4 Ol Tok Yu Gat Tupela Tingting Long En
“Yu gat liklik bilip tasol. Bilong wanem yu gat tupela tingting?”—Matyu 14:31.
BILONG WANEM I HATWOK? Sampela taim ol disaipel bilong Jisas ol tu i gat tupela tingting. (Matyu 14:30; Luk 24:36-39; Jon 20:24, 25) Baibel i tok pasin bilong lusim bilip em wanpela “sin.” (Hibru 12:1) Aposel Pol i tok: “Planti man ol i no bilip long Krais.” (2 Tesalonaika 3:2) Tasol i no olsem ol i no inap bilip, nogat. Planti i no bilip, long wanem, ol i no wok long kisim dispela pasin. God bai blesim wok bilong ol man husat i wok long kisim pasin bilong bilip.
YU KEN MEKIM WANEM? Luksave long ol samting i mekim na yu gat tupela tingting. Disaipel Tomas i no bilip olsem Jisas i kirap bek, maski ol arapela disaipel i tok ol i bin lukim em. Tomas i laik lukim wanpela evidens. Wanem samting i kamap? Jisas i soim evidens long em na dispela i strongim bilip bilong em.—Jon 20:24-29.
Long rot bilong Baibel, God Jehova i bekim ol askim bilong yumi na bai yumi no gat tupela tingting moa. Planti man i lusim bilip long God, long wanem, ol i tok o ting olsem God i gat asua long ol woa, pasin bilong pait na bagarapim man, na ol samting i givim hevi long ol man. Baibel i tok wanem long dispela samting?
God i no mekim wok bos long rot bilong ol gavman bilong ol man. Jisas i tok olsem Satan, em wanpela spirit yumi no inap lukim, em i “hetman i save bosim dispela graun.” (Jon 14:30) Satan i tok long givim Jisas namba long bosim olgeta kingdom bilong graun sapos Jisas i lotu long em. Em i tok: “Bai mi givim yu strong bilong bosim olgeta dispela kantri, na bai yu gat biknem tru. Olgeta dispela samting ol i bilong mi pinis. Na sapos mi laik givim long wanpela man, orait mi ken givim.” Jisas i no tok Satan i no gat namba long mekim olsem, nogat. Em i tok: “Buk bilong God i gat tok olsem, ‘Yu mas aninit long God, Bikpela bilong yu, na yu mas lotu long em wanpela tasol.’ ” (Luk 4:5-8) As bilong ol pen na hevi, em Satan na ol gavman bilong ol man, God, nogat.—KTH 12:9, 12.
Klostu nau God Jehova bai pinisim olgeta samting i givim pen na hevi long ol man. Em i stretim rot pinis long wanpela Kingdom, o gavman, aninit long han bilong Pikinini bilong em, Krais Jisas, long bosim ol manmeri. (Matyu 6:9, 10; 1 Korin 15:20-28) Olsem Baibel i tok profet, wok bilong autim gutnius bilong dispela Kingdom i save kamap nau long olgeta hap bilong graun. (Matyu 24:14) Klostu nau dispela Kingdom bai rausim olgeta man i birua long en na pinisim olgeta samting i save kamapim pen na hevi.—Daniel 2:44; Matyu 25:31-33, 46; KTH 21:3, 4.
HELPIM YU OLSEM WANEM? Taim ol man i gat tupela tingting, ‘tok bilong ol grisman i sakim ol nabaut olsem win na si i save sakim kanu long solwara.’ (Efesus 4:14; 2 Pita 2:1) Tasol ol man i kisim gutpela bekim long ol askim bilong ol, ol i save “sanap strong long bilip.”—1 Korin 16:13.
Ol Witnes Bilong Jehova, em lain i wokim dispela nius, ol i laik helpim yu long kisim bekim bilong ol askim yu gat tupela tingting long en. Ol i singautim yu long bung wantaim ol na bai yu yet i ken skelim ol bilip bilong ol. Taim yu mekim olsem, dispela bai strongim tru bilip bilong yu long God.
Bilong kisim sampela save moa, lukim sapta 8, “Kingdom Bilong God Em i Wanem Samting?,” na sapta 11, “Bilong Wanem God i Larim Pen na Hevi i Stap?,” long buk Tru Tru Baibel i Tok Wanem?a
[Futnot]
a Ol Witnes Bilong Jehova i wokim.
[Piksa long pes 9]
Ol man i kisim gutpela bekim long ol askim bilong ol, bilip bilong ol i gat as tru bilong en