Bilip Em Wanem Samting?
YU TING bilip em wanem samting? Sampela i ting em wankain olsem pasin bilong bilip nating. Wanpela niusman bilong Amerika, H. L. Mencken, i tok, pasin bilong bilip i olsem “man i bilip nating long samting i no inap kamap.”
Tasol Baibel i no tok pasin bilong bilip i olsem man i bilip nating, nogat. Baibel i tok: “Pasin bilong bilip em i olsem. Yumi save gut tru olsem, olgeta gutpela samting God i promis pinis long givim yumi na yumi wet long kisim, em bai yumi kisim tru. Maski ai bilong yumi i no lukim ol dispela samting, yumi save gut tru olsem, dispela olgeta samting i stap.”—Hibru 11:1.
Ol man i gat kain kain tingting long pasin bilong bilip, olsem na i gutpela yumi tingim ol dispela askim:
• Olsem wanem tok Baibel i mekim long bilip i narapela kain long tingting bilong planti man?
• Bilong wanem i bikpela samting long yumi kisim kain bilip em Baibel i tok long en?
• Olsem wanem yu inap kisim strongpela bilip?
Taitol Pepa na Evidens
Taim ol i raitim Buk Hibru bilong Baibel, hap tok Grik ol i tanim olsem “save gut tru,” em wanpela tok i stap planti taim long ol pepa bilong bisnis. Ol i raitim bilong makim olsem bihain bai man i kisim tru samting. Olsem na wanpela buk i tok yumi inap tanim tok bilong Hibru 11:1 olsem: “Pasin bilong bilip i olsem taitol pepa bilong ol samting yumi wet long kisim.”
Sapos yu baim pinis wanpela samting long kampani na nau yu wet long ol i bringim i kam long yu, yu kamapim olsem yu bilip yu bai kisim dispela samting. Yu gat risit bilong samting yu bin baim, olsem na i gat as na yu bilip olsem kampani bai givim yu samting yu bin baim. Dispela risit i olsem taitol pepa bilong yu na i makim olsem yu bai kisim tru samting yu bin baim. Sapos yu lusim dispela risit o yu tromoi, i olsem yu lusim samting i makim olsem i stret yu kisim dispela samting yu bin baim. Na olsem tasol, ol man i gat strongpela bilip olsem God bai truim ol promis bilong em, ol bai kisim tru samting ol i wet long en. Tasol ol man i no gat strongpela bilip, o ol i lusim bilip, ol i no ken ting ol bai kisim samting God i tok promis long givim, nogat.—Jems 1:5-8.
Long Hibru 11:1 i gat narapela hap tok Grik em tu ol i tanim olsem “save gut tru,” na insait bilong dispela tok i olsem evidens bilong samting i no wankain long samting yumi lukim long ai. Olsem: Long ai bilong yumi, i luk olsem san i raunim graun—em i kam antap long hap is, wokabaut brukim skai, na i go daun long hap wes. Tasol save ol man i kisim long astronomi na matematiks i soim olsem graun i no stap namel long sola sistem. Taim yu save gut tru long dispela evidens na bilip long en, orait nau yu bilip olsem graun i raunim san—maski samting yu lukim i no wankain long dispela. Yu no bilip nating, nogat. Bilip bilong yu i mekim na nau yu save gut long samting i tru na i no long samting i luk tasol olsem em i tru.
Strongpela Bilip i Bikpela Samting?
Kain bilip em Baibel i kirapim yumi long kisim, em strongpela bilip i gat as tru bilong en. Bilong kisim kain bilip olsem, ating sampela taim yumi mas stretim sampela tingting bilong yumi. Kain bilip olsem em i bikpela samting. Aposel Pol i tok: “Man i no bilip long God, em i no inap bihainim laik bilong God. Long wanem, man i laik i go klostu long God, em i mas bilip olsem God i stap, na em i mas bilip olsem God i save mekim gut tru long ol man i wok long painim em.”—Hibru 11:6.
I gat planti samting inap pasim yu long kisim strongpela bilip. Tasol yu inap kisim sapos yu mekim 4-pela samting ol stori i kamap bihain long dispela i stori long en.