsem?

Long 400-301 B.C.E., ol soldia i wok aninit long Bikpela King Aleksander, ol i gat narapela narapela pasin bilong mekim tok ples Grik bilong bipo na long dispela taim ol dispela narapela narapela pasin i wok long bung wantaim na kamapim tok ples Grik, Koine. Aleksander i wok long daunim na kisim ol kantri, na long dispela rot tok ples Koine i kamap olsem tok ples em planti man bilong kain kain kantri i bin yusim. Long dispela taim, ol Juda i bin i go sindaun long ol narapela narapela ples ausait long Palestain. Ol Juda i bin i go kalabus long Babilon long 607 B.C.E., tasol taim ol i kamap fri, planti bilong ol i no go bek long Palestain. Long dispela as, planti Juda i lusim tingting long tok ples Hibru bilong bipo na ol i mekim wok long tok ples Grik. (Aposel 6:1) Olsem na bilong helpim ol, ol i kamapim Baibel Septuagint, ol i tanim Ol Skripsa Hibru i go long tok ples Grik, Koine.

Buk Dictionnaire de la Bible i tok, i no gat ol narapela tok ples i olsem tok ples Grik, em “i gat planti wed bilong kolim ol samting, na ol man bilong planti kantri i save yusim dispela tok ples.” Dispela tok ples i gat planti wed, ol wed i makim stret ol samting, planti lo bilong tok ples, na ol tok i kamapim gut mining tru bilong ol wed, na dispela i mekim na em “tok ples planti man bilong dispela taim bipo i bin save long en na i yusim. Em i gutpela rot bilong givim tok i go long planti manmeri​—em tok ples ol i nidim bilong telimautim bilip Kristen.” Olsem na i stret ol i bin raitim tok i go long ol Kristen long tok ples Grik.

[Futnot]

[Piksa long pes 13]

Hap bilong manuskrip bilong Baibel Grik Septuagint

[Kredit Lain]

Courtesy of Israel Antiquities Authority