2 Kisim Stretpela Save Long God
“Laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru.”—Jon 17:3.
BILONG WANEM I HATWOK? Sampela man i tok olsem God i no wanpela man i stap tru. Na sampela i bilip olsem God em i wanpela strong tasol. Ol man husat i bilip olsem em i wanpela man i stap tru, ol i gat kain kain tingting long ol pasin bilong em na long em i husat tru.
YU KEN MEKIM WANEM? Wanpela rot bilong kisim save long God, em long rot bilong lukluk long ol hanmak bilong em. Aposel Pol i tok: “Stat long taim God i mekim kamap olgeta samting na i kam inap nau, ol man i lukim ol samting em i bin wokim. Long dispela rot ol man inap save long sampela pasin bilong God i stap hait. Ol inap save long as bilong pasin bilong God, na ol inap save long bikpela strong bilong en.” (Rom 1:20) Taim yu lukim gut ol hanmak bilong em, yu inap kisim save long savetingting na bikpela strong bilong Krieta bilong yumi.—Song 104:24; Aisaia 40:26.
Tasol bilong kisim save long em i wanem kain God, yu mas opim Baibel na yu yet i mas skelim. No ken larim ol narapela i makim samting yu mas bilip long en. Bihainim dispela gutpela tok bilong Baibel: “Yupela i no ken wokabaut wankain olsem ol man bilong dispela graun. Nogat. Yupela i mas larim God i mekim tingting bilong yupela i kamap nupela na bai pasin bilong yupela i kamap nupela tu. Olsem na bai yupela inap long save tru long laik bilong God. Bai yupela i save long ol pasin i gutpela na long ol pasin God i laikim tumas na long ol pasin i inap tru na i stret olgeta.” (Rom 12:2) Tingim ol tok daunbilo Baibel i mekim long God.
God i gat nem bilong em. Long Baibel ol i bin raitim long pastaim, nem bilong God i stap planti tausen taim. Long planti Baibel ol man i bin tanim, nem bilong God i stap long Song 83:18: “Bambai ol man i ken save, yu, nem bilong yu tasol em Jehova, yu antap tru na yu bosim olgeta hap bilong graun.”—King James Version.
God Jehova inap pilim ol samting long bel; samting ol man i mekim dispela inap mekim em i bel hevi o amamas. Bihain long Jehova i bin kisim bek lain Israel long wok kalabus long Isip, sampela taim ol i sakim ol gutpela tok bilong em. Pasin bikhet bilong ol i mekim em i “bel hevi.”—Song 78:40.
Jehova i save tingim yumi wan wan. Jisas i tokim ol disaipel: “Yupela i save, ol man i save baim tupela liklik pisin long 10 toea tasol. Na Papa bilong yupela i save lukautim gut ol dispela pisin. Sapos em i no laik, orait i no inap wanpela bilong ol i pundaun long graun. Na tu, God i kaunim pinis olgeta gras long het bilong yupela, na em i save gut tru long yupela. Olsem na yupela i no ken pret. Yupela i winim planti lain liklik pisin.”—Matyu 10:29-31.
God i laikim ol man bilong olgeta kain skin na ples. Aposel Pol i tokim ol Grik long Atens: “Long wanpela tumbuna tasol [God] i bin mekim olgeta lain manmeri i kamap. Na em i putim ol i stap long olgeta hap bilong graun.” Na em i tok, God “i no i stap longwe long yumi olgeta wan wan.” (Aposel 17:26, 27) Aposel Pita i tok: “God i save mekim wankain pasin long olgeta manmeri, maski ol i bilong wanem lain. Long olgeta lain em i save laikim ol manmeri i aninit long em na i mekim stretpela pasin.”—Aposel 10:34, 35.
HELPIM YU OLSEM WANEM? Sampela ol i “strong tumas long bihainim pasin God i laikim. Tasol ol i no klia gut long laik tru bilong God, na ol i mekim.” (Rom 10:2) Sapos yu save long ol tok Baibel i mekim long God, dispela bai helpim yu na ol man i no inap giamanim yu, na yu inap “go klostu tru long God.”—Jems 4:8.
Bilong kisim sampela save moa, lukim sapta 1, “God Em i Wanem Kain Man Tru?,” long buk Tru Tru Baibel i Tok Wanem?a
[Futnot]
a Ol Witnes Bilong Jehova i wokim.
[Piksa long pes 6]
Bilong kisim save long God, lukim ol samting em i bin wokim