Vatiken i Laik Pinisim Pasin Bilong Kolim Nem Bilong God

OL BIKMAN bilong Misin Katolik i laik pinisim pasin bilong kolim nem bilong God long taim bilong mekim lotu. Long yia i go pinis, wanpela lain (Vatican Congregation for Divine Worship and the Discipline of the Sacraments) i salim toksave long ol kibung bilong ol bisop bilong Misin Katolik i stap long olgeta hap bilong graun, long ol samting ol i mas mekim. Pop yet i bin tokim ol long mekim olsem.

Dispela pepa bilong Jun 29, 2008 i tok, maski ol i bin salim tok long ol lo ol i mas bihainim, “nau long dispela taim i gat wanpela pasin i kam insait long lotu, em pasin bilong kolim nem tru bilong God bilong Israel, em ol i kolim olsem holi tetragramaton ol i raitim long 4-pela leta Hibru olsem יהוה, YHWH.” Dispela pepa i tokaut olsem ol i bin raitim nem bilong God long kain kain pasin, olsem “Yahweh,” “Yahwè,” “Jahweh,” “Jahwè,” “Jave,” “Yehovah,” na kain olsem.a Tasol dispela pepa bilong Vatiken i laik kamapim bek pasin Misin Katolik i bin holim bipo. Olsem, ol i mas rausim Tetragramaton na putim “Bikpela.” Na tu, taim ol Katolik i mekim lotu, o singsing lotu, o beten, “ol i no ken kamapim o kolim nem bilong God, olsem YHWH.”

Bilong helpim dispela lo, dispela pepa bilong Vatiken i kamapim pasin lotu bilong Misin Katolik ‘i bin kirap long bipo yet.’ Pepa i tok, long Baibel Septuagint bilong Ol Skripsa Hibru, em ol i bin tanim paslain long taim bilong ol Kristen, ol i bin raitim nem bilong God olsem Kyʹri·os, em wanpela tok Grik i makim “Bikpela.” Olsem na pepa i tok strong olsem, “Kirap long taim lotu Kristen i kamap nupela, ol Kristen i no bin kolim tetragramaton.” Tasol dispela tok i sakim ol samting i kamap ples klia pinis na i narapela kain long dispela tok. Ol olpela kopi bilong Baibel Septuagint i no gat dispela tok Kyʹri·os; ol i gat nem bilong God ol i bin raitim olsem יהוה. Ol disaipel bilong Krais long pastaim tru ol i bin save long nem bilong God na ol i bin kolim long maus. Jisas yet i beten long Papa bilong em na i tok: “Mi bin kamapim nem bilong yu.” (Jon 17:26) Na long beten Jisas i bin lainim ol man long en, em i tok: “Papa bilong mipela, yu stap long heven, nem bilong yu i mas i stap holi.”​—Matyu 6:9.

Olgeta Kristen i mas i gat laik long lukim nem bilong God i stap holi. Ol wok bilong Vatiken long pinisim pasin bilong kolim nem bilong God, dispela i daunim Jehova, em yet i bin tok: “Dispela em nem bilong mi inap oltaim oltaim; ol lain tumbuna i kamap bihain i mas kolim mi long dispela nem.”​—Kisim Bek 3:​15, The Jerusalem Bible.

[Futnot]

[Rait long pes 30]

“Dispela em nem bilong mi inap oltaim oltaim.”​—Kisim Bek 3:​15, JB

[Piksa long pes 30]

Liklik hap rait bilong Baibel “Septuagint” bilong taim bilong ol aposel. Mipela i putim sekol long nem bilong God, em ol i save raitim long 4-pela leta Hibru, em YHWH

[Kredit Lain]

Courtesy of the Egypt Exploration Society