1 Bilip Tru Long Baibel

“Spirit bilong God yet i bin kamapim olgeta tok i stap long buk bilong God. Na dispela tok em i gutpela samting tru bilong skulim yumi long tok tru na bilong stretim ol manmeri tingting bilong ol i no stret na bilong stretim wokabaut bilong yumi.”​​—2 Timoti 3:​16.

BILONG WANEM I HATWOK? Planti man i ting Baibel i wanpela buk i kamapim save bilong ol man tasol. Sampela i tok Baibel i no kolim stret ol samting i bin kamap bipo. Na sampela i tok Baibel i olpela buk na i no inap helpim ol man long nau.

YU KEN MEKIM WANEM? Ol man husat i tok Baibel i no inap helpim ol man na ol tok bilong en i no stret, ating ol yet i no bin skelim ol tok bilong en. Ol i kamapim tasol ol tok ol narapela i mekim. Tasol Baibel i tok: “Ol man i gat liklik save tasol, ol i save bilipim olgeta kain tok. Tasol man i gat gutpela tingting, em i save was gut long ol pasin em i mekim.”​​—Sindaun 14:15.

Olsem na nogut yu bilipim nating ol tok ol narapela i mekim. Em i gutpela sapos yu bihainim pasin bilong ol Kristen bilong pastaim long Beria long noten Grik. Ol i no bilipim nating ol tok ol i harim, nogat. Ol i save “ritim na skelim tok i stap long buk bilong God, bilong ol i ken save, tok [ol i harim] em i tru, o nogat.” (Aposel 17:11) Tingim tupela as na yu ken bilip tru olsem Baibel em i Tok Bilong God.

Tok bilong Baibel i stret wantaim ol samting i bin kamap bipo. Inap planti yia, sampela man i bin sutim tok olsem Baibel i no kolim stret nem bilong ol man na ples. Tasol planti samting i bin kamap bilong soim klia olsem tok bilong ol i no gat as bilong en, na ol samting Baibel i stori long en i stret.

Olsem: Bipo, sampela saveman i tok King Sargon bilong Asiria, em Aisaia 20:1 i stori long en, em i no wanpela man i bin i stap tru. Tasol long 1840 samting, ol saveman i digim graun na ol i painim haus bilong dispela king. Long nau Sargon dispela king bilong Asiria em wanpela king planti man i save long em.

Sampela i bin tok olsem Pontius Pailat bilong Rom, em gavena i bin givim tok long kilim Jisas i dai, em i no wanpela man i bin i stap tru. (Matyu 27:​1, 22-​24) Tasol long 1961, klostu long taun Sisaria long Israel, ol i painim wanpela ston i gat rait long en i kolim nem na namba bilong Pontius Pailat.

Nius U.S.News & World Report bilong Oktoba 25, 1999, i tok: “Wok bilong painim ol samting bilong bipo i bin kamapim klia olsem Olpela na Nupela Testamen i stori stret long ol samting i bin kamap bipo, em i strongim ol tok i stori long ol tumbuna bilong lain Israel, ol Israel i lusim Isip, ol king long lain bilong Devit, na i stap bilong ol man long taim bilong Jisas.” Tru, samting ol saveman i painim pinis i no as na yumi bilip long Baibel, nogat, tasol i stret olsem buk em God i bin kamapim i mas kolim stret ol samting, a?

Ol savetok bilong Baibel i helpim ol man bilong kain kain sindaun. Taim ol i no kisim save yet long ol liklik liklik binatang na wok bilong ol long givim sik long ol man, Baibel i kirapim ol man long bihainim pasin bilong i stap klin long skin, na dispela pasin i gutpela long helpim ol man long nau tu. (Wok Pris 11:​32-​40; Lo 23:​12, 13) Taim olgeta long famili i bihainim tok bilong Baibel long mekim gut long narapela narapela, ol i amamas moa. (Efesus 5:28–6:4) Taim man i bihainim ol stiatok bilong Baibel, em i save kamap gutpela wokman o bos i gat gutpela pasin. (Efesus 4:​28; 6:​5-9) Na tu, pasin bilong bihainim ol stiatok bilong Baibel i save helpim bel na tingting long stap gut. (Sindaun 14:30; Efesus 4:​31, 32; Kolosi 3:​8-​10) I stret Man Bilong Wokim yumi i kamapim kain savetok olsem, a?

HELPIM YU OLSEM WANEM? Savetingting i stap long Baibel inap givim gutpela tingting long ol man i no gat planti save. (Song 19:7) Na taim yumi kisim strongpela bilip long Baibel, dispela inap helpim tru yumi long mekim namba 2 samting bilong kisim strongpela bilip.

Bilong kisim sampela save moa, lukim sapta 2, “Baibel​​—Wanpela Buk i Kam Long God,” long buk Tru Tru Baibel i Tok Wanem?a

[Futnot]